5.10 စုန္ဒတ္ထေရအပဒါန
“သိဒ္ဓတ္ထဿ ဘဂဝတော,
လောကဇေဋ္ဌဿ တာဒိနော;
အဂ္ဃိယံ ကာရယိတွာန,
ဇာတိပုပ္ဖေဟိ ဆာဒယိံ.
နိဋ္ဌာပေတွာန တံ ပုပ္ဖံ,
ဗုဒ္ဓဿ ဥပနာမယိံ;
ပုပ္ဖါဝသေသံ ပဂ္ဂယှ,
ဗုဒ္ဓဿ အဘိရောပယိံ.
ကဉ္စနဂ္ဃိယသင်္ကာသံ,
ဗုဒ္ဓံ လောကဂ္ဂနာယကံ;
ပသန္နစိတ္တော သုမနော,
ပုပ္ဖဂ္ဃိယမုပါနယိံ.
ဝိတိဏ္ဏကင်္ခေါ သမ္ဗုဒ္ဓေါ,
တိဏ္ဏောဃေဟိ ပုရက္ခတော;
ဘိက္ခုသံဃေ နိသီဒိတွာ,
ဣမာ ဂါထာ အဘာသထ._
‘ဒိဗ္ဗဂန္ဓံ ပဝါယန္တံ,
ယော မေ ပုပ္ဖဂ္ဃိယံ အဒါ;
တမဟံ ကိတ္တယိဿာမိ,
သုဏာထ မမ ဘာသတော.
ဣတော စုတော အယံ ပေါသော,_
ဒေဝသင်္ဃပုရက္ခတော;
ဇာတိပုပ္ဖေဟိ ပရိကိဏ္ဏော,
ဒေဝလောကံ ဂမိဿတိ.
ဥဗ္ဗိဒ္ဓံ ဘဝနံ တဿ,_
သောဝဏ္ဏဉ္စ မဏီမယံ;
ဗျမှံ ပါတုဘဝိဿတိ,
ပုညကမ္မပ္ပဘာဝိတံ.
စတုသတ္တတိက္ခတ္တုံ သော,
ဒေဝရဇ္ဇံ ကရိဿတိ;
အနုဘောဿတိ သမ္ပတ္တိံ,
အစ္ဆရာဟိ ပုရက္ခတော.
ပထဗျာ ရဇ္ဇံ တိသတံ,
ဝသုဓံ အာဝသိဿတိ;
ပဉ္စသတ္တတိက္ခတ္တုဉ္စ,
စက္ကဝတ္တီ ဘဝိဿတိ.
ဒုဇ္ဇယော နာမ နာမေန,
ဟေဿတိ မနုဇာဓိပေါ;
အနုဘောတွာန တံ ပုညံ,
သကကမ္မံ အပဿိတော.
ဝိနိပါတံ အဂန္တွာန,
မနုဿတ္တံ ဂမိဿတိ;
ဟိရညံ တဿ နိစိတံ,
ကောဋိသတမနပ္ပကံ.
နိဗ္ဗတ္တိဿတိ ယောနိမှိ,
ဗြာဟ္မဏေ သော ဘဝိဿတိ;
ဝင်္ဂန္တဿ သုတော ဓီမာ,
သာရိယာ ဩရသော ပိယော.
သော စ ပစ္ဆာ ပဗ္ဗဇိတွာ,
အင်္ဂီရသဿ သာသနေ;
စူဠစုန္ဒောတိ နာမေန,
ဟေဿတိ သတ္ထု သာဝကော.
သာမဏေရောဝ သော သန္တော,
ခီဏာသဝေါ ဘဝိဿတိ;
သဗ္ဗာသဝေ ပရိညာယ,
နိဗ္ဗာယိဿတိနာသဝေါ’.
ဥပဋ္ဌဟိံ မဟာဝီရံ,_
အညေ စ ပေသလေ ဗဟူ;
ဘာတရံ မေ စုပဋ္ဌာသိံ,
ဥတ္တမတ္ထဿ ပတ္တိယာ._
ဘာတရံ မေ ဥပဋ္ဌိတွာ,
ဓာတုံ ပတ္တမှိ ဩဟိယ;
သမ္ဗုဒ္ဓံ ဥပနာမေသိံ,
လောကဇေဋ္ဌံ နရာသဘံ.
ဥဘော ဟတ္ထေဟိ ပဂ္ဂယှ,_
ဗုဒ္ဓေါ လောကေ သဒေဝကေ;
သန္ဒဿယန္တော တံ ဓာတုံ,
ကိတ္တယိ အဂ္ဂသာဝကံ.
စိတ္တဉ္စ သုဝိမုတ္တံ မေ,
သဒ္ဓါ မယှံ ပတိဋ္ဌိတာ;
သဗ္ဗာသဝေ ပရိညာယ,
ဝိဟရာမိ အနာသဝေါ.
ပဋိသမ္ဘိဒါနုပ္ပတ္တာ,
ဝိမောက္ခာပိ စ ဖဿိတာ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”. (1246)
ဣတ္ထံ သုဒံ အာယသ္မာ စုန္ဒော ထေရော ဣမာ ဂါထာယော အဘာသိတ္ထာတိ.
စုန္ဒတ္ထေရဿာပဒါနံ ဒသမံ.
ဥပါလိဝဂ္ဂေါ ပဉ္စမော.
တဿုဒ္ဒါနံ
ဥပါလိ သောဏော ဘဒ္ဒိယော,_
သန္နိဋ္ဌာပကဟတ္ထိယော;
ဆဒနံ သေယျစင်္ကမံ,
သုဘဒ္ဒေါ စုန္ဒသဝှယော;
ဂါထာသတံ သတာလီသံ,
စတဿော စ တဒုတ္တရိ.