5.9 သုဘဒ္ဒတ္ထေရအပဒါန
“ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
ဇနတံ ဥဒ္ဓရိတွာန,
နိဗ္ဗာယတိ မဟာယသော.
နိဗ္ဗာယန္တေ စ သမ္ဗုဒ္ဓေ,
ဒသသဟဿိ ကမ္ပထ;
ဇနကာယော မဟာ အာသိ,
ဒေဝါ သန္နိပတုံ တဒါ.
စန္ဒနံ ပူရယိတွာန,
တဂရာမလ္လိကာဟိ စ;
ဟဋ္ဌော ဟဋ္ဌေန စိတ္တေန,
အာရောပယိံ နရုတ္တမံ.
မမ သင်္ကပ္ပမညာယ,
သတ္ထာ လောကေ အနုတ္တရော;
နိပန္နကောဝ သမ္ဗုဒ္ဓေါ,
ဣမာ ဂါထာ အဘာသထ._
‘ယော မေ ပစ္ဆိမကေ ကာလေ,
ဂန္ဓမာလေန ဆာဒယိ;
တမဟံ ကိတ္တယိဿာမိ,
သုဏာထ မမ ဘာသတော.
ဣတော စုတော အယံ ပေါသော,_
တုသိတကာယံ ဂမိဿတိ;
တတ္ထ ရဇ္ဇံ ကရိတွာန,
နိမ္မာနံ သော ဂမိဿတိ.
ဧတေနေဝ ဥပါယေန,
ဒတွာ မာလံ ဝရုတ္တမံ;
သကကမ္မာဘိရဒ္ဓေါ သော,
သမ္ပတ္တိံ အနုဘောဿတိ.
ပုနာပိ တုသိတေ ကာယေ,
နိဗ္ဗတ္တိဿတိယံ နရော;
တမှာ ကာယာ စဝိတွာန,
မနုဿတ္တံ ဂမိဿတိ.
သကျပုတ္တော မဟာနာဂေါ,
အဂ္ဂေါ လောကေ သဒေဝကေ;
ဗောဓယိတွာ ဗဟူ သတ္တေ,
နိဗ္ဗာယိဿတိ စက္ခုမာ.
တဒါ သောပဂတော သန္တော,
သုက္ကမူလေန စောဒိတော;
ဥပသင်္ကမ္မ သမ္ဗုဒ္ဓံ,_
ပဉှံ ပုစ္ဆိဿတိ တဒါ.
ဟာသယိတွာန သမ္ဗုဒ္ဓေါ,
သဗ္ဗညူ လောကနာယကော;
ပုညကမ္မံ ပရိညာယ,
သစ္စာနိ ဝိဝရိဿတိ.
အာရဒ္ဓေါ စ အယံ ပဉှော,
တုဋ္ဌော ဧကဂ္ဂမာနသော;
သတ္ထာရံ အဘိဝါဒေတွာ,
ပဗ္ဗဇ္ဇံ ယာစယိဿတိ.
ပသန္နမာနသံ ဒိသွာ,
သကကမ္မေန တောသိတံ;
ပဗ္ဗာဇေဿတိ သော ဗုဒ္ဓေါ,
အဂ္ဂမဂ္ဂဿ ကောဝိဒေါ.
ဝါယမိတွာနယံ ပေါသော,
သမ္မာသမ္ဗုဒ္ဓသာသနေ;
သဗ္ဗာသဝေ ပရိညာယ,
နိဗ္ဗာယိဿတိနာသဝေါ’.
ပဉ္စမဘာဏဝါရံ.
ပုဗ္ဗကမ္မေန သံယုတ္တော,
ဧကဂ္ဂေါ သုသမာဟိတော;
ဗုဒ္ဓဿ ဩရသော ပုတ္တော,
ဓမ္မဇောမှိ သုနိမ္မိတော.
ဓမ္မရာဇံ ဥပဂမ္မ,
အပုစ္ဆိံ ပဉှမုတ္တမံ;
ကထယန္တော စ မေ ပဉှံ,
ဓမ္မသောတံ ဥပါနယိ.
တဿာဟံ ဓမ္မမညာယ,
ဝိဟာသိံ သာသနေ ရတော;
သဗ္ဗာသဝေ ပရိညာယ,
ဝိဟရာမိ အနာသဝေါ.
သတသဟဿိတော ကပ္ပေ,
ဇလဇုတ္တမနာယကော;
နိဗ္ဗာယိ အနုပါဒါနော,
ဒီပေါဝ တေလသင်္ခယာ.
သတ္တယောဇနိကံ အာသိ,
ထူပဉ္စ ရတနာမယံ;
ဓဇံ တတ္ထ အပူဇေသိံ,
သဗ္ဗဘဒ္ဒံ မနောရမံ.
ကဿပဿ စ ဗုဒ္ဓဿ,
တိဿော နာမဂ္ဂသာဝကော;
ပုတ္တော မေ ဩရသော အာသိ,
ဒါယာဒေါ ဇိနသာသနေ.
တဿ ဟီနေန မနသာ,
ဝါစံ ဘာသိံ အဘဒ္ဒကံ;
တေန ကမ္မဝိပါကေန,
ပစ္ဆာ မေ အာသိ ဘဒ္ဒကံ.
ဥပဝတ္တနေ သာလဝနေ,_
ပစ္ဆိမေ သယနေ မုနိ;
ပဗ္ဗာဇေသိ မဟာဝီရော,
ဟိတော ကာရုဏိကော ဇိနော.
အဇ္ဇေဝ ဒါနိ ပဗ္ဗဇ္ဇာ,
အဇ္ဇေဝ ဥပသမ္ပဒါ;
အဇ္ဇေဝ ပရိနိဗ္ဗာနံ,
သမ္မုခါ ဒွိပဒုတ္တမေ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ သုဘဒ္ဒေါ ထေရော ဣမာ ဂါထာယော အဘာသိတ္ထာတိ.
သုဘဒ္ဒတ္ထေရဿာပဒါနံ နဝမံ.