49.9 ဓမ္မရုစိယတ္ထေရအပဒါန
“ယဒါ ဒီပင်္ကရော ဗုဒ္ဓေါ,
သုမေဓံ ဗျာကရီ ဇိနော;
‘အပရိမေယျေ ဣတော ကပ္ပေ,
အယံ ဗုဒ္ဓေါ ဘဝိဿတိ.
ဣမဿ ဇနိကာ မာတာ,_
မာယာ နာမ ဘဝိဿတိ;
ပိတာ သုဒ္ဓေါဒနော နာမ,
အယံ ဟေဿတိ ဂေါတမော.
ပဓာနံ ပဒဟိတွာန,
ကတွာ ဒုက္ကရကာရိကံ;
အဿတ္ထမူလေ သမ္ဗုဒ္ဓေါ,
ဗုဇ္ဈိဿတိ မဟာယသော.
ဥပတိဿော ကောလိတော စ,_
အဂ္ဂါ ဟေဿန္တိ သာဝကာ;
အာနန္ဒော နာမ နာမေန,
ဥပဋ္ဌိဿတိမံ ဇိနံ._
ခေမာ ဥပ္ပလဝဏ္ဏာ စ,
အဂ္ဂါ ဟေဿန္တိ သာဝိကာ;
စိတ္တော အာဠဝကော စေဝ,
အဂ္ဂါ ဟေဿန္တုပါသကာ.
ခုဇ္ဇုတ္တရာ နန္ဒမာတာ,
အဂ္ဂါ ဟေဿန္တုပါသိကာ;
ဗောဓိ ဣမဿ ဝီရဿ,
အဿတ္ထောတိ ပဝုစ္စတိ’.
ဣဒံ သုတွာန ဝစနံ,_
အသမဿ မဟေသိနော;
အာမောဒိတာ နရမရူ,
နမဿန္တိ ကတဉ္ဇလီ.
တဒါဟံ မာဏဝေါ အာသိံ,
မေဃော နာမ သုသိက္ခိတော;
သုတွာ ဗျာကရဏံ သေဋ္ဌံ,
သုမေဓဿ မဟာမုနေ.
သံဝိသဋ္ဌော ဘဝိတွာန,
သုမေဓေ ကရုဏာသယေ;
ပဗ္ဗဇန္တဉ္စ တံ ဝီရံ,
သဟာဝ အနုပဗ္ဗဇိံ.
သံဝုတော ပါတိမောက္ခသ္မိံ,
ဣန္ဒြိယေသု စ ပဉ္စသု;_
သုဒ္ဓါဇီဝေါ သတော ဝီရော,
ဇိနသာသနကာရကော.
ဧဝံ ဝိဟရမာနောဟံ,
ပါပမိတ္တေန ကေနစိ;
နိယောဇိတော အနာစာရေ,
သုမဂ္ဂါ ပရိဓံသိတော.
ဝိတက္ကဝသိကော ဟုတွာ,
သာသနတော အပက္ကမိံ;
ပစ္ဆာ တေန ကုမိတ္တေန,
ပယုတ္တော မာတုဃာတနံ.
အကရိံ အာနန္တရိယံ,
ဃာတယိံ ဒုဋ္ဌမာနသော;
တတော စုတော မဟာဝီစိံ,
ဥပပန္နော သုဒါရုဏံ._
ဝိနိပါတဂတော သန္တော,
သံသရိံ ဒုက္ခိတော စိရံ;
န ပုနော အဒ္ဒသံ ဝီရံ,
သုမေဓံ နရပုင်္ဂဝံ.
အသ္မိံ ကပ္ပေ သမုဒ္ဒမှိ,
မစ္ဆော အာသိံ တိမိင်္ဂလော;
ဒိသွာဟံ သာဂရေ နာဝံ,
ဂေါစရတ္ထမုပါဂမိံ.
ဒိသွာ မံ ဝါဏိဇာ ဘီတာ,
ဗုဒ္ဓသေဋ္ဌမနုဿရုံ;
ဂေါတမောတိ မဟာဃောသံ,
သုတွာ တေဟိ ဥဒီရိတံ.
ပုဗ္ဗသညံ သရိတွာန,
တတော ကာလင်္ကတော အဟံ;
သာဝတ္ထိယံ ကုလေ ဣဒ္ဓေ,
ဇာတော ဗြာဟ္မဏဇာတိယံ.
အာသိံ ဓမ္မရုစိ နာမ,
သဗ္ဗပါပဇိဂုစ္ဆကော;
ဒိသွာဟံ လောကပဇ္ဇောတံ,
ဇာတိယာ သတ္တဝဿိကော.
မဟာဇေတဝနံ ဂန္တွာ,
ပဗ္ဗဇိံ အနဂါရိယံ;
ဥပေမိ ဗုဒ္ဓံ တိက္ခတ္တုံ,_
ရတ္တိယာ ဒိဝသဿ စ.
တဒါ ဒိသွာ မုနိ အာဟ,
စိရံ ဓမ္မရုစီတိ မံ;
တတောဟံ အဝစံ ဗုဒ္ဓံ,
ပုဗ္ဗကမ္မပဘာဝိတံ.
သုစိရံ သတပုညလက္ခဏံ,
ပတိပုဗ္ဗေန ဝိသုဒ္ဓပစ္စယံ;
အဟမဇ္ဇသုပေက္ခနံ ဝတ,
တဝ ပဿာမိ နိရုပမံ ဝိဂ္ဂဟံ.
သုစိရံ ဝိဟတတ္တမော မယာ,
သုစိရက္ခေန နဒီ ဝိသောသိတာ;
သုစိရံ အမလံ ဝိသောဓိတံ,
နယနံ ဉာဏမယံ မဟာမုနေ.
စိရကာလသမင်္ဂိတော တယာ,
အဝိနဋ္ဌော ပုနရန္တရံ စိရံ;
ပုနရဇ္ဇသမာဂတော တယာ,
န ဟိ နဿန္တိ ကတာနိ ဂေါတမ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဓမ္မရုစိယော ထေရော ဣမာ ဂါထာယော အဘာသိတ္ထာတိ.
ဓမ္မရုစိယတ္ထေရဿာပဒါနံ နဝမံ.