45.8 ပါဒပီဌိယတ္ထေရအပဒါန
“သုမေဓော နာမ သမ္ဗုဒ္ဓေါ,
အဂ္ဂေါ ကာရုဏိကော မုနိ;
တာရယိတွာ ဗဟူ သတ္တေ,
နိဗ္ဗုတော သော မဟာယသော.
သီဟာသနဿ သာမန္တာ,
သုမေဓဿ မဟေသိနော;
ပသန္နစိတ္တော သုမနော,
ပါဒပီဌမကာရယိံ.
ကတွာန ကုသလံ ကမ္မံ,
သုခပါကံ သုခုဒြယံ;
ပုညကမ္မေန သံယုတ္တော,
တာဝတိံသမဂစ္ဆဟံ.
တတ္ထ မေ ဝသမာနဿ,
ပုညကမ္မသမင်္ဂိနော;
ပဒါနိ ဥဒ္ဓရန္တဿ,
သောဏ္ဏပီဌာ ဘဝန္တိ မေ.
လာဘာ တေသံ သုလဒ္ဓံ ဝေါ,
ယေ လဘန္တိ ဥပဿုတိံ;
နိဗ္ဗုတေ ကာရံ ကတွာန,
လဘန္တိ ဝိပုလံ သုခံ.
မယာပိ သုကတံ ကမ္မံ,
ဝါဏိဇ္ဇံ သုပ္ပယောဇိတံ;
ပါဒပီဌံ ကရိတွာန,
သောဏ္ဏပီဌံ လဘာမဟံ.
ယံ ယံ ဒိသံ ပက္ကမာမိ,
ကေနစိ ကိစ္စယေနဟံ;
သောဏ္ဏပီဌေ အက္ကမာမိ,
ပုညကမ္မဿိဒံ ဖလံ.
တိံသကပ္ပသဟဿမှိ,
ယံ ကမ္မမကရိံ တဒါ;
ဒုဂ္ဂတိံ နာဘိဇာနာမိ,
ပါဒပီဌဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ပါဒပီဌိယော ထေရော ဣမာ ဂါထာယော အဘာသိတ္ထာတိ.
ပါဒပီဌိယတ္ထေရဿာပဒါနံ အဋ္ဌမံ.