3.9 ယသောဓရာပမုခဒသဘိက္ခုနီသဟဿအပဒါန
“ကပ္ပေ စ သတသဟဿေ,
စတုရော စ အသင်္ခိယေ;
ဒီပင်္ကရော နာမ ဇိနော,
ဥပ္ပဇ္ဇိ လောကနာယကော._
ဒီပင်္ကရော မဟာဝီရော,
ဝိယာကာသိ ဝိနာယကော;
သုမေဓဉ္စ သုမိတ္တဉ္စ,
သမာနသုခဒုက္ခတံ.
သဒေဝကဉ္စ ပဿန္တော,
ဝိစရန္တော သဒေဝကံ;
တေသံ ပကိတ္တနေ အမှေ,
ဥပဂမ္မ သမာဂမံ._
အမှံ သဗ္ဗပတိ ဟောဟိ,
အနာဂတသမာဂမေ;
သဗ္ဗာဝ တုယှံ ဘရိယာ,
မနာပါ ပိယဝါဒိကာ.
ဒါနံ သီလမယံ သဗ္ဗံ,
ဘာဝနာ စ သုဘာဝိတာ;
ဒီဃရတ္တဉ္စ နော သဗ္ဗံ,
ပရိစ္စတ္တံ မဟာမုနေ.
ဂန္ဓံ ဝိလေပနံ မာလံ,
ဒီပဉ္စ ရတနာမယံ;
ယံ ကိဉ္စိ ပတ္ထိတံ သဗ္ဗံ,
ပရိစ္စတ္တံ မဟာမုနိ.
အညံ ဝါပိ ကတံ ကမ္မံ,
ပရိဘောဂဉ္စ မာနုသံ;
ဒီဃရတ္တဉှိ နော သဗ္ဗံ,
ပရိစ္စတ္တံ မဟာမုနိ.
အနေကဇာတိသံသာရံ,
ဗဟုံ ပုညမ္ပိ နော ကတံ;
ဣဿရမနုဘောတွာန,_
သံသရိတွာ ဘဝါဘဝေ.
ပစ္ဆိမေ ဘဝေ သမ္ပတ္တေ,
သကျပုတ္တနိဝေသနေ;
နာနာကုလူပပန္နာယော,
အစ္ဆရာ ကာမဝဏ္ဏိနီ.
လာဘဂ္ဂေန ယသံ ပတ္တာ,
ပူဇိတာ သဗ္ဗသက္ကတာ;
လာဘိယော အန္နပါနာနံ,
သဒါ သမ္မာနိတာ မယံ.
အဂါရံ ပဇဟိတွာန,
ပဗ္ဗဇိမှနဂါရိယံ;
အဍ္ဎမာသေ အသမ္ပတ္တေ,
သဗ္ဗာ ပတ္တာမှ နိဗ္ဗုတိံ.
လာဘိယော အန္နပါနာနံ,
ဝတ္ထသေနာသနာနိ စ;
ဥပေန္တိ ပစ္စယာ သဗ္ဗေ,_
သဒါ သက္ကတပူဇိတာ.
ကိလေသာ ဈာပိတာ အမှံ,
_ …ပေ… _
ဝိဟရာမ အနာသဝါ.
သွာဂတံ ဝတ နော အာသိ,
_ …ပေ… _
ကတံ ဗုဒ္ဓဿ သာသနံ.
ပဋိသမ္ဘိဒါ စတဿော,
_ …ပေ… _
ကတံ ဗုဒ္ဓဿ သာသနံ”.
ဣတ္ထံ သုဒံ ယသောဓရာပမုခါနိ ဒသဘိက္ခုနီသဟဿာနိ ဘဂဝတော သမ္မုခါ ဣမာ ဂါထာယော အဘာသိတ္ထာတိ.
ယသောဓရာပမုခဒသဘိက္ခုနီသဟဿာပဒါနံ နဝမံ.