2.1.9 တောဒေယျမာဏဝပုစ္ဆာနိဒ္ဒေသ
ယသ္မိံ ကာမာ န ဝသန္တိ, (ဣစ္စာယသ္မာ တောဒေယျော)
တဏှာ ယဿ န ဝိဇ္ဇတိ;
ကထံကထာ စ ယော တိဏ္ဏော,
ဝိမောက္ခော တဿ ကီဒိသော. (1)
ယသ္မိံ ကာမာ န ဝသန္တီ တိ ယသ္မိံ ကာမာ န ဝသန္တိ န သံဝသန္တိ န အာဝသန္တိ န ပရိဝသန္တီတိ— ယသ္မိံ ကာမာ န ဝသန္တိ. ဣစ္စာယသ္မာ တောဒေယျော တိ. ဣစ္စာ တိ ပဒသန္ဓိ …ပေ… ပဒါနုပုဗ္ဗတာပေတံ— ဣစ္စာတိ. အာယသ္မာ တိ ပိယဝစနံ …ပေ… . တောဒေယျော တိ တဿ ဗြာဟ္မဏဿ နာမံ …ပေ… အဘိလာပေါတိ— ဣစ္စာယသ္မာ တောဒေယျော.
တဏှာ ယဿ န ဝိဇ္ဇတီ တိ တဏှာ ယဿ နတ္ထိ န အတ္ထိ န သံဝိဇ္ဇတိ နုပလဗ္ဘတိ ဉာဏဂ္ဂိနာ ဒဍ္ဎာတိ— တဏှာ ယဿ န ဝိဇ္ဇတိ.
ကထံကထာ စ ယော တိဏ္ဏော တိ ကထံကထာ စ ယော တိဏ္ဏော ဥတ္တိဏ္ဏော နိတ္ထိဏ္ဏော အတိက္ကန္တော သမတိက္ကန္တော ဝီတိဝတ္တောတိ— ကထံကထာ စ ယော တိဏ္ဏော.
ဝိမောက္ခော တဿ ကီဒိသော တိ ဝိမောက္ခော တဿ ကီဒိသော ကိံသဏ္ဌိတော ကိံပကာရော ကိံပဋိဘာဂေါ ဣစ္ဆိတဗ္ဗောတိ ဝိမောက္ခံ ပုစ္ဆတီတိ— ဝိမောက္ခော တဿ ကီဒိသော. တေနာဟ သော ဗြာဟ္မဏော—
“ယသ္မိံ ကာမာ န ဝသန္တိ, (ဣစ္စာယသ္မာ တောဒေယျော)
တဏှာ ယဿ န ဝိဇ္ဇတိ;
ကထံကထာ စ ယော တိဏ္ဏော,
ဝိမောက္ခော တဿ ကီဒိသော”တိ.
ယသ္မိံ ကာမာ န ဝသန္တိ, (တောဒေယျာတိ ဘဂဝါ)
တဏှာ ယဿ န ဝိဇ္ဇတိ;
ကထံကထာ စ ယော တိဏ္ဏော,
ဝိမောက္ခော တဿ နာပရော. (2)
ယသ္မိံ ကာမာ န ဝသန္တီ တိ. ယသ္မိန် တိ ယသ္မိံ ပုဂ္ဂလေ အရဟန္တေ ခီဏာသဝေ. ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. ယသ္မိံ ကာမာ န ဝသန္တီ တိ ယသ္မိံ ကာမာ န ဝသန္တိ န သံဝသန္တိ န အာဝသန္တိ န ပရိဝသန္တီတိ— ယသ္မိံ ကာမာ န ဝသန္တိ.
တောဒေယျာတိ ဘဂဝါ တိ. တောဒေယျာ တိ ဘဂဝါ တံ ဗြာဟ္မဏံ နာမေန အာလပတိ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— တောဒေယျာတိ ဘဂဝါ.
တဏှာ ယဿ န ဝိဇ္ဇတီ တိ. တဏှာ တိ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ. ယဿာ တိ အရဟတော ခီဏာသဝဿ. တဏှာ ယဿ န ဝိဇ္ဇတီ တိ တဏှာ ယဿ နတ္ထိ န အတ္ထိ န သံဝိဇ္ဇတိ နုပလဗ္ဘတိ, ပဟီနာ သမုစ္ဆိန္နာ ဝူပသန္တာ ပဋိပ္ပဿဒ္ဓါ အဘဗ္ဗုပ္ပတ္တိကာ ဉာဏဂ္ဂိနာ ဒဍ္ဎာတိ— တဏှာ ယဿ န ဝိဇ္ဇတိ.
ကထံကထာ စ ယော တိဏ္ဏော တိ ကထံကထာ ဝုစ္စတိ ဝိစိကိစ္ဆာ. ဒုက္ခေ ကင်္ခါ …ပေ… ဆမ္ဘိတတ္တံ စိတ္တဿ မနောဝိလေခေါ. ယော တိ ယော သော အရဟံ ခီဏာသဝေါ. ကထံကထာ စ ယော တိဏ္ဏော တိ ကထံကထာ စ ယော တိဏ္ဏော ဥတ္တိဏ္ဏော နိတ္ထိဏ္ဏော အတိက္ကန္တော သမတိက္ကန္တော ဝီတိဝတ္တောတိ— ကထံကထာ စ ယော တိဏ္ဏော.
ဝိမောက္ခော တဿ နာပရော တိ နတ္ထိ တဿ အပရော ဝိမောက္ခော. ယေန ဝိမောက္ခေန ဝိမုစ္စေယျ ဝိမုတ္တော သော. ကတံ တဿ ဝိမောက္ခေန ကရဏီယန္တိ— ဝိမောက္ခော တဿ နာပရော. တေနာဟ ဘဂဝါ—
“ယသ္မိံ ကာမာ န ဝသန္တိ, (တောဒေယျာတိ ဘဂဝါ)
တဏှာ ယဿ န ဝိဇ္ဇတိ;
ကထံကထာ စ ယော တိဏ္ဏော,
ဝိမောက္ခော တဿ နာပရော”တိ.
နိရာသသော သော ဥဒ အာသသာနော,
ပညာဏဝါ သော ဥဒ ပညကပ္ပီ;
မုနိံ အဟံ သက္က ယထာ ဝိဇညံ,
တံ မေ ဝိယာစိက္ခ သမန္တစက္ခု. (3)
နိရာသသော သော ဥဒ အာသသာနော တိ နိတ္တဏှော သော, ဥဒါဟု သတဏှော ရူပေ အာသီသတိ, သဒ္ဒေ …ပေ… ဂန္ဓေ… ရသေ… ဖောဋ္ဌဗ္ဗေ… ကုလံ… ဂဏံ… အာဝါသံ… လာဘံ… ယသံ… ပသံသံ… သုခံ… စီဝရံ… ပိဏ္ဍပါတံ… သေနာသနံ… ဂိလာနပစ္စယဘေသဇ္ဇပရိက္ခာရံ… ကာမဓာတုံ… ရူပဓာတုံ… အရူပဓာတုံ… ကာမဘဝံ… ရူပဘဝံ… အရူပဘဝံ… သညာဘဝံ… အသညာဘဝံ… နေဝသညာနာသညာဘဝံ… ဧကဝေါကာရဘဝံ… စတုဝေါကာရဘဝံ… ပဉ္စဝေါကာရဘဝံ… အတီတံ… အနာဂတံ… ပစ္စုပ္ပန္နံ… ဒိဋ္ဌသုတမုတဝိညာတဗ္ဗေ ဓမ္မေ အာသီသတိ သာဒိယတိ ပတ္ထေတိ ပိဟေတိ အဘိဇပ္ပတီတိ— နိရာသသော သော ဥဒ အာသသာနော.
ပညာဏဝါ သော ဥဒ ပညကပ္ပီ တိ. ပညာဏဝါ သော တိ ပဏ္ဍိတော ပညဝါ ဗုဒ္ဓိမာ ဉာဏီ ဝိဘာဝီ မေဓာဝီ. ဥဒ ပညကပ္ပီ တိ ဥဒါဟု အဋ္ဌသမာပတ္တိဉာဏေန ဝါ ပဉ္စာဘိညာဉာဏေန ဝါ မိစ္ဆာဉာဏေန ဝါ တဏှာကပ္ပံ ဝါ ဒိဋ္ဌိကပ္ပံ ဝါ ကပ္ပေတိ ဇနေတိ သဉ္ဇနေတိ နိဗ္ဗတ္တေတိ အဘိနိဗ္ဗတ္တေတီတိ— ပညာဏဝါ သော ဥဒ ပညကပ္ပီ.
မုနိံ အဟံ သက္က ယထာ ဝိဇညန် တိ. သက္ကာ တိ သက္ကော ဘဂဝါ. သကျကုလာ ပဗ္ဗဇိတောတိပိ သက္ကော. အထ ဝါ အဍ္ဎော မဟဒ္ဓနော ဓနဝါတိပိ သက္ကော. တဿိမာနိ ဓနာနိ, သေယျထိဒံ— သဒ္ဓါဓနံ သီလဓနံ ဟိရိဓနံ ဩတ္တပ္ပဓနံ သုတဓနံ စာဂဓနံ ပညာဓနံ သတိပဋ္ဌာနဓနံ သမ္မပ္ပဓာနဓနံ ဣဒ္ဓိပါဒဓနံ ဣန္ဒြိယဓနံ ဗလဓနံ ဗောဇ္ဈင်္ဂဓနံ မဂ္ဂဓနံ ဖလဓနံ နိဗ္ဗာနဓနန္တိ. တေဟိ အနေကဝိဓေဟိ ဓနရတနေဟိ အဍ္ဎော မဟဒ္ဓနော ဓနဝါတိပိ သက္ကော. အထ ဝါ သက္ကော ပဟု ဝိသဝီ အလမတ္တော သူရော ဝီရော ဝိက္ကန္တော အဘီရူ အစ္ဆမ္ဘီ အနုတြာသီ အပလာယီ ပဟီနဘယဘေရဝေါ ဝိဂတလောမဟံသောတိပိ သက္ကော. မုနိံ အဟံ သက္က ယထာ ဝိဇညန် တိ သက္က ယထာဟံ မုနိံ ဇာနေယျံ အာဇာနေယျံ ဝိဇာနေယျံ ပဋိဝိဇာနေယျံ ပဋိဝိဇ္ဈေယျန္တိ— မုနိံ အဟံ သက္က ယထာ ဝိဇညံ.
တံ မေ ဝိယာစိက္ခ သမန္တစက္ခူ တိ. တန် တိ ယံ ပုစ္ဆာမိ ယံ ယာစာမိ ယံ အဇ္ဈေသာမိ ယံ ပသာဒေမိ. ဝိယာစိက္ခာ တိ အာစိက္ခာဟိ ဒေသေဟိ ပညပေဟိ ပဋ္ဌပေဟိ ဝိဝရာဟိ ဝိဘဇာဟိ ဥတ္တာနီကရောဟိ ပကာသေဟိ. သမန္တစက္ခူ တိ သမန္တစက္ခု ဝုစ္စတိ သဗ္ဗညုတဉာဏံ …ပေ… တထာဂတော တေန သမန္တစက္ခူတိ— တံ မေ ဝိယာစိက္ခ သမန္တစက္ခု. တေနာဟ သော ဗြာဟ္မဏော—
“နိရာသသော သော ဥဒ အာသသာနော,
ပညာဏဝါ သော ဥဒ ပညကပ္ပီ;
မုနိံ အဟံ သက္က ယထာ ဝိဇညံ,
တံ မေ ဝိယာစိက္ခ သမန္တစက္ခူ”တိ.
နိရာသသော သော န စ အာသသာနော,
ပညာဏဝါ သော န စ ပညကပ္ပီ;
ဧဝမ္ပိ တောဒေယျ မုနိံ ဝိဇာန,
အကိဉ္စနံ ကာမဘဝေ အသတ္တံ. (4)
နိရာသသော သော န စ အာသသာနော တိ နိတ္တဏှော သော. န သော သတဏှော ရူပေ နာသီသတိ. သဒ္ဒေ …ပေ… ဂန္ဓေ… ဒိဋ္ဌသုတမုတဝိညာတဗ္ဗေ ဓမ္မေ နာသီသတိ န ဣစ္ဆတိ န သာဒိယတိ န ပတ္ထေတိ န ပိဟေတိ နာဘိဇပ္ပတီတိ— နိရာသသော သော န စ အာသသာနော.
ပညာဏဝါ သော န စ ပညကပ္ပီ တိ. ပညာဏဝါ တိ ပဏ္ဍိတော ပညဝါ ဗုဒ္ဓိမာ ဉာဏီ ဝိဘာဝီ မေဓာဝီ. န စ ပညကပ္ပီ တိ အဋ္ဌသမာပတ္တိဉာဏေန ဝါ ပဉ္စာဘိညာဉာဏေန ဝါ မိစ္ဆာဉာဏေန ဝါ တဏှာကပ္ပံ ဝါ န ကပ္ပေတိ ဒိဋ္ဌိကပ္ပံ ဝါ န ကပ္ပေတိ န ဇနေတိ န သဉ္ဇနေတိ န နိဗ္ဗတ္တေတိ နာဘိနိဗ္ဗတ္တေတီတိ— ပညာဏဝါ သော န စ ပညကပ္ပီ.
ဧဝမ္ပိ တောဒေယျ မုနိံ ဝိဇာနာ တိ. မုနီ တိ မောနံ ဝုစ္စတိ ဉာဏံ …ပေ… သင်္ဂဇာလမတိစ္စ သော မုနိ. ဧဝမ္ပိ တောဒေယျ မုနိံ ဝိဇာနာ တိ တောဒေယျ, ဧဝံ မုနိံ ဇာန ပဋိဇာန ပဋိဝိဇာန ပဋိဝိဇ္ဈာတိ— ဧဝမ္ပိ တောဒေယျ မုနိံ ဝိဇာန.
အကိဉ္စနံ ကာမဘဝေ အသတ္တန် တိ. အကိဉ္စနန် တိ ရာဂကိဉ္စနံ ဒေါသကိဉ္စနံ မောဟကိဉ္စနံ မာနကိဉ္စနံ ဒိဋ္ဌိကိဉ္စနံ ကိလေသကိဉ္စနံ ဒုစ္စရိတကိဉ္စနံ. ယဿေတာနိ ကိဉ္စနာနိ ပဟီနာနိ သမုစ္ဆိန္နာနိ ဝူပသန္တာနိ ပဋိပ္ပဿဒ္ဓါနိ အဘဗ္ဗုပ္ပတ္တိကာနိ ဉာဏဂ္ဂိနာ ဒဍ္ဎာနိ, သော ဝုစ္စတိ အကိဉ္စနော. ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. ဘဝါ တိ ဒွေ ဘဝါ— ကမ္မဘဝေါ စ ပဋိသန္ဓိကော စ ပုနဗ္ဘဝေါ …ပေ… အယံ ပဋိသန္ဓိကော ပုနဗ္ဘဝေါ.
အကိဉ္စနံ ကာမဘဝေ အသတ္တန် တိ အကိဉ္စနံ ပုဂ္ဂလံ ကာမေ စ ဘဝေ စ အသတ္တံ အလဂ္ဂံ အလဂ္ဂိတံ အပလိဗုဒ္ဓံ နိက္ခန္တံ နိဿဋံ ဝိပ္ပမုတ္တံ ဝိသညုတ္တံ ဝိမရိယာဒိကတေန စေတသာ ဝိဟရန္တန္တိ— အကိဉ္စနံ ကာမဘဝေ အသတ္တံ. တေနာဟ ဘဂဝါ—
“နိရာသသော သော န စ အာသသာနော,
ပညာဏဝါ သော န စ ပညကပ္ပီ;
ဧဝမ္ပိ တောဒေယျ မုနိံ ဝိဇာန,
အကိဉ္စနံ ကာမဘဝေ အသတ္တန်”တိ.
သဟ ဂါထာပရိယောသာနာ …ပေ… သတ္ထာ မေ ဘန္တေ ဘဂဝါ, သာဝကောဟမသ္မီတိ.
တောဒေယျမာဏဝပုစ္ဆာနိဒ္ဒေသော နဝမော.