43.8 သုစိန္တိတတ္ထေရအပဒါန
“နဂရေ ဟံသဝတိယာ,
အဟောသိံ ကဿကော တဒါ;
ကသိကမ္မေန ဇီဝါမိ,
တေန ပေါသေမိ ဒါရကေ.
သုသမ္ပန္နံ တဒါ ခေတ္တံ,
ဓညံ မေ ဖလိနံ အဟု;
ပါကကာလေ စ သမ္ပတ္တေ,
ဧဝံ စိန္တေသဟံ တဒါ.
နစ္ဆန္နံ နပ္ပတိရူပံ,
ဇာနန္တဿ ဂုဏာဂုဏံ;
ယောဟံ သံဃေ အဒတွာန,
အဂ္ဂံ ဘုဉ္ဇေယျ စေ တဒါ.
အယံ ဗုဒ္ဓေါ အသမသမော,
ဒွတ္တိံသဝရလက္ခဏော;
တတော ပဘာဝိတော သံဃော,
ပုညက္ခေတ္တော အနုတ္တရော.
တတ္ထ ဒဿာမဟံ ဒါနံ,
နဝသဿံ ပုရေ ပုရေ;
ဧဝါဟံ စိန္တယိတွာန,
ဟဋ္ဌော ပီဏိတမာနသော.
ခေတ္တတော ဓညမာဟတွာ,
သမ္ဗုဒ္ဓံ ဥပသင်္ကမိံ;
ဥပသင်္ကမ္မ သမ္ဗုဒ္ဓံ,_
လောကဇေဋ္ဌံ နရာသဘံ;
ဝန္ဒိတွာ သတ္ထုနော ပါဒေ,
ဣဒံ ဝစနမဗြဝိံ._
‘နဝသဿဉ္စ သမ္ပန္နံ,
အာယာဂေါသိ စ တွံ မုနေ;
အနုကမ္ပမုပါဒါယ,
အဓိဝါသေဟိ စက္ခုမ’.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
မမ သင်္ကပ္ပမညာယ,
ဣဒံ ဝစနမဗြဝိ._
‘စတ္တာရော စ ပဋိပန္နာ,
စတ္တာရော စ ဖလေ ဌိတာ;
ဧသ သံဃော ဥဇုဘူတော,
ပညာသီလသမာဟိတော;
ယဇန္တာနံ မနုဿာနံ,
ပုညပေက္ခာန ပါဏိနံ.
ကရောတောပဓိကံ ပုညံ,
သံဃေ ဒိန္နံ မဟပ္ဖလံ;
တသ္မိံ သံဃေဝ ဒါတဗ္ဗံ,
တဝ သဿံ တထေတရံ.
သံဃတော ဥဒ္ဒိသိတွာန,
ဘိက္ခူ နေတွာန သံဃရံ;
ပဋိယတ္တံ ဃရေ သန္တံ,
ဘိက္ခုသံဃဿ ဒေဟိ တွံ’.
သံဃတော ဥဒ္ဒိသိတွာန,
ဘိက္ခူ နေတွာန သံဃရံ;
ယံ ဃရေ ပဋိယတ္တံ မေ,
ဘိက္ခုသံဃဿဒါသဟံ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
တတ္ထ မေ သုကတံ ဗျမှံ,
သောဝဏ္ဏံ သပ္ပဘဿရံ;
သဋ္ဌိယောဇနမုဗ္ဗေဓံ,
တိံသယောဇနဝိတ္ထတံ.
ဧကူနဝီသတိမံ ဘာဏဝါရံ.
အာကိဏ္ဏံ ဘဝနံ မယှံ,
နာရီဂဏသမာကုလံ;
တတ္ထ ဘုတွာ ပိဝိတွာ စ,
ဝသာမိ တိဒသေ အဟံ.
သတာနံ တီဏိက္ခတ္တုဉ္စ,
ဒေဝရဇ္ဇမကာရယိံ;
သတာနံ ပဉ္စက္ခတ္တုဉ္စ,
စက္ကဝတ္တီ အဟောသဟံ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
ဘဝါဘဝေ သံသရန္တော,
လဘာမိ အမိတံ ဓနံ;
ဘောဂေ မေ ဦနတာ နတ္ထိ,
နဝသဿဿိဒံ ဖလံ.
ဟတ္ထိယာနံ အဿယာနံ,
သိဝိကံ သန္ဒမာနိကံ;
လဘာမိ သဗ္ဗမေဝေတံ,
နဝသဿဿိဒံ ဖလံ.
နဝဝတ္ထံ နဝဖလံ,
နဝဂ္ဂရသဘောဇနံ;
လဘာမိ သဗ္ဗမေဝေတံ,
နဝသဿဿိဒံ ဖလံ.
ကောသေယျကမ္ဗလိယာနိ,
ခေါမကပ္ပါသိကာနိ စ;
လဘာမိ သဗ္ဗမေဝေတံ,
နဝသဿဿိဒံ ဖလံ.
ဒါသီဂဏံ ဒါသဂဏံ,
နာရိယော စ အလင်္ကတာ;
လဘာမိ သဗ္ဗမေဝေတံ,
နဝသဿဿိဒံ ဖလံ.
န မံ သီတံ ဝါ ဥဏှံ ဝါ,
ပရိဠာဟော န ဝိဇ္ဇတိ;
အထော စေတသိကံ ဒုက္ခံ,
ဟဒယေ မေ န ဝိဇ္ဇတိ.
ဣဒံ ခါဒ ဣဒံ ဘုဉ္ဇ,_
ဣမမှိ သယနေ သယ;_
လဘာမိ သဗ္ဗမေဝေတံ,
နဝသဿဿိဒံ ဖလံ.
အယံ ပစ္ဆိမကော ဒါနိ,
စရိမော ဝတ္တတေ ဘဝေါ;
အဇ္ဇာပိ ဒေယျဓမ္မော မေ,
ဖလံ တောသေသိ သဗ္ဗဒါ.
နဝသဿံ ဒဒိတွာန,
သံဃေ ဂဏဝရုတ္တမေ;
အဋ္ဌာနိသံသေ အနုဘောမိ,
ကမ္မာနုစ္ဆဝိကေ မမ.
ဝဏ္ဏဝါ ယသဝါ ဟောမိ,
မဟာဘောဂေါ အနီတိကော;
မဟာပက္ခော သဒါ ဟောမိ,
အဘေဇ္ဇပရိသော သဒါ.
သဗ္ဗေ မံ အပစာယန္တိ,
ယေ ကေစိ ပထဝိဿိတာ;
ဒေယျဓမ္မာ စ ယေ ကေစိ,
ပုရေ ပုရေ လဘာမဟံ.
ဘိက္ခုသံဃဿ ဝါ မဇ္ဈေ,
ဗုဒ္ဓသေဋ္ဌဿ သမ္မုခါ;
သဗ္ဗေပိ သမတိက္ကမ္မ,
ဒေန္တိ မမေဝ ဒါယကာ.
ပဌမံ နဝသဿဉှိ,
ဒတွာ သံဃေ ဂဏုတ္တမေ;
ဣမာနိသံသေ အနုဘောမိ,_
နဝသဿဿိဒံ ဖလံ.
သတသဟဿိတော ကပ္ပေ,
ယံ ဒါနမဒဒိံ တဒါ;
ဒုဂ္ဂတိံ နာဘိဇာနာမိ,
နဝသဿဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သုစိန္တိတော ထေရော ဣမာ ဂါထာယော အဘာသိတ္ထာတိ.
သုစိန္တိတတ္ထေရဿာပဒါနံ အဋ္ဌမံ.