2.9 ဥပ္ပလဝဏ္ဏာထေရီအပဒါန
“ဘိက္ခုနီ ဥပ္ပလဝဏ္ဏာ,
ဣဒ္ဓိယာ ပါရမိံ ဂတာ;_
ဝန္ဒိတွာ သတ္ထုနော ပါဒေ,
ဣဒံ ဝစနမဗြဝိ._
‘နိတ္ထိဏ္ဏာ ဇာတိသံသာရံ,
ပတ္တာဟံ အစလံ ပဒံ;
သဗ္ဗဒုက္ခံ မယာ ခီဏံ,
အာရောစေမိ မဟာမုနိ.
ယာဝတာ ပရိသာ အတ္ထိ,
ပသန္နာ ဇိနသာသနေ;
ယဿာ စ မေပရာဓောတ္ထိ,
ခမန္တု ဇိနသမ္မုခါ.
သံသာရေ သံသရန္တိယာ,
ခလိတံ မေ သစေ ဘဝေ;
အာရောစေမိ မဟာဝီရ,
အပရာဓံ ခမဿု တံ’.
‘ဣဒ္ဓိဉ္စာပိ နိဒဿေဟိ,
မမ သာသနကာရိကေ;
စတဿော ပရိသာ အဇ္ဇ,
ကင်္ခံ ဆိန္ဒာဟိ ယာဝတာ’.
‘ဓီတာ တုယှံ မဟာဝီရ,
ပညဝန္တ ဇုတိန္ဓရ;
ဗဟုဉ္စ ဒုက္ကရံ ကမ္မံ,
ကတံ မေ အတိဒုက္ကရံ.
ဥပ္ပလဿေဝ မေ ဝဏ္ဏော,_
နာမေနုပ္ပလနာမိကာ;
သာဝိကာ တေ မဟာဝီရ,
ပါဒေ ဝန္ဒာမိ စက္ခုမ.
ရာဟုလော စ အဟဉ္စေဝ,
နေကဇာတိသတေ ဗဟူ;
ဧကသ္မိံ သမ္ဘဝေ ဇာတာ,
သမာနဆန္ဒမာနသာ.
နိဗ္ဗတ္တိ ဧကတော ဟောတိ,
ဇာတိယာပိ စ ဧကတော;
ပစ္ဆိမေ ဘဝေ သမ္ပတ္တေ,
ဥဘောပိ နာနာသမ္ဘဝါ._
ပုတ္တော စ ရာဟုလော နာမ,
ဓီတာ ဥပ္ပလသဝှယာ;
ပဿ ဝီရ မမံ ဣဒ္ဓိံ,
ဗလံ ဒဿေမိ သတ္ထုနော’.
မဟာသမုဒ္ဒေ စတုရော,
ပက္ခိပိ ဟတ္ထပါတိယံ;
တေလံ ဟတ္ထဂတဉ္စေဝ,
ခိဍ္ဍော ကောမာရကော ယထာ.
ဥဗ္ဗတ္တယိတွာ ပထဝိံ,_
ပက္ခိပိ ဟတ္ထပါတိယံ;
စိတ္တံ မုဉ္ဇံ ယထာ နာမ,
လုဉ္စိ ကောမာရကော ယုဝါ.
စက္ကဝါဠသမံ ပါဏိံ,
ဆာဒယိတွာန မတ္ထကေ;
ဝဿာပေတွာန ဖုသိတံ,
နာနာဝဏ္ဏံ ပုနပ္ပုနံ.
ဘူမိံ ဥဒုက္ခလံ ကတွာ,
ဓညံ ကတွာန သက္ခရံ;
သိနေရုံ မုသလံ ကတွာ,
မဒ္ဒိ ကောမာရိကာ ယထာ.
‘ဓီတာဟံ ဗုဒ္ဓသေဋ္ဌဿ,
နာမေနုပ္ပလသဝှယာ;
အဘိညာသု ဝသီဘူတာ,
တဝ သာသနကာရိကာ.
နာနာဝိကုဗ္ဗနံ ကတွာ,
ဒဿေတွာ လောကနာယကံ;
နာမဂေါတ္တဉ္စ သာဝေတွာ,
ပါဒေ ဝန္ဒာမိ စက္ခုမ.
ဣဒ္ဓီသု စ ဝသီ ဟောမိ,_
ဒိဗ္ဗာယ သောတဓာတုယာ;
စေတောပရိယဉာဏဿ,
ဝသီ ဟောမိ မဟာမုနေ.
ပုဗ္ဗေနိဝါသံ ဇာနာမိ,
ဒိဗ္ဗစက္ခု ဝိသောဓိတံ;
သဗ္ဗာသဝါ ပရိက္ခီဏာ,
နတ္ထိ ဒါနိ ပုနဗ္ဘဝေါ.
အတ္ထဓမ္မနိရုတ္တီသု,
ပဋိဘာနေ တထေဝ စ;
ဉာဏံ မေ ဝိမလံ သုဒ္ဓံ,
သဘာဝေန မဟေသိနော.
ပုရိမာနံ ဇိနဂ္ဂါနံ,
သင်္ဂမံ တေ နိဒဿိတံ;
အဓိကာရံ ဗဟုံ မယှံ,
တုယှတ္ထာယ မဟာမုနိ.
ယံ မယာ ပူရိတံ ကမ္မံ,
ကုသလံ သရ မေ မုနိ;
တဝတ္ထာယ မဟာဝီရ,
ပုညံ ဥပစိတံ မယာ.
အဘဗ္ဗဋ္ဌာနေ ဝဇ္ဇေတွာ,
ဝါရယန္တီ အနာစရံ;
တဝတ္ထာယ မဟာဝီရ,
စတ္တံ မေ ဇီဝိတုတ္တမံ.
ဒသကောဋိသဟဿာနိ,
အဒါသိံ မမ ဇီဝိတံ;
ပရိစ္စတ္တာ စ မေ ဟောမိ,
တဝတ္ထာယ မဟာမုနိ’.
တဒါတိဝိမှိတာ သဗ္ဗာ,
သိရသာဝ ကတဉ္ဇလီ;
‘အဝေါစယျေ ကထံ အာသိ,
အတုလိဒ္ဓိပရက္ကမာ’.
သတသဟဿိတော ကပ္ပေ,
နာဂကညာ အဟံ တဒါ;
ဝိမလာ နာမ နာမေန,
ကညာနံ သာဓုသမ္မတာ.
မဟောရဂေါ မဟာနာဂေါ,
ပသန္နော ဇိနသာသနေ;
ပဒုမုတ္တရံ မဟာတေဇံ,
နိမန္တေသိ သသာဝကံ.
ရတနမယံ မဏ္ဍပံ,
ပလ္လင်္ကံ ရတနာမယံ;
ရတနံ ဝါလုကာကိဏ္ဏံ,
ဥပဘောဂံ ရတနာမယံ._
မဂ္ဂဉ္စ ပဋိယာဒေသိ,
ရတနဒ္ဓဇဘူသိတံ;
ပစ္စုဂ္ဂန္တွာန သမ္ဗုဒ္ဓံ,
ဝဇ္ဇန္တော တူရိယေဟိ သော.
ပရိသာဟိ စ စတူဟိ,
ပရိဝုတော လောကနာယကော;
မဟောရဂဿ ဘဝနေ,
နိသီဒိ ပရမာသနေ.
အန္နံ ပါနံ ခါဒနီယံ,
ဘောဇနဉ္စ မဟာရဟံ;
ဝရံ ဝရဉ္စ ပါဒါသိ,
နာဂရာဇာ မဟာယသံ.
ဘုဉ္ဇိတွာန သမ္ဗုဒ္ဓေါ,
ပတ္တံ ဓောဝိတွာ ယောနိသော;
အနုမောဒနီယံကာသိ,
နာဂကညာ မဟိဒ္ဓိကာ.
သဗ္ဗညုံ ဖုလ္လိတံ ဒိသွာ,
နာဂကညာ မဟာယသံ;
ပသန္နံ သတ္ထုနော စိတ္တံ,
သုနိဗန္ဓဉ္စ မာနသံ.
မမဉ္စ စိတ္တမညာယ,
ဇလဇုတ္တမနာမကော;
တသ္မိံ ခဏေ မဟာဝီရော,
ဘိက္ခုနိံ ဒဿယိဒ္ဓိယာ.
ဣဒ္ဓီ အနေကာ ဒဿေသိ,_
ဘိက္ခုနီ သာ ဝိသာရဒါ;
ပမောဒိတာ ဝေဒဇာတာ,
သတ္ထာရံ ဣဒမဗြဝိ.
‘အဒ္ဒသာဟံ ဣမံ ဣဒ္ဓိံ,
သုမနံ ဣတရာယပိ;
ကထံ အဟောသိ သာ ဝီရ,
ဣဒ္ဓိယာ သုဝိသာရဒါ’._
‘ဩရသာ မုခတော ဇာတာ,
ဓီတာ မမ မဟိဒ္ဓိကာ;
မမာနုသာသနိကရာ,
ဣဒ္ဓိယာ သုဝိသာရဒါ’._
ဗုဒ္ဓဿ ဝစနံ သုတွာ,
ဧဝံ ပတ္ထေသဟံ တဒါ;
‘အဟမ္ပိ တာဒိသာ ဟောမိ,
ဣဒ္ဓိယာ သုဝိသာရဒါ._
ပမောဒိတာဟံ သုမနာ,
ပတ္ထေ ဥတ္တမမာနသာ;
အနာဂတမှိ အဒ္ဓါနေ,
ဤဒိသာ ဟောမိ နာယက’.
မဏိမယမှိ ပလ္လင်္ကေ,
မဏ္ဍပမှိ ပဘဿရေ;
အန္နပါနေန တပ္ပေတွာ,
သသံဃံ လောကနာယကံ.
နာဂါနံ ပဝရံ ပုပ္ဖံ,
အရုဏံ နာမ ဥပ္ပလံ;
‘ဝဏ္ဏံ မေ ဤဒိသံ ဟောတု’,
ပူဇေသိံ လောကနာယကံ.
တေန ကမ္မေန သုကတေန,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
တတော စုတာဟံ မနုဇေ,
ဥပပန္နာ သယမ္ဘုနော;_
ဥပ္ပလေဟိ ပဋိစ္ဆန္နံ,_
ပိဏ္ဍပါတမဒါသဟံ.
ဧကနဝုတိတော ကပ္ပေ,
ဝိပဿီ နာမ နာယကော;
ဥပ္ပဇ္ဇိ စာရုဒဿနော,_
သဗ္ဗဓမ္မေသု စက္ခုမာ.
သေဋ္ဌိဓီတာ တဒါ ဟုတွာ,
ဗာရာဏသိပုရုတ္တမေ;
နိမန္တေတွာန သမ္ဗုဒ္ဓံ,
သသံဃံ လောကနာယကံ.
မဟာဒါနံ ဒဒိတွာန,
ဥပ္ပလေဟိ ဝိနာယကံ;_
ပူဇယိတွာ စေတသာဝ,
ဝဏ္ဏသောဘံ အပတ္ထယိံ.
ဣမမှိ ဘဒ္ဒကေ ကပ္ပေ,_
ဗြဟ္မဗန္ဓု မဟာယသော;
ကဿပေါ နာမ ဂေါတ္တေန,
ဥပ္ပဇ္ဇိ ဝဒတံ ဝရော._
ဥပဋ္ဌာကော မဟေသိဿ,_
တဒါ အာသိ နရိဿရော;
ကာသိရာဇာ ကိကီ နာမ,
ဗာရာဏသိပုရုတ္တမေ.
တဿာသိံ ဒုတိယာ ဓီတာ,
သမဏဂုတ္တသဝှယာ;
ဓမ္မံ သုတွာ ဇိနဂ္ဂဿ,
ပဗ္ဗဇ္ဇံ သမရောစယိံ.
အနုဇာနိ န နော တာတော,
အဂါရေဝ တဒါ မယံ;
ဝီသဝဿသဟဿာနိ,
ဝိစရိမှ အတန္ဒိတာ.
ကောမာရိဗြဟ္မစရိယံ,
ရာဇကညာ သုခေဓိတာ;
ဗုဒ္ဓေါပဋ္ဌာနနိရတာ,
မုဒိတာ သတ္တဓီတရော.
သမဏီ သမဏဂုတ္တာ စ,
ဘိက္ခုနီ ဘိက္ခုဒါယိကာ;
ဓမ္မာ စေဝ သုဓမ္မာ စ,
သတ္တမီ သံဃဒါယိကာ.
အဟံ ခေမာ စ သပ္ပညာ,
ပဋာစာရာ စ ကုဏ္ဍလာ;
ကိသာဂေါတမီ ဓမ္မဒိန္နာ,
ဝိသာခါ ဟောတိ သတ္တမီ.
တေဟိ ကမ္မေဟိ သုကတေဟိ,
စေတနာပဏိဓီဟိ စ;
ဇဟိတွာ မာနုသံ ဒေဟံ,
တာဝတိံသမဂစ္ဆဟံ.
တတော စုတာ မနုဿေသု,
ဥပပန္နာ မဟာကုလေ;_
ပီတံ မဋ္ဌံ ဝရံ ဒုဿံ,
အဒံ အရဟတော အဟံ.
တတော စုတာရိဋ္ဌပုရေ,
ဇာတာ ဝိပ္ပကုလေ အဟံ;
ဓီတာ တိရိဋိဝစ္ဆဿ,
ဥမ္မာဒန္တီ မနောဟရာ._
တတော စုတာ ဇနပဒေ,
ကုလေ အညတရေ အဟံ;
ပသူတာ နာတိဖီတမှိ,
သာလိံ ဂေါပေမဟံ တဒါ.
ဒိသွာ ပစ္စေကသမ္ဗုဒ္ဓံ,
ပဉ္စလာဇာသတာနိဟံ;
ဒတွာ ပဒုမစ္ဆန္နာနိ,
ပဉ္စ ပုတ္တသတာနိဟံ.
ပတ္ထယိံ တေပိ ပတ္ထေသုံ,
မဓုံ ဒတွာ သယမ္ဘုနော;
တတော စုတာ အရညေဟံ,
အဇာယိံ ပဒုမောဒရေ.
ကာသိရညော မဟေသီဟံ,
ဟုတွာ သက္ကတပူဇိတာ;
အဇနိံ ရာဇပုတ္တာနံ,
အနူနံ သတပဉ္စကံ.
ယဒါ တေ ယောဗ္ဗနပ္ပတ္တာ,
ကီဠန္တာ ဇလကီဠိတံ;
ဒိသွာ ဩပတ္တပဒုမံ,
အာသုံ ပစ္စေကနာယကာ.
သာဟံ တေဟိ ဝိနာဘူတာ,
သုတဝီရေဟိ သောကိနီ;
စုတာ ဣသိဂိလိပဿေ,
ဂါမကမှိ အဇာယိဟံ.
ယဒါ ဗုဒ္ဓါ သုတမတီ,
သုတာနံ ဘတ္တုနောပိ စ;
ယာဂုံ အာဒါယ ဂစ္ဆန္တီ,
အဋ္ဌ ပစ္စေကနာယကေ.
ဘိက္ခာယ ဂါမံ ဂစ္ဆန္တေ,
ဒိသွာ ပုတ္တေ အနုဿရိံ;
ခီရဓာရာ ဝိနိဂ္ဂစ္ဆိ,
တဒါ မေ ပုတ္တပေမသာ.
တတော တေသံ အဒံ ယာဂုံ,
ပသန္နာ သေဟိ ပါဏိဘိ;
တတော စုတာဟံ တိဒသံ,
နန္ဒနံ ဥပပဇ္ဇဟံ.
အနုဘောတွာ သုခံ ဒုက္ခံ,
သံသရိတွာ ဘဝါဘဝေ;
တဝတ္ထာယ မဟာဝီရ,
ပရိစ္စတ္တဉ္စ ဇီဝိတံ.
ဧဝံ ဗဟုဝိဓံ ဒုက္ခံ,
သမ္ပတ္တီ စ ဗဟုဗ္ဗိဓာ;
ပစ္ဆိမေ ဘဝေ သမ္ပတ္တေ,
ဇာတာ သာဝတ္ထိယံ ပုရေ.
မဟာဓနသေဋ္ဌိကုလေ,
သုခိတေ သဇ္ဇိတေ တထာ;
နာနာရတနပဇ္ဇောတေ,
သဗ္ဗကာမသမိဒ္ဓိနေ.
သက္ကတာ ပူဇိတာ စေဝ,
မာနိတာပစိတာ တထာ;
ရူပသောဘဂ္ဂသမ္ပန္နာ,
ကုလေသု အတိသက္ကတာ.
အတီဝ ပတ္ထိတာ စာသိံ,
ရူပဘောဂသိရီဟိ စ;
ပတ္ထိတာ သေဋ္ဌိပုတ္တေဟိ,
အနေကေဟိ သတေဟိပိ.
အဂါရံ ပဇဟိတွာန,
ပဗ္ဗဇိံ အနဂါရိယံ;
အဍ္ဎမာသေ အသမ္ပတ္တေ,
စတုသစ္စမပါပုဏိံ.
ဣဒ္ဓိယာ အဘိနိမ္မိတွာ,_
စတုရဿံ ရထံ အဟံ;
ဗုဒ္ဓဿ ပါဒေ ဝန္ဒိဿံ,
လောကနာထဿ တာဒိနော.
‘သုပုပ္ဖိတဂ္ဂံ ဥပဂမ္မ ပါဒပံ,
ဧကာ တုဝံ တိဋ္ဌသိ သာလမူလေ;
န စာပိ တေ ဒုတိယော အတ္ထိ ကောစိ,
ဗာလေ န တွံ ဘာယသိ ဓုတ္တကာနံ’.
‘သတံ သဟဿာနိပိ ဓုတ္တကာနံ,
သမာဂတာ ဧဒိသကာ ဘဝေယျုံ;
လောမံ န ဣဉ္ဇေ န သမ္ပဝေဓေ,
ကိံ မေ တုဝံ မာရ ကရိဿသေကော.
ဧသာ အန္တရဓာယာမိ,
ကုစ္ဆိံ ဝါ ပဝိသာမိ တေ;
ဘမုကန္တရိကာယမ္ပိ,
တိဋ္ဌန္တိံ မံ န ဒက္ခသိ.
စိတ္တသ္မိံ ဝသီဘူတာမှိ,
ဣဒ္ဓိပါဒါ သုဘာဝိတာ;_
သဗ္ဗဗန္ဓနမုတ္တာမှိ,
န တံ ဘာယာမိ အာဝုသော.
သတ္တိသူလူပမာ ကာမာ,
ခန္ဓာသံ အဓိကုဋ္ဋနာ;
ယံ တွံ ကာမရတိံ ဗြူသိ,
အရတီ ဒါနိ သာ မမ.
သဗ္ဗတ္ထ ဝိဟတာ နန္ဒီ,
တမောခန္ဓော ပဒါလိတော;
ဧဝံ ဇာနာဟိ ပါပိမ,
နိဟတော တွမသိ အန္တက’.
ဇိနော တမှိ ဂုဏေ တုဋ္ဌော,
ဧတဒဂ္ဂေ ဌပေသိ မံ;
အဂ္ဂါ ဣဒ္ဓိမတီနန္တိ,
ပရိသာသု ဝိနာယကော.
ပရိစိဏ္ဏော မယာ သတ္ထာ,
ကတံ ဗုဒ္ဓဿ သာသနံ;
ဩဟိတော ဂရုကော ဘာရော,
ဘဝနေတ္တိသမူဟတာ.
ယဿတ္ထာယ ပဗ္ဗဇိတာ,
အဂါရသ္မာနဂါရိယံ;
သော မေ အတ္ထော အနုပ္ပတ္တော,
သဗ္ဗသံယောဇနက္ခယော.
စီဝရံ ပိဏ္ဍပါတဉ္စ,
ပစ္စယံ သယနာသနံ;
ခဏေန ဥပနာမေန္တိ,
သဟဿာနိ သမန္တတော.
ကိလေသာ ဈာပိတာ မယှံ,
_ …ပေ… _
ဝိဟရာမိ အနာသဝါ.
သွာဂတံ ဝတ မေ အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ ဥပ္ပလဝဏ္ဏာ ဘိက္ခုနီ ဣမာ ဂါထာယော အဘာသိတ္ထာတိ.
ဥပ္ပလဝဏ္ဏာထေရိယာပဒါနံ နဝမံ.