9.1 တိမိရပုပ္ဖိယတ္ထေရအပဒါန
“စန္ဒဘာဂါနဒီတီရေ,
အနုသောတံ ဝဇာမဟံ;
နိသိန္နံ သမဏံ ဒိသွာ,
ဝိပ္ပသန္နမနာဝိလံ.
တတ္ထ စိတ္တံ ပသာဒေတွာ,
ဧဝံ စိန္တေသဟံ တဒါ;
တာရယိဿတိ တိဏ္ဏောယံ,
ဒန္တောယံ ဒမယိဿတိ.
အဿာသိဿတိ အဿတ္ထော,
သန္တော စ သမယိဿတိ;
မောစယိဿတိ မုတ္တော စ,
နိဗ္ဗာပေဿတိ နိဗ္ဗုတော.
ဧဝါဟံ စိန္တယိတွာန,
သိဒ္ဓတ္ထဿ မဟေသိနော;
ဂဟေတွာ တိမိရပုပ္ဖံ,
မတ္ထကေ ဩကိရိံ အဟံ.
အဉ္ဇလိံ ပဂ္ဂဟေတွာန,
ကတွာ စ နံ ပဒက္ခိဏံ;
ဝန္ဒိတွာ သတ္ထုနော ပါဒေ,
ပက္ကာမိံ အပရံ ဒိသံ.
အစိရံ ဂတမတ္တံ မံ,
မိဂရာဇာ ဝိဟေဌယိ;
ပပါတမနုဂစ္ဆန္တော,
တတ္ထေဝ ပပတိံ အဟံ.
စတုန္နဝုတိတော ကပ္ပေ,
ယံ ပုပ္ဖမဘိရောပယိံ;
ဒုဂ္ဂတိံ နာဘိဇာနာမိ,
ပုပ္ဖပူဇာယိဒံ ဖလံ.
ဆပ္ပညာသမှိ ကပ္ပမှိ,
သတ္တေဝါသုံ မဟာယသာ;
သတ္တရတနသမ္ပန္နာ,
စက္ကဝတ္တီ မဟဗ္ဗလာ.
ပဋိသမ္ဘိဒါ စတဿော,
ဝိမောက္ခာပိ စ အဋ္ဌိမေ;
ဆဠဘိညာ သစ္ဆိကတာ,
ကတံ ဗုဒ္ဓဿ သာသနံ”.
ဣတ္ထံ သုဒံ အာယသ္မာ တိမိရပုပ္ဖိယော ထေရော ဣမာ ဂါထာယော အဘာသိတ္ထာတိ.
တိမိရပုပ္ဖိယတ္ထေရဿာပဒါနံ ပဌမံ.