9.4 အဓောပုပ္ဖိယတ္ထေရအပဒါန
Review
22.
1713
“အဘိဘူ နာမ သော ဘိက္ခု,
သိခိနော အဂ္ဂသာဝကော;
မဟာနုဘာဝေါ တေဝိဇ္ဇော,
ဟိမဝန္တံ ဥပါဂမိ.
23.
1714
အဟမ္ပိ ဟိမဝန္တမှိ,
ရမဏီယဿမေ ဣသိ;
ဝသာမိ အပ္ပမညာသု,
ဣဒ္ဓီသု စ တဒါ ဝသီ._
24.
1715
ပက္ခိဇာတော ဝိယာကာသေ,
ပဗ္ဗတံ အဓိဝတ္ထယိံ;
အဓောပုပ္ဖံ ဂဟေတွာန,
အာဂစ္ဆိံ ပဗ္ဗတံ အဟံ.
25.
1716
သတ္တ ပုပ္ဖါနိ ဂဏှိတွာ,
မတ္ထကေ ဩကိရိံ အဟံ;
အာလောကိတေ စ ဝီရေန,
ပက္ကာမိံ ပါစိနာမုခေါ.
26.
1717
အာဝါသံ အဘိသမ္ဘောသိံ,
ပတွာန အဿမံ အဟံ;
ခါရိဘာရံ ဂဟေတွာန,
ပါယာသိံ ပဗ္ဗတန္တရံ.
27.
1718
အဇဂရော မံ ပီဠေသိ,
ဃောရရူပေါ မဟဗ္ဗလော;
ပုဗ္ဗကမ္မံ သရိတွာန,
တတ္ထ ကာလင်္ကတော အဟံ.
28.
1719
ဧကတ္တိံသေ ဣတော ကပ္ပေ,
ယံ ပုပ္ဖမဘိရောပယိံ;
ဒုဂ္ဂတိံ နာဘိဇာနာမိ,
ပုပ္ဖပူဇာယိဒံ ဖလံ.
29.
1720
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
1721
ဣတ္ထံ သုဒံ အာယသ္မာ အဓောပုပ္ဖိယော ထေရော ဣမာ ဂါထာယော အဘာသိတ္ထာတိ.
1722
အဓောပုပ္ဖိယတ္ထေရဿာပဒါနံ စတုတ္ထံ.