2.1.7 နန္ဒမာဏဝပုစ္ဆာနိဒ္ဒေသ
သန္တိ လောကေ မုနယော, (ဣစ္စာယသ္မာ နန္ဒော)
ဇနာ ဝဒန္တိ တယိဒံ ကထံသု;
ဉာဏူပပန္နံ မုနိ နော ဝဒန္တိ,
ဥဒါဟု ဝေ ဇီဝိတေနူပပန္နံ. (1)
သန္တိ လောကေ မုနယော တိ. သန္တီ တိ သန္တိ သံဝိဇ္ဇန္တိ အတ္ထိ ဥပလဗ္ဘန္တိ. လောကေ တိ အပါယလောကေ …ပေ… အာယတနလောကေ. မုနယော တိ မုနိနာမကာ အာဇီဝကာ နိဂဏ္ဌာ ဇဋိလာ တာပသာ. ဒေဝါ လောကေ မုနယောတိ သဉ္ဇာနန္တိ, န စ တေ မုနယောတိ. သန္တိ လောကေ မုနယော. ဣစ္စာယသ္မာ နန္ဒော တိ. ဣစ္စာ တိ ပဒသန္ဓိ …ပေ… . အာယသ္မာ တိ ပိယဝစနံ …ပေ… . နန္ဒော တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ နန္ဒော.
ဇနာ ဝဒန္တိ တယိဒံ ကထံသူ တိ. ဇနာ တိ ခတ္တိယာ စ ဗြာဟ္မဏာ စ ဝေဿာ စ သုဒ္ဒါ စ ဂဟဋ္ဌာ စ ပဗ္ဗဇိတာ စ ဒေဝါ စ မနုဿာ စ. ဝဒန္တီ တိ ကထေန္တိ ဘဏန္တိ ဒီပယန္တိ ဝေါဟရန္တိ. တယိဒံ ကထံသူ တိ သံသယပုစ္ဆာ ဝိမတိပုစ္ဆာ ဒွေဠှကပုစ္ဆာ အနေကံသပုစ္ဆာ “ဧဝံ နု ခေါ, န နု ခေါ, ကိံ နု ခေါ, ကထံ နု ခေါ”တိ— ဇနာ ဝဒန္တိ တယိဒံ ကထံသု.
ဉာဏူပပန္နံ မုနိ နော ဝဒန္တီ တိ. အဋ္ဌ သမာပတ္တိဉာဏေန ဝါ ပဉ္စာဘိညာဉာဏေန ဝါ ဥပေတံ သမုပေတံ ဥပါဂတံ သမုပါဂတံ ဥပပန္နံ သမုပပန္နံ သမန္နာဂတံ မုနိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— ဉာဏူပပန္နံ မုနိ နော ဝဒန္တိ.
ဥဒါဟု ဝေ ဇီဝိတေနူပပန္နန် တိ ဥဒါဟု အနေကဝိဝိဓအတိပရမဒုက္ကရကာရိကလူခဇီဝိတာနုယောဂေန ဥပေတံ သမုပေတံ ဥပါဂတံ သမုပါဂတံ ဥပပန္နံ သမုပပန္နံ သမန္နာဂတံ မုနိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— ဥဒါဟု ဝေ ဇီဝိတေနူပပန္နံ. တေနာဟ သော ဗြာဟ္မဏော—
“သန္တိ လောကေ မုနယော, (ဣစ္စာယသ္မာ နန္ဒော)
ဇနာ ဝဒန္တိ တယိဒံ ကထံသု;
ဉာဏူပပန္နံ မုနိ နော ဝဒန္တိ,
ဥဒါဟု ဝေ ဇီဝိတေနူပပန္နန်”တိ._
န ဒိဋ္ဌိယာ န သုတိယာ န ဉာဏေန,
မုနီဓ နန္ဒ ကုသလာ ဝဒန္တိ;
ဝိသေနိကတွာ အနီဃာ နိရာသာ,
စရန္တိ ယေ တေ မုနယောတိ ဗြူမိ. (2)
န ဒိဋ္ဌိယာ န သုတိယာ န ဉာဏေနာ တိ. န ဒိဋ္ဌိယာ တိ န ဒိဋ္ဌသုဒ္ဓိယာ. န သုတိယာ တိ န သုတသုဒ္ဓိယာ. န ဉာဏေနာ တိ နပိ အဋ္ဌသမာပတ္တိဉာဏေန နပိ ပဉ္စာဘိညာဉာဏေန နပိ မိစ္ဆာဉာဏေနာတိ— န ဒိဋ္ဌိယာ န သုတိယာ န ဉာဏေန.
မုနီဓ နန္ဒ ကုသလာ ဝဒန္တီ တိ. ကုသလာ တိ ယေ တေ ခန္ဓကုသလာ ဓာတုကုသလာ အာယတနကုသလာ ပဋိစ္စသမုပ္ပါဒကုသလာ သတိပဋ္ဌာနကုသလာ သမ္မပ္ပဓာနကုသလာ ဣဒ္ဓိပါဒကုသလာ ဣန္ဒြိယကုသလာ ဗလကုသလာ ဗောဇ္ဈင်္ဂကုသလာ မဂ္ဂကုသလာ ဖလကုသလာ နိဗ္ဗာနကုသလာ ဒိဋ္ဌသုဒ္ဓိယာ ဝါ သုတသုဒ္ဓိယာ ဝါ အဋ္ဌသမာပတ္တိဉာဏေန ဝါ ပဉ္စာဘိညာဉာဏေန ဝါ မိစ္ဆာဉာဏေန ဝါ ဒိဋ္ဌေန ဝါ သုတေန ဝါ ဥပေတံ သမုပေတံ ဥပါဂတံ သမုပါဂတံ ဥပပန္နံ သမုပပန္နံ သမန္နာဂတံ မုနိံ န ဝဒန္တိ န ကထေန္တိ န ဘဏန္တိ န ဒီပယန္တိ န ဝေါဟရန္တီတိ— မုနီဓ နန္ဒ ကုသလာ ဝဒန္တိ.
ဝိသေနိကတွာ အနီဃာ နိရာသာ, စရန္တိ ယေ တေ မုနယောတိ ဗြူမီ တိ သေနာ ဝုစ္စတိ မာရသေနာ, ကာယဒုစ္စရိတံ မာရသေနာ, ဝစီဒုစ္စရိတံ မာရသေနာ, မနောဒုစ္စရိတံ မာရသေနာ, ရာဂေါ မာရသေနာ, ဒေါသော မာရသေနာ, မောဟော မာရသေနာ, ကောဓော …ပေ… ဥပနာဟော… မက္ခော… ပဠာသော… ဣဿာ… မစ္ဆရိယံ… မာယာ… သာဌေယျံ… ထမ္ဘော… သာရမ္ဘော… မာနော… အတိမာနော… မဒေါ… ပမာဒေါ… သဗ္ဗေ ကိလေသာ သဗ္ဗေ ဒုစ္စရိတာ သဗ္ဗေ ဒရထာ သဗ္ဗေ ပရိဠာဟာ သဗ္ဗေ သန္တာပါ သဗ္ဗာကုသလာဘိသင်္ခါရာ မာရသေနာ. ဝုတ္တဉှေတံ ဘဂဝတာ—
“ကာမာ တေ ပဌမာ သေနာ,
ဒုတိယာ အရတိ ဝုစ္စတိ;
တတိယာ ခုပ္ပိပါသာ တေ,
စတုတ္ထီ တဏှာ ပဝုစ္စတိ.
ပဉ္စမံ ထိနမိဒ္ဓံ တေ,
ဆဋ္ဌာ ဘီရူ ပဝုစ္စတိ;
သတ္တမီ ဝိစိကိစ္ဆာ တေ,
မက္ခော ထမ္ဘော တေ အဋ္ဌမော;
လာဘော သိလောကော သက္ကာရော,
မိစ္ဆာလဒ္ဓေါ စ ယော ယသော.
ယော စတ္တာနံ သမုက္ကံသေ,
ပရေ စ အဝဇာနတိ;
ဧသာ နမုစိ တေ သေနာ,
ကဏှဿာဘိပ္ပဟာရိနီ;
န နံ အသူရော ဇိနာတိ,
ဇေတွာ စ လဘတေ သုခန်”တိ.
ယတော စတူဟိ အရိယမဂ္ဂေဟိ သဗ္ဗာ စ မာရသေနာ သဗ္ဗေ စ ပဋိသေနိကရာ ကိလေသာ ဇိတာ စ ပရာဇိတာ စ ဘဂ္ဂါ ဝိပ္ပလုဂ္ဂါ ပရမ္မုခါ, တေန ဝုစ္စန္တိ ဝိသေနိကတွာ. အနီဃာ တိ ရာဂေါ နီဃော, ဒေါသော နီဃော, မောဟော နီဃော, ကောဓော နီဃော, ဥပနာဟော နီဃော …ပေ… သဗ္ဗာကုသလာဘိသင်္ခါရာ နီဃာ. ယေသံ ဧတေ နီဃာ ပဟီနာ သမုစ္ဆိန္နာ ဝူပသန္တာ ပဋိပ္ပဿဒ္ဓါ အဘဗ္ဗုပ္ပတ္တိကာ ဉာဏဂ္ဂိနာ ဒဍ္ဎာ တေ ဝုစ္စန္တိ အနီဃာ. နိရာသာ တိ အာသာ ဝုစ္စတိ တဏှာ. ယော ရာဂေါ သာရာဂေါ …ပေ… အဝိဇ္ဇာ လောဘော အကုသလမူလံ. ယေသံ ဧသာ အာသာ တဏှာ ပဟီနာ သမုစ္ဆိန္နာ ဝူပသန္တာ ပဋိပ္ပဿဒ္ဓါ အဘဗ္ဗုပ္ပတ္တိကာ ဉာဏဂ္ဂိနာ ဒဍ္ဎာ, တေ ဝုစ္စန္တိ နိရာသာ အရဟန္တော ခီဏာသဝါ. ဝိသေနိကတွာ အနီဃာ နိရာသာ, စရန္တိ ယေ တေ မုနယောတိ ဗြူမီ တိ ယေ တေ ဝိသေနိကတွာဝ အနီဃာ စ နိရာသာ စ စရန္တိ ဝိဟရန္တိ ဣရိယန္တိ ဝတ္တေန္တိ ပါလေန္တိ ယပေန္တိ ယာပေန္တိ, တေ လောကေ မုနယောတိ ဗြူမိ အာစိက္ခာမိ ဒေသေမိ ပညပေမိ ပဋ္ဌပေမိ ဝိဝရာမိ ဝိဘဇာမိ ဥတ္တာနီကရောမိ ပကာသေမီတိ— ဝိသေနိကတွာ အနီဃာ နိရာသာ, စရန္တိ ယေ တေ မုနယောတိ ဗြူမိ. တေနာဟ ဘဂဝါ—
“န ဒိဋ္ဌိယာ န သုတိယာ န ဉာဏေန,
မုနီဓ နန္ဒ ကုသလာ ဝဒန္တိ;
ဝိသေနိကတွာ အနီဃာ နိရာသာ,
စရန္တိ ယေ တေ မုနယောတိ ဗြူမီ”တိ.
ယေ ကေစိမေ သမဏဗြာဟ္မဏာသေ, (ဣစ္စာယသ္မာ နန္ဒော)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ.
ကစ္စိဿု တေ ဘဂဝါ တတ္ထ ယတာ စရန္တာ,
အတာရု ဇာတိဉ္စ ဇရဉ္စ မာရိသ;
ပုစ္ဆာမိ တံ ဘဂဝါ ဗြူဟိ မေတံ. (3)
ယေ ကေစိမေ သမဏဗြာဟ္မဏာသေ တိ. ယေ ကေစီ တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ ပရိယာဒိယနဝစနမေတံ— ယေ ကေစီတိ. သမဏာ တိ ယေ ကေစိ ဣတော ဗဟိဒ္ဓါ ပဗ္ဗဇ္ဇူပဂတာ ပရိဗ္ဗာဇကသမာပန္နာ. ဗြာဟ္မဏာ တိ ယေ ကေစိ ဘောဝါဒိကာတိ— ယေ ကေစိမေ သမဏဗြာဟ္မဏာသေ. ဣစ္စာယသ္မာ နန္ဒော တိ. ဣစ္စာ တိ ပဒသန္ဓိ …ပေ… . အာယသ္မာ တိ ပိယဝစနံ …ပေ… . နန္ဒော တိ. တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ နန္ဒော.
ဒိဋ္ဌဿုတေနာပိ ဝဒန္တိ သုဒ္ဓိန် တိ ဒိဋ္ဌေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; သုတေနပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; ဒိဋ္ဌဿုတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— ဒိဋ္ဌဿုတေနာပိ ဝဒန္တိ သုဒ္ဓိံ.
သီလဗ္ဗတေနာပိ ဝဒန္တိ သုဒ္ဓိန် တိ သီလေနပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; ဝတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; သီလဗ္ဗတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— သီလဗ္ဗတေနာပိ ဝဒန္တိ သုဒ္ဓိံ.
အနေကရူပေန ဝဒန္တိ သုဒ္ဓိန် တိ အနေကဝိဓကောတူဟလမင်္ဂလေန သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— အနေကရူပေန ဝဒန္တိ သုဒ္ဓိံ.
ကစ္စိဿု တေ ဘဂဝါ တတ္ထ ယတာ စရန္တာ တိ. ကစ္စိဿူ တိ သံသယပုစ္ဆာ ဝိမတိပုစ္ဆာ ဒွေဠှကပုစ္ဆာ အနေကံသပုစ္ဆာ, “ဧဝံ နု ခေါ, န နု ခေါ, ကိံ နု ခေါ, ကထံ နု ခေါ”တိ— ကစ္စိဿု. တေ တိ ဒိဋ္ဌိဂတိကာ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ကစ္စိဿု တေ ဘဂဝါ. တတ္ထ ယတာ စရန္တာ တိ. တတ္ထာ တိ သကာယ ဒိဋ္ဌိယာ သကာယ ခန္တိယာ သကာယ ရုစိယာ သကာယ လဒ္ဓိယာ. ယတာ တိ ယတ္တာ ပဋိယတ္တာ ဂုတ္တာ ဂေါပိတာ ရက္ခိတာ သံဝုတာ. စရန္တာ တိ စရန္တာ ဝိဟရန္တာ ဣရိယန္တာ ဝတ္တေန္တာ ပါလေန္တာ ယပေန္တာ ယာပေန္တာတိ— ကစ္စိဿု တေ ဘဂဝါ တတ္ထ ယတာ စရန္တာ.
အတာရု ဇာတိဉ္စ ဇရဉ္စ မာရိသာ တိ ဇာတိဇရာမရဏံ အတရိံသု ဥတ္တရိံသု ပတရိံသု သမတိက္ကမိံသု ဝီတိဝတ္တိံသု. မာရိသာ တိ ပိယဝစနံ ဂရုဝစနံ သဂါရဝသပ္ပတိဿာဓိဝစနမေတံ— မာရိသာတိ— အတာရု ဇာတိဉ္စ ဇရဉ္စ မာရိသ.
ပုစ္ဆာမိ တံ ဘဂဝါ ဗြူဟိ မေတန် တိ. ပုစ္ဆာမိ တန် တိ ပုစ္ဆာမိ တံ ယာစာမိ တံ အဇ္ဈေသာမိ တံ, ကထယဿု မေတိ ပုစ္ဆာမိ တံ. ဘဂဝါ တိ …ပေ… သစ္ဆိကာ ပညတ္တိ, ယဒိဒံ ဘဂဝါတိ. ဗြူဟိ မေတန် တိ ဗြူဟိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ— ပုစ္ဆာမိ တံ ဘဂဝါ ဗြူဟိ မေတံ. တေနာဟ သော ဗြာဟ္မဏော—
“ယေ ကေစိမေ သမဏဗြာဟ္မဏာသေ, (ဣစ္စာယသ္မာ နန္ဒော)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ.
ကစ္စိဿု တေ ဘဂဝါ တတ္ထ ယတာ စရန္တာ,
အတာရု ဇာတိဉ္စ ဇရဉ္စ မာရိသ;
ပုစ္ဆာမိ တံ ဘဂဝါ ဗြူဟိ မေတန်”တိ.
ယေ ကေစိမေ သမဏဗြာဟ္မဏာသေ, (နန္ဒာတိ ဘဂဝါ)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ;
ကိဉ္စာပိ တေ တတ္ထ ယတာ စရန္တိ,
နာတရိံသု ဇာတိဇရန္တိ ဗြူမိ. (4)
ယေ ကေစိမေ သမဏဗြာဟ္မဏာသေ တိ. ယေ ကေစီ တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ ပရိယာဒိယနဝစနမေတံ— ယေ ကေစီတိ. သမဏာ တိ ယေ ကေစိ ဣတော ဗဟိဒ္ဓါ ပဗ္ဗဇ္ဇူပဂတာ ပရိဗ္ဗာဇကသမာပန္နာ. ဗြာဟ္မဏာ တိ ယေ ကေစိ ဘောဝါဒိကာတိ— ယေ ကေစိမေ သမဏဗြာဟ္မဏာသေ. နန္ဒာတိ ဘဂဝါ တိ. နန္ဒာ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— နန္ဒာတိ ဘဂဝါ.
ဒိဋ္ဌဿုတေနာပိ ဝဒန္တိ သုဒ္ဓိန် တိ ဒိဋ္ဌေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; သုတေနပိ သုဒ္ဓိံ …ပေ… ဒိဋ္ဌဿုတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— ဒိဋ္ဌဿုတေနာပိ ဝဒန္တိ သုဒ္ဓိံ.
သီလဗ္ဗတေနာပိ ဝဒန္တိ သုဒ္ဓိန် တိ သီလေနပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; ဝတေနာပိ သုဒ္ဓိံ …ပေ… ဝေါဟရန္တိ; သီလဗ္ဗတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— သီလဗ္ဗတေနာပိ ဝဒန္တိ သုဒ္ဓိံ.
အနေကရူပေန ဝဒန္တိ သုဒ္ဓိန် တိ အနေကဝိဓကောတူဟလမင်္ဂလေန သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— အနေကရူပေန ဝဒန္တိ သုဒ္ဓိံ.
ကိဉ္စာပိ တေ တတ္ထ ယတာ စရန္တီ တိ. ကိဉ္စာပီ တိ ပဒသန္ဓိ ပဒသံသဂ္ဂေါ ပဒပါရိပူရီ အက္ခရသမဝါယော ဗျဉ္ဇနသိလိဋ္ဌတာ ပဒါနုပုဗ္ဗတာပေတံ— ကိဉ္စာပီတိ. တေ တိ ဒိဋ္ဌိဂတိကာ. တတ္ထာ တိ သကာယ ဒိဋ္ဌိယာ သကာယ ခန္တိယာ သကာယ ရုစိယာ သကာယ လဒ္ဓိယာ. ယတာ တိ ယတ္တာ ပဋိယတ္တာ ဂုတ္တာ ဂေါပိတာ ရက္ခိတာ သံဝုတာ. စရန္တီ တိ စရန္တိ ဝိဟရန္တိ ဣရိယန္တိ ဝတ္တေန္တိ ပါလေန္တိ ယပေန္တိ ယာပေန္တီတိ— ကိဉ္စာပိ တေ တတ္ထ ယတာ စရန္တိ.
နာတရိံသု ဇာတိဇရန္တိ ဗြူမီ တိ ဇာတိဇရာမရဏံ န တရိံသု န ဥတ္တရိံသု န ပတရိံသု န သမတိက္ကမိံသု န ဝီတိဝတ္တိံသု, ဇာတိဇရာမရဏာ အနိက္ခန္တာ အနိဿဋာ အနတိက္ကန္တာ အသမတိက္ကန္တာ အဝီတိဝတ္တာ, အန္တောဇာတိဇရာမရဏေ ပရိဝတ္တေန္တိ, အန္တောသံသာရပထေ ပရိဝတ္တေန္တိ, ဇာတိယာ အနုဂတာ, ဇရာယ အနုသဋာ, ဗျာဓိနာ အဘိဘူတာ, မရဏေန အဗ္ဘာဟတာ အတာဏာ အလေဏာ အသရဏာ အသရဏီဘူတာတိ ဗြူမိ အာစိက္ခာမိ ဒေသေမိ ပညပေမိ ပဋ္ဌပေမိ ဝိဝရာမိ ဝိဘဇာမိ ဥတ္တာနီကရောမိ ပကာသေမီတိ— နာတရိံသု ဇာတိဇရန္တိ ဗြူမိ. တေနာဟ ဘဂဝါ—
“ယေ ကေစိမေ သမဏဗြာဟ္မဏာသေ, (နန္ဒာတိ ဘဂဝါ)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ;
ကိဉ္စာပိ တေ တတ္ထ ယတာ စရန္တိ,
နာတရိံသု ဇာတိဇရန္တိ ဗြူမီ”တိ.
ယေ ကေစိမေ သမဏဗြာဟ္မဏာသေ, (ဣစ္စာယသ္မာ နန္ဒော)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ.
တေ စေ မုနီ ဗြူသိ အနောဃတိဏ္ဏေ,
အထ ကော စရဟိ ဒေဝမနုဿလောကေ;
အတာရိ ဇာတိဉ္စ ဇရဉ္စ မာရိသ,
ပုစ္ဆာမိ တံ ဘဂဝါ ဗြူဟိ မေတံ. (5)
ယေ ကေစိမေ သမဏဗြာဟ္မဏာသေ တိ. ယေ ကေစီ တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ ပရိယာဒိယနဝစနမေတံ— ယေ ကေစီတိ. သမဏာ တိ ယေ ကေစိ ဣတော ဗဟိဒ္ဓါ ပဗ္ဗဇ္ဇူပဂတာ ပရိဗ္ဗာဇကသမာပန္နာ. ဗြာဟ္မဏာ တိ ယေ ကေစိ ဘောဝါဒိကာတိ— ယေ ကေစိမေ သမဏဗြာဟ္မဏာသေ. ဣစ္စာယသ္မာ နန္ဒော တိ. ဣစ္စာ တိ ပဒသန္ဓိ …ပေ… ဣစ္စာယသ္မာ နန္ဒော.
ဒိဋ္ဌဿုတေနာပိ ဝဒန္တိ သုဒ္ဓိန် တိ ဒိဋ္ဌေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; သုတေနာပိ သုဒ္ဓိံ …ပေ… ဒိဋ္ဌဿုတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— ဒိဋ္ဌဿုတေနာပိ ဝဒန္တိ သုဒ္ဓိံ.
သီလဗ္ဗတေနာပိ ဝဒန္တိ သုဒ္ဓိန် တိ သီလေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တိ; ဝတေနာပိ သုဒ္ဓိံ …ပေ… ဝေါဟရန္တိ; သီလဗ္ဗတေနာပိ သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— သီလဗ္ဗတေနာပိ ဝဒန္တိ သုဒ္ဓိံ.
အနေကရူပေန ဝဒန္တိ သုဒ္ဓိန် တိ အနေကဝိဓကောတူဟလမင်္ဂလေန သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ဝဒန္တိ ကထေန္တိ ဘဏန္တိ ဒီပယန္တိ ဝေါဟရန္တီတိ— အနေကရူပေန ဝဒန္တိ သုဒ္ဓိံ.
တေ စေ မုနီ ဗြူသိ အနောဃတိဏ္ဏေ တိ. တေ စေ တိ ဒိဋ္ဌိဂတိကေ. မုနီ တိ မောနံ ဝုစ္စတိ ဉာဏံ …ပေ… သင်္ဂဇာလမတိစ္စ သော မုနိ. ဗြူသိ အနောဃတိဏ္ဏေ တိ ကာမောဃံ ဘဝေါဃံ ဒိဋ္ဌောဃံ အဝိဇ္ဇောဃံ အတိဏ္ဏေ အနတိက္ကန္တေ အသမတိက္ကန္တေ အဝီတိဝတ္တေ အန္တောဇာတိဇရာမရဏေ ပရိဝတ္တေန္တေ အန္တောသံသာရပထေ ပရိဝတ္တေန္တေ ဇာတိယာ အနုဂတေ ဇရာယ အနုသဋေ ဗျာဓိနာ အဘိဘူတေ မရဏေန အဗ္ဘာဟတေ အတာဏေ အလေဏေ အသရဏေ အသရဏီဘူတေ. ဗြူသီ တိ ဗြူသိ အာစိက္ခသိ ဒေသေသိ ပညပေသိ ပဋ္ဌပေသိ ဝိဝရသိ ဝိဘဇသိ ဥတ္တာနီကရောသိ ပကာသေသီတိ— တေ စေ မုနီ ဗြူသိ အနောဃတိဏ္ဏေ.
အထ ကော စရဟိ ဒေဝမနုဿလောကေ, အတာရိ ဇာတိဉ္စ ဇရဉ္စ မာရိသာ တိ အထ ကော ဧသော သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ ဇာတိဇရာမရဏံ အတရိ ဥတ္တရိ ပတရိ သမတိက္ကမိ ဝီတိဝတ္တယိ. မာရိသာ တိ ပိယဝစနံ ဂရုဝစနံ သဂါရဝသပ္ပတိဿာဓိဝစနမေတံ မာရိသာတိ— အထ ကော စရဟိ ဒေဝမနုဿလောကေ, အတာရိ ဇာတိဉ္စ ဇရဉ္စ မာရိသ.
ပုစ္ဆာမိ တံ ဘဂဝါ ဗြူဟိ မေတန် တိ. ပုစ္ဆာမိ တန် တိ ပုစ္ဆာမိ တံ ယာစာမိ တံ အဇ္ဈေသာမိ တံ ပသာဒေမိ တံ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ. ဗြူဟိ မေတန် တိ ဗြူဟိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟီတိ— ပုစ္ဆာမိ တံ ဘဂဝါ ဗြူဟိ မေတံ. တေနာဟ သော ဗြာဟ္မဏော—
“ယေ ကေစိမေ သမဏဗြာဟ္မဏာသေ, (ဣစ္စာယသ္မာ နန္ဒော)
ဒိဋ္ဌဿုတေနာပိ ဝဒန္တိ သုဒ္ဓိံ;
သီလဗ္ဗတေနာပိ ဝဒန္တိ သုဒ္ဓိံ,
အနေကရူပေန ဝဒန္တိ သုဒ္ဓိံ.
တေ စေ မုနီ ဗြူသိ အနောဃတိဏ္ဏေ,
အထ ကော စရဟိ ဒေဝမနုဿလောကေ;
အတာရိ ဇာတိဉ္စ ဇရဉ္စ မာရိသ,
ပုစ္ဆာမိ တံ ဘဂဝါ ဗြူဟိ မေတန်”တိ.
နာဟံ သဗ္ဗေ သမဏဗြာဟ္မဏာသေ, (နန္ဒာတိ ဘဂဝါ)
ဇာတိဇရာယ နိဝုတာတိ ဗြူမိ;
ယေ သီဓ ဒိဋ္ဌံ ဝ သုတံ မုတံ ဝါ,
သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗံ,
တဏှံ ပရိညာယ အနာသဝါသေ;
တေ ဝေ နရာ ဩဃတိဏ္ဏာတိ ဗြူမိ. (6)
နာဟံ သဗ္ဗေ သမဏဗြာဟ္မဏာသေ, (နန္ဒာတိ ဘဂဝါ) ဇာတိဇရာယ နိဝုတာတိ ဗြူမီ တိ နာဟံ, နန္ဒ, သဗ္ဗေ သမဏဗြာဟ္မဏာ ဇာတိဇရာယ အာဝုတာ နိဝုတာ ဩဝုတာ ပိဟိတာ ပဋိစ္ဆန္နာ ပဋိကုဇ္ဇိတာတိ ဝဒါမိ. အတ္ထိ တေ သမဏဗြာဟ္မဏာ ယေသံ ဇာတိ စ ဇရာမရဏဉ္စ ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာတိ ဗြူမိ အာစိက္ခာမိ ဒေသေမိ ပညပေမိ ပဋ္ဌပေမိ ဝိဝရာမိ ဝိဘဇာမိ ဥတ္တာနီကရောမိ ပကာသေမီတိ— နာဟံ သဗ္ဗေ သမဏဗြာဟ္မဏာသေ, (နန္ဒာတိ ဘဂဝါ) ဇာတိဇရာယ နိဝုတာတိ ဗြူမိ.
ယေ သီဓ ဒိဋ္ဌံ ဝ သုတံ မုတံ ဝါ, သီလဗ္ဗတံ ဝါပိ ပဟာယ သဗ္ဗန် တိ ယေ သဗ္ဗာ ဒိဋ္ဌသုဒ္ဓိယော ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာ. ယေ သဗ္ဗာ သုတသုဒ္ဓိယော ပဟာယ …ပေ… ယေ သဗ္ဗာ မုတသုဒ္ဓိယော ပဟာယ, ယေ သဗ္ဗာ ဒိဋ္ဌသုတမုတသုဒ္ဓိယော ပဟာယ ယေ သဗ္ဗာ သီလသုဒ္ဓိယော ပဟာယ, ယေ သဗ္ဗာ ဝတသုဒ္ဓိယော ပဟာယ, ယေ သဗ္ဗာ သီလဗ္ဗတသုဒ္ဓိယော ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— ယေ သီဓ ဒိဋ္ဌံ ဝ သုတံ မုတံ ဝါ, သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗန် တိ အနေကဝိဓကောတူဟလမင်္ဂလေန သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— အနေကရူပမ္ပိ ပဟာယ သဗ္ဗံ.
တဏှံ ပရိညာယ အနာသဝါ သေ, တေ ဝေ နရာ ဩဃတိဏ္ဏာတိ ဗြူမီ တိ. တဏှာ တိ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ. တဏှံ ပရိညာယာ တိ တဏှံ တီဟိ ပရိညာဟိ ပရိဇာနိတွာ— ဉာတပရိညာယ, တီရဏပရိညာယ, ပဟာနပရိညာယ. ကတမာ ဉာတပရိညာ? တဏှံ ဇာနာတိ “အယံ ရူပတဏှာ, အယံ သဒ္ဒတဏှာ, အယံ ဂန္ဓတဏှာ, အယံ ရသတဏှာ, အယံ ဖောဋ္ဌဗ္ဗတဏှာ, အယံ ဓမ္မတဏှာ”တိ ဇာနာတိ ပဿတိ— အယံ ဉာတပရိညာ.
ကတမာ တီရဏပရိညာ? ဧဝံ ဉာတံ ကတွာ တဏှံ တီရေတိ အနိစ္စတော ဒုက္ခတော ရောဂတော ဂဏ္ဍတော …ပေ… နိဿရဏတော တီရေတိ— အယံ တီရဏပရိညာ.
ကတမာ ပဟာနပရိညာ? ဧဝံ တီရယိတွာ တဏှံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ. ဝုတ္တဉှေတံ ဘဂဝတာ— “ယော, ဘိက္ခဝေ, တဏှာယ ဆန္ဒရာဂေါ တံ ပဇဟထ. ဧဝံ သာ တဏှာ ပဟီနာ ဘဝိဿတိ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ”. အယံ ပဟာနပရိညာ. တဏှံ ပရိညာယာ တိ တဏှံ ဣမာဟိ တီဟိ ပရိညာဟိ ပရိဇာနိတွာ. အနာသဝါ တိ စတ္တာရော အာသဝါ— ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ. ယေသံ ဣမေ အာသဝါ ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ, တေ ဝုစ္စန္တိ အနာသဝါ အရဟန္တော ခီဏာသဝါ— တဏှံ ပရိညာယ အနာသဝါ.
တေ ဝေ နရာ ဩဃတိဏ္ဏာတိ ဗြူမီ တိ ယေ တဏှံ ပရိညာယ အနာသဝါ, တေ ကာမောဃံ တိဏ္ဏာ ဘဝေါဃံ တိဏ္ဏာ ဒိဋ္ဌောဃံ တိဏ္ဏာ အဝိဇ္ဇောဃံ တိဏ္ဏာ သဗ္ဗသံသာရပထံ တိဏ္ဏာ ဥတ္တိဏ္ဏာ နိတ္ထိဏ္ဏာ အတိက္ကန္တာ သမတိက္ကန္တာ ဝီတိဝတ္တာတိ ဗြူမိ အာစိက္ခာမိ ဒေသေမိ ပညပေမိ ပဋ္ဌပေမိ ဝိဝရာမိ ဝိဘဇာမိ ဥတ္တာနီကရောမိ ပကာသေမီတိ— တဏှံ ပရိညာယ အနာသဝါသေ တေ ဝေ နရာ ဩဃတိဏ္ဏာတိ ဗြူမိ. တေနာဟ ဘဂဝါ—
“နာဟံ သဗ္ဗေ သမဏဗြာဟ္မဏာသေ, (နန္ဒာတိ ဘဂဝါ)
ဇာတိဇရာယ နိဝုတာတိ ဗြူမိ;
ယေ သီဓ ဒိဋ္ဌံ ဝ သုတံ မုတံ ဝါ,
သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗံ,
တဏှံ ပရိညာယ အနာသဝါသေ;
တေ ဝေ နရာ ဩဃတိဏ္ဏာတိ ဗြူမီ”တိ.
ဧတာဘိနန္ဒာမိ ဝစော မဟေသိနော,
သုကိတ္တိတံ ဂေါတမနူပဓီကံ;
ယေ သီဓ ဒိဋ္ဌံ ဝ သုတံ မုတံ ဝါ,
သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗံ,
တဏှံ ပရိညာယ အနာသဝါသေ;
အဟမ္ပိ တေ ဩဃတိဏ္ဏာတိ ဗြူမိ. (7)
ဧတာဘိနန္ဒာမိ ဝစော မဟေသိနော တိ. ဧတန် တိ တုယှံ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ နန္ဒာမိ အဘိနန္ဒာမိ မောဒါမိ အနုမောဒါမိ ဣစ္ဆာမိ သာဒိယာမိ ပတ္ထယာမိ ပိဟယာမိ အဘိဇပ္ပါမိ. မဟေသိနော တိ ကိံ မဟေသိ ဘဂဝါ? မဟန္တံ သီလက္ခန္ဓံ ဧသီ ဂဝေသီ ပရိယေသီတိ မဟေသိ …ပေ… ကဟံ နရာသဘောတိ မဟေသီတိ— ဧတာဘိနန္ဒာမိ ဝစော မဟေသိနော.
သုကိတ္တိတံ ဂေါတမနူပဓီကန် တိ. သုကိတ္တိတန် တိ သုကိတ္တိတံ သုအာစိက္ခိတံ သုဒေသိတံ သုပညပိတံ သုပဋ္ဌပိတံ သုဝိဝဋံ သုဝိဘတ္တံ သုဥတ္တာနီကတံ သုပကာသိတံ. ဂေါတမနူပဓီကန် တိ ဥပဓီ ဝုစ္စန္တိ ကိလေသာ စ ခန္ဓာ စ အဘိသင်္ခါရာ စ. ဥပဓိပ္ပဟာနံ ဥပဓိဝူပသမံ ဥပဓိနိဿဂ္ဂံ ဥပဓိပဋိပ္ပဿဒ္ဓံ အမတံ နိဗ္ဗာနန္တိ— သုကိတ္တိတံ ဂေါတမနူပဓီကံ.
ယေ သီဓ ဒိဋ္ဌံ ဝ သုတံ မုတံ ဝါ, သီလဗ္ဗတံ ဝါပိ ပဟာယ သဗ္ဗန် တိ ယေ သဗ္ဗာ ဒိဋ္ဌသုဒ္ဓိယော ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာ. ယေ သဗ္ဗာ သုတသုဒ္ဓိယော …ပေ… ယေ သဗ္ဗာ မုတသုဒ္ဓိယော… ယေ သဗ္ဗာ ဒိဋ္ဌသုတမုတသုဒ္ဓိယော… ယေ သဗ္ဗာ သီလသုဒ္ဓိယော… ယေ သဗ္ဗာ ဝတသုဒ္ဓိယော… ယေ သဗ္ဗာ သီလဗ္ဗတသုဒ္ဓိယော ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— ယေ သီဓ ဒိဋ္ဌံ ဝ သုတံ မုတံ ဝါ, သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗန် တိ အနေကဝိဓကောတူဟလမင်္ဂလေန သုဒ္ဓိံ ဝိသုဒ္ဓိံ ပရိသုဒ္ဓိံ မုတ္တိံ ဝိမုတ္တိံ ပရိမုတ္တိံ ပဟာယ ဇဟိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— အနေကရူပမ္ပိ ပဟာယ သဗ္ဗံ.
တဏှံ ပရိညာယ အနာသဝါသေ, အဟမ္ပိ တေ ဩဃတိဏ္ဏာတိ ဗြူမီ တိ. တဏှာ တိ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ. တဏှံ ပရိညာယာ တိ တဏှံ တီဟိ ပရိညာဟိ ပရိဇာနိတွာ— ဉာတပရိညာယ, တီရဏပရိညာယ, ပဟာနပရိညာယ. ကတမာ ဉာတပရိညာ? တဏှံ ဇာနာတိ— အယံ ရူပတဏှာ, အယံ သဒ္ဒတဏှာ, အယံ ဂန္ဓတဏှာ, အယံ ရသတဏှာ, အယံ ဖောဋ္ဌဗ္ဗတဏှာ, အယံ ဓမ္မတဏှာတိ ဇာနာတိ ပဿတိ— အယံ ဉာတပရိညာ.
ကတမာ တီရဏပရိညာ? ဧဝံ ဉာတံ ကတွာ တဏှံ တီရေတိ အနိစ္စတော ဒုက္ခတော ရောဂတော ဂဏ္ဍတော သလ္လတော အဃတော အာဗာဓတော ပရတော ပလောကတော ဤတိတော ဥပဒ္ဒဝတော ဘယတော ဥပသဂ္ဂတော စလတော ပဘင်္ဂုတော အဒ္ဓုဝတော အတာဏတော အလေဏတော အသရဏတော အသရဏီဘူတတော ရိတ္တတော တုစ္ဆတော သုညတော အနတ္တတော အာဒီနဝတော ဝိပရိဏာမဓမ္မတော အသာရကတော အဃမူလတော ဝဓကတော ဝိဘဝတော သာသဝတော သင်္ခတတော မာရာမိသတော ဇာတိဓမ္မတော ဇရာဓမ္မတော ဗျာဓိဓမ္မတော မရဏဓမ္မတော သောကပရိဒေဝဒုက္ခဒေါမနဿုပါယာသဓမ္မတော သံကိလေသဓမ္မတော သမုဒယတော အတ္ထင်္ဂမတော အဿာဒတော အာဒီနဝတော နိဿရဏတော တီရေတိ— အယံ တီရဏပရိညာ.
ကတမာ ပဟာနပရိညာ? ဧဝံ တီရယိတွာ တဏှံ ပဇဟတိ ဝိနောဒေတိ ဗျန္တီကရောတိ အနဘာဝံ ဂမေတိ— အယံ ပဟာနပရိညာ.
တဏှံ ပရိညာယာ တိ တဏှံ ဣမာဟိ တီဟိ ပရိညာဟိ ပရိဇာနိတွာ. အနာသဝါ တိ စတ္တာရော အာသဝါ— ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ. ယေသံ ဣမေ အာသဝါ ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ, တေ ဝုစ္စန္တိ အနာသဝါ အရဟန္တော ခီဏာသဝါ. တဏှံ ပရိညာယ အနာသဝါသေ, အဟမ္ပိ တေ ဩဃတိဏ္ဏာ တိ. ဗြူမီ တိ ယေ တဏှံ ပရိညာယ အနာသဝါ, အဟမ္ပိ တေ ကာမောဃံ တိဏ္ဏာ ဘဝေါဃံ တိဏ္ဏာ ဒိဋ္ဌောဃံ တိဏ္ဏာ အဝိဇ္ဇောဃံ တိဏ္ဏာ သဗ္ဗသံသာရပထံ တိဏ္ဏာ ဥတ္တိဏ္ဏာ နိတ္ထိဏ္ဏာ အတိက္ကန္တာ သမတိက္ကန္တာ ဝီတိဝတ္တာတိ ဗြူမိ ဝဒါမီတိ— တဏှံ ပရိညာယ အနာသဝါသေ, အဟမ္ပိ တေ ဩဃတိဏ္ဏာတိ ဗြူမိ. တေနာဟ သော ဗြာဟ္မဏော—
“ဧတာဘိနန္ဒာမိ ဝစော မဟေသိနော,
သုကိတ္တိတံ ဂေါတမနူပဓီကံ;
ယေ သီဓ ဒိဋ္ဌံ ဝ သုတံ မုတံ ဝါ,
သီလဗ္ဗတံ ဝါပိ ပဟာယ သဗ္ဗံ.
အနေကရူပမ္ပိ ပဟာယ သဗ္ဗံ,
တဏှံ ပရိညာယ အနာသဝါသေ;
အဟမ္ပိ တေ ဩဃတိဏ္ဏာတိ ဗြူမီ”တိ.
နန္ဒမာဏဝပုစ္ဆာနိဒ္ဒေသော သတ္တမော.