50.1 တိကိင်္ကဏိပုပ္ဖိယတ္ထေရအပဒါန
Review
1.
6430
“ကဏိကာရံဝ ဇောတန္တံ,
နိသိန္နံ ပဗ္ဗတန္တရေ;
အဒ္ဒသံ ဝိရဇံ ဗုဒ္ဓံ,
ဝိပဿိံ လောကနာယကံ.
2.
6431
တီဏိ ကိင်္ကဏိပုပ္ဖါနိ,
ပဂ္ဂယှ အဘိရောပယိံ;
သမ္ဗုဒ္ဓမဘိပူဇေတွာ,
ဂစ္ဆာမိ ဒက္ခိဏာမုခေါ.
3.
6432
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
4.
6433
ဧကနဝုတိတော ကပ္ပေ,
ယံ ဗုဒ္ဓမဘိပူဇယိံ;
ဒုဂ္ဂတိံ နာဘိဇာနာမိ,
ဗုဒ္ဓပူဇာယိဒံ ဖလံ.
5.
6434
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
နာဂေါဝ ဗန္ဓနံ ဆေတွာ,
ဝိဟရာမိ အနာသဝေါ.
6.
6435
သွာဂတံ ဝတ မေ အာသိ,
မမ ဗုဒ္ဓဿ သန္တိကေ;
တိဿော ဝိဇ္ဇာ အနုပ္ပတ္တာ,
ကတံ ဗုဒ္ဓဿ သာသနံ.
7.
6436
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
6437
ဣတ္ထံ သုဒံ အာယသ္မာ တိကိင်္ကဏိပုပ္ဖိယော ထေရော ဣမာ ဂါထာယော အဘာသိတ္ထာတိ.
6438
တိကိင်္ကဏိပုပ္ဖိယတ္ထေရဿာပဒါနံ ပဌမံ.