2.1.13 ဥဒယမာဏဝပုစ္ဆာနိဒ္ဒေသ
ဈာယိံ ဝိရဇမာသီနံ, (ဣစ္စာယသ္မာ ဥဒယော)
ကတကိစ္စံ အနာသဝံ;
ပါရဂုံ သဗ္ဗဓမ္မာနံ,
အတ္ထိ ပဉှေန အာဂမံ;
အညာဝိမောက္ခံ ပဗြူဟိ ,
အဝိဇ္ဇာယ ပဘေဒနံ. (1)
ဈာယိံ ဝိရဇမာသီနန် တိ. ဈာယိန် တိ ဈာယီ ဘဂဝါ. ပဌမေနပိ ဈာနေန ဈာယီ, ဒုတိယေနပိ ဈာနေန ဈာယီ, တတိယေနပိ ဈာနေန ဈာယီ, စတုတ္ထေနပိ ဈာနေန ဈာယီ, သဝိတက္ကသဝိစာရေနပိ ဈာနေန ဈာယီ, အဝိတက္ကဝိစာရမတ္တေနပိ ဈာနေန ဈာယီ, အဝိတက္ကအဝိစာရေနပိ ဈာနေန ဈာယီ, သပ္ပီတိကေနပိ ဈာနေန ဈာယီ, နိပ္ပီတိကေနပိ ဈာနေန ဈာယီ, သာတသဟဂတေနပိ ဈာနေန ဈာယီ, ဥပေက္ခာသဟဂတေနပိ ဈာနေန ဈာယီ, သုညတေနပိ ဈာနေန ဈာယီ, အနိမိတ္တေနပိ ဈာနေန ဈာယီ, အပ္ပဏိဟိတေနပိ ဈာနေန ဈာယီ, လောကိယေနပိ ဈာနေန ဈာယီ, လောကုတ္တရေနပိ ဈာနေန ဈာယီ ဈာနရတော ဧကတ္တမနုယုတ္တော သဒတ္ထဂရုကောတိ— ဈာယိံ. ဝိရဇန် တိ ရာဂေါ ရဇော, ဒေါသော ရဇော, မောဟော ရဇော, ကောဓော ရဇော, ဥပနာဟော ရဇော …ပေ… သဗ္ဗာကုသလာဘိသင်္ခါရာ ရဇာ. တေ ရဇာ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ အရဇော ဝိရဇော နိရဇော ရဇာပဂတော ရဇဝိပ္ပဟီနော ရဇဝိပ္ပယုတ္တော သဗ္ဗရဇဝီတိဝတ္တော.
ရာဂေါ ရဇော န စ ပန ရေဏု ဝုစ္စတိ,
ရာဂဿေတံ အဓိဝစနံ ရဇောတိ;
ဧတံ ရဇံ ဝိပ္ပဇဟိတွာ စက္ခုမာ,
တသ္မာ ဇိနော ဝိဂတရဇောတိ ဝုစ္စတိ.
ဒေါသော ရဇော န စ ပန ရေဏု ဝုစ္စတိ,
ဒေါသဿေတံ အဓိဝစနံ ရဇောတိ;
ဧတံ ရဇံ ဝိပ္ပဇဟိတွာ စက္ခုမာ,
တသ္မာ ဇိနော ဝိဂတရဇောတိ ဝုစ္စတိ.
မောဟော ရဇော န စ ပန ရေဏု ဝုစ္စတိ,
မောဟဿေတံ အဓိဝစနံ ရဇောတိ;
ဧတံ ရဇံ ဝိပ္ပဇဟိတွာ စက္ခုမာ,
တသ္မာ ဇိနော ဝိဂတရဇောတိ ဝုစ္စတီတိ.—
ဝိရဇံ …ပေ… . အာသီနန် တိ နိသိန္နော ဘဂဝါ ပါသာဏကေ စေတိယေတိ— အာသီနော.
နဂဿ ပဿေ အာသီနံ,
မုနိံ ဒုက္ခဿ ပါရဂုံ;
သာဝကာ ပယိရုပါသန္တိ,
တေဝိဇ္ဇာ မစ္စုဟာယိနောတိ.
ဧဝမ္ပိ ဘဂဝါ အာသီနော. အထ ဝါ ဘဂဝါ သဗ္ဗောဿုက္ကပဋိပ္ပဿဒ္ဓတ္တာ အာသီနော ဝုတ္ထဝါသော စိဏ္ဏစရဏော …ပေ… ဇာတိမရဏသံသာရော နတ္ထိ တဿ ပုနဗ္ဘဝေါတိ. ဧဝမ္ပိ ဘဂဝါ အာသီနောတိ— ဈာယိံ ဝိရဇမာသီနံ.
ဣစ္စာယသ္မာ ဥဒယော တိ. ဣစ္စာ တိ ပဒသန္ဓိ …ပေ… အာယသ္မာ တိ ပိယဝစနံ …ပေ… ဥဒယော တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ ဥဒယော.
ကတကိစ္စံ အနာသဝန် တိ ဗုဒ္ဓဿ ဘဂဝတော ကိစ္စာကိစ္စံ ကရဏီယာကရဏီယံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝံကတံ အာယတိံ အနုပ္ပါဒဓမ္မံ. တသ္မာ ဗုဒ္ဓေါ ကတကိစ္စော.
ယဿ စ ဝိသတာ နတ္ထိ,
ဆိန္နသောတဿ ဘိက္ခုနော;
ကိစ္စာကိစ္စပ္ပဟီနဿ,
ပရိဠာဟော န ဝိဇ္ဇတီတိ.
ကတကိစ္စံ အနာသဝန် တိ. အာသဝါ တိ စတ္တာရော အာသဝါ— ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ. တေ အာသဝါ ဗုဒ္ဓဿ ဘဂဝတော ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ဗုဒ္ဓေါ အနာသဝေါတိ— ကတကိစ္စံ အနာသဝံ.
ပါရဂုံ သဗ္ဗဓမ္မာနန် တိ ဘဂဝါ သဗ္ဗဓမ္မာနံ အဘိညာပါရဂူ ပရိညာပါရဂူ ပဟာနပါရဂူ ဘာဝနာပါရဂူ သစ္ဆိကိရိယာပါရဂူ သမာပတ္တိပါရဂူ. အဘိညာပါရဂူ သဗ္ဗဓမ္မာနံ, ပရိညာပါရဂူ သဗ္ဗဒုက္ခာနံ, ပဟာနပါရဂူ သဗ္ဗကိလေသာနံ, ဘာဝနာပါရဂူ စတုန္နံ မဂ္ဂါနံ, သစ္ဆိကိရိယာပါရဂူ နိရောဓဿ, သမာပတ္တိပါရဂူ သဗ္ဗသမာပတ္တီနံ. သော ဝသိပ္ပတ္တော ပါရမိပ္ပတ္တော အရိယသ္မိံ သီလသ္မိံ; ဝသိပ္ပတ္တော ပါရမိပ္ပတ္တော အရိယသ္မိံ သမာဓိသ္မိံ; ဝသိပ္ပတ္တော ပါရမိပ္ပတ္တော အရိယာယ ပညာယ; ဝသိပ္ပတ္တော ပါရမိပ္ပတ္တော အရိယာယ ဝိမုတ္တိယာ. သော ပါရဂတော ပါရပ္ပတ္တော အန္တဂတော အန္တပ္ပတ္တော ကောဋိဂတော ကောဋိပ္ပတ္တော ပရိယန္တဂတော ပရိယန္တပ္ပတ္တော ဝေါသာနဂတော ဝေါသာနပ္ပတ္တော တာဏဂတော တာဏပ္ပတ္တော လေဏဂတော လေဏပ္ပတ္တော သရဏဂတော သရဏပ္ပတ္တော အဘယဂတော အဘယပ္ပတ္တော အစ္စုတဂတော အစ္စုတပ္ပတ္တော အမတဂတော အမတပ္ပတ္တော နိဗ္ဗာနဂတော နိဗ္ဗာနပ္ပတ္တော. သော ဝုတ္တဝါသော စိဏ္ဏစရဏော …ပေ… ဇာတိမရဏသံသာရော နတ္ထိ တဿ ပုနဗ္ဘဝေါတိ— ပါရဂုံ သဗ္ဗဓမ္မာနံ.
အတ္ထိ ပဉှေန အာဂမန် တိ ပဉှေန အတ္ထိကော အာဂတောမှိ, ပဉှံ ပုစ္ဆိတုကာမော အာဂတောမှိ, ပဉှံ သောတုကာမော အာဂတောမှီတိ, ဧဝမ္ပိ အတ္ထိ ပဉှေန အာဂမံ. အထ ဝါ ပဉှတ္ထိကာနံ ပဉှံ ပုစ္ဆိတုကာမာနံ ပဉှံ သောတုကာမာနံ အာဂမနံ အဘိက္ကမနံ ဥပသင်္ကမနံ ပယိရုပါသနံ အတ္ထီတိ, ဧဝမ္ပိ အတ္ထိ ပဉှေန အာဂမံ. အထ ဝါ ပဉှာဂမော တုယှံ အတ္ထိ, တွမ္ပိ ပဟု တွမသိ အလမတ္တော မယာ ပုစ္ဆိတံ ကထေတုံ ဝိသဇ္ဇေတုံ, ဝဟဿေတံ ဘာရန္တိ, ဧဝမ္ပိ အတ္ထိ ပဉှေန အာဂမံ.
အညာဝိမောက္ခံ ပဗြူဟီ တိ အညာဝိမောက္ခော ဝုစ္စတိ အရဟတ္တဝိမောက္ခော. အရဟတ္တဝိမောက္ခံ ပဗြူဟိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ— အညာဝိမောက္ခံ ပဗြူဟိ.
အဝိဇ္ဇာယ ပဘေဒနန် တိ အဝိဇ္ဇာယ ဘေဒနံ ပဘေဒနံ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓံ အမတံ နိဗ္ဗာနန္တိ— အဝိဇ္ဇာယ ပဘေဒနံ. တေနာဟ သော ဗြာဟ္မဏော—
“ဈာယိံ ဝိရဇမာသီနံ, (ဣစ္စာယသ္မာ ဥဒယော)
ကတကိစ္စံ အနာသဝံ;
ပါရဂုံ သဗ္ဗဓမ္မာနံ,
အတ္ထိ ပဉှေန အာဂမံ;
အညာဝိမောက္ခံ ပဗြူဟိ,
အဝိဇ္ဇာယ ပဘေဒနန်”တိ.
ပဟာနံ ကာမစ္ဆန္ဒာနံ, (ဥဒယာတိ ဘဂဝါ)
ဒေါမနဿာန စူဘယံ;
ထိနဿ စ ပနူဒနံ,
ကုက္ကုစ္စာနံ နိဝါရဏံ. (2)
ပဟာနံ ကာမစ္ဆန္ဒာနန် တိ. ဆန္ဒော တိ ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပိပါသာ ကာမပရိဠာဟော ကာမမုစ္ဆာ ကာမဇ္ဈောသာနံ ကာမောဃော ကာမယောဂေါ ကာမုပါဒါနံ ကာမစ္ဆန္ဒနီဝရဏံ. ပဟာနံ ကာမစ္ဆန္ဒာနန် တိ ကာမစ္ဆန္ဒာနံ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ပဟာနံ ကာမစ္ဆန္ဒာနံ. ဥဒယာတိ ဘဂဝါ တိ. ဥဒယာ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဥဒယာတိ ဘဂဝါ.
ဒေါမနဿာန စူဘယန် တိ. ဒေါမနဿာ တိ ယံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ, စေတောသမ္ဖဿဇာ အသာတာ ဒုက္ခာ ဝေဒနာ. ဒေါမနဿာန စူဘယန် တိ ကာမစ္ဆန္ဒဿ စ ဒေါမနဿဿ စ ဥဘိန္နံ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ဒေါမနဿာန စူဘယံ.
ထိနဿ စ ပနူဒနန် တိ. ထိနန် တိ ယာ စိတ္တဿ အကလျတာ အကမ္မညတာ ဩလီယနာ သလ္လီယနာ လီနာ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ. ပနူဒနန် တိ ထိနဿ စ ပနူဒနံ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ထိနဿ စ ပနူဒနံ.
ကုက္ကုစ္စာနံ နိဝါရဏန် တိ. ကုက္ကုစ္စန် တိ ဟတ္ထကုက္ကုစ္စမ္ပိ ကုက္ကုစ္စံ, ပါဒကုက္ကုစ္စမ္ပိ ကုက္ကုစ္စံ, ဟတ္ထပါဒကုက္ကုစ္စမ္ပိ ကုက္ကုစ္စံ. အကပ္ပိယေ ကပ္ပိယသညိတာ, ကပ္ပိယေ အကပ္ပိယသညိတာ …ပေ… အဝဇ္ဇေ ဝဇ္ဇသညိတာ, ဝဇ္ဇေ အဝဇ္ဇသညိတာ. ယံ ဧဝရူပံ ကုက္ကုစ္စံ ကုက္ကုစ္စာယနာ ကုက္ကုစ္စာယိတတ္တံ စေတသော ဝိပ္ပဋိသာရော မနောဝိလေခေါ, ဣဒံ ဝုစ္စတိ ကုက္ကုစ္စံ. အပိ စ ဒွီဟိ ကာရဏေဟိ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ— ကတတ္တာ စ အကတတ္တာ စ. ကထံ ကတတ္တာ စ အကတတ္တာ စ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ? “ကတံ မေ ကာယဒုစ္စရိတံ, အကတံ မေ ကာယသုစရိတန်”တိ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ. “ကတံ မေ ဝစီဒုစ္စရိတံ, အကတံ မေ ဝစီသုစရိတန်”တိ …ပေ… “ကတံ မေ မနောဒုစ္စရိတံ, အကတံ မေ မနောသုစရိတန်”တိ …ပေ… “ကတော မေ ပါဏာတိပါတော, အကတာ မေ ပါဏာတိပါတာ ဝေရမဏီ”တိ …ပေ… “ကတံ မေ အဒိန္နာဒါနံ, အကတာ မေ အဒိန္နာဒါနာ ဝေရမဏီ”တိ …ပေ… “ကတော မေ ကာမေသုမိစ္ဆာစာရော, အကတာ မေ ကာမေသုမိစ္ဆာစာရာ ဝေရမဏီ”တိ …ပေ… “ကတော မေ မုသာဝါဒေါ, အကတာ မေ မုသာဝါဒါ ဝေရမဏီ”တိ …ပေ… “ကတာ မေ ပိသုဏာ ဝါစာ, အကတာ မေ ပိသုဏာယ ဝါစာယ ဝေရမဏီ”တိ …ပေ… “ကတာ မေ ဖရုသာ ဝါစာ, အကတာ မေ ဖရုသာယ ဝါစာယ ဝေရမဏီ”တိ …ပေ… “ကတော မေ သမ္ဖပ္ပလာပေါ, အကတာ မေ သမ္ဖပ္ပလာပါ ဝေရမဏီ”တိ …ပေ… “ကတာ မေ အဘိဇ္ဈာ, အကတာ မေ အနဘိဇ္ဈာ”တိ …ပေ… “ကတော မေ ဗျာပါဒေါ, အကတော မေ အဗျာပါဒေါ”တိ …ပေ… “ကတာ မေ မိစ္ဆာဒိဋ္ဌိ, အကတာ မေ သမ္မာဒိဋ္ဌီ”တိ, ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ. ဧဝံ ကတတ္တာ စ အကတတ္တာ စ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ.
အထ ဝါ “သီလေသုမှိ အပရိပူရကာရီ”တိ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ; “ဣန္ဒြိယေသုမှိ အဂုတ္တဒွါရော”တိ …ပေ… “ဘောဇနေ အမတ္တညုမှီ”တိ… “ဇာဂရိယံ အနနုယုတ္တောမှီ”တိ… “န သတိသမ္ပဇညေန သမန္နာဂတောမှီ”တိ… “အဘာဝိတာ မေ စတ္တာရော သတိပဋ္ဌာနာတိ, စတ္တာရော သမ္မပ္ပဓာနာတိ စတ္တာရော ဣဒ္ဓိပါဒါတိ, ပဉ္စိန္ဒြိယာနီတိ, ပဉ္စ ဗလာနီတိ, သတ္တ ဗောဇ္ဈင်္ဂါတိ, အရိယော အဋ္ဌင်္ဂိကော မဂ္ဂေါ”တိ… “ဒုက္ခံ မေ အပရိညာတံ, သမုဒယော မေ အပ္ပဟီနော, မဂ္ဂေါ မေ အဘာဝိတော, နိရောဓော မေ အသစ္ဆိကတော”တိ ဥပ္ပဇ္ဇတိ ကုက္ကုစ္စံ စေတသော ဝိပ္ပဋိသာရော မနောဝိလေခေါ.
ကုက္ကုစ္စာနံ နိဝါရဏန် တိ ကုက္ကုစ္စာနံ အာဝရဏံ နီဝရဏံ ပဟာနံ ဥပသမံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ကုက္ကုစ္စာနံ နိဝါရဏံ. တေနာဟ ဘဂဝါ—
“ပဟာနံ ကာမစ္ဆန္ဒာနံ, (ဥဒယာတိ ဘဂဝါ)
ဒေါမနဿာန စူဘယံ;
ထိနဿ စ ပနူဒနံ,
ကုက္ကုစ္စာနံ နိဝါရဏန်”တိ.
ဥပေက္ခာသတိသံသုဒ္ဓံ ,
ဓမ္မတက္ကပုရေဇဝံ;
အညာဝိမောက္ခံ ပဗြူမိ,
အဝိဇ္ဇာယ ပဘေဒနံ. (3)
ဥပေက္ခာသတိသံသုဒ္ဓန် တိ. ဥပေက္ခာ တိ ယာ စတုတ္ထေ ဈာနေ ဥပေက္ခာ ဥပေက္ခနာ အဇ္ဈုပေက္ခနာ စိတ္တသမတာ စိတ္တပ္ပဿဒ္ဓတာ မဇ္ဈတ္တတာ စိတ္တဿ. သတီ တိ ယာ စတုတ္ထေ ဈာနေ ဥပေက္ခံ အာရဗ္ဘ သတိ အနုဿတိ …ပေ… သမ္မာသတိ. ဥပေက္ခာသတိသံသုဒ္ဓန် တိ စတုတ္ထေ ဈာနေ ဥပေက္ခာ စ သတိ စ သုဒ္ဓါ ဟောန္တိ ဝိသုဒ္ဓါ သံသုဒ္ဓါ ပရိသုဒ္ဓါ ပရိယောဒါတာ အနင်္ဂဏာ ဝိဂတူပက္ကိလေသာ မုဒုဘူတာ ကမ္မနိယာ ဌိတာ အာနေဉ္ဇပ္ပတ္တာတိ— ဥပေက္ခာသတိသံသုဒ္ဓံ.
ဓမ္မတက္ကပုရေဇဝန် တိ ဓမ္မတက္ကော ဝုစ္စတိ သမ္မာသင်္ကပ္ပေါ. သော အာဒိတော ဟောတိ, ပုရတော ဟောတိ, ပုဗ္ဗင်္ဂမော ဟောတိ အညာဝိမောက္ခဿာတိ, ဧဝမ္ပိ ဓမ္မတက္ကပုရေဇဝံ. အထ ဝါ ဓမ္မတက္ကော ဝုစ္စတိ သမ္မာဒိဋ္ဌိ. သာ အာဒိတော ဟောတိ, ပုရတော ဟောတိ, ပုဗ္ဗင်္ဂမော ဟောတိ အညာဝိမောက္ခဿာတိ, ဧဝမ္ပိ ဓမ္မတက္ကပုရေဇဝံ. အထ ဝါ ဓမ္မတက္ကော ဝုစ္စတိ စတုန္နံ မဂ္ဂါနံ ပုဗ္ဗဘာဂဝိပဿနာ. သာ အာဒိတော ဟောတိ, ပုရတော ဟောတိ, ပုဗ္ဗင်္ဂမော ဟောတိ အညာဝိမောက္ခဿာတိ— ဧဝမ္ပိ ဓမ္မတက္ကပုရေဇဝံ.
အညာဝိမောက္ခံ ပဗြူမီ တိ အညာဝိမောက္ခော ဝုစ္စတိ အရဟတ္တဝိမောက္ခော. အရဟတ္တဝိမောက္ခံ ပဗြူမိ အာစိက္ခာမိ ဒေသေမိ ပညပေမိ ပဋ္ဌပေမိ ဝိဝရာမိ ဝိဘဇာမိ ဥတ္တာနီကရောမိ ပကာသေမီတိ— အညာဝိမောက္ခံ ပဗြူမိ.
အဝိဇ္ဇာယ ပဘေဒနန် တိ. အဝိဇ္ဇာ တိ ဒုက္ခေ အညာဏံ …ပေ… အဝိဇ္ဇာ မောဟော အကုသလမူလံ. ပဘေဒနန် တိ အဝိဇ္ဇာယ ပဘေဒနံ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— အဝိဇ္ဇာယ ပဘေဒနံ. တေနာဟ ဘဂဝါ—
“ဥပေက္ခာသတိသံသုဒ္ဓံ,
ဓမ္မတက္ကပုရေဇဝံ;
အညာဝိမောက္ခံ ပဗြူမိ,
အဝိဇ္ဇာယ ပဘေဒနန်”တိ.
ကိံသု သံယောဇနော လောကော,
ကိံသု တဿ ဝိစာရဏံ;
ကိဿဿ ဝိပ္ပဟာနေန,
နိဗ္ဗာနံ ဣတိ ဝုစ္စတိ. (4)
ကိံသု သံယောဇနော လောကော တိ လောကဿ သံယောဇနံ လဂ္ဂနံ ဗန္ဓနံ ဥပက္ကိလေသော. ကေန လောကော ယုတ္တော ပယုတ္တော အာယုတ္တော သမာယုတ္တော လဂ္ဂေါ လဂ္ဂိတော ပလိဗုဒ္ဓေါတိ— ကိံသု သံယောဇနော လောကော.
ကိံသု တဿ ဝိစာရဏန် တိ ကိံသု တဿ စာရဏံ ဝိစာရဏံ ပဋိဝိစာရဏံ. ကေန လောကော စရတိ ဝိစရတိ ပဋိဝိစရတီတိ— ကိံသု တဿ ဝိစာရဏံ. ကိဿဿ ဝိပ္ပဟာနေန နိဗ္ဗာနံ ဣတိ ဝုစ္စတီ တိ ကိဿဿ ဝိပ္ပဟာနေန ဝူပသမေန ပဋိနိဿဂ္ဂေန ပဋိပ္ပဿဒ္ဓိယာ နိဗ္ဗာနံ ဣတိ ဝုစ္စတိ ပဝုစ္စတိ ကထီယတိ ဘဏီယတိ ဒီပီယတိ ဝေါဟရီယတီတိ— ကိဿဿ ဝိပ္ပဟာနေန နိဗ္ဗာနံ ဣတိ ဝုစ္စတိ. တေနာဟ သော ဗြာဟ္မဏော—
“ကိံသု သံယောဇနော လောကော,
ကိံသု တဿ ဝိစာရဏံ;
ကိဿဿ ဝိပ္ပဟာနေန,
နိဗ္ဗာနံ ဣတိ ဝုစ္စတီ”တိ.
နန္ဒိသံယောဇနော လောကော,
ဝိတက္ကဿ ဝိစာရဏံ;
တဏှာယ ဝိပ္ပဟာနေန,
နိဗ္ဗာနံ ဣတိ ဝုစ္စတိ. (5)
နန္ဒိသံယောဇနော လောကော တိ နန္ဒီ ဝုစ္စတိ တဏှာ. ယော ရာဂေါ သာရာဂေါ …ပေ… အဘိဇ္ဈာ လောဘော အကုသလမူလံ, အယံ ဝုစ္စတိ နန္ဒီ. ယာ နန္ဒီ လောကဿ သံယောဇနံ လဂ္ဂနံ ဗန္ဓနံ ဥပက္ကိလေသော, ဣမာယ နန္ဒိယာ လောကော ယုတ္တော ပယုတ္တော အာယုတ္တော သမာယုတ္တော လဂ္ဂေါ လဂ္ဂိတော ပလိဗုဒ္ဓေါတိ— နန္ဒိသံယောဇနော လောကော.
ဝိတက္ကဿ ဝိစာရဏန် တိ. ဝိတက္ကာ တိ နဝ ဝိတက္ကာ— ကာမဝိတက္ကော, ဗျာပါဒဝိတက္ကော, ဝိဟိံသာဝိတက္ကော, ဉာတိဝိတက္ကော ဇနပဒဝိတက္ကော, အမရာဝိတက္ကော, ပရာနုဒယတာပဋိသံယုတ္တော ဝိတက္ကော, လာဘသက္ကာရသိလောကပဋိသံယုတ္တော ဝိတက္ကော, အနဝညတ္တိပဋိသံယုတ္တော ဝိတက္ကော. ဣမေ ဝုစ္စန္တိ နဝ ဝိတက္ကာ. ဣမေ နဝ ဝိတက္ကာ လောကဿ စာရဏာ ဝိစာရဏာ ပဋိဝိစာရဏာ. ဣမေဟိ နဝဟိ ဝိတက္ကေဟိ လောကော စရတိ ဝိစရတိ ပဋိဝိစရတီတိ— ဝိတက္ကဿ ဝိစာရဏံ.
တဏှာယ ဝိပ္ပဟာနေန နိဗ္ဗာနံ ဣတိ ဝုစ္စတီ တိ. တဏှာ တိ ရူပတဏှာ …ပေ… ဓမ္မတဏှာ. တဏှာယ ဝိပ္ပဟာနေန နိဗ္ဗာနံ ဣတိ ဝုစ္စတီ တိ တဏှာယ ဝိပ္ပဟာနေန ဝူပသမေန ပဋိနိဿဂ္ဂေန ပဋိပ္ပဿဒ္ဓိယာ နိဗ္ဗာနံ ဣတိ ဝုစ္စတိ ပဝုစ္စတိ ကထီယတိ ဘဏီယတိ ဒီပီယတိ ဝေါဟရီယတီတိ— တဏှာယ ဝိပ္ပဟာနေန နိဗ္ဗာနံ ဣတိ ဝုစ္စတိ. တေနာဟ ဘဂဝါ—
“နန္ဒိသံယောဇနော လောကော,
ဝိတက္ကဿ ဝိစာရဏံ;
တဏှာယ ဝိပ္ပဟာနေန,
နိဗ္ဗာနံ ဣတိ ဝုစ္စတီ”တိ.
ကထံ သတဿ စရတော,
ဝိညာဏံ ဥပရုဇ္ဈတိ;
ဘဂဝန္တံ ပုဋ္ဌုမာဂမာ,
တံ သုဏောမ ဝစော တဝ. (6)
ကထံ သတဿ စရတော တိ ကထံ သတဿ သမ္ပဇာနဿ စရတော ဝိဟရတော ဣရိယတော ဝတ္တယတော ပါလယတော ယပယတော ယာပယတောတိ— ကထံ သတဿ စရတော.
ဝိညာဏံ ဥပရုဇ္ဈတီ တိ ဝိညာဏံ နိရုဇ္ဈတိ ဝူပသမ္မတိ အတ္ထံ ဂစ္ဆတိ ပဋိပ္ပဿမ္ဘတီတိ— ဝိညာဏံ ဥပရုဇ္ဈတိ.
ဘဂဝန္တံ ပုဋ္ဌုမာဂမာ တိ ဗုဒ္ဓံ ဘဂဝန္တံ ပုဋ္ဌုံ ပုစ္ဆိတုံ ယာစိတုံ အဇ္ဈေသိတုံ ပသာဒေတုံ အာဂမှာ အာဂတမှာ ဥပါဂတမှာ သမ္ပတ္တမှာ, “တယာ သဒ္ဓိံ သမာဂတမှာ”တိ— ဘဂဝန္တံ ပုဋ္ဌုမာဂမာ.
တံ သုဏောမ ဝစော တဝါ တိ. တန် တိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ သုဏောမ ဥဂ္ဂဏှာမ ဓာရေမ ဥပဓာရေမ ဥပလက္ခေမာတိ— တံ သုဏောမ ဝစော တဝ. တေနာဟ သော ဗြာဟ္မဏော—
“ကထံ သတဿ စရတော,
ဝိညာဏံ ဥပရုဇ္ဈတိ;
ဘဂဝန္တံ ပုဋ္ဌုမာဂမာ,
တံ သုဏောမ ဝစော တဝါ”တိ.
အဇ္ဈတ္တဉ္စ ဗဟိဒ္ဓါ စ,
ဝေဒနံ နာဘိနန္ဒတော;
ဧဝံ သတဿ စရတော,
ဝိညာဏံ ဥပရုဇ္ဈတိ. (7)
အဇ္ဈတ္တဉ္စ ဗဟိဒ္ဓါ စ ဝေဒနံ နာဘိနန္ဒတော တိ အဇ္ဈတ္တံ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ; ဗဟိဒ္ဓါ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ; အဇ္ဈတ္တဗဟိဒ္ဓါ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ.
အဇ္ဈတ္တံ သမုဒယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ; အဇ္ဈတ္တံ ဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… အဇ္ဈတ္တံ သမုဒယဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… ဗဟိဒ္ဓါ သမုဒယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ; ဗဟိဒ္ဓါ ဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… ဗဟိဒ္ဓါ သမုဒယဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… အဇ္ဈတ္တဗဟိဒ္ဓါ သမုဒယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… အဇ္ဈတ္တဗဟိဒ္ဓါ ဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော …ပေ… အဇ္ဈတ္တဗဟိဒ္ဓါ သမုဒယဝယဓမ္မာနုပဿီ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ. ဣမေဟိ ဒွါဒသဟိ အာကာရေဟိ ဝေဒနာသု ဝေဒနာနုပဿီ ဝိဟရန္တော …ပေ… အနဘာဝံ ဂမေတိ.
အထ ဝါ ဝေဒနံ အနိစ္စတော ပဿန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ. ဝေဒနံ ဒုက္ခတော ရောဂတော ဂဏ္ဍတော သလ္လတော အဃတော အာဗာဓတော …ပေ… နိဿရဏတော ပဿန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ. ဣမေဟိ စတ္တာလီသာယ အာကာရေဟိ ဝေဒနာသု ဝေဒနာနုပဿီ ဝိဟရန္တော ဝေဒနံ နာဘိနန္ဒတိ နာဘိဝဒတိ န အဇ္ဈောသေတိ, အဘိနန္ဒနံ အဘိဝဒနံ အဇ္ဈောသာနံ ဂါဟံ ပရာမာသံ အဘိနိဝေသံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတီတိ— အဇ္ဈတ္တဉ္စ ဗဟိဒ္ဓါ စ ဝေဒနံ နာဘိနန္ဒတော.
ဧဝံ သတဿ စရတော တိ ဧဝံ သတဿ သမ္ပဇာနဿ စရတော ဝိဟရတော ဣရိယတော ဝတ္တယတော ပါလယတော ယပယတော ယာပယတောတိ— ဧဝံ သတဿ စရတော.
ဝိညာဏံ ဥပရုဇ္ဈတီ တိ ပုညာဘိသင်္ခါရသဟဂတံ ဝိညာဏံ အပုညာဘိသင်္ခါရသဟဂတံ ဝိညာဏံ အာနေဉ္ဇာဘိသင်္ခါရသဟဂတံ ဝိညာဏံ နိရုဇ္ဈတိ ဝူပသမ္မတိ အတ္ထံ ဂစ္ဆတိ ပဋိပ္ပဿမ္ဘတီတိ— ဝိညာဏံ ဥပရုဇ္ဈတိ. တေနာဟ ဘဂဝါ—
“အဇ္ဈတ္တဉ္စ ဗဟိဒ္ဓါ စ,
ဝေဒနံ နာဘိနန္ဒတော;
ဧဝံ သတဿ စရတော,
ဝိညာဏံ ဥပရုဇ္ဈတီ”တိ.
သဟ ဂါထာပရိယောသာနာ …ပေ… သတ္ထာ မေ, ဘန္တေ ဘဂဝါ, သာဝကောဟမသ္မီတိ.
ဥဒယမာဏဝပုစ္ဆာနိဒ္ဒေသော တေရသမော.