48.1 နဠမာလိယတ္ထေရအပဒါန
Review
1.
6066
“သုဝဏ္ဏဝဏ္ဏံ သမ္ဗုဒ္ဓံ,
အာဟုတီနံ ပဋိဂ္ဂဟံ;
ဝိပိနဂ္ဂေန ဂစ္ဆန္တံ,
အဒ္ဒသံ လောကနာယကံ.
2.
6067
နဠမာလံ ဂဟေတွာန,
နိက္ခမန္တော စ တာဝဒေ;
တတ္ထဒ္ဒသာသိံ သမ္ဗုဒ္ဓံ,
ဩဃတိဏ္ဏမနာသဝံ.
3.
6068
ပသန္နစိတ္တော သုမနော,
နဠမာလမပူဇယိံ;
ဒက္ခိဏေယျံ မဟာဝီရံ,
သဗ္ဗလောကာနုကမ္ပကံ.
4.
6069
ဧကတိံသေ ဣတော ကပ္ပေ,
ယံ မာလမဘိရောပယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
5.
6070
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
6.
6071
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
7.
6072
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
6073
ဣတ္ထံ သုဒံ အာယသ္မာ နဠမာလိယော ထေရော ဣမာ ဂါထာယော အဘာသိတ္ထာတိ.
6074
နဠမာလိယတ္ထေရဿာပဒါနံ ပဌမံ.