54.6 ဗာဟိယတ္ထေရအပဒါန
“ဣတော သတသဟဿမှိ,
ကပ္ပေ ဥပ္ပဇ္ဇိ နာယကော;
မဟပ္ပဘော တိလောကဂ္ဂေါ,
နာမေန ပဒုမုတ္တရော.
ခိပ္ပါဘိညဿ ဘိက္ခုဿ,
ဂုဏံ ကိတ္တယတော မုနေ;
သုတွာ ဥဒဂ္ဂစိတ္တောဟံ,
ကာရံ ကတွာ မဟေသိနော.
ဒတွာ သတ္တာဟိကံ ဒါနံ,
သသိဿဿ မုနေ အဟံ;
အဘိဝါဒိယ သမ္ဗုဒ္ဓံ,
တံ ဌာနံ ပတ္ထယိံ တဒါ.
တတော မံ ဗျာကရိ ဗုဒ္ဓေါ,
‘ဧတံ ပဿထ ဗြာဟ္မဏံ;
ပတိတံ ပါဒမူလေ မေ,
စရိယံ ပစ္စဝေက္ခဏံ.
ဟေမယညောပစိတင်္ဂံ,
အဝဒါတတနုတ္တစံ;
ပလမ္ဗဗိမ္ဗတမ္ဗောဋ္ဌံ,
သေတတိဏှသမံ ဒိဇံ.
ဂုဏထာမဗဟုတရံ,
သမုဂ္ဂတတနူရုဟံ;
ဂုဏောဃာယတနီဘူတံ,
ပီတိသမ္ဖုလ္လိတာနနံ.
ဧသော ပတ္ထယတေ ဌာနံ,
ခိပ္ပါဘိညဿ ဘိက္ခုနော;
အနာဂတေ မဟာဝီရော,
ဂေါတမော နာမ ဟေဿတိ.
တဿ ဓမ္မေသု ဒါယာဒေါ,
ဩရသော ဓမ္မနိမ္မိတော;
ဗာဟိယော နာမ နာမေန,
ဟေဿတိ သတ္ထု သာဝကော’.
တဒါ ဟိ တုဋ္ဌော ဝုဋ္ဌာယ,
ယာဝဇီဝံ မဟာမုနေ;
ကာရံ ကတွာ စုတော သဂ္ဂံ,
အဂံ သဘဝနံ ယထာ.
ဒေဝဘူတော မနုဿော ဝါ,
သုခိတော တဿ ကမ္မုနော;
ဝါဟသာ သံသရိတွာန,
သမ္ပတ္တိမနုဘောမဟံ.
ပုန ကဿပဝီရဿ,
အတ္ထမေန္တမှိ သာသနေ;
အာရုယှ သေလသိခရံ,
ယုဉ္ဇိတွာ ဇိနသာသနံ.
ဝိသုဒ္ဓသီလော သပ္ပညော,
ဇိနသာသနကာရကော;
တတော စုတာ ပဉ္စ ဇနာ,
ဒေဝလောကံ အဂမှသေ.
တတောဟံ ဗာဟိယော ဇာတော,
ဘာရုကစ္ဆေ ပုရုတ္တမေ;
တတော နာဝါယ ပက္ခန္ဒော,
သာဂရံ အပ္ပသိဒ္ဓိယံ.
တတော နာဝါ အဘိဇ္ဇိတ္ထ,
ဂန္တွာန ကတိပါဟကံ;
တဒါ ဘီသနကေ ဃောရေ,
ပတိတော မကရာကရေ.
တဒါဟံ ဝါယမိတွာန,
သန္တရိတွာ မဟောဒဓိံ;
သုပ္ပါရပဋ္ဋနဝရံ,
သမ္ပတ္တော မန္ဒဝေဓိတော.
ဒါရုစီရံ နိဝါသေတွာ,
ဂါမံ ပိဏ္ဍာယ ပါဝိသိံ;
တဒါဟ သော ဇနော တုဋ္ဌော,
‘အရဟာယမိဓာဂတော.
ဣမံ အန္နေန ပါနေန,_
ဝတ္ထေန သယနေန စ;
ဘေသဇ္ဇေန စ သက္ကတွာ,
ဟေဿာမ သုခိတာ မယံ’.
ပစ္စယာနံ တဒါ လာဘီ,
တေဟိ သက္ကတပူဇိတော;
အရဟာဟန္တိ သင်္ကပ္ပံ,
ဥပ္ပါဒေသိံ အယောနိသော._
တတော မေ စိတ္တမညာယ,
စောဒယီ ပုဗ္ဗဒေဝတာ;
‘န တွံ ဥပါယမဂ္ဂညူ,
ကုတော တွံ အရဟာ ဘဝေ’.
စောဒိတော တာယ သံဝိဂ္ဂေါ,
တဒါဟံ ပရိပုစ္ဆိ တံ;
‘ကေ ဝါ ဧတေ ကုဟိံ လောကေ,
အရဟန္တော နရုတ္တမာ’.
‘သာဝတ္ထိယံ ကောသလမန္ဒိရေ ဇိနော,
ပဟူတပညော ဝရဘူရိမေဓသော;
သော သကျပုတ္တော အရဟာ အနာသဝေါ,
ဒေသေတိ ဓမ္မံ အရဟတ္တပတ္တိယာ’.
တဒဿ သုတွာ ဝစနံ သုပီဏိတော,
နိဓိံဝ လဒ္ဓါ ကပဏောတိ ဝိမှိတော;
ဥဒဂ္ဂစိတ္တော အရဟတ္တမုတ္တမံ,_
သုဒဿနံ ဒဋ္ဌုမနန္တဂေါစရံ.
တဒါ တတော နိက္ခမိတွာန ‘သတ္ထုနော,
သဒါ ဇိနံ ပဿာမိ ဝိမလာနနံ’;
ဥပေစ္စ ရမ္မံ ဝိဇိတဝှယံ ဝနံ,_
ဒိဇေ အပုစ္ဆိံ ‘ကုဟိံ လောကနန္ဒနော’.
‘တတော အဝေါစုံ နရဒေဝဝန္ဒိတော,
ပုရံ ပဝိဋ္ဌော အသနေသနာယ သော;
သသောဝ ခိပ္ပံ မုနိဒဿနုဿုကော,
ဥပေစ္စ ဝန္ဒာဟိ တမဂ္ဂပုဂ္ဂလံ’._
တတောဟံ တုဝဋံ ဂန္တွာ,
သာဝတ္ထိံ ပုရမုတ္တမံ;
ဝိစရန္တံ တမဒ္ဒက္ခိံ,
ပိဏ္ဍတ္ထံ အပိဟာဂိဓံ.
ပတ္တပါဏိံ အလောလက္ခံ,
ပါစယန္တံ ပီတာကရံ;
သိရီနိလယသင်္ကာသံ,
ရဝိဒိတ္တိဟရာနနံ.
တံ သမေစ္စ နိပစ္စာဟံ,
ဣဒံ ဝစနမဗြဝိံ;_
‘ကုပထေ ဝိပ္ပနဋ္ဌဿ,
သရဏံ ဟောဟိ ဂေါတမ’.
‘ပါဏသန္တာရဏတ္ထာယ,
ပိဏ္ဍာယ ဝိစရာမဟံ;
န တေ ဓမ္မကထာကာလော’,
ဣစ္စာဟ မုနိသတ္တမော._
တဒါ ပုနပ္ပုနံ ဗုဒ္ဓံ,
အာယာစိံ ဓမ္မလာလသော;
ယော မေ ဓမ္မမဒေသေသိ,
ဂမ္ဘီရံ သုညတံ ပဒံ.
တဿ ဓမ္မံ သုဏိတွာန,
ပါပုဏိံ အာသဝက္ခယံ;
ပရိက္ခီဏာယုကော သန္တော,
အဟော သတ္ထာနုကမ္ပကော.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ.
ဧဝံ ထေရော ဝိယာကာသိ,
ဗာဟိယော ဒါရုစီရိယော;
သင်္ကာရကူဋေ ပတိတော,
ဘူတာဝိဋ္ဌာယ ဂါဝိယာ.
အတ္တနော ပုဗ္ဗစရိယံ,
ကိတ္တယိတွာ မဟာမတိ;
ပရိနိဗ္ဗာယိ သော ထေရော,
သာဝတ္ထိယံ ပုရုတ္တမေ.
နဂရာ နိက္ခမန္တော တံ,
ဒိသွာန ဣသိသတ္တမော;
ဒါရုစီရဓရံ ဓီရံ,
ဗာဟိယံ ဗာဟိတာဂမံ.
ဘူမိယံ ပတိတံ ဒန္တံ,
ဣန္ဒကေတူဝ ပါတိတံ;_
ဂတာယုံ သုက္ခကိလေသံ,
ဇိနသာသနကာရကံ.
တတော အာမန္တယီ သတ္ထာ,
သာဝကေ သာသနေ ရတေ;
‘ဂဏှထ နေတွာ ဈာပေထ,
တနုံ သဗြဟ္မစာရိနော.
ထူပံ ကရောထ ပူဇေထ,
နိဗ္ဗုတော သော မဟာမတိ;
ခိပ္ပါဘိညာနမေသဂ္ဂေါ,
သာဝကော မေ ဝစောကရော.
သဟဿမပိ စေ ဂါထာ,
အနတ္ထပဒသဉှိတာ;
ဧကံ ဂါထာပဒံ သေယျော,
ယံ သုတွာ ဥပသမ္မတိ.
ယတ္ထ အာပေါ စ ပထဝီ,
တေဇော ဝါယော န ဂါဓတိ;
န တတ္ထ သုက္ကာ ဇောတန္တိ,
အာဒိစ္စော န ပကာသတိ.
န တတ္ထ စန္ဒိမာ ဘာတိ,
တမော တတ္ထ န ဝိဇ္ဇတိ;
ယဒါ စ အတ္တနာ ဝေဒိ,
မုနိမောနေန ဗြာဟ္မဏော.
အထ ရူပါ အရူပါ စ,
သုခဒုက္ခာ ဝိမုစ္စတိ’;
ဣစ္စေဝံ အဘဏီ နာထော,_
တိလောကသရဏော မုနိ”.
ဣတ္ထံ သုဒံ အာယသ္မာ ဗာဟိယော ထေရော ဣမာ ဂါထာယော အဘာသိတ္ထာတိ.
ဗာဟိယတ္ထေရဿာပဒါနံ ဆဋ္ဌံ.