47.9 သယမ္ပဋိဘာနိယတ္ထေရအပဒါန
“ကကုဓံ ဝိလသန္တံဝ,
ဒေဝဒေဝံ နရာသဘံ;
ရထိယံ ပဋိပဇ္ဇန္တံ,
ကော ဒိသွာ န ပသီဒတိ.
တမန္ဓကာရံ နာသေတွာ,
သန္တာရေတွာ ဗဟုံ ဇနံ;
ဉာဏာလောကေန ဇောတန္တံ,
ကော ဒိသွာ န ပသီဒတိ.
ဝသီသတသဟဿေဟိ,
နီယန္တံ လောကနာယကံ;
ဥဒ္ဓရန္တံ ဗဟူ သတ္တေ,_
ကော ဒိသွာ န ပသီဒတိ.
အာဟနန္တံ ဓမ္မဘေရိံ,
မဒ္ဒန္တံ တိတ္ထိယေ ဂဏေ;
သီဟနာဒံ ဝိနဒန္တံ,
ကော ဒိသွာ န ပသီဒတိ.
ယာဝတာ ဗြဟ္မလောကတော,
အာဂန္တွာန သဗြဟ္မကာ;
ပုစ္ဆန္တိ နိပုဏေ ပဉှေ,
ကော ဒိသွာ န ပသီဒတိ.
ယဿဉ္ဇလိံ ကရိတွာန,
အာယာစန္တိ သဒေဝကာ;
တေန ပုညံ အနုဘောန္တိ,
ကော ဒိသွာ န ပသီဒတိ.
သဗ္ဗေ ဇနာ သမာဂန္တွာ,
သမ္ပဝါရေန္တိ စက္ခုမံ;
န ဝိကမ္ပတိ အဇ္ဈိဋ္ဌော,
ကော ဒိသွာ န ပသီဒတိ.
နဂရံ ပဝိသတော ယဿ,
ရဝန္တိ ဘေရိယော ဗဟူ;
ဝိနဒန္တိ ဂဇာ မတ္တာ,
ကော ဒိသွာ န ပသီဒတိ.
ဝီထိယာ ဂစ္ဆတော ယဿ,
သဗ္ဗာဘာ ဇောတတေ သဒါ;
အဗ္ဘုန္နတာ သမာ ဟောန္တိ,
ကော ဒိသွာ န ပသီဒတိ.
ဗျာဟရန္တဿ ဗုဒ္ဓဿ,
စက္ကဝါဠမ္ပိ သုယျတိ;
သဗ္ဗေ သတ္တေ ဝိညာပေတိ,
ကော ဒိသွာ န ပသီဒတိ.
သတသဟဿိတော ကပ္ပေ,
ယံ ဗုဒ္ဓမဘိကိတ္တယိံ;
ဒုဂ္ဂတိံ နာဘိဇာနာမိ,
ကိတ္တနာယ ဣဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သယမ္ပဋိဘာနိယော ထေရော ဣမာ ဂါထာယော အဘာသိတ္ထာတိ.
သယမ္ပဋိဘာနိယတ္ထေရဿာပဒါနံ နဝမံ.