48.3 ဥက္ကာသတိကတ္ထေရအပဒါန
“ကောသိယော နာမ ဘဂဝါ,
စိတ္တကူဋေ ဝသီ တဒါ;
ဈာယီ ဈာနရတော ဗုဒ္ဓေါ,
ဝိဝေကာဘိရတော မုနိ.
အဇ္ဈောဂါဟေတွာ ဟိမဝန္တံ,
နာရီဂဏပုရက္ခတော;
အဒ္ဒသံ ကောသိယံ ဗုဒ္ဓံ,
ပုဏ္ဏမာယေဝ စန္ဒိမံ.
ဥက္ကာသတေ ဂဟေတွာန,_
ပရိဝါရေသဟံ တဒါ;
သတ္တရတ္တိန္ဒိဝံ ဌတွာ,
အဋ္ဌမေန အဂစ္ဆဟံ.
ဝုဋ္ဌိတံ ကောသိယံ ဗုဒ္ဓံ,
သယမ္ဘုံ အပရာဇိတံ;
ပသန္နစိတ္တော ဝန္ဒိတွာ,
ဧကံ ဘိက္ခံ အဒါသဟံ.
တေန ကမ္မေန ဒွိပဒိန္ဒ,
လောကဇေဋ္ဌ နရာသဘ;
ဥပ္ပဇ္ဇိံ တုသိတေ ကာယေ,_
ဧကဘိက္ခာယိဒံ ဖလံ.
ဒိဝသဉ္စေဝ ရတ္တိဉ္စ,
အာလောကော ဟောတိ မေ သဒါ;
သမန္တာ ယောဇနသတံ,
ဩဘာသေန ဖရာမဟံ.
ပဉ္စပညာသကပ္ပမှိ,
စက္ကဝတ္တီ အဟောသဟံ;
စာတုရန္တော ဝိဇိတာဝီ,
ဇမ္ဗုမဏ္ဍဿ ဣဿရော.
တဒါ မေ နဂရံ အာသိ,
ဣဒ္ဓံ ဖီတံ သုနိမ္မိတံ;_
တိံသယောဇနမာယာမံ,
ဝိတ္ထာရေန စ ဝီသတိ.
သောဘနံ နာမ နဂရံ,
ဝိဿကမ္မေန မာပိတံ;
ဒသသဒ္ဒါဝိဝိတ္တံ တံ,
သမ္မတာဠသမာဟိတံ.
န တမှိ နဂရေ အတ္ထိ,
ဝလ္လိကဋ္ဌဉ္စ မတ္တိကာ;
သဗ္ဗသောဏ္ဏမယံယေဝ,
ဇောတတေ နိစ္စကာလိကံ.
စတုပါကာရပရိက္ခိတ္တံ,
တယော အာသုံ မဏိမယာ;
ဝေမဇ္ဈေ တာလပန္တီ စ,
ဝိဿကမ္မေန မာပိတာ.
ဒသသဟဿပေါက္ခရညော,
ပဒုမုပ္ပလဆာဒိတာ;
ပုဏ္ဍရီကေဟိ သဉ္ဆန္နာ,
နာနာဂန္ဓသမီရိတာ.
စတုန္နဝုတိတော ကပ္ပေ,
ယံ ဥက္ကံ ဓာရယိံ အဟံ;
ဒုဂ္ဂတိံ နာဘိဇာနာမိ,
ဥက္ကာဓာရဿိဒံ ဖလံ._
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဥက္ကာသတိကော ထေရော ဣမာ ဂါထာယော အဘာသိတ္ထာတိ.
ဥက္ကာသတိကတ္ထေရဿာပဒါနံ တတိယံ.