55.6 ကာဠုဒါယိတ္ထေရအပဒါန
“ပဒုမုတ္တရော နာမ ဇိနော,
သဗ္ဗဓမ္မေသု စက္ခုမာ;
ဣတော သတသဟဿမှိ,_
ကပ္ပေ ဥပ္ပဇ္ဇိ နာယကော.
နာယကာနံ ဝရော သတ္ထာ,
ဂုဏာဂုဏဝိဒူ ဇိနော;
ကတညူ ကတဝေဒီ စ,
တိတ္ထေ ယောဇေတိ ပါဏိနေ.
သဗ္ဗညုတေန ဉာဏေန,
တုလယိတွာ ဒယာသယော;
ဒေသေတိ ပဝရံ ဓမ္မံ,
အနန္တဂုဏသဉ္စယော.
သ ကဒါစိ မဟာဝီရော,
အနန္တဇိနသံသရိ;
ဒေသေတိ မဓုရံ ဓမ္မံ,
စတုသစ္စူပသဉှိတံ.
သုတွာန တံ ဓမ္မဝရံ,
အာဒိမဇ္ဈန္တသောဘနံ;
ပါဏသတသဟဿာနံ,
ဓမ္မာဘိသမယော အဟု.
နိန္နာဒိတာ တဒါ ဘူမိ,
ဂဇ္ဇိံသု စ ပယောဓရာ;
သာဓုကာရံ ပဝတ္တိံသု,
ဒေဝဗြဟ္မနရာသုရာ.
‘အဟော ကာရုဏိကော သတ္ထာ,
အဟော သဒ္ဓမ္မဒေသနာ;
အဟော ဘဝသမုဒ္ဒမှိ,
နိမုဂ္ဂေ ဥဒ္ဓရီ ဇိနော’.
ဧဝံ ပဝေဒဇာတေသု,
သနရာမရဗြဟ္မသု;
ကုလပ္ပသာဒကာနဂ္ဂံ,
သာဝကံ ဝဏ္ဏယီ ဇိနော.
တဒါဟံ ဟံသဝတိယံ,
ဇာတောမစ္စကုလေ အဟုံ;
ပါသာဒိကော ဒဿနိယော,
ပဟူတဓနဓညဝါ.
ဟံသာရာမမုပေစ္စာဟံ,
ဝန္ဒိတွာ တံ တထာဂတံ;
သုဏိတွာ မဓုရံ ဓမ္မံ,
ကာရံ ကတွာ စ တာဒိနော.
နိပစ္စ ပါဒမူလေဟံ,
ဣမံ ဝစနမဗြဝိံ;_
‘ကုလပ္ပသာဒကာနဂ္ဂေါ,
ယော တယာ သန္ထုတော မုနေ.
တာဒိသော ဟောမဟံ ဝီရ,
ဗုဒ္ဓသေဋ္ဌဿ သာသနေ’;
တဒါ မဟာကာရုဏိကော,
သိဉ္စန္တော ဝါမတေန မံ.
အာဟ မံ ‘ပုတ္တ ဥတ္တိဋ္ဌ,
လစ္ဆသေ တံ မနောရထံ;
ကထံ နာမ ဇိနေ ကာရံ,
ကတွာန ဝိဖလော သိယာ.
သတသဟဿိတော ကပ္ပေ,
ဩက္ကာကကုလသမ္ဘဝေါ;
ဂေါတမော နာမ ဂေါတ္တေန,
သတ္ထာ လောကေ ဘဝိဿတိ.
တဿ ဓမ္မေသု ဒါယာဒေါ,
ဩရသော ဓမ္မနိမ္မိတော;
ဥဒါယိ နာမ နာမေန,_
ဟေဿတိ သတ္ထု သာဝကော’.
တံ သုတွာ မုဒိတော ဟုတွာ,
ယာဝဇီဝံ တဒါ ဇိနံ;
မေတ္တစိတ္တော ပရိစရိံ,
ပစ္စယေဟိ ဝိနာယကံ.
တေန ကမ္မဝိပါကေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
ပစ္ဆိမေ စ ဘဝေ ဒါနိ,
ရမ္မေ ကပိလဝတ္ထဝေ;
ဇာတော မဟာမစ္စကုလေ,
သုဒ္ဓေါဒနမဟီပတေ.
တဒါ အဇာယိ သိဒ္ဓတ္ထော,
ရမ္မေ လုမ္ဗိနိကာနနေ;
ဟိတာယ သဗ္ဗလောကဿ,
သုခါယ စ နရာသဘော.
တဒဟေဝ အဟံ ဇာတော,
သဟ တေနေဝ ဝဍ္ဎိတော;
ပိယော သဟာယော ဒယိတော,
ဝိယတ္တော နီတိကောဝိဒေါ.
ဧကူနတိံသော ဝယသာ,
နိက္ခမိတွာ အဂါရတော;
ဆဗ္ဗဿံ ဝီတိနာမေတွာ,
အာသိ ဗုဒ္ဓေါ ဝိနာယကော.
ဇေတွာ သသေနကံ မာရံ,
ခေပယိတွာန အာသဝေ;
ဘဝဏ္ဏဝံ တရိတွာန,
ဗုဒ္ဓေါ အာသိ သဒေဝကေ.
ဣသိဝှယံ ဂမိတွာန,_
ဝိနေတွာ ပဉ္စဝဂ္ဂိယေ;
တတော ဝိနေသိ ဘဂဝါ,
ဂန္တွာ ဂန္တွာ တဟိံ တဟိံ.
ဝေနေယျေ ဝိနယန္တော သော,
သင်္ဂဏှန္တော သဒေဝကံ;
ဥပေစ္စ မဂဓေ ဂိရိံ,_
ဝိဟရိတ္ထ တဒါ ဇိနော.
တဒါ သုဒ္ဓေါဒနေနာဟံ,
ဘူမိပါလေန ပေသိတော;
ဂန္တွာ ဒိသွာ ဒသဗလံ,
ပဗ္ဗဇိတွာရဟာ အဟုံ.
တဒါ မဟေသိံ ယာစိတွာ,
ပါပယိံ ကပိလဝှယံ;
တတော ပုရာဟံ ဂန္တွာန,
ပသာဒေသိံ မဟာကုလံ.
ဇိနော တသ္မိံ ဂုဏေ တုဋ္ဌော,
မံ မဟာပရိသာယ သော;
ကုလပ္ပသာဒကာနဂ္ဂံ,
ပညာပေသိ ဝိနာယကော.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝေါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ကာဠုဒါယီ ထေရော ဣမာ ဂါထာယော အဘာသိတ္ထာတိ.
ကာဠုဒါယိတ္ထေရဿာပဒါနံ ဆဋ္ဌံ.