43.9 သောဝဏ္ဏကိင်္ကဏိယတ္ထေရအပဒါန
“သဒ္ဓါယ အဘိနိက္ခမ္မ,
ပဗ္ဗဇိံ အနဂါရိယံ;
ဝါကစီရဓရော အာသိံ,
တပေါကမ္မမပဿိတော.
အတ္ထဒဿီ တု ဘဂဝါ,
လောကဇေဋ္ဌော နရာသဘော;
ဥပ္ပဇ္ဇိ တမှိ သမယေ,_
တာရယန္တော မဟာဇနံ.
ဗလဉ္စ ဝတ မေ ခီဏံ,
ဗျာဓိနာ ပရမေန တံ;
ဗုဒ္ဓသေဋ္ဌံ သရိတွာန,
ပုလိနေ ထူပမုတ္တမံ.
ကရိတွာ ဟဋ္ဌစိတ္တောဟံ,
သဟတ္ထေန သမောကိရိံ;
သောဏ္ဏကိင်္ကဏိပုပ္ဖါနိ,
ဥဒဂ္ဂမနသော အဟံ._
သမ္မုခါ ဝိယ သမ္ဗုဒ္ဓံ,
ထူပံ ပရိစရိံ အဟံ;
တေန စေတောပသာဒေန,
အတ္ထဒဿိဿ တာဒိနော.
ဒေဝလောကံ ဂတော သန္တော,
လဘာမိ ဝိပုလံ သုခံ;
သုဝဏ္ဏဝဏ္ဏော တတ္ထာသိံ,
ဗုဒ္ဓပူဇာယိဒံ ဖလံ.
အသီတိကောဋိယော မယှံ,
နာရိယော သမလင်္ကတာ;
သဒါ မယှံ ဥပဋ္ဌန္တိ,
ဗုဒ္ဓပူဇာယိဒံ ဖလံ.
သဋ္ဌိတုရိယသဟဿာနိ,
ဘေရိယော ပဏဝါနိ စ;
သင်္ခါ စ ဍိဏ္ဍိမာ တတ္ထ,
ဝဂ္ဂူ ဝဇ္ဇန္တိ ဒုန္ဒုဘီ.
စုလ္လာသီတိသဟဿာနိ,
ဟတ္ထိနော သမလင်္ကတာ;
တိဓာပဘိန္နမာတင်္ဂါ,
ကုဉ္ဇရာ သဋ္ဌိဟာယနာ.
ဟေမဇာလာဘိသဉ္ဆန္နာ,
ဥပဋ္ဌာနံ ကရောန္တိ မေ;_
ဗလကာယေ ဂဇေ စေဝ,
ဦနတာ မေ န ဝိဇ္ဇတိ.
သောဏ္ဏကိင်္ကဏိပုပ္ဖါနံ,
ဝိပါကံ အနုဘောမဟံ;
အဋ္ဌပညာသက္ခတ္တုဉ္စ,
ဒေဝရဇ္ဇမကာရယိံ.
ဧကသတ္တတိက္ခတ္တုဉ္စ,
စက္ကဝတ္တီ အဟောသဟံ;
ပထဗျာ ရဇ္ဇံ ဧကသတံ,
မဟိယာ ကာရယိံ အဟံ.
သော ဒါနိ အမတံ ပတ္တော,
အသင်္ခတံ သုဒုဒ္ဒသံ;
သံယောဇနပရိက္ခီဏော,
နတ္ထိ ဒါနိ ပုနဗ္ဘဝေါ.
အဋ္ဌာရသေ ကပ္ပသတေ,
ယံ ပုပ္ဖမဘိရောပယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သောဝဏ္ဏကိင်္ကဏိယော ထေရော ဣမာ ဂါထာယော အဘာသိတ္ထာတိ.
သောဝဏ္ဏကိင်္ကဏိယတ္ထေရဿာပဒါနံ နဝမံ.