44.1 ဧကဝိဟာရိကတ္ထေရအပဒါန
“ဣမမှိ ဘဒ္ဒကေ ကပ္ပေ,
ဗြဟ္မဗန္ဓု မဟာယသော;
ကဿပေါ နာမ ဂေါတ္တေန,
ဥပ္ပဇ္ဇိ ဝဒတံ ဝရော._
နိပ္ပပဉ္စော နိရာလမ္ဗော,
အာကာသသမမာနသော;
သုညတာဗဟုလော တာဒီ,
အနိမိတ္တရတော ဝသီ.
အသင်္ဂစိတ္တော နိက္လေသော,
အသံသဋ္ဌော ကုလေ ဂဏေ;
မဟာကာရုဏိကော ဝီရော,
ဝိနယောပါယကောဝိဒေါ.
ဥယျုတ္တော ပရကိစ္စေသု,_
ဝိနယန္တော သဒေဝကေ;
နိဗ္ဗာနဂမနံ မဂ္ဂံ,
ဂတိံ ပင်္ကဝိသောသနံ.
အမတံ ပရမဿာဒံ,
ဇရာမစ္စုနိဝါရဏံ;
မဟာပရိသမဇ္ဈေ သော,
နိသိန္နော လောကတာရကော.
ကရဝီကရုတော နာထော,
ဗြဟ္မဃောသော တထာဂတော;
ဥဒ္ဓရန္တော မဟာဒုဂ္ဂါ,_
ဝိပ္ပနဋ္ဌေ အနာယကေ.
ဒေသေန္တော ဝိရဇံ ဓမ္မံ,
ဒိဋ္ဌော မေ လောကနာယကော;
တဿ ဓမ္မံ သုဏိတွာန,
ပဗ္ဗဇိံ အနဂါရိယံ.
ပဗ္ဗဇိတွာ တဒါပါဟံ,
စိန္တေန္တော ဇိနသာသနံ;
ဧကကောဝ ဝနေ ရမ္မေ,
ဝသိံ သံသဂ္ဂပီဠိတော.
သက္ကာယဝူပကာသော မေ,
ဟေတုဘူတော မမာဘဝီ;
မနသော ဝူပကာသဿ,
သံသဂ္ဂဘယဒဿိနော.
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဧကဝိဟာရိကော ထေရော ဣမာ ဂါထာယော အဘာသိတ္ထာတိ.
ဧကဝိဟာရိကတ္ထေရဿာပဒါနံ ပဌမံ.