8.6 တိဏသန္ထရဒါယကတ္ထေရအပဒါန
Review
22.
1620
“ဟိမဝန္တဿာဝိဒူရေ,
မဟာဇာတဿရော အဟု;
သတပတ္တေဟိ သဉ္ဆန္နော,
နာနာသကုဏမာလယော.
23.
1621
တမှိ နှတွာ စ ပိတွာ စ,
အဝိဒူရေ ဝသာမဟံ;
အဒ္ဒသံ သမဏာနဂ္ဂံ,
ဂစ္ဆန္တံ အနိလဉ္ဇသေ.
24.
1622
မမ သင်္ကပ္ပမညာယ,
သတ္ထာ လောကေ အနုတ္တရော;
အဗ္ဘတော ဩရုဟိတွာန,
ဘူမိယံဌာသိ တာဝဒေ.
25.
1623
ဝိသာဏေန တိဏံ ဂယှ,
နိသီဒနမဒါသဟံ;
နိသီဒိ ဘဂဝါ တတ္ထ,
တိဿော လောကဂ္ဂနာယကော.
26.
1624
သကံ စိတ္တံ ပသာဒေတွာ,
အဝန္ဒိ လောကနာယကံ;
ပဋိကုဋိကော အပသက္ကိံ,
နိဇ္ဈာယန္တော မဟာမုနိံ.
27.
1625
တေန စိတ္တပ္ပသာဒေန,
နိမ္မာနံ ဥပပဇ္ဇဟံ;
ဒုဂ္ဂတိံ နာဘိဇာနာမိ,
သန္ထရဿ ဣဒံ ဖလံ.
28.
1626
ဣတော ဒုတိယကေ ကပ္ပေ,_
မိဂ သမ္မတခတ္တိယော;
သတ္တရတနသမ္ပန္နော,
စက္ကဝတ္တီ မဟဗ္ဗလော.
29.
1627
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
1628
ဣတ္ထံ သုဒံ အာယသ္မာ တိဏသန္ထရဒါယကော ထေရော ဣမာ ဂါထာယော အဘာသိတ္ထာတိ.
1629
တိဏသန္ထရဒါယကတ္ထေရဿာပဒါနံ ဆဋ္ဌံ.