49.3 ဘိသဒါယကတ္ထေရအပဒါန
“ဩဂယှ ယံ ပေါက္ခရဏိံ,
နာနာကုဉ္ဇရသေဝိတံ;
ဥဒ္ဓရာမိ ဘိသံ တတ္ထ,_
ဃာသဟေတု အဟံ တဒါ.
ဘဂဝါ တမှိ သမယေ,
ပဒုမုတ္တရသဝှယော;
ရတ္တမ္ဗရဓရော ဗုဒ္ဓေါ,
ဂစ္ဆတိ အနိလဉ္ဇသေ.
ဓုနန္တော ပံသုကူလာနိ,
သဒ္ဒမဿောသဟံ တဒါ;
ဥဒ္ဓံ နိဇ္ဈာယမာနောဟံ,_
အဒ္ဒသံ လောကနာယကံ.
တတ္ထေဝ ဌိတကော သန္တော,
အာယာစိံ လောကနာယကံ;
‘မဓုံ ဘိသေဟိ သဝတိ,
ခီရံ သပ္ပိံ မုဠာလိဘိ.
ပဋိဂ္ဂဏှာတု မေ ဗုဒ္ဓေါ,
အနုကမ္ပာယ စက္ခုမာ’;
တတော ကာရုဏိကော သတ္ထာ,
ဩရုဟိတွာ မဟာယသော.
ပဋိဂ္ဂဏှိ မမံ ဘိက္ခံ,
အနုကမ္ပာယ စက္ခုမာ;
ပဋိဂ္ဂဟေတွာ သမ္ဗုဒ္ဓေါ,
အကာ မေ အနုမောဒနံ.
‘သုခီ ဟောတု မဟာပုည,
ဂတိ တုယှံ သမိဇ္ဈတု;
ဣမိနာ ဘိသဒါနေန,_
လဘဿု ဝိပုလံ သုခံ’.
ဣဒံ ဝတွာန သမ္ဗုဒ္ဓေါ,_
ဇလဇုတ္တမနာမကော;
ဘိက္ခမာဒါယ သမ္ဗုဒ္ဓေါ,
အမ္ဗရေနာဂမာ ဇိနော.
တတော ဘိသံ ဂဟေတွာန,
အာဂစ္ဆိံ မမ အဿမံ;
ဘိသံ ရုက္ခေ လဂေတွာန,
မမ ဒါနမနုဿရိံ.
မဟာဝါတော ဝုဋ္ဌဟိတွာ,
သဉ္စာလေသိ ဝနံ တဒါ;
အာကာသော အဘိနာဒိတ္ထ,
အသနိယာ ဖလန္တိယာ.
တတော မေ အသနီပါတော,
မတ္ထကေ နိပတီ တဒါ;
သောဟံ နိသိန္နကော သန္တော,
တတ္ထ ကာလင်္ကတော အဟုံ.
ပုညကမ္မေန သံယုတ္တော,
တုသိတံ ဥပပဇ္ဇဟံ;
ကဠေဝရံ မေ ပတိတံ,
ဒေဝလောကေ ရမိံ အဟံ.
ဆဠသီတိသဟဿာနိ,
နာရိယော သမလင်္ကတာ;
သာယံ ပါတံ ဥပဋ္ဌန္တိ,
ဘိသဒါနဿိဒံ ဖလံ.
မနုဿယောနိမာဂန္တွာ,
သုခိတော ဟောမဟံ သဒါ;
ဘောဂေ မေ ဦနတာ နတ္ထိ,
ဘိသဒါနဿိဒံ ဖလံ.
အနုကမ္ပိတကော တေန,
ဒေဝဒေဝေန တာဒိနာ;
သဗ္ဗာသဝါ ပရိက္ခီဏာ,
နတ္ထိ ဒါနိ ပုနဗ္ဘဝေါ.
သတသဟဿိတော ကပ္ပေ,
ယံ ဘိသံ အဒဒိံ တဒါ;
ဒုဂ္ဂတိံ နာဘိဇာနာမိ,
ဘိသဒါနဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဘိသဒါယကော ထေရော ဣမာ ဂါထာယော အဘာသိတ္ထာတိ.
ဘိသဒါယကတ္ထေရဿာပဒါနံ တတိယံ.