1.3 ပါရာယနတ္ထုတိဂါထာ
ဣဒမဝေါစ ဘဂဝါ မဂဓေသု ဝိဟရန္တော ပါသာဏကေ စေတိယေ, ပရိစာရကသောဠသာနံ ဗြာဟ္မဏာနံ အဇ္ဈိဋ္ဌော ပုဋ္ဌော ပုဋ္ဌော ပဉှံ ဗျာကာသိ. ဧကမေကဿ စေပိ ပဉှဿ အတ္ထမညာယ ဓမ္မမညာယ ဓမ္မာနုဓမ္မံ ပဋိပဇ္ဇေယျ, ဂစ္ဆေယျေဝ ဇရာမရဏဿ ပါရံ. “ပါရင်္ဂမနီယာ ဣမေ ဓမ္မာ”တိ— တသ္မာ ဣမဿ ဓမ္မပရိယာယဿ ပါရာယနန္တေဝ အဓိဝစနံ.
အဇိတော တိဿမေတ္တေယျော,
ပုဏ္ဏကော အထ မေတ္တဂူ;
ဓောတကော ဥပသီဝေါ စ,
နန္ဒော စ အထ ဟေမကော. (1)
တောဒေယျကပ္ပါ ဒုဘယော,
ဇတုကဏ္ဏီ စ ပဏ္ဍိတော;
ဘဒြာဝုဓော ဥဒယော စ,
ပေါသာလော စာပိ ဗြာဟ္မဏော;
မောဃရာဇာ စ မေဓာဝီ,
ပိင်္ဂိယော စ မဟာဣသိ. (2)
ဧတေ ဗုဒ္ဓံ ဥပါဂစ္ဆုံ,
သမ္ပန္နစရဏံ ဣသိံ;
ပုစ္ဆန္တာ နိပုဏေ ပဉှေ,
ဗုဒ္ဓသေဋ္ဌံ ဥပါဂမုံ. (3)
တေသံ ဗုဒ္ဓေါ ပဗျာကာသိ,
ပဉှေ ပုဋ္ဌော ယထာတထံ;
ပဉှာနံ ဝေယျာကရဏေန,
တောသေသိ ဗြာဟ္မဏေ မုနိ. (4)
တေ တောသိတာ စက္ခုမတာ,
ဗုဒ္ဓေနာဒိစ္စဗန္ဓုနာ;
ဗြဟ္မစရိယမစရိံသု,
ဝရပညဿ သန္တိကေ. (5)
ဧကမေကဿ ပဉှဿ,
ယထာ ဗုဒ္ဓေန ဒေသိတံ;
တထာ ယော ပဋိပဇ္ဇေယျ,
ဂစ္ဆေ ပါရံ အပါရတော. (6)
အပါရာ ပါရံ ဂစ္ဆေယျ,
ဘာဝေန္တော မဂ္ဂမုတ္တမံ;
မဂ္ဂေါ သော ပါရံ ဂမနာယ,
တသ္မာ ပါရာယနံ ဣတိ. (7)