43.1 သကိံသမ္မဇ္ဇကတ္ထေရအပဒါန
“ဝိပဿိနော ဘဂဝတော,
ပါဋလိံ ဗောဓိမုတ္တမံ;
ဒိသွာဝ တံ ပါဒပဂ္ဂံ,
တတ္ထ စိတ္တံ ပသာဒယိံ.
သမ္မဇ္ဇနိံ ဂဟေတွာန,
ဗောဓိံ သမ္မဇ္ဇိ တာဝဒေ;
သမ္မဇ္ဇိတွာန တံ ဗောဓိံ,
အဝန္ဒိံ ပါဋလိံ အဟံ.
တတ္ထ စိတ္တံ ပသာဒေတွာ,
သိရေ ကတွာန အဉ္ဇလိံ;
နမဿမာနော တံ ဗောဓိံ,
ဂဉ္ဆိံ ပဋိကုဋိံ အဟံ.
တာဒိမဂ္ဂေန ဂစ္ဆာမိ,
သရန္တော ဗောဓိမုတ္တမံ;
အဇဂရော မံ ပီဠေသိ,
ဃောရရူပေါ မဟဗ္ဗလော.
အာသန္နေ မေ ကတံ ကမ္မံ,
ဖလေန တောသယီ မမံ;
ကဠေဝရံ မေ ဂိလတိ,
ဒေဝလောကေ ရမာမဟံ.
အနာဝိလံ မမ စိတ္တံ,
ဝိသုဒ္ဓံ ပဏ္ဍရံ သဒါ;
သောကသလ္လံ န ဇာနာမိ,
စိတ္တသန္တာပနံ မမ.
ကုဋ္ဌံ ဂဏ္ဍော ကိလာသော စ,
အပမာရော ဝိတစ္ဆိကာ;
ဒဒ္ဒု ကဏ္ဍု စ မေ နတ္ထိ,
ဖလံ သမ္မဇ္ဇနာယိဒံ.
သောကော စ ပရိဒေဝေါ စ,
ဟဒယေ မေ န ဝိဇ္ဇတိ;
အဘန္တံ ဥဇုကံ စိတ္တံ,
ဖလံ သမ္မဇ္ဇနာယိဒံ.
သမာဓီသု န မဇ္ဇာမိ,
ဝိသဒံ ဟောတိ မာနသံ;
ယံ ယံ သမာဓိမိစ္ဆာမိ,
သော သော သမ္ပဇ္ဇတေ မမံ.
ရဇနီယေ န ရဇ္ဇာမိ,
အထော ဒုဿနိယေသု စ;
မောဟနီယေ န မုယှာမိ,
ဖလံ သမ္မဇ္ဇနာယိဒံ.
ဧကနဝုတိတော ကပ္ပေ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
ဖလံ သမ္မဇ္ဇနာယိဒံ.
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သကိံသမ္မဇ္ဇကော ထေရော ဣမာ ဂါထာယော အဘာသိတ္ထာတိ.
သကိံသမ္မဇ္ဇကတ္ထေရဿာပဒါနံ ပဌမံ.