53.10 သုဂန္ဓတ္ထေရအပဒါန
“ဣမမှိ ဘဒ္ဒကေ ကပ္ပေ,
ဗြဟ္မဗန္ဓု မဟာယသော;
ကဿပေါ နာမ ဂေါတ္တေန,
ဥပ္ပဇ္ဇိ ဝဒတံ ဝရော._
အနုဗျဉ္ဇနသမ္ပန္နော,
ဗာတ္တိံသဝရလက္ခဏော;
ဗျာမပ္ပဘာပရိဝုတော,
ရံသိဇာလသမောတ္ထဋော.
အဿာသေတာ ယထာ စန္ဒော,
သူရိယောဝ ပဘင်္ကရော;
နိဗ္ဗာပေတာ ယထာ မေဃော,
သာဂရောဝ ဂုဏာကရော.
ဓရဏီရိဝ သီလေန,
ဟိမဝါဝ သမာဓိနာ;
အာကာသော ဝိယ ပညာယ,
အသင်္ဂေါ အနိလော ယထာ.
သ ကဒါစိ မဟာဝီရော,
ပရိသာသု ဝိသာရဒေါ;
သစ္စာနိ သမ္ပကာသေတိ,
ဥဒ္ဓရန္တော မဟာဇနံ._
တဒါ ဟိ ဗာရာဏသိယံ,
သေဋ္ဌိပုတ္တော မဟာယသော;
အာသဟံ ဓနဓညဿ,
ပဟူတဿ ဗဟူ တဒါ.
ဇင်္ဃာဝိဟာရံ ဝိစရံ,
မိဂဒါယမုပေစ္စဟံ;
အဒ္ဒသံ ဝိရဇံ ဗုဒ္ဓံ,
ဒေသေန္တံ အမတံ ပဒံ.
ဝိသဋ္ဌကန္တဝစနံ,
ကရဝီကသမဿရံ;
ဟံသရုတေဟိ နိဂ္ဃေါသံ,
ဝိညာပေန္တံ မဟာဇနံ.
ဒိသွာ ဒေဝါတိဒေဝံ တံ,
သုတွာဝ မဓုရံ ဂိရံ;
ပဟာယနပ္ပကေ ဘောဂေ,
ပဗ္ဗဇိံ အနဂါရိယံ.
ဧဝံ ပဗ္ဗဇိတော စာဟံ,
န စိရေန ဗဟုဿုတော;
အဟောသိံ ဓမ္မကထိကော,
ဝိစိတ္တပဋိဘာနဝါ.
မဟာပရိသမဇ္ဈေဟံ,
ဟဋ္ဌစိတ္တော ပုနပ္ပုနံ;
ဝဏ္ဏယိံ ဟေမဝဏ္ဏဿ,
ဝဏ္ဏံ ဝဏ္ဏဝိသာရဒေါ.
‘ဧသ ခီဏာသဝေါ ဗုဒ္ဓေါ,
အနီဃော ဆိန္နသံသယော;
သဗ္ဗကမ္မက္ခယံ ပတ္တော,
ဝိမုတ္တောပဓိသင်္ခယေ.
ဧသ သော ဘဂဝါ ဗုဒ္ဓေါ,
ဧသ သီဟော အနုတ္တရော;
သဒေဝကဿ လောကဿ,
ဗြဟ္မစက္ကပ္ပဝတ္တကော.
ဒန္တော ဒမေတာ သန္တော စ,
သမေတာ နိဗ္ဗုတော ဣသိ;
နိဗ္ဗာပေတာ စ အဿတ္ထော,
အဿာသေတာ မဟာဇနံ.
ဝီရော သူရော စ ဝိက္ကန္တော,
ပညော ကာရုဏိကော ဝသီ;
ဝိဇိတာဝီ စ သ ဇိနော,
အပ္ပဂဗ္ဗော အနာလယော.
အနေဉ္ဇော အစလော ဓီမာ,
အမောဟော အသမော မုနိ;
ဓောရယှော ဥသဘော နာဂေါ,
သီဟော သက္ကော ဂရူသုပိ.
ဝိရာဂေါ ဝိမလော ဗြဟ္မာ,
ဝါဒီ သူရော ရဏဉ္ဇဟော;
အခိလော စ ဝိသလ္လော စ,
အသမော သံယတော သုစိ.
ဗြာဟ္မဏော သမဏော နာထော,
ဘိသက္ကော သလ္လကတ္တကော;
ယောဓော ဗုဒ္ဓေါ သုတာသုတော,
အစလော မုဒိတော သိတော.
ဓာတာ ဓတာ စ သန္တိ စ,
ကတ္တာ နေတာ ပကာသိတာ;
သမ္ပဟံသိတာ ဘေတ္တာ စ,
ဆေတ္တာ သောတာ ပသံသိတာ.
အခိလော စ ဝိသလ္လော စ,
အနီဃော အကထံကထီ;
အနေဇော ဝိရဇော ကတ္တာ,
ဂန္ဓာ ဝတ္တာ ပသံသိတာ.
တာရေတာ အတ္ထကာရေတာ,
ကာရေတာ သမ္ပဒါရိတာ;
ပါပေတာ သဟိတာ ကန္တာ,
ဟန္တာ အာတာပီ တာပသော.
သမစိတ္တော သမသမော,
အသဟာယော ဒယာလယော;
အစ္ဆေရသတ္တော အကုဟော,
ကတာဝီ ဣသိသတ္တမော.
နိတ္တိဏ္ဏကင်္ခေါ နိမ္မာနော,
အပ္ပမေယျော အနူပမော;
သဗ္ဗဝါကျပထာတီတော,
သစ္စနေယျန္တဂူ ဇိနော.
သတ္တသာရဝရေ တသ္မိံ,
ပသာဒေါ အမတာဝဟော;
တသ္မာ ဗုဒ္ဓေ စ ဓမ္မေ စ,
သံဃေ သဒ္ဓါ မဟတ္ထိကာ’.
ဂုဏေဟိ ဧဝမာဒီဟိ,
တိလောကသရဏုတ္တမံ;
ဝဏ္ဏေန္တော ပရိသာမဇ္ဈေ,
အကံ ဓမ္မကထံ အဟံ.
တတော စုတာဟံ တုသိတေ,
အနုဘောတွာ မဟာသုခံ;
တတော စုတော မနုဿေသု,
ဇာတော ဟောမိ သုဂန္ဓိကော.
နိဿာသော မုခဂန္ဓော စ,
ဒေဟဂန္ဓော တထေဝ မေ;
သေဒဂန္ဓော စ သတတံ,
သဗ္ဗဂန္ဓောဝ ဟောတိ မေ.
မုခဂန္ဓော သဒါ မယှံ,
ပဒုမုပ္ပလစမ္ပကော;
ပရိသန္တော သဒါ ဝါတိ,
သရီရော စ တထေဝ မေ.
ဂုဏတ္ထဝဿ သဗ္ဗန္တံ,
ဖလံ တု ပရမဗ္ဘုတံ;
ဧကဂ္ဂမနသာ သဗ္ဗေ,
ဝဏ္ဏယိဿံ သုဏာထ မေ.
ဂုဏံ ဗုဒ္ဓဿ ဝတွာန,
ဟိတာယ စ န သဒိသံ;
သုခိတော ဟောမိ သဗ္ဗတ္ထ,
သံဃော ဝီရသမာယုတော.
ယသဿီ သုခိတော ကန္တော,
ဇုတိမာ ပိယဒဿနော;
ဝတ္တာ အပရိဘူတော စ,
နိဒ္ဒေါသော ပညဝါ တထာ.
ခီဏေ အာယုသိ နိဗ္ဗာနံ,
သုလဘံ ဗုဒ္ဓဘတ္တိနော;
တေသံ ဟေတုံ ပဝက္ခာမိ,
တံ သုဏာထ ယထာတထံ.
သန္တံ ယသံ ဘဂဝတော,
ဝိဓိနာ အဘိဝါဒယံ;
တတ္ထ တတ္ထူပပန္နောပိ,
ယသဿီ တေန ဟောမဟံ.
ဒုက္ခဿန္တကရံ ဗုဒ္ဓံ,
ဓမ္မံ သန္တမသင်္ခတံ;
ဝဏ္ဏယံ သုခဒေါ အာသိံ,
သတ္တာနံ သုခိတော တတော.
ဂုဏံ ဝဒန္တော ဗုဒ္ဓဿ,
ဗုဒ္ဓပီတိသမာယုတော;
သကန္တိံ ပရကန္တိဉ္စ,
ဇနယိံ တေန ကန္တိမာ.
ဇိနော တေ တိတ္ထိကာကိဏ္ဏေ,
အဘိဘုယျ ကုတိတ္ထိယေ;
ဂုဏံ ဝဒန္တော ဇောတေသိံ,
နာယကံ ဇုတိမာ တတော.
ပိယကာရီ ဇနဿာပိ,
သမ္ဗုဒ္ဓဿ ဂုဏံ ဝဒံ;
သရဒေါဝ သသင်္ကောဟံ,
တေနာသိံ ပိယဒဿနော.
ယထာသတ္တိဝသေနာဟံ,
သဗ္ဗဝါစာဟိ သန္ထဝိံ;
သုဂတံ တေန ဝါဂိသော,
ဝိစိတ္တပဋိဘာနဝါ.
ယေ ဗာလာ ဝိမတိံ ပတ္တာ,
ပရိဘောန္တိ မဟာမုနိံ;
နိဂ္ဂဟိံ တေ သဒ္ဓမ္မေန,
ပရိဘူတော န တေနဟံ.
ဗုဒ္ဓဝဏ္ဏေန သတ္တာနံ,
ကိလေသေ အပနေသဟံ;
နိက္ကိလေသမနော ဟောမိ,
တဿ ကမ္မဿ ဝါဟသာ.
သောတူနံ ဝုဒ္ဓိမဇနိံ,
ဗုဒ္ဓါနုဿတိဒေသကော;
တေနာဟမာသိံ သပ္ပညော,
နိပုဏတ္ထဝိပဿကော.
သဗ္ဗာသဝပရိက္ခီဏော,
တိဏ္ဏသံသာရသာဂရော;
သိခီဝ အနုပါဒါနော,
ပါပုဏိဿာမိ နိဗ္ဗုတိံ.
ဣမသ္မိံယေဝ ကပ္ပသ္မိံ,_
ယမဟံ သန္ထဝိံ ဇိနံ;
ဒုဂ္ဂတိံ နာဘိဇာနာမိ,
ဗုဒ္ဓဝဏ္ဏဿိဒံ ဖလံ.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (5575)
ဣတ္ထံ သုဒံ အာယသ္မာ သုဂန္ဓော ထေရော ဣမာ ဂါထာယော အဘာသိတ္ထာတိ.
သုဂန္ဓတ္ထေရဿာပဒါနံ ဒသမံ.
တိဏဒါယကဝဂ္ဂေါ တေပညာသမော.
တဿုဒ္ဒါနံ
တိဏဒေါ မဉ္စဒေါ စေဝ,
သရဏဗ္ဘဉ္ဇနပ္ပဒေါ;
သုပဋော ဒဏ္ဍဒါယီ စ,
နေလပူဇီ တထေဝ စ.
ဗောဓိသမ္မဇ္ဇကော မဏ္ဍော,
သုဂန္ဓော ဒသမောတိ စ;
ဂါထာသတံ သတေဝီသံ,
ဂဏိတဉ္စေတ္ထ သဗ္ဗသော.