45.1 ဝိဘီတကမိဉ္ဇိယတ္ထေရအပဒါန
Review
1.
5775
“ကကုသန္ဓော မဟာဝီရော,
သဗ္ဗဓမ္မာန ပါရဂူ;
ဂဏမှာ ဝူပကဋ္ဌော သော,
အဂမာသိ ဝနန္တရံ.
2.
5776
ဗီဇမိဉ္ဇံ ဂဟေတွာန,
လတာယ အာဝုဏိံ အဟံ;
ဘဂဝါ တမှိ သမယေ,
ဈာယတေ ပဗ္ဗတန္တရေ.
3.
5777
ဒိသွာနဟံ ဒေဝဒေဝံ,
ဝိပ္ပသန္နေန စေတသာ;
ဒက္ခိဏေယျဿ ဝီရဿ,
ဗီဇမိဉ္ဇမဒါသဟံ.
4.
5778
ဣမသ္မိံယေဝ ကပ္ပမှိ,_
ယံ မိဉ္ဇမဒဒိံ တဒါ;
ဒုဂ္ဂတိံ နာဘိဇာနာမိ,
ဗီဇမိဉ္ဇဿိဒံ ဖလံ.
5.
5779
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
6.
5780
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
7.
5781
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
5782
ဣတ္ထံ သုဒံ အာယသ္မာ ဝိဘီတကမိဉ္ဇိယော ထေရော ဣမာ ဂါထာယော အဘာသိတ္ထာတိ.
5783
ဝိဘီတကမိဉ္ဇိယတ္ထေရဿာပဒါနံ ပဌမံ.