2.1.6 ဥပသီဝမာဏဝပုစ္ဆာနိဒ္ဒေသ
ဧကော အဟံ သက္က မဟန္တမောဃံ, (ဣစ္စာယသ္မာ ဥပသီဝေါ)
အနိဿိတော နော ဝိသဟာမိ တာရိတုံ;
အာရမ္မဏံ ဗြူဟိ သမန္တစက္ခု,
ယံ နိဿိတော ဩဃမိမံ တရေယျံ. (1)
ဧကော အဟံ သက္က မဟန္တမောဃန် တိ. ဧကော တိ ပုဂ္ဂလော ဝါ မေ ဒုတိယော နတ္ထိ, ဓမ္မော ဝါ မေ ဒုတိယော နတ္ထိ, ယံ ဝါ ပုဂ္ဂလံ နိဿာယ ဓမ္မံ ဝါ နိဿာယ မဟန္တံ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ တရေယျံ ဥတ္တရေယျံ ပတရေယျံ သမတိက္ကမေယျံ ဝီတိဝတ္တေယျန္တိ. သက္ကာ တိ သက္ကော. ဘဂဝါ သကျကုလာ ပဗ္ဗဇိတောတိပိ သက္ကော. အထ ဝါ အဍ္ဎော မဟဒ္ဓနော ဓနဝါတိပိ သက္ကော. တဿိမာနိ ဓနာနိ, သေယျထိဒံ— သဒ္ဓါဓနံ သီလဓနံ ဟိရိဓနံ ဩတ္တပ္ပဓနံ သုတဓနံ စာဂဓနံ ပညာဓနံ သတိပဋ္ဌာနဓနံ …ပေ… နိဗ္ဗာနဓနံ. ဣမေဟိ အနေကေဟိ ဓနရတနေဟိ အဍ္ဎော မဟဒ္ဓနော ဓနဝါတိပိ သက္ကော. အထ ဝါ သက္ကော ပဟု ဝိသဝီ အလမတ္တော သူရော ဝီရော ဝိက္ကန္တော အဘီရူ အဆမ္ဘီ အနုတြာသီ အပလာယီ ပဟီနဘယဘေရဝေါ ဝိဂတလောမဟံသောတိပိ သက္ကောတိ— ဧကော အဟံ သက္က မဟန္တမောဃံ.
ဣစ္စာယသ္မာ ဥပသီဝေါ တိ. ဣစ္စာ တိ ပဒသန္ဓိ …ပေ… . အာယသ္မာ တိ ပိယဝစနံ …ပေ… . ဥပသီဝေါ တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ ဥပသီဝေါ.
အနိဿိတော နော ဝိသဟာမိ တာရိတုန် တိ. အနိဿိတော တိ ပုဂ္ဂလံ ဝါ အနိဿိတော ဓမ္မံ ဝါ အနိဿိတော နော ဝိသဟာမိ န ဥဿဟာမိ န သက္ကောမိ န ပဋိဗလော မဟန္တံ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ တရိတုံ ဥတ္တရိတုံ ပတရိတုံ သမတိက္ကမိတုံ ဝီတိဝတ္တိတုန္တိ— အနိဿိတော နော ဝိသဟာမိ တာရိတုံ.
အာရမ္မဏံ ဗြူဟိ သမန္တစက္ခူ တိ အာရမ္မဏံ အာလမ္ဗဏံ နိဿယံ ဥပနိဿယံ ဗြူဟိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟိ. သမန္တစက္ခူ တိ သမန္တစက္ခု ဝုစ္စတိ သဗ္ဗညုတဉာဏံ. ဘဂဝါ တေန သဗ္ဗညုတဉာဏေန ဥပေတော သမုပေတော ဥပါဂတော သမုပါဂတော ဥပပန္နော သမုပပန္နော သမန္နာဂတော.
န တဿ အဒိဋ္ဌမိဓတ္ထိ ကိဉ္စိ,
အထော အဝိညာတမဇာနိတဗ္ဗံ;
သဗ္ဗံ အဘိညာသိ ယဒတ္ထိ နေယျံ,
တထာဂတော တေန သမန္တစက္ခူတိ.
အာရမ္မဏံ ဗြူဟိ သမန္တစက္ခု.
ယံ နိဿိတော ဩဃမိမံ တရေယျန် တိ. ယံ နိဿိတော တိ ယံ ပုဂ္ဂလံ ဝါ နိဿိတော ဓမ္မံ ဝါ နိဿိတော မဟန္တံ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ တရေယျံ ဥတ္တရေယျံ ပတရေယျံ သမတိက္ကမေယျံ ဝီတိဝတ္တေယျန္တိ— ယံ နိဿိတော ဩဃမိမံ တရေယျံ. တေနာဟ သော ဗြာဟ္မဏော—
“ဧကော အဟံ သက္က မဟန္တမောဃံ, (ဣစ္စာယသ္မာ ဥပသီဝေါ)
အနိဿိတော နော ဝိသဟာမိ တာရိတုံ;
အာရမ္မဏံ ဗြူဟိ သမန္တစက္ခု,
ယံ နိဿိတော ဩဃမိမံ တရေယျန်”တိ.
အာကိဉ္စညံ ပေက္ခမာနော သတိမာ, (ဥပသီဝါတိ ဘဂဝါ)
နတ္ထီတိ နိဿာယ တရဿု ဩဃံ;
ကာမေ ပဟာယ ဝိရတော ကထာဟိ,
တဏှက္ခယံ နတ္တမဟာဘိပဿ. (2)
အာကိဉ္စညံ ပေက္ခမာနော သတိမာ တိ သော ဗြာဟ္မဏော ပကတိယာ အာကိဉ္စညာယတနသမာပတ္တိံ လာဘီယေဝ နိဿယံ န ဇာနာတိ— “အယံ မေ နိဿယော”တိ. တဿ ဘဂဝါ နိဿယဉ္စ အာစိက္ခတိ ဥတ္တရိဉ္စ နိယျာနပထံ. အာကိဉ္စညာယတနသမာပတ္တိံ သတော သမာပဇ္ဇိတွာ တတော ဝုဋ္ဌဟိတွာ တတ္ထ ဇာတေ စိတ္တစေတသိကေ ဓမ္မေ အနိစ္စတော ပေက္ခမာနော, ဒုက္ခတော …ပေ… ရောဂတော… ဂဏ္ဍတော… သလ္လတော… အဃတော… အာဗာဓတော… ပရတော… ပလောကတော… ဤတိတော… ဥပဒ္ဒဝတော… ဘယတော… ဥပသဂ္ဂတော… စလတော… ပဘင်္ဂုတော… အဒ္ဓုဝတော… အတာဏတော… အလေဏတော… အသရဏတော… အသရဏီဘူတတော… ရိတ္တတော… တုစ္ဆတော… သုညတော… အနတ္တတော… အာဒီနဝတော… ဝိပရိဏာမဓမ္မတော… အသာရကတော… အဃမူလတော… ဘဝတော… ဝိဘဝတော… သာသဝတော… သင်္ခတတော… မာရာမိသတော… ဇာတိဓမ္မတော… ဇရာဓမ္မတော… ဗျာဓိဓမ္မတော… မရဏဓမ္မတော… သောကပရိဒေဝဒုက္ခဒေါမနဿုပါယာသဓမ္မတော… သမုဒယဓမ္မတော… အတ္ထင်္ဂမတော… အဿာဒတော… အာဒီနဝတော… နိဿရဏတော ပေက္ခမာနော ဒက္ခမာနော ဩလောကယမာနော နိဇ္ဈာယမာနော ဥပပရိက္ခမာနော.
သတိမာ တိ ယာ သတိ အနုဿတိ ပဋိဿတိ …ပေ… သမ္မာသတိ— အယံ ဝုစ္စတိ သတိ. ဣမာယ သတိယာ ဥပေတော ဟောတိ …ပေ… သမန္နာဂတော, သော ဝုစ္စတိ သတိမာတိ— အာကိဉ္စညံ ပေက္ခမာနော သတိမာ.
ဥပသီဝါတိ ဘဂဝါ တိ. ဥပသီဝါ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဥပသီဝါတိ ဘဂဝါ.
နတ္ထီတိ နိဿာယ တရဿု ဩဃန် တိ နတ္ထိ ကိဉ္စီတိ အာကိဉ္စညာယတနသမာပတ္တိ. ကိံကာရဏာ နတ္ထိ ကိဉ္စီတိ အာကိဉ္စညာယတနသမာပတ္တိ? ဝိညာဏဉ္စာယတနသမာပတ္တိံ သတော သမာပဇ္ဇိတွာ တတော ဝုဋ္ဌဟိတွာ တညေဝ ဝိညာဏံ အဘာဝေတိ, ဝိဘာဝေတိ, အန္တရဓာပေတိ, နတ္ထိ ကိဉ္စီတိ ပဿတိ. တံကာရဏာ နတ္ထိ ကိဉ္စီတိ အာကိဉ္စညာယတနသမာပတ္တိံ နိဿာယ ဥပနိဿာယ အာလမ္ဗဏံ ကရိတွာ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ တရဿု ဥတ္တရဿု ပတရဿု သမတိက္ကမဿု ဝီတိဝတ္တဿူတိ— နတ္ထီတိ နိဿာယ တရဿု ဩဃံ.
ကာမေ ပဟာယ ဝိရတော ကထာဟီ တိ. ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. ကာမေ ပဟာယာ တိ ဝတ္ထုကာမေ ပရိဇာနိတွာ ကိလေသကာမေ ပဟာယ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— ကာမေ ပဟာယ. ဝိရတော ကထာဟီ တိ ကထံကထာ ဝုစ္စတိ ဝိစိကိစ္ဆာ. ဒုက္ခေ ကင်္ခါ …ပေ… ဆမ္ဘိတတ္တံ စိတ္တဿ မနောဝိလေခေါ ကထံကထာယ အာရတော ဝိရတော ပဋိဝိရတော နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ— ဧဝမ္ပိ ဝိရတော ကထာဟိ …ပေ… အထ ဝါ ဒွတ္တိံသာယ တိရစ္ဆာနကထာယ အာရတော ဝိရတော ပဋိဝိရတော နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ ဧဝမ္ပိ ဝိရတော ကထာဟီတိ— ကာမေ ပဟာယ ဝိရတော ကထာဟိ.
တဏှက္ခယံ နတ္တမဟာဘိပဿာ တိ. တဏှာ တိ ရူပတဏှာ …ပေ… ဓမ္မတဏှာ. နတ္တံ ဝုစ္စတိ ရတ္တိ. အဟော တိ ဒိဝသော. ရတ္တိဉ္စ ဒိဝါ စ တဏှက္ခယံ ရာဂက္ခယံ ဒေါသက္ခယံ မောဟက္ခယံ ဂတိက္ခယံ ဥပပတ္တိက္ခယံ ပဋိသန္ဓိက္ခယံ ဘဝက္ခယံ သံသာရက္ခယံ ဝဋ္ဋက္ခယံ ပဿ အဘိပဿ ဒက္ခ ဩလောကယ နိဇ္ဈာယ ဥပပရိက္ခာတိ— တဏှက္ခယံ နတ္တမဟာဘိပဿ. တေနာဟ ဘဂဝါ—
“အာကိဉ္စညံ ပေက္ခမာနော သတိမာ, (ဥပသီဝါတိ ဘဂဝါ)
နတ္ထီတိ နိဿာယ တရဿု ဩဃံ;
ကာမေ ပဟာယ ဝိရတော ကထာဟိ,
တဏှက္ခယံ နတ္တမဟာဘိပဿာ”တိ.
သဗ္ဗေသု ကာမေသု ယော ဝီတရာဂေါ, (ဣစ္စာယသ္မာ ဥပသီဝေါ)
အာကိဉ္စညံ နိဿိတော ဟိတွာ မညံ;
သညာဝိမောက္ခေ ပရမေဓိမုတ္တော,
တိဋ္ဌေ နု သော တတ္ထ အနာနုယာယီ. (3)
သဗ္ဗေသု ကာမေသု ယော ဝီတရာဂေါ တိ. သဗ္ဗေသူ တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ ပရိယာဒိယနဝစနမေတံ သဗ္ဗေသူတိ. ကာမေသူ တိ ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. သဗ္ဗေသု ကာမေသု ယော ဝီတရာဂေါတိ. သဗ္ဗေသု ကာမေသု ယော ဝီတရာဂေါ ဝိဂတရာဂေါ စတ္တရာဂေါ ဝန္တရာဂေါ မုတ္တရာဂေါ ပဟီနရာဂေါ ပဋိနိဿဋ္ဌရာဂေါ ဝိက္ခမ္ဘနတောတိ— သဗ္ဗေသု ကာမေသု ယော ဝီတရာဂေါ.
ဣစ္စာယသ္မာ ဥပသီဝေါ တိ. ဣစ္စာ တိ ပဒသန္ဓိ …ပေ… . အာယသ္မာ တိ ပိယဝစနံ …ပေ… . ဥပသီဝေါ တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ ဥပသီဝေါ.
အာကိဉ္စညံ နိဿိတော ဟိတွာ မညန် တိ. ဟေဋ္ဌိမာ ဆ သမာပတ္တိယော ဟိတွာ စဇိတွာ ပရိစ္စဇိတွာ အတိက္ကမိတွာ သမတိက္ကမိတွာ ဝီတိဝတ္တိတွာ အာကိဉ္စညာယတနသမာပတ္တိံ နိဿိတော အလ္လီနော ဥပဂတော သမုပဂတော အဇ္ဈောသိတော အဓိမုတ္တောတိ— အာကိဉ္စညံ နိဿိတော ဟိတွာ မညံ.
သညာဝိမောက္ခေ ပရမေဓိမုတ္တော တိ သညာဝိမောက္ခာ ဝုစ္စန္တိ သတ္တ သညာသမာပတ္တိယော. တာသံ သညာသမာပတ္တီနံ အာကိဉ္စညာယတနသမာပတ္တိဝိမောက္ခော အဂ္ဂေါ စ သေဋ္ဌော စ ဝိသေဋ္ဌော စ ပါမောက္ခော စ ဥတ္တမော စ ပဝရော စ, ပရမေ အဂ္ဂေ သေဋ္ဌေ ဝိသေဋ္ဌေ ပါမောက္ခေ ဥတ္တမေ ပဝရေ အဓိမုတ္တိဝိမောက္ခေန အဓိမုတ္တော တတြာဓိမုတ္တော တဒဓိမုတ္တော တစ္စရိတော တဗ္ဗဟုလော တဂ္ဂရုကော တန္နိန္နော တပ္ပေါဏော တပ္ပဗ္ဘာရော တဒဓိမုတ္တော တဒဓိပတေယျောတိ— သညာဝိမောက္ခေ ပရမေဓိမုတ္တော.
တိဋ္ဌေ နု သော တတ္ထ အနာနုယာယီ တိ. တိဋ္ဌေ နူ တိ သံသယပုစ္ဆာ ဝိမတိပုစ္ဆာ ဒွေဠှကပုစ္ဆာ အနေကံသပုစ္ဆာ, “ဧဝံ နု ခေါ, နနု ခေါ, ကိံ နု ခေါ, ကထံ နု ခေါ”တိ— တိဋ္ဌေ နု. တတ္ထာ တိ အာကိဉ္စညာယတနေ. အနာနုယာယီ တိ အနာနုယာယီ အဝိစ္စမာနော အဝိဂစ္ဆမာနော အနန္တရဓာယမာနော အပရိဟာယမာနော …ပေ… . အထ ဝါ အရဇ္ဇမာနော အဒုဿမာနော အမုယှမာနော အကိလိဿမာနောတိ— တိဋ္ဌေ နု သော တတ္ထ အနာနုယာယီ. တေနာဟ သော ဗြာဟ္မဏော—
“သဗ္ဗေသု ကာမေသု ယော ဝီတရာဂေါ, (ဣစ္စာယသ္မာ ဥပသီဝေါ)
အာကိဉ္စညံ နိဿိတော ဟိတွာ မညံ;
သညာဝိမောက္ခေ ပရမေဓိမုတ္တော,
တိဋ္ဌေ နု သော တတ္ထ အနာနုယာယီ”တိ.
သဗ္ဗေသု ကာမေသု ယော ဝီတရာဂေါ, (ဥပသီဝါတိ ဘဂဝါ)
အာကိဉ္စညံ နိဿိတော ဟိတွာ မညံ;
သညာဝိမောက္ခေ ပရမေဓိမုတ္တော,
တိဋ္ဌေယျ သော တတ္ထ အနာနုယာယီ. (4)
သဗ္ဗေသု ကာမေသု ယော ဝီတရာဂေါ တိ. သဗ္ဗေသူ တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ ပရိယာဒိယနဝစနမေတံ သဗ္ဗေသူတိ. ကာမေသူ တိ ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. သဗ္ဗေသု ကာမေသု ယော ဝီတရာဂေါ တိ သဗ္ဗေသု ကာမေသု ယော ဝီတရာဂေါ …ပေ… ပဋိနိဿဋ္ဌရာဂေါ ဝိက္ခမ္ဘနတောတိ— သဗ္ဗေသု ကာမေသု ယော ဝီတရာဂေါ.
ဥပသီဝါတိ ဘဂဝါ တိ. ဥပသီဝါ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဥပသီဝါတိ ဘဂဝါ.
အာကိဉ္စညံ နိဿိတော ဟိတွာ မညန် တိ. ဟေဋ္ဌိမာ ဆ သမာပတ္တိယော ဟိတွာ စဇိတွာ ပရိစ္စဇိတွာ အတိက္ကမိတွာ သမတိက္ကမိတွာ ဝီတိဝတ္တိတွာ အာကိဉ္စညာယတနသမာပတ္တိံ နိဿိတော အလ္လီနော ဥပဂတော သမုပဂတော အဇ္ဈောသိတော အဓိမုတ္တောတိ— အာကိဉ္စညံ နိဿိတော ဟိတွာ မညံ.
သညာဝိမောက္ခေ ပရမေဓိမုတ္တော တိ သညာဝိမောက္ခာ ဝုစ္စန္တိ သတ္တ သညာသမာပတ္တိယော. တာသံ သညာသမာပတ္တီနံ အာကိဉ္စညာယတနသမာပတ္တိဝိမောက္ခော အဂ္ဂေါ စ သေဋ္ဌော စ ဝိသေဋ္ဌော စ ပါမောက္ခော စ ဥတ္တမော စ ပဝရော စ, ပရမေ အဂ္ဂေ သေဋ္ဌေ ဝိသေဋ္ဌေ ပါမောက္ခေ ဥတ္တမေ ပဝရေ အဓိမုတ္တိဝိမောက္ခေန အဓိမုတ္တော တတြာဓိမုတ္တော တဒဓိမုတ္တော …ပေ… တဒဓိပတေယျောတိ— သညာဝိမောက္ခေ ပရမေဓိမုတ္တော.
တိဋ္ဌေယျ သော တတ္ထ အနာနုယာယီ တိ. တိဋ္ဌေယျာ တိ တိဋ္ဌေယျ သဋ္ဌိကပ္ပသဟဿာနိ. တတ္ထာ တိ အာကိဉ္စညာယတနေ. အနာနုယာယီ တိ အနာနုယာယီ အဝိစ္စမာနော အဝိဂစ္ဆမာနော အနန္တရဓာယမာနော အပရိဟာယမာနော. အထ ဝါ အရဇ္ဇမာနော အဒုဿမာနော အမုယှမာနော အကိလိဿမာနောတိ— တိဋ္ဌေယျ သော တတ္ထ အနာနုယာယီ. တေနာဟ ဘဂဝါ—
“သဗ္ဗေသု ကာမေသု ယော ဝီတရာဂေါ, (ဥပသီဝါတိ ဘဂဝါ)
အာကိဉ္စညံ နိဿိတော ဟိတွာ မညံ;
သညာဝိမောက္ခေ ပရမေဓိမုတ္တော,
တိဋ္ဌေယျ သော တတ္ထ အနာနုယာယီ”တိ.
တိဋ္ဌေ စေ သော တတ္ထ အနာနုယာယီ,
ပူဂမ္ပိ ဝဿာနိ သမန္တစက္ခု;
တတ္ထေဝ သော သီတိသိယာ ဝိမုတ္တော,
စဝေထ ဝိညာဏံ တထာဝိဓဿ. (5)
တိဋ္ဌေ စေ သော တတ္ထ အနာနုယာယီ တိ သစေ သော တိဋ္ဌေယျ သဋ္ဌိကပ္ပသဟဿာနိ. တတ္ထာ တိ အာကိဉ္စညာယတနေ. အနာနုယာယီ တိ အနာနုယာယီ အဝိစ္စမာနော အဝိဂစ္ဆမာနော အနန္တရဓာယမာနော အပရိဟာယမာနော. အထ ဝါ အရဇ္ဇမာနော အဒုဿမာနော အမုယှမာနော အကိလိဿမာနောတိ— တိဋ္ဌေ စေ သော တတ္ထ အနာနုယာယီ.
ပူဂမ္ပိ ဝဿာနိ သမန္တစက္ခူ တိ. ပူဂမ္ပိ ဝဿာနီ တိ ပူဂမ္ပိ ဝဿာနိ ဗဟူနိ ဝဿာနိ ဗဟူနိ ဝဿသတာနိ ဗဟူနိ ဝဿသဟဿာနိ ဗဟူနိ ဝဿသတသဟဿာနိ ဗဟူနိ ကပ္ပါနိ ဗဟူနိ ကပ္ပသတာနိ ဗဟူနိ ကပ္ပသဟဿာနိ ဗဟူနိ ကပ္ပသတသဟဿာနိ. သမန္တစက္ခူ တိ သမန္တစက္ခု ဝုစ္စတိ သဗ္ဗညုတဉာဏံ …ပေ… တထာဂတော တေန သမန္တစက္ခူတိ— ပူဂမ္ပိ ဝဿာနိ သမန္တစက္ခု.
တတ္ထေဝ သော သီတိသိယာ ဝိမုတ္တော, စဝေထ ဝိညာဏံ တထာဝိဓဿာ တိ တတ္ထေဝ သော သီတိဘာဝမနုပ္ပတ္တော နိစ္စော ဓုဝေါ သဿတော အဝိပရိဏာမဓမ္မော သဿတိသမံ တထေဝ တိဋ္ဌေယျ. အထ ဝါ တဿ ဝိညာဏံ စဝေယျ ဥစ္ဆိဇ္ဇေယျ နဿေယျ ဝိနဿေယျ န ဘဝေယျာတိ ပုနဗ္ဘဝပဋိသန္ဓိဝိညာဏံ နိဗ္ဗတ္တေယျ ကာမဓာတုယာ ဝါ ရူပဓာတုယာ ဝါ အရူပဓာတုယာ ဝါတိ အာကိဉ္စညာယတနံ သမာပန္နဿ သဿတဉ္စ ဥစ္ဆေဒဉ္စ ပုစ္ဆတိ. ဥဒါဟု တတ္ထေဝ အနုပါဒိသေသာယ နိဗ္ဗာနဓာတုယာ ပရိနိဗ္ဗာယေယျ. အထ ဝါ တဿ ဝိညာဏံ စဝေယျ ပုန ပဋိသန္ဓိဝိညာဏံ နိဗ္ဗတ္တေယျ ကာမဓာတုယာ ဝါ ရူပဓာတုယာ ဝါ အရူပဓာတုယာ ဝါတိ, အာကိဉ္စညာယတနံ ဥပပန္နဿ ပရိနိဗ္ဗာနဉ္စ ပဋိသန္ဓိဉ္စ ပုစ္ဆတိ. တထာဝိဓဿာ တိ တထာဝိဓဿ တာဒိသဿ တဿဏ္ဌိတဿ တပ္ပကာရဿ တပ္ပဋိဘာဂဿ အာကိဉ္စညာယတနံ ဥပပန္နဿာတိ— တတ္ထေဝ သော သီတိသိယာ ဝိမုတ္တော, စဝေထ ဝိညာဏံ တထာဝိဓဿ. တေနာဟ သော ဗြာဟ္မဏော—
“တိဋ္ဌေ စေ သော တတ္ထ အနာနုယာယီ,
ပူဂမ္ပိ ဝဿာနိ သမန္တစက္ခု;
တတ္ထေဝ သော သီတိသိယာ ဝိမုတ္တော,
စဝေထ ဝိညာဏံ တထာဝိဓဿာ”တိ.
အစ္စိ ယထာ ဝါတဝေဂေန ခိတ္တာ, (ဥပသီဝါတိ ဘဂဝါ)
အတ္ထံ ပလေတိ န ဥပေတိ သင်္ခံ;
ဧဝံ မုနီ နာမကာယာ ဝိမုတ္တော,
အတ္ထံ ပလေတိ န ဥပေတိ သင်္ခံ. (6)
အစ္စိ ယထာ ဝါတဝေဂေန ခိတ္တာ တိ အစ္စိ ဝုစ္စတိ ဇာလသိခါ. ဝါတာ တိ ပုရတ္ထိမာ ဝါတာ ပစ္ဆိမာ ဝါတာ ဥတ္တရာ ဝါတာ ဒက္ခိဏာ ဝါတာ သရဇာ ဝါတာ အရဇာ ဝါတာ သီတာ ဝါတာ ဥဏှာ ဝါတာ ပရိတ္တာ ဝါတာ အဓိမတ္တာ ဝါတာ ဝေရမ္ဘဝါတာ ပက္ခဝါတာ သုပဏ္ဏဝါတာ တာလပဏ္ဏဝါတာ ဝိဓူပနဝါတာ. ဝါတဝေဂေန ခိတ္တာ တိ ဝါတဝေဂေန ခိတ္တာ ဥက္ခိတ္တာ နုန္နာ ပဏုန္နာ ခမ္ဘိတာ ဝိက္ခမ္ဘိတာတိ— အစ္စိ ယထာ ဝါတဝေဂေန ခိတ္တာ. ဥပသီဝါတိ ဘဂဝါ တိ. ဥပသီဝါ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဥပသီဝါတိ ဘဂဝါ.
အတ္ထံ ပလေတိ န ဥပေတိ သင်္ခန် တိ. အတ္ထံ ပလေတီ တိ အတ္ထံ ပလေတိ, အတ္ထံ ဂမေတိ, အတ္ထံ ဂစ္ဆတိ နိရုဇ္ဈတိ ဝူပသမတိ ပဋိပ္ပဿမ္ဘတိ. န ဥပေတိ သင်္ခန် တိ သင်္ခံ န ဥပေတိ, ဥဒ္ဒေသံ န ဥပေတိ, ဂဏနံ န ဥပေတိ, ပဏ္ဏတ္တိံ န ဥပေတိ, “ပုရတ္ထိမံ ဝါ ဒိသံ ဂတာ, ပစ္ဆိမံ ဝါ ဒိသံ ဂတာ, ဥတ္တရံ ဝါ ဒိသံ ဂတာ, ဒက္ခိဏံ ဝါ ဒိသံ ဂတာ ဥဒ္ဓံ ဝါ ဂတာ, အဓော ဝါ ဂတာ, တိရိယံ ဝါ ဂတာ, ဝိဒိသံ ဝါ ဂတာ”တိ, သော ဟေတု နတ္ထိ, ပစ္စယော နတ္ထိ, ကာရဏံ နတ္ထိ, ယေန သင်္ခံ ဂစ္ဆေယျာတိ— အတ္ထံ ပလေတိ န ဥပေတိ သင်္ခံ.
ဧဝံ မုနီ နာမကာယာ ဝိမုတ္တော တိ. ဧဝန် တိ ဩပမ္မသမ္ပဋိပါဒနံ. မုနီ တိ မောနံ ဝုစ္စတိ ဉာဏံ …ပေ… သင်္ဂဇာလမတိစ္စ သော မုနိ. နာမကာယာ ဝိမုတ္တော တိ သော မုနိ ပကတိယာ ပုဗ္ဗေဝ ရူပကာယာ ဝိမုတ္တော. တဒင်္ဂံ သမတိက္ကမာ ဝိက္ခမ္ဘနပ္ပဟာနေန ပဟီနော. တဿ မုနိနော ဘဝန္တံ အာဂမ္မ စတ္တာရော အရိယမဂ္ဂါ ပဋိလဒ္ဓါ ဟောန္တိ. စတုန္နံ အရိယမဂ္ဂါနံ ပဋိလဒ္ဓတ္တာ နာမကာယော စ ရူပကာယော စ ပရိညာတာ ဟောန္တိ. နာမကာယဿ စ ရူပကာယဿ စ ပရိညာတတ္တာ နာမကာယာ စ ရူပကာယာ စ မုတ္တော ဝိမုတ္တော သုဝိမုတ္တော အစ္စန္တအနုပါဒါဝိမောက္ခေနာတိ— ဧဝံ မုနီ နာမကာယာ ဝိမုတ္တော.
အတ္ထံ ပလေတိ န ဥပေတိ သင်္ခန် တိ. အတ္ထံ ပလေတီ တိ အနုပါဒိသေသာယ နိဗ္ဗာနဓာတုယာ ပရိနိဗ္ဗာယတိ. န ဥပေတိ သင်္ခန် တိ အနုပါဒိသေသာယ နိဗ္ဗာနဓာတုယာ ပရိနိဗ္ဗုတော သင်္ခံ န ဥပေတိ, ဥဒ္ဒေသံ န ဥပေတိ, ဂဏနံ န ဥပေတိ, ပဏ္ဏတ္တိံ န ဥပေတိ— ခတ္တိယောတိ ဝါ ဗြာဟ္မဏောတိ ဝါ ဝေဿောတိ ဝါ သုဒ္ဒေါတိ ဝါ ဂဟဋ္ဌောတိ ဝါ ပဗ္ဗဇိတောတိ ဝါ ဒေဝေါတိ ဝါ မနုဿောတိ ဝါ ရူပီတိ ဝါ အရူပီတိ ဝါ သညီတိ ဝါ အသညီတိ ဝါ နေဝသညီနာသညီတိ ဝါ. သော ဟေတု နတ္ထိ ပစ္စယော နတ္ထိ ကာရဏံ နတ္ထိ ယေန သင်္ခံ ဂစ္ဆေယျာတိ— အတ္ထံ ပလေတိ န ဥပေတိ သင်္ခံ. တေနာဟ ဘဂဝါ—
“အစ္စိ ယထာ ဝါတဝေဂေန ခိတ္တာ, (ဥပသီဝါတိ ဘဂဝါ)
အတ္ထံ ပလေတိ န ဥပေတိ သင်္ခံ;
ဧဝံ မုနီ နာမကာယာ ဝိမုတ္တော,
အတ္ထံ ပလေတိ န ဥပေတိ သင်္ခန်”တိ.
အတ္ထင်္ဂတော သော ဥဒ ဝါ သော နတ္ထိ,
ဥဒါဟု ဝေ သဿတိယာ အရောဂေါ;
တံ မေ မုနီ သာဓု ဝိယာကရောဟိ,
တထာ ဟိ တေ ဝိဒိတော ဧသ ဓမ္မော. (7)
အတ္ထင်္ဂတော သော ဥဒ ဝါ သော နတ္ထီ တိ သော အတ္ထင်္ဂတော ဥဒါဟု နတ္ထိ သော နိရုဒ္ဓေါ ဥစ္ဆိန္နော ဝိနဋ္ဌောတိ— အတ္ထင်္ဂတော သော ဥဒ ဝါ သော နတ္ထိ.
ဥဒါဟု ဝေ သဿတိယာ အရောဂေါ တိ ဥဒါဟု နိစ္စော ဓုဝေါ သဿတော အဝိပရိဏာမဓမ္မော သဿတိသမံ တထေဝ တိဋ္ဌေယျာတိ— ဥဒါဟု ဝေ သဿတိယာ အရောဂေါ.
တံ မေ မုနီ သာဓု ဝိယာကရောဟီ တိ. တန် တိ ယံ ပုစ္ဆာမိ ယံ ယာစာမိ ယံ အဇ္ဈေသာမိ ယံ ပသာဒေမိ. မုနီ တိ မောနံ ဝုစ္စတိ ဉာဏံ …ပေ… သင်္ဂဇာလမတိစ္စ သော မုနိ. သာဓု ဝိယာကရောဟီ တိ သာဓု အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ— တံ မေ မုနီ သာဓု ဝိယာကရောဟိ.
တထာ ဟိ တေ ဝိဒိတော ဧသ ဓမ္မော တိ တထာ ဟိ တေ ဝိဒိတော တုလိတော တီရိတော ဝိဘူတော ဝိဘာဝိတော ဧသ ဓမ္မောတိ— တထာ ဟိ တေ ဝိဒိတော ဧသ ဓမ္မော. တေနာဟ သော ဗြာဟ္မဏော—
“အတ္ထင်္ဂတော သော ဥဒ ဝါ သော နတ္ထိ,
ဥဒါဟု ဝေ သဿတိယာ အရောဂေါ;_
တံ မေ မုနီ သာဓု ဝိယာကရောဟိ,
တထာ ဟိ တေ ဝိဒိတော ဧသ ဓမ္မော”တိ.
အတ္ထင်္ဂတဿ န ပမာဏမတ္ထိ, (ဥပသီဝါတိ ဘဂဝါ)
ယေန နံ ဝဇ္ဇုံ တံ တဿ နတ္ထိ;
သဗ္ဗေသု ဓမ္မေသု သမူဟတေသု,
သမူဟတာ ဝါဒပထာပိ သဗ္ဗေ. (8)
အတ္ထင်္ဂတဿ န ပမာဏမတ္ထီ တိ အတ္ထင်္ဂတဿ အနုပါဒိသေသာယ နိဗ္ဗာနဓာတုယာ ပရိနိဗ္ဗုတဿ ရူပပမာဏံ နတ္ထိ, ဝေဒနာပမာဏံ နတ္ထိ, သညာပမာဏံ နတ္ထိ, သင်္ခါရပမာဏံ နတ္ထိ, ဝိညာဏပမာဏံ နတ္ထိ, န အတ္ထိ န သံဝိဇ္ဇတိ နုပလဗ္ဘတိ ပဟီနံ သမုစ္ဆိန္နံ ဝူပသန္တံ ပဋိပ္ပဿဒ္ဓံ အဘဗ္ဗုပ္ပတ္တိကံ ဉာဏဂ္ဂိနာ ဒဍ္ဎန္တိ— အတ္ထင်္ဂတဿ န ပမာဏမတ္ထိ. ဥပသီဝါတိ ဘဂဝါ တိ ဥပသီဝါ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဥပသီဝါတိ ဘဂဝါ.
ယေန နံ ဝဇ္ဇုံ တံ တဿ နတ္ထီ တိ ယေန တံ ရာဂေန ဝဒေယျုံ, ယေန ဒေါသေန ဝဒေယျုံ, ယေန မောဟေန ဝဒေယျုံ, ယေန မာနေန ဝဒေယျုံ, ယာယ ဒိဋ္ဌိယာ ဝဒေယျုံ, ယေန ဥဒ္ဓစ္စေန ဝဒေယျုံ, ယာယ ဝိစိကိစ္ဆာယ ဝဒေယျုံ, ယေဟိ အနုသယေဟိ ဝဒေယျုံ— ရတ္တောတိ ဝါ ဒုဋ္ဌောတိ ဝါ မူဠှောတိ ဝါ ဝိနိဗဒ္ဓေါတိ ဝါ ပရာမဋ္ဌောတိ ဝါ ဝိက္ခေပဂတောတိ ဝါ အနိဋ္ဌင်္ဂတောတိ ဝါ ထာမဂတောတိ ဝါ, တေ အဘိသင်္ခါရာ ပဟီနာ. အဘိသင်္ခါရာနံ ပဟီနတ္တာ ဂတိယာ ယေန တံ ဝဒေယျုံ— နေရယိကောတိ ဝါ တိရစ္ဆာနယောနိကောတိ ဝါ ပေတ္တိဝိသယိကောတိ ဝါ မနုဿောတိ ဝါ ဒေဝေါတိ ဝါ ရူပီတိ ဝါ အရူပီတိ ဝါ သညီတိ ဝါ အသညီတိ ဝါ နေဝသညီနာသညီတိ ဝါ, သော ဟေတု နတ္ထိ ပစ္စယော နတ္ထိ ကာရဏံ နတ္ထိ ယေန ဝဒေယျုံ ကထေယျုံ ဘဏေယျုံ ဒီပေယျုံ ဝေါဟရေယျုန္တိ— ယေန နံ ဝဇ္ဇုံ တံ တဿ နတ္ထိ.
သဗ္ဗေသု ဓမ္မေသု သမူဟတေသူ တိ သဗ္ဗေသု ဓမ္မေသု သဗ္ဗေသု ခန္ဓေသု သဗ္ဗေသု အာယတနေသု သဗ္ဗာသု ဓာတူသု သဗ္ဗာသု ဂတီသု သဗ္ဗာသု ဥပပတ္တီသု သဗ္ဗာသု ပဋိသန္ဓီသု သဗ္ဗေသု ဘဝေသု သဗ္ဗေသု သံသာရေသု သဗ္ဗေသု ဝဋ္ဋေသု ဦဟတေသု သမူဟတေသု ဥဒ္ဓတေသု သမုဒ္ဓတေသု ဥပ္ပါဋိတေသု သမုပ္ပါဋိတေသု ပဟီနေသု သမုစ္ဆိန္နေသု ဝူပသန္တေသု ပဋိပ္ပဿဒ္ဓေသု အဘဗ္ဗုပ္ပတ္တိကေသု ဉာဏဂ္ဂိနာ ဒဍ္ဎေသူတိ— သဗ္ဗေသု ဓမ္မေသု သမူဟတေသု.
သမူဟတာ ဝါဒပထာပိ သဗ္ဗေ တိ ဝါဒပထာ ဝုစ္စန္တိ ကိလေသာ စ ခန္ဓာ စ အဘိသင်္ခါရာ စ. တဿ ဝါဒါ စ ဝါဒပထာ စ အဓိဝစနာနိ စ အဓိဝစနပထာ စ နိရုတ္တိ စ နိရုတ္တိပထာ စ ပညတ္တိ စ ပညတ္တိပထာ စ ဦဟတာ သမူဟတာ ဥဒ္ဓတာ သမုဒ္ဓတာ ဥပ္ပါဋိတာ သမုပ္ပါဋိတာ ပဟီနာ သမုစ္ဆိန္နာ ဝူပသန္တာ ပဋိပ္ပဿဒ္ဓါ အဘဗ္ဗုပ္ပတ္တိကာ ဉာဏဂ္ဂိနာ ဒဍ္ဎာတိ— သမူဟတာ ဝါဒပထာပိ သဗ္ဗေ. တေနာဟ ဘဂဝါ—
“အတ္ထင်္ဂတဿ န ပမာဏမတ္ထိ, (ဥပသီဝါတိ ဘဂဝါ)
ယေန နံ ဝဇ္ဇုံ တံ တဿ နတ္ထိ;
သဗ္ဗေသု ဓမ္မေသု သမူဟတေသု,
သမူဟတာ ဝါဒပထာပိ သဗ္ဗေ”တိ.
သဟ ဂါထာပရိယောသာနာ ယေ တေ ဗြာဟ္မဏေန သဒ္ဓိံ …ပေ… ပဉ္ဇလိကော နမဿမာနော နိသိန္နော ဟောတိ— သတ္ထာ မေ, ဘန္တေ ဘဂဝါ, သာဝကောဟမသ္မီတိ.
ဥပသီဝမာဏဝပုစ္ဆာနိဒ္ဒေသော ဆဋ္ဌော.