2.1.16 ပိင်္ဂိယမာဏဝပုစ္ဆာနိဒ္ဒေသ
ဇိဏ္ဏောဟမသ္မိ အဗလော ဝီတဝဏ္ဏော , (ဣစ္စာယသ္မာ ပိင်္ဂိယော)
နေတ္တာ န သုဒ္ဓါ သဝနံ န ဖာသု;
မာဟံ နဿံ မောမုဟော အန္တရာဝ,
အာစိက္ခ ဓမ္မံ ယမဟံ ဝိဇညံ;
ဇာတိဇရာယ ဣဓ ဝိပ္ပဟာနံ. (1)
ဇိဏ္ဏောဟမသ္မိ အဗလော ဝီတဝဏ္ဏော တိ. ဇိဏ္ဏောဟမသ္မီ တိ ဇိဏ္ဏော ဝုဍ္ဎော မဟလ္လကော အဒ္ဓဂတော ဝယောအနုပ္ပတ္တော ဝီသဝဿသတိကော ဇာတိယာ. အဗလော တိ ဒုဗ္ဗလော အပ္ပဗလော အပ္ပထာမော. ဝီတဝဏ္ဏော တိ ဝီတဝဏ္ဏော ဝိဂတဝဏ္ဏော ဝိဂစ္ဆိတဝဏ္ဏော. ယာ သာ ပုရိမာ သုဘာ ဝဏ္ဏနိဘာ သာ အန္တရဟိတာ, အာဒီနဝေါ ပါတုဘူတောတိ— ဇိဏ္ဏောဟမသ္မိ အဗလော ဝီတဝဏ္ဏော.
ဣစ္စာယသ္မာ ပိင်္ဂိယော တိ. ဣစ္စာ တိ ပဒသန္ဓိ …ပေ… . အာယသ္မာ တိ ပိယဝစနံ …ပေ… . ပိင်္ဂိယော တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ ပိင်္ဂိယော.
နေတ္တာ န သုဒ္ဓါ သဝနံ န ဖာသူ တိ နေတ္တာ အသုဒ္ဓါ အဝိသုဒ္ဓါ အပရိသုဒ္ဓါ အဝေါဒါတာ. နော တထာ စက္ခုနာ ရူပေ ပဿာမီတိ— နေတ္တာ န သုဒ္ဓါ. သဝနံ န ဖာသူ တိ သောတံ အသုဒ္ဓံ အဝိသုဒ္ဓံ အပရိသုဒ္ဓံ အဝေါဒါတံ. နော တထာ သောတေန သဒ္ဒံ သုဏောမီတိ— နေတ္တာ န သုဒ္ဓါ သဝနံ န ဖာသု.
မာဟံ နဿံ မောမုဟော အန္တရာဝါ တိ. မာဟံ နဿန် တိ မာဟံ နဿံ မာဟံ ဝိနဿံ မာဟံ ပနဿံ. မောမုဟော တိ မောဟမုဟော အဝိဇ္ဇာဂတော အညာဏီ အဝိဘာဝီ ဒုပ္ပညော. အန္တရာဝါ တိ တုယှံ ဓမ္မံ ဒိဋ္ဌိံ ပဋိပဒံ မဂ္ဂံ အနညာယ အနဓိဂန္တွာ အဝိဒိတွာ အပ္ပဋိလဘိတွာ အဖဿယိတွာ အသစ္ဆိကရိတွာ အန္တရာယေဝ ကာလံ ကရေယျန္တိ— မာဟံ နဿံ မောမုဟော အန္တရာဝ.
အာစိက္ခ ဓမ္မံ ယမဟံ ဝိဇညန် တိ. ဓမ္မန် တိ အာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ, စတ္တာရော သတိပဋ္ဌာနေ, စတ္တာရော သမ္မပ္ပဓာနေ, စတ္တာရော ဣဒ္ဓိပါဒေ, ပဉ္စိန္ဒြိယာနိ, ပဉ္စ ဗလာနိ, သတ္တ ဗောဇ္ဈင်္ဂေ, အရိယံ အဋ္ဌင်္ဂိကံ မဂ္ဂံ, နိဗ္ဗာနဉ္စ နိဗ္ဗာနဂါမိနိဉ္စ ပဋိပဒံ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ— အာစိက္ခ ဓမ္မံ. ယမဟံ ဝိဇညန် တိ ယမဟံ ဇာနေယျံ အာဇာနေယျံ ဝိဇာနေယျံ ပဋိဝိဇာနေယျံ ပဋိဝိဇ္ဈေယျံ အဓိဂစ္ဆေယျံ ဖဿေယျံ သစ္ဆိကရေယျန္တိ— အာစိက္ခ ဓမ္မံ ယမဟံ ဝိဇညံ.
ဇာတိဇရာယ ဣဓ ဝိပ္ပဟာနန် တိ ဣဓေဝ ဇာတိဇရာမရဏဿ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ဇာတိဇရာယ ဣဓ ဝိပ္ပဟာနံ. တေနာဟ သော ဗြာဟ္မဏော—
“ဇိဏ္ဏောဟမသ္မိ အဗလော ဝီတဝဏ္ဏော, (ဣစ္စာယသ္မာ ပိင်္ဂိယော)
နေတ္တာ န သုဒ္ဓါ သဝနံ န ဖာသု;
မာဟံ နဿံ မောမုဟော အန္တရာဝ,
အာစိက္ခ ဓမ္မံ ယမဟံ ဝိဇညံ;
ဇာတိဇရာယ ဣဓ ဝိပ္ပဟာနန်”တိ.
ဒိသွာန ရူပေသု ဝိဟညမာနေ, (ပိင်္ဂိယာတိ ဘဂဝါ)
ရုပ္ပန္တိ ရူပေသု ဇနာ ပမတ္တာ;
တသ္မာ တုဝံ ပိင်္ဂိယ အပ္ပမတ္တော,
ဇဟဿု ရူပံ အပုနဗ္ဘဝါယ. (2)
ဒိသွာန ရူပေသု ဝိဟညမာနေ တိ. ရူပန် တိ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယ ရူပံ. သတ္တာ ရူပဟေတု ရူပပ္ပစ္စယာ ရူပကာရဏာ ဟညန္တိ ဝိဟညန္တိ ဥပဟညန္တိ ဥပဃာတိယန္တိ. ရူပေ သတိ ဝိဝိဓကမ္မကာရဏာ ကာရေန္တိ. ကသာဟိပိ တာဠေန္တိ, ဝေတ္တေဟိပိ တာဠေန္တိ, အဍ္ဎဒဏ္ဍကေဟိပိ တာဠေန္တိ, ဟတ္ထမ္ပိ ဆိန္ဒန္တိ, ပါဒမ္ပိ ဆိန္ဒန္တိ, ဟတ္ထပါဒမ္ပိ ဆိန္ဒန္တိ, ကဏ္ဏမ္ပိ ဆိန္ဒန္တိ, နာသမ္ပိ ဆိန္ဒန္တိ, ကဏ္ဏနာသမ္ပိ ဆိန္ဒန္တိ, ဗိလင်္ဂထာလိကမ္ပိ ကရောန္တိ, သင်္ခမုဏ္ဍိကမ္ပိ ကရောန္တိ, ရာဟုမုခမ္ပိ ကရောန္တိ, ဇောတိမာလိကမ္ပိ ကရောန္တိ, ဟတ္ထပဇ္ဇောတိကမ္ပိ ကရောန္တိ, ဧရကဝတ္တိကမ္ပိ ကရောန္တိ, စီရကဝါသိကမ္ပိ ကရောန္တိ, ဧဏေယျကမ္ပိ ကရောန္တိ, ဗဠိသမံသိကမ္ပိ ကရောန္တိ, ကဟာပဏိကမ္ပိ ကရောန္တိ, ခါရာပတစ္ဆိကမ္ပိ ကရောန္တိ, ပလိဃပရိဝတ္တိကမ္ပိ ကရောန္တိ, ပလာလပီဌကမ္ပိ ကရောန္တိ, တတ္တေနပိ တေလေန ဩသိဉ္စန္တိ, သုနခေဟိပိ ခါဒါပေန္တိ, ဇီဝန္တမ္ပိ သူလေ ဥတ္တာသေန္တိ, အသိနာပိ သီသံ ဆိန္ဒန္တိ. ဧဝံ သတ္တာ ရူပဟေတု ရူပပ္ပစ္စယာ ရူပကာရဏာ ဟညန္တိ ဝိဟညန္တိ ဥပဟညန္တိ ဥပဃာတိယန္တိ. ဧဝံ ဟညမာနေ ဝိဟညမာနေ ဥပဟညမာနေ ဥပဃာတိယမာနေ ဒိသွာ ပဿိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ— ဒိသွာန ရူပေသု ဝိဟညမာနေ.
ပိင်္ဂိယာတိ ဘဂဝါ တိ. ပိင်္ဂိယာ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ပိင်္ဂိယာတိ ဘဂဝါ.
ရုပ္ပန္တိ ရူပေသု ဇနာ ပမတ္တာ တိ. ရုပ္ပန္တီ တိ ရုပ္ပန္တိ ကုပ္ပန္တိ ပီဠယန္တိ ဃဋ္ဋယန္တိ, ဗျာဓိတာ ဒေါမနဿိတာ ဟောန္တိ. စက္ခုရောဂေန ရုပ္ပန္တိ ကုပ္ပန္တိ ပီဠယန္တိ ဃဋ္ဋယန္တိ, ဗျာဓိတာ ဒေါမနဿိတာ ဟောန္တိ. သောတရောဂေန …ပေ… ကာယရောဂေန …ပေ… ဍံသမကသဝါတာတပသရီသပသမ္ဖဿေဟိ ရုပ္ပန္တိ ကုပ္ပန္တိ ပီဠယန္တိ ဃဋ္ဋယန္တိ, ဗျာဓိတာ ဒေါမနဿိတာ ဟောန္တီတိ— ရုပ္ပန္တိ ရူပေသု.
အထ ဝါ စက္ခုသ္မိံ ဟီယမာနေ ဟာယမာနေ ပရိဟာယမာနေ ဝေမာနေ ဝိဂစ္ဆမာနေ အန္တရဓာယမာနေ ရုပ္ပန္တိ …ပေ… ဒေါမနဿိတာ ဟောန္တိ. သောတသ္မိံ …ပေ… ဃာနသ္မိံ… ဇိဝှါယ… ကာယသ္မိံ… ရူပသ္မိံ… သဒ္ဒသ္မိံ… ဂန္ဓသ္မိံ… ရသသ္မိံ… ဖောဋ္ဌဗ္ဗသ္မိံ… ကုလသ္မိံ… ဂဏသ္မိံ… အာဝါသသ္မိံ… လာဘသ္မိံ… ယသသ္မိံ… ပသံသာယ… သုခသ္မိံ… စီဝရသ္မိံ… ပိဏ္ဍပါတသ္မိံ… သေနာသနသ္မိံ… ဂိလာနပစ္စယဘေသဇ္ဇပရိက္ခာရသ္မိံ ဟီယမာနေ ဟာယမာနေ ပရိဟာယမာနေ ဝေမာနေ ဝိဂစ္ဆမာနေ အန္တရဓာယမာနေ ရုပ္ပန္တိ ကုပ္ပန္တိ ပီဠယန္တိ ဃဋ္ဋယန္တိ, ဗျာဓိတာ ဒေါမနဿိတာ ဟောန္တီတိ— ဧဝမ္ပိ ရုပ္ပန္တိ ရူပေသု.
ဇနာ တိ ခတ္တိယာ စ ဗြာဟ္မဏာ စ ဝေဿာ စ သုဒ္ဒါ စ ဂဟဋ္ဌာ စ ပဗ္ဗဇိတာ စ ဒေဝါ စ မနုဿာ စ. ပမတ္တာ တိ ပမာဒေါ ဝတ္တဗ္ဗော ကာယဒုစ္စရိတေန ဝါ ဝစီဒုစ္စရိတေန ဝါ မနောဒုစ္စရိတေန ဝါ ပဉ္စသု ကာမဂုဏေသု စိတ္တဿ ဝေါသဂ္ဂေါ ဝေါသဂ္ဂါနုပ္ပဒါနံ ကုသလာနံ ဝါ ဓမ္မာနံ ဘာဝနာယ အသက္ကစ္စကိရိယတာ အသာတစ္စကိရိယတာ အနဋ္ဌိတကိရိယတာ ဩလီနဝုတ္တိတာ နိက္ခိတ္တစ္ဆန္ဒတာ နိက္ခိတ္တဓုရတာ အနာသေဝနာ အဘာဝနာ အဗဟုလီကမ္မံ အနဓိဋ္ဌာနံ အနနုယောဂေါ ပမာဒေါ. ယော ဧဝရူပေါ ပမာဒေါ ပမဇ္ဇနာ ပမဇ္ဇိတတ္တံ— အယံ ဝုစ္စတိ ပမာဒေါ. ဣမိနာ ပမာဒေန သမန္နာဂတာ ဇနာ ပမတ္တာတိ— ရုပ္ပန္တိ ရူပေသု ဇနာ ပမတ္တာ.
တသ္မာ တုဝံ ပိင်္ဂိယ အပ္ပမတ္တော တိ. တသ္မာ တိ တသ္မာ တံကာရဏာ တံဟေတု တပ္ပစ္စယာ တံနိဒါနာ ဧဝံ အာဒီနဝံ သမ္ပဿမာနော ရူပေသူတိ— တသ္မာ တုဝံ ပိင်္ဂိယ. အပ္ပမတ္တော တိ သက္ကစ္စကာရီ သာတစ္စကာရီ …ပေ… အပ္ပမာဒေါ ကုသလေသု ဓမ္မေသူတိ— တသ္မာ တုဝံ ပိင်္ဂိယ အပ္ပမတ္တော.
ဇဟဿု ရူပံ အပုနဗ္ဘဝါယာ တိ. ရူပန် တိ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယ ရူပံ. ဇဟဿု ရူပန် တိ ဇဟဿု ရူပံ, ပဇဟဿု ရူပံ, ဝိနောဒေဟိ ရူပံ, ဗျန္တီကရောဟိ ရူပံ, အနဘာဝံ ဂမေဟိ ရူပံ. အပုနဗ္ဘဝါယာ တိ ယထာ တေ ရူပံ ဣဓေဝ နိရုဇ္ဈေယျ, ပုနပဋိသန္ဓိကော ဘဝေါ န နိဗ္ဗတ္တေယျ ကာမဓာတုယာ ဝါ ရူပဓာတုယာ ဝါ အရူပဓာတုယာ ဝါ, ကာမဘဝေ ဝါ ရူပဘဝေ ဝါ အရူပဘဝေ ဝါ, သညာဘဝေ ဝါ အသညာဘဝေ ဝါ နေဝသညာနာသညာဘဝေ ဝါ, ဧကဝေါကာရဘဝေ ဝါ စတုဝေါကာရဘဝေ ဝါ ပဉ္စဝေါကာရဘဝေ ဝါ, ပုန ဂတိယာ ဝါ ဥပပတ္တိယာ ဝါ ပဋိသန္ဓိယာ ဝါ ဘဝေ ဝါ သံသာရေ ဝါ ဝဋ္ဋေ ဝါ န ဇနေယျ န သဉ္ဇနေယျ န နိဗ္ဗတ္တေယျ နာဘိနိဗ္ဗတ္တေယျ, ဣဓေဝ နိရုဇ္ဈေယျ ဝူပသမေယျ အတ္ထံ ဂစ္ဆေယျ ပဋိပ္ပဿမ္ဘေယျာတိ— ဇဟဿု ရူပံ အပုနဗ္ဘဝါယ. တေနာဟ ဘဂဝါ—
“ဒိသွာန ရူပေသု ဝိဟညမာနေ, (ပိင်္ဂိယာတိ ဘဂဝါ)
ရုပ္ပန္တိ ရူပေသု ဇနာ ပမတ္တာ;
တသ္မာ တုဝံ ပိင်္ဂိယ အပ္ပမတ္တော,
ဇဟဿု ရူပံ အပုနဗ္ဘဝါယာ”တိ.
ဒိသာ စတဿော ဝိဒိသာ စတဿော,
ဥဒ္ဓံ အဓော ဒသ ဒိသာ ဣမာယော;
န တုယှံ အဒိဋ္ဌံ အသုတံ အမုတံ,
အထော အဝိညာတံ ကိဉ္စနမတ္ထိ လောကေ;
အာစိက္ခ ဓမ္မံ ယမဟံ ဝိဇညံ,
ဇာတိဇရာယ ဣဓ ဝိပ္ပဟာနံ. (3)
ဒိသာ စတဿော ဝိဒိသာ စတဿော, ဥဒ္ဓံ အဓော ဒသ ဒိသာ ဣမာယော တိ ဒသ ဒိသာ.
န တုယှံ အဒိဋ္ဌံ အသုတံ အမုတံ, အထော အဝိညာတံ ကိဉ္စနမတ္ထိ လောကေ တိ န တုယှံ အဒိဋ္ဌံ အသုတံ အမုတံ အဝိညာတံ ကိဉ္စိ အတ္တတ္ထော ဝါ ပရတ္ထော ဝါ ဥဘယတ္ထော ဝါ ဒိဋ္ဌဓမ္မိကော ဝါ အတ္ထော သမ္ပရာယိကော ဝါ အတ္ထော ဥတ္တာနော ဝါ အတ္ထော ဂမ္ဘီရော ဝါ အတ္ထော ဂူဠှော ဝါ အတ္ထော ပဋိစ္ဆန္နော ဝါ အတ္ထော နေယျော ဝါ အတ္ထော နီတော ဝါ အတ္ထော အနဝဇ္ဇော ဝါ အတ္ထော နိက္ကိလေသော ဝါ အတ္ထော ဝေါဒါနော ဝါ အတ္ထော ပရမတ္ထော ဝါ အတ္ထော နတ္ထိ န အတ္ထိ န သံဝိဇ္ဇတိ နုပလဗ္ဘတီတိ— န တုယှံ အဒိဋ္ဌံ အသုတံ အမုတံ, အထော အဝိညာတံ ကိဉ္စနမတ္ထိ လောကေ.
အာစိက္ခ ဓမ္မံ ယမဟံ ဝိဇညန် တိ. ဓမ္မန် တိ အာဒိကလျာဏံ …ပေ… နိဗ္ဗာနဉ္စ နိဗ္ဗာနဂါမိနိဉ္စ ပဋိပဒံ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟိ. ယမဟံ ဝိဇညန် တိ ယမဟံ ဇာနေယျံ အာဇာနေယျံ ဝိဇာနေယျံ ပဋိဝိဇာနေယျံ ပဋိဝိဇ္ဈေယျံ အဓိဂစ္ဆေယျံ ဖဿေယျံ သစ္ဆိကရေယျန္တိ— အာစိက္ခ ဓမ္မံ ယမဟံ ဝိဇညံ.
ဇာတိဇရာယ ဣဓ ဝိပ္ပဟာနန် တိ ဣဓေဝ ဇာတိဇရာမရဏဿ ပဟာနံ ဝူပသမံ ပဋိနိဿဂ္ဂံ ပဋိပ္ပဿဒ္ဓိံ အမတံ နိဗ္ဗာနန္တိ— ဇာတိဇရာယ ဣဓ ဝိပ္ပဟာနံ. တေနာဟ သော ဗြာဟ္မဏော—
“ဒိသာ စတဿော ဝိဒိသာ စတဿော,
ဥဒ္ဓံ အဓော ဒသ ဒိသာ ဣမာယော;_
န တုယှံ အဒိဋ္ဌံ အသုတံ အမုတံ,
အထော အဝိညာတံ ကိဉ္စနမတ္ထိ လောကေ;
အာစိက္ခ ဓမ္မံ ယမဟံ ဝိဇညံ,
ဇာတိဇရာယ ဣဓ ဝိပ္ပဟာနန်”တိ.
တဏှာဓိပန္နေ မနုဇေ ပေက္ခမာနော, (ပိင်္ဂိယာတိ ဘဂဝါ)
သန္တာပဇာတေ ဇရသာ ပရေတေ;
တသ္မာ တုဝံ ပိင်္ဂိယ အပ္ပမတ္တော,
ဇဟဿု တဏှံ အပုနဗ္ဘဝါယ. (4)
တဏှာဓိပန္နေ မနုဇေ ပေက္ခမာနော တိ. တဏှာ တိ ရူပတဏှာ …ပေ… ဓမ္မတဏှာ. တဏှာဓိပန္နေ တိ တဏှာဓိပန္နေ တဏှာနုဂေ တဏှာနုဂတေ တဏှာနုသဋေ တဏှာယ ပန္နေ ပဋိပန္နေ အဘိဘူတေ ပရိယာဒိန္နစိတ္တေ. မနုဇေ တိ သတ္တာဓိဝစနံ. ပေက္ခမာနော တိ ပေက္ခမာနော ဒက္ခမာနော ဩလောကယမာနော နိဇ္ဈာယမာနော ဥပပရိက္ခမာနောတိ— တဏှာဓိပန္နေ မနုဇေ ပေက္ခမာနော. ပိင်္ဂိယာတိ ဘဂဝါ တိ. ပိင်္ဂိယာ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ပိင်္ဂိယာတိ ဘဂဝါ.
သန္တာပဇာတေ ဇရသာ ပရေတေ တိ. သန္တာပဇာတေ တိ ဇာတိယာ သန္တာပဇာတေ, ဇရာယ သန္တာပဇာတေ, ဗျာဓိနာ သန္တာပဇာတေ, မရဏေန သန္တာပဇာတေ, သောကပရိဒေဝဒုက္ခဒေါမနဿုပါယာသေဟိ သန္တာပဇာတေ, နေရယိကေန ဒုက္ခေန သန္တာပဇာတေ …ပေ… ဒိဋ္ဌိဗျသနေန ဒုက္ခေန သန္တာပဇာတေ ဤတိဇာတေ ဥပဒ္ဒဝဇာတေ ဥပသဂ္ဂဇာတေတိ— သန္တာပဇာတေ. ဇရသာ ပရေတေ တိ ဇရာယ ဖုဋ္ဌေ ပရေတေ သမောဟိတေ သမန္နာဂတေ. ဇာတိယာ အနုဂတေ ဇရာယ အနုသဋေ ဗျာဓိနာ အဘိဘူတေ မရဏေန အဗ္ဘာဟတေ အတာဏေ အလေဏေ အသရဏေ အသရဏီဘူတေတိ— သန္တာပဇာတေ ဇရသာ ပရေတေ.
တသ္မာ တုဝံ ပိင်္ဂိယ အပ္ပမတ္တော တိ. တသ္မာ တိ တသ္မာ တံကာရဏာ တံဟေတု တပ္ပစ္စယာ တံနိဒါနာ ဧဝံ အာဒီနဝံ သမ္ပဿမာနော တဏှာယာတိ— တသ္မာ တုဝံ ပိင်္ဂိယ. အပ္ပမတ္တော တိ သက္ကစ္စကာရီ …ပေ… အပ္ပမာဒေါ ကုသလေသု ဓမ္မေသူတိ— တသ္မာ တုဝံ ပိင်္ဂိယ အပ္ပမတ္တော.
ဇဟဿု တဏှံ အပုနဗ္ဘဝါယာ တိ. တဏှာ တိ ရူပတဏှာ …ပေ… ဓမ္မတဏှာ. ဇဟဿု တဏှန် တိ ဇဟဿု တဏှံ ပဇဟဿု တဏှံ ဝိနောဒေဟိ တဏှံ ဗျန္တီကရောဟိ တဏှံ အနဘာဝံ ဂမေဟိ တဏှံ. အပုနဗ္ဘဝါယာ တိ ယထာ တေ …ပေ… ပုနပဋိသန္ဓိကော ဘဝေါ န နိဗ္ဗတ္တေယျ ကာမဓာတုယာ ဝါ ရူပဓာတုယာ ဝါ အရူပဓာတုယာ ဝါ, ကာမဘဝေ ဝါ ရူပဘဝေ ဝါ အရူပဘဝေ ဝါ, သညာဘဝေ ဝါ အသညာဘဝေ ဝါ နေဝသညာနာသညာဘဝေ ဝါ, ဧကဝေါကာရဘဝေ ဝါ စတုဝေါကာရဘဝေ ဝါ ပဉ္စဝေါကာရဘဝေ ဝါ, ပုနဂတိယာ ဝါ ဥပပတ္တိယာ ဝါ ပဋိသန္ဓိယာ ဝါ ဘဝေ ဝါ သံသာရေ ဝါ ဝဋ္ဋေ ဝါ န ဇနေယျ န သဉ္ဇနေယျ န နိဗ္ဗတ္တေယျ နာဘိနိဗ္ဗတ္တေယျ, ဣဓေဝ နိရုဇ္ဈေယျ ဝူပသမေယျ အတ္ထံ ဂစ္ဆေယျ ပဋိပ္ပဿမ္ဘေယျာတိ— ဇဟဿု တဏှံ အပုနဗ္ဘဝါယ. တေနာဟ ဘဂဝါ—
“တဏှာဓိပန္နေ မနုဇေ ပေက္ခမာနော, (ပိင်္ဂိယာတိ ဘဂဝါ)
သန္တာပဇာတေ ဇရသာ ပရေတေ;
တသ္မာ တုဝံ ပိင်္ဂိယ အပ္ပမတ္တော,
ဇဟဿု တဏှံ အပုနဗ္ဘဝါယာ”တိ.
သဟ ဂါထာပရိယောသာနာ ယေ တေ ဗြာဟ္မဏေန သဒ္ဓိံ ဧကစ္ဆန္ဒာ ဧကပယောဂါ ဧကာဓိပ္ပါယာ ဧကဝါသနဝါသိတာ, တေသံ အနေကပါဏသဟဿာနံ ဝိရဇံ ဝီတမလံ ဓမ္မစက္ခုံ ဥဒပါဒိ— “ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မန်”တိ. တဿ စ ဗြာဟ္မဏဿ ဝိရဇံ ဝီတမလံ ဓမ္မစက္ခုံ ဥဒပါဒိ— “ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မန်”တိ. သဟ ဓမ္မစက္ခုဿ ပဋိလာဘာ အဇိနဇဋာဝါကစီရတိဒဏ္ဍကမဏ္ဍလုကေသာ စ မဿူ စ အန္တရဟိတာ ဘဏ္ဍုကာသာယဝတ္ထဝသနော သင်္ဃာဋိပတ္တစီဝရဓရော အနွတ္ထပဋိပတ္တိယာ ပဉ္ဇလိကော ဘဂဝန္တံ နမဿမာနော နိသိန္နော ဟောတိ— “သတ္ထာ မေ, ဘန္တေ, ဘဂဝါ, သာဝကောဟမသ္မီ”တိ.
ပိင်္ဂိယမာဏဝပုစ္ဆာနိဒ္ဒေသော သောဠသမော.