6.5 ဩပဝယှတ္ထေရအပဒါန
“ပဒုမုတ္တရဗုဒ္ဓဿ,
အာဇာနီယမဒါသဟံ;
နိယျာဒေတွာန သမ္ဗုဒ္ဓေ,
အဂမာသိံ သကံ ဃရံ.
ဒေဝလော နာမ နာမေန,
သတ္ထုနော အဂ္ဂသာဝကော;
ဝရဓမ္မဿ ဒါယာဒေါ,
အာဂစ္ဆိ မမ သန္တိကံ.
သပတ္တဘာရော ဘဂဝါ,
အာဇာနေယျော န ကပ္ပတိ;
တဝ သင်္ကပ္ပမညာယ,
အဓိဝါသေသိ စက္ခုမာ.
အဂ္ဃါပေတွာ ဝါတဇဝံ,
သိန္ဓဝံ သီဃဝါဟနံ;
ပဒုမုတ္တရဗုဒ္ဓဿ,
ခမနီယမဒါသဟံ.
ယံ ယံ ယောနုပပဇ္ဇာမိ,
ဒေဝတ္တံ အထ မာနုသံ;
ခမနီယံ ဝါတဇဝံ,
စိတ္တံ နိဗ္ဗတ္တတေ မမ.
လာဘံ တေသံ သုလဒ္ဓံဝ,
ယေ လဘန္တုပသမ္ပဒံ;
ပုနပိ ပယိရုပါသေယျံ,
ဗုဒ္ဓေါ လောကေ သစေ ဘဝေ.
အဋ္ဌဝီသတိက္ခတ္တုံဟံ,
ရာဇာ အာသိံ မဟဗ္ဗလော;
စာတုရန္တော ဝိဇိတာဝီ,
ဇမ္ဗုသဏ္ဍဿ ဣဿရော.
ဣဒံ ပစ္ဆိမကံ မယှံ,_
စရိမော ဝတ္တတေ ဘဝေါ;
ပတ္တောသ္မိ အစလံ ဌာနံ,
ဟိတွာ ဇယပရာဇယံ.
စတုတိံသသဟဿမှိ,
မဟာတေဇောသိ ခတ္တိယော;
သတ္တရတနသမ္ပန္နော,
စက္ကဝတ္တီ မဟဗ္ဗလော.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ ဩပဝယှော ထေရော ဣမာ ဂါထာယော အဘာသိတ္ထာတိ.
ဩပဝယှတ္ထေရဿာပဒါနံ ပဉ္စမံ.