14 သုဇာတဗုဒ္ဓဝံသ
“တတ္ထေဝ မဏ္ဍကပ္ပမှိ,
သုဇာတော နာမ နာယကော;
သီဟဟနုသဘက္ခန္ဓော,
အပ္ပမေယျော ဒုရာသဒေါ.
စန္ဒောဝ ဝိမလော သုဒ္ဓေါ,
သတရံသီဝ ပတာပဝါ;
ဧဝံ သောဘတိ သမ္ဗုဒ္ဓေါ,
ဇလန္တော သိရိယာ သဒါ.
ပါပုဏိတွာန သမ္ဗုဒ္ဓေါ,
ကေဝလံ ဗောဓိမုတ္တမံ;
သုမင်္ဂလမှိ နဂရေ,
ဓမ္မစက္ကံ ပဝတ္တယိ.
ဒေသေန္တေ ပဝရံ ဓမ္မံ,
သုဇာတေ လောကနာယကေ;
အသီတိကောဋီ အဘိသမိံသု,
ပဌမေ ဓမ္မဒေသနေ.
ယဒါ သုဇာတော အမိတယသော,
ဒေဝေ ဝဿံ ဥပါဂမိ;
သတ္တတိံသသတသဟဿာနံ,
ဒုတိယာဘိသမယော အဟု.
ယဒါ သုဇာတော အသမသမော,
ဥပဂစ္ဆိ ပိတုသန္တိကံ;_
သဋ္ဌိသတသဟဿာနံ,
တတိယာဘိသမယော အဟု.
သန္နိပါတာ တယော အာသုံ,
သုဇာတဿ မဟေသိနော;
ခီဏာသဝါနံ ဝိမလာနံ,
သန္တစိတ္တာန တာဒိနံ.
အဘိညာဗလပ္ပတ္တာနံ,
အပ္ပတ္တာနံ ဘဝါဘဝေ;
သဋ္ဌိသတသဟဿာနိ,
ပဌမံ သန္နိပတိံသု တေ.
ပုနာပရံ သန္နိပါတေ,
တိဒိဝေါရောဟဏေ ဇိနေ;
ပညာသသတသဟဿာနံ,
ဒုတိယော အာသိ သမာဂမော.
ဥပသင်္ကမန္တော နရာသဘံ,_
တဿ ယော အဂ္ဂသာဝကော;
စတူဟိ သတသဟဿေဟိ,
သမ္ဗုဒ္ဓံ ဥပသင်္ကမိ.
အဟံ တေန သမယေန,
စတုဒီပမှိ ဣဿရော;
အန္တလိက္ခစရော အာသိံ,
စက္ကဝတ္တီ မဟဗ္ဗလော.
လောကေ အစ္ဆရိယံ ဒိသွာ,
အဗ္ဘုတံ လောမဟံသနံ;
ဥပဂန္တွာန ဝန္ဒိံ သော,_
သုဇာတံ လောကနာယကံ.
စတုဒီပေ မဟာရဇ္ဇံ,
ရတနေ သတ္တ ဥတ္တမေ;
ဗုဒ္ဓေ နိယျာဒယိတွာန,
ပဗ္ဗဇိံ တဿ သန္တိကေ.
အာရာမိကာ ဇနပဒေ,
ဥဋ္ဌာနံ ပဋိပိဏ္ဍိယ;_
ဥပနေန္တိ ဘိက္ခုသံဃဿ,_
ပစ္စယံ သယနာသနံ.
သောပိ မံ ဗုဒ္ဓေါ ဗျာကာသိ,
ဒသသဟဿိမှိ ဣဿရော;
‘တိံသကပ္ပသဟဿမှိ,
အယံ ဗုဒ္ဓေါ ဘဝိဿတိ.
ပဓာနံ ပဒဟိတွာန,
_ …ပေ… _
ဟေဿာမ သမ္မုခါ ဣမံ’.
တဿာပိ ဝစနံ သုတွာ,
ဘိယျော ဟာသံ ဇနေသဟံ;
အဓိဋ္ဌဟိံ ဝတံ ဥဂ္ဂံ,
ဒသပါရမိပူရိယာ.
သုတ္တန္တံ ဝိနယဉ္စာပိ,
နဝင်္ဂံ သတ္ထုသာသနံ;
သဗ္ဗံ ပရိယာပုဏိတွာန,
သောဘယိံ ဇိနသာသနံ.
တတ္ထပ္ပမတ္တော ဝိဟရန္တော,
ဗြဟ္မံ ဘာဝေတွ ဘာဝနံ;
အဘိညာပါရမိံ ဂန္တွာ,
ဗြဟ္မလောကမဂဉ္ဆဟံ.
သုမင်္ဂလံ နာမ နဂရံ,
ဥဂ္ဂတော နာမ ခတ္တိယော;_
မာတာ ပဘာဝတီ နာမ,
သုဇာတဿ မဟေသိနော.
နဝဝဿသဟဿာနိ,
အဂါရံ အဇ္ဈ သော ဝသိ;
သိရီ ဥပသိရီ နန္ဒော,
တယော ပါသာဒမုတ္တမာ.
တေဝီသတိသဟဿာနိ,
နာရိယော သမလင်္ကတာ;
သိရိနန္ဒာ နာမ နာရီ,
ဥပသေနော နာမ အတြဇော._
နိမိတ္တေ စတုရော ဒိသွာ,
အဿယာနေန နိက္ခမိ;
အနူနနဝမာသာနိ,
ပဓာနံ ပဒဟီ ဇိနော.
ဗြဟ္မုနာ ယာစိတော သန္တော,
သုဇာတော လောကနာယကော;
ဝတ္တိ စက္ကံ မဟာဝီရော,
သုမင်္ဂလုယျာနမုတ္တမေ.
သုဒဿနော သုဒေဝေါ စ,
အဟေသုံ အဂ္ဂသာဝကာ;
နာရဒေါ နာမုပဋ္ဌာကော,
သုဇာတဿ မဟေသိနော.
နာဂါ စ နာဂသမာလာ စ,
အဟေသုံ အဂ္ဂသာဝိကာ;
ဗောဓိ တဿ ဘဂဝတော,
မဟာဝေဠူတိ ဝုစ္စတိ.
သော စ ရုက္ခော ဃနက္ခန္ဓော,
အစ္ဆိဒ္ဒေါ ဟောတိ ပတ္တိကော;
ဥဇု ဝံသော ဗြဟာ ဟောတိ,_
ဒဿနီယော မနောရမော.
ဧကက္ခန္ဓော ပဝဍ္ဎိတွာ,
တတော သာခါ ပဘိဇ္ဇတိ;
ယထာ သုဗဒ္ဓေါ မောရဟတ္ထော,
ဧဝံ သောဘတိ သော ဒုမော.
န တဿ ကဏ္ဋကာ ဟောန္တိ,
နာပိ ဆိဒ္ဒံ မဟာ အဟု;
ဝိတ္ထိဏ္ဏသာခေါ အဝိရလော,
သန္ဒစ္ဆာယော မနောရမော.
သုဒတ္တော စေဝ စိတ္တော စ,
အဟေသုံ အဂ္ဂုပဋ္ဌကာ;
သုဘဒ္ဒါ စ ပဒုမာ စ,
အဟေသုံ အဂ္ဂုပဋ္ဌိကာ.
ပညာသရတနော အာသိ,
ဥစ္စတ္တနေန သော ဇိနော;_
သဗ္ဗာကာရဝရူပေတော,
သဗ္ဗဂုဏမုပါဂတော.
တဿ ပဘာ အသမသမာ,
နိဒ္ဓါဝတိ သမန္တတော;
အပ္ပမာဏော အတုလိယော,
ဩပမ္မေဟိ အနူပမော.
နဝုတိဝဿသဟဿာနိ,
အာယု ဝိဇ္ဇတိ တာဝဒေ;
တာဝတာ တိဋ္ဌမာနော သော,
တာရေသိ ဇနတံ ဗဟုံ.
ယထာပိ သာဂရေ ဦမီ,
ဂဂနေ တာရကာ ယထာ;
ဧဝံ တဒါ ပါဝစနံ,
အရဟန္တေဟိ စိတ္တိတံ.
သော စ ဗုဒ္ဓေါ အသမသမော,
ဂုဏာနိ စ တာနိ အတုလိယာနိ;
သဗ္ဗံ တမန္တရဟိတံ,
နနု ရိတ္တာ သဗ္ဗသင်္ခါရာ.
သုဇာတော ဇိနဝရော ဗုဒ္ဓေါ,
သိလာရာမမှိ နိဗ္ဗုတော;
တတ္ထေဝ တဿ စေတိယော,
တီဏိဂါဝုတမုဂ္ဂတော”တိ. (651)
သုဇာတဿ ဘဂဝတော ဝံသော ဒွါဒသမော.