8.10 တိပဒုမိယတ္ထေရအပဒါန
“ပဒုမုတ္တရော နာမ ဇိနော,
သဗ္ဗဓမ္မာန ပါရဂူ;
ဒန္တော ဒန္တပရိဝုတော,
နဂရာ နိက္ခမီ တဒါ.
နဂရေ ဟံသဝတိယံ,
အဟောသိံ မာလိကော တဒါ;
ယံ တတ္ထ ဥတ္တမံ တီဏိ,
ပဒ္မပုပ္ဖါနိ အဂ္ဂဟိံ.
‘အဒ္ဒသံ ဝိရဇံ ဗုဒ္ဓံ,
ပဋိမဂ္ဂန္တရာပဏေ;
သဟ ဒိသွာန သမ္ဗုဒ္ဓံ,
ဧဝံ စိန္တေသဟံ တဒါ.
ကိံ မေ ဣမေဟိ ပုပ္ဖေဟိ,
ရညော ဥပနိတေဟိ မေ;
ဂါမံ ဝါ ဂါမခေတ္တံ ဝါ,
သဟဿံ ဝါ လဘေယျဟံ.
အဒန္တဒမနံ ဝီရံ,
သဗ္ဗသတ္တသုခါဝဟံ;
လောကနာထံ ပူဇယိတွာ,
လစ္ဆာမိ အမတံ ဓနံ’.
ဧဝါဟံ စိန္တယိတွာန,
သကံ စိတ္တံ ပသာဒယိံ;
တီဏိ လောဟိတကေ ဂယှ,
အာကာသေ ဥက္ခိပိံ တဒါ.
မယာ ဥက္ခိတ္တမတ္တမှိ,
အာကာသေ ပတ္ထရိံသု တေ;
ဓာရိံသု မတ္ထကေ တတ္ထ,
ဥဒ္ဓံဝဏ္ဋာ အဓောမုခါ._
ယေ ကေစိ မနုဇာ ဒိသွာ,
ဥက္ကုဋ္ဌိံ သမ္ပဝတ္တယုံ;_
ဒေဝတာ အန္တလိက္ခမှိ,
သာဓုကာရံ ပဝတ္တယုံ.
အစ္ဆေရံ လောကေ ဥပ္ပန္နံ,
ဗုဒ္ဓသေဋ္ဌဿ ဝါဟသာ;
သဗ္ဗေ ဓမ္မံ သုဏိဿာမ,
ပုပ္ဖါနံ ဝါဟသာ မယံ.
ပဒုမုတ္တရော လောကဝိဒူ,
အာဟုတီနံ ပဋိဂ္ဂဟော;
ဝီထိယဉှိ ဌိတော သန္တော,
ဣမာ ဂါထာ အဘာသထ._
‘ယော သော ဗုဒ္ဓံ အပူဇေသိ,
ရတ္တပဒ္မေဟိ မာဏဝေါ;
တမဟံ ကိတ္တယိဿာမိ,
သုဏာထ မမ ဘာသတော.
တိံသကပ္ပသဟဿာနိ,
ဒေဝလောကေ ရမိဿတိ;
တိံသကပ္ပါနိ ဒေဝိန္ဒော,
ဒေဝရဇ္ဇံ ကရိဿတိ.
မဟာဝိတ္ထာရိကံ နာမ,
ဗျမှံ ဟေဿတိ တာဝဒေ;
တိယောဇနသတုဗ္ဗိဒ္ဓံ,
ဒိယဍ္ဎသတဝိတ္ထတံ.
စတ္တာရိသတသဟဿာနိ,
နိယျူဟာ စ သုမာပိတာ;
ကူဋာဂါရဝရူပေတာ,
မဟာသယနမဏ္ဍိတာ.
ကောဋိသတသဟဿိယော,
ပရိဝါရေဿန္တိ အစ္ဆရာ;
ကုသလာ နစ္စဂီတဿ,
ဝါဒိတေပိ ပဒက္ခိဏာ.
ဧတာဒိသေ ဗျမှဝရေ,
နာရီဂဏသမာကုလေ;
ဝဿိဿတိ ပုပ္ဖဝဿော,
ဒိဗ္ဗော လောဟိတကော သဒါ.
ဘိတ္တိခီလေ နာဂဒန္တေ,
ဒွါရဗာဟာယ တောရဏေ;
စက္ကမတ္တာ လောဟိတကာ,
ဩလမ္ဗိဿန္တိ တာဝဒေ.
ပတ္တေန ပတ္တသဉ္ဆန္နေ,
အန္တောဗျမှဝရေ ဣမံ;
အတ္ထရိတွာ ပါရုပိတွာ,
တုဝဋ္ဋိဿန္တိ တာဝဒေ.
ဘဝနံ ပရိဝါရေတွာ,
သမန္တာ သတယောဇနေ;
တေပိ ပဒ္မါ လောဟိတကာ,
ဒိဗ္ဗဂန္ဓံ ပဝါယရေ.
ပဉ္စသတ္တတိက္ခတ္တုဉ္စ,
စက္ကဝတ္တီ ဘဝိဿတိ;
ပဒေသရဇ္ဇံ ဝိပုလံ,
ဂဏနာတော အသင်္ခိယံ.
သမ္ပတ္တိယော ဒုဝေ ဘုတွာ,
အနီတိ အနုပဒ္ဒဝေါ;
သမ္ပတ္တေ ပရိယောသာနေ,
နိဗ္ဗာနံ ပါပုဏိဿတိ’.
သုဒိဋ္ဌော ဝတ မေ ဗုဒ္ဓေါ,
ဝါဏိဇ္ဇံ သုပယောဇိတံ;
ပဒ္မါနိ တီဏိ ပူဇေတွာ,
အနုဘောသိံ တိသမ္ပဒါ.
အဇ္ဇ မေ ဓမ္မပ္ပတ္တဿ,
ဝိပ္ပမုတ္တဿ သဗ္ဗသော;
သုပုပ္ဖိတံ လောဟိတကံ,
ဓာရယိဿတိ မတ္ထကေ.
မမ ကမ္မံ ကထေန္တဿ,
ပဒုမုတ္တရသတ္ထုနော;
သတပါဏသဟဿာနံ,
ဓမ္မာဘိသမယော အဟု.
သတသဟဿိတော ကပ္ပေ,
ယံ ဗုဒ္ဓမဘိပူဇယိံ;
ဒုဂ္ဂတိံ နာဘိဇာနာမိ,
တိပဒုမာနိဒံ ဖလံ.
ကိလေသာ ဈာပိတာ မယှံ,
ဘဝါ သဗ္ဗေ သမူဟတာ;
သဗ္ဗာသဝါ ပရိက္ခီဏာ,
နတ္ထိ ဒါနိ ပုနဗ္ဘဝေါ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”. (1486)
ဣတ္ထံ သုဒံ အာယသ္မာ တိပဒုမိယော ထေရော ဣမာ ဂါထာယော အဘာသိတ္ထာတိ.
တိပဒုမိယတ္ထေရဿာပဒါနံ ဒသမံ.
နာဂသမာလဝဂ္ဂေါ အဋ္ဌမော.
တဿုဒ္ဒါနံ
နာဂသမာလော ပဒသညီ,
သညကာလုဝဒါယကော;
ဧကသညီ တိဏသန္ထာရော,
သူစိပါဋလိပုပ္ဖိယော;
ဌိတဉ္ဇလီ တိပဒုမီ,
ဂါထာယော ပဉ္စသတ္တတိ.