45.10 ဗောဓိဃရဒါယကတ္ထေရအပဒါန
“သိဒ္ဓတ္ထဿ ဘဂဝတော,
ဒွိပဒိန္ဒဿ တာဒိနော;
ပသန္နစိတ္တော သုမနော,
ဗောဓိဃရမကာရယိံ.
တုသိတံ ဥပပန္နောမှိ,
ဝသာမိ ရတနေ ဃရေ;
န မေ သီတံ ဝါ ဥဏှံ ဝါ,
ဝါတော ဂတ္တေ န သမ္ဖုသေ.
ပဉ္စသဋ္ဌိမှိတော ကပ္ပေ,
စက္ကဝတ္တီ အဟောသဟံ;
ကာသိကံ နာမ နဂရံ,
ဝိဿကမ္မေန မာပိတံ.
ဒသယောဇနအာယာမံ,
အဋ္ဌယောဇနဝိတ္ထတံ;
န တမှိ နဂရေ အတ္ထိ,
ကဋ္ဌံ ဝလ္လီ စ မတ္တိကာ.
တိရိယံ ယောဇနံ အာသိ,
အဒ္ဓယောဇနဝိတ္ထတံ;
မင်္ဂလော နာမ ပါသာဒေါ,
ဝိဿကမ္မေန မာပိတော.
စုလ္လာသီတိသဟဿာနိ,
ထမ္ဘာ သောဏ္ဏမယာ အဟုံ;
မဏိမယာ စ နိယျူဟာ,
ဆဒနံ ရူပိယံ အဟု.
သဗ္ဗသောဏ္ဏမယံ ဃရံ,
ဝိဿကမ္မေန မာပိတံ;
အဇ္ဈာဝုတ္ထံ မယာ ဧတံ,
ဃရဒါနဿိဒံ ဖလံ.
တေ သဗ္ဗေ အနုဘောတွာန,
ဒေဝမာနုသကေ ဘဝေ;
အဇ္ဈပတ္တောမှိ နိဗ္ဗာနံ,
သန္တိပဒမနုတ္တရံ.
တိံသကပ္ပသဟဿမှိ,
ဗောဓိဃရမကာရယိံ;
ဒုဂ္ဂတိံ နာဘိဇာနာမိ,
ဃရဒါနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (4704)
ဣတ္ထံ သုဒံ အာယသ္မာ ဗောဓိဃရဒါယကော ထေရော ဣမာ ဂါထာယော အဘာသိတ္ထာတိ.
ဗောဓိဃရဒါယကတ္ထေရဿာပဒါနံ ဒသမံ.
ဝိဘီတကဝဂ္ဂေါ ပဉ္စစတ္တာလီသမော.
တဿုဒ္ဒါနံ
ဝိဘီတကီ ကောလဖလီ,
ဗိလ္လဘလ္လာတကပ္ပဒေါ;
ဥတ္တလမ္ဗဋကီ စေဝ,_
အာသနီ ပါဒပီဌကော.
ဝေဒိကော ဗောဓိဃရိကော,
ဂါထာယော ဂဏိတာပိ စ;
ဧကူနာသီတိကာ သဗ္ဗာ,
အသ္မိံ ဝဂ္ဂေ ပကိတ္တိတာ.