49.1 ပံသုကူလသညကတ္ထေရအပဒါန
Review
1.
6185
“တိဿော နာမာသိ ဘဂဝါ,
သယမ္ဘူ အဂ္ဂပုဂ္ဂလော;
ပံသုကူလံ ဌပေတွာန,
ဝိဟာရံ ပါဝိသီ ဇိနော.
2.
6186
ဝိနတံ ဓနုမာဒါယ,
ဘက္ခတ္ထာယ စရိံ အဟံ;
မဏ္ဍလဂ္ဂံ ဂဟေတွာန,
ကာနနံ ပါဝိသိံ အဟံ.
3.
6187
တတ္ထဒ္ဒသံ ပံသုကူလံ,
ဒုမဂ္ဂေ လဂ္ဂိတံ တဒါ;
စာပံ တတ္ထေဝ နိက္ခိပ္ပ,
သိရေ ကတွာန အဉ္ဇလိံ.
4.
6188
ပသန္နစိတ္တော သုမနော,
ဝိပုလာယ စ ပီတိယာ;
ဗုဒ္ဓသေဋ္ဌံ သရိတွာန,
ပံသုကူလံ အဝန္ဒဟံ.
5.
6189
ဒွေနဝုတေ ဣတော ကပ္ပေ,
ပံသုကူလမဝန္ဒဟံ;
ဒုဂ္ဂတိံ နာဘိဇာနာမိ,
ဝန္ဒနာယ ဣဒံ ဖလံ.
6.
6190
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
7.
6191
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
8.
6192
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
6193
ဣတ္ထံ သုဒံ အာယသ္မာ ပံသုကူလသညကော ထေရော ဣမာ ဂါထာယော အဘာသိတ္ထာတိ.
6194
ပံသုကူလသညကတ္ထေရဿာပဒါနံ ပဌမံ.