2.2 ပါရာယနတ္ထုတိဂါထာနိဒ္ဒေသ
ဣဒမဝေါစ ဘဂဝါ တိ ဣဒံ ပါရာယနံ အဝေါစ. ဘဂဝါ တိ ဂါရဝါဓိဝစနမေတံ …ပေ… သစ္ဆိကာ ပညတ္တိ, ယဒိဒံ ဘဂဝါတိ— ဣဒမဝေါစ ဘဂဝါ. မဂဓေသု ဝိဟရန္တော တိ မဂဓနာမကေ ဇနပဒေ ဝိဟရန္တော ဣရိယန္တော ဝတ္တေန္တော ပါလေန္တော ယပေန္တော ယာပေန္တော. ပါသာဏကေ စေတိယေ တိ ပါသာဏကစေတိယံ ဝုစ္စတိ ဗုဒ္ဓါသနန္တိ— မဂဓေသု ဝိဟရန္တော ပါသာဏကေ စေတိယေ. ပရိစာရကသောဠသာနံ ဗြာဟ္မဏာနန် တိ ပိင်္ဂိယော ဗြာဟ္မဏော ဗာဝရိဿ ဗြာဟ္မဏဿ ပဒ္ဓေါ ပဒ္ဓစရော ပရိစာရကော သိဿော. ပိင်္ဂိယေန တေ သောဠသာတိ— ဧဝမ္ပိ ပရိစာရကသောဠသာနံ ဗြာဟ္မဏာနံ. အထ ဝါ တေ သောဠသ ဗြာဟ္မဏာ ဗုဒ္ဓဿ ဘဂဝတော ပဒ္ဓါ ပဒ္ဓစရာ ပရိစာရကာ သိဿာတိ— ဧဝမ္ပိ ပရိစာရကသောဠသာနံ ဗြာဟ္မဏာနံ.
အဇ္ဈိဋ္ဌော ပုဋ္ဌော ပုဋ္ဌော ပဉှံ ဗျာကာသီ တိ. အဇ္ဈိဋ္ဌော တိ အဇ္ဈိဋ္ဌော အဇ္ဈေသိတော. ပုဋ္ဌော ပုဋ္ဌော တိ ပုဋ္ဌော ပုဋ္ဌော ပုစ္ဆိတော ပုစ္ဆိတော ယာစိတော ယာစိတော အဇ္ဈေသိတော အဇ္ဈေသိတော ပသာဒိတော ပသာဒိတော. ပဉှံ ဗျာကာသီ တိ ပဉှံ ဗျာကာသိ အာစိက္ခိ ဒေသေသိ ပညပေသိ ပဋ္ဌပေသိ ဝိဝရိ ဝိဘဇိ ဥတ္တာနီအာကာသိ ပကာသေသီတိ— အဇ္ဈိဋ္ဌော ပုဋ္ဌော ပုဋ္ဌော ပဉှံ ဗျာကာသိ. တေနေတံ ဝုစ္စတိ—
“ဣဒမဝေါစ ဘဂဝါ မဂဓေသု ဝိဟရန္တော ပါသာဏကေ စေတိယေ, ပရိစာရကသောဠသာနံ ဗြာဟ္မဏာနံ အဇ္ဈိဋ္ဌော ပုဋ္ဌော ပုဋ္ဌော ပဉှံ ဗျာကာသီ”တိ.
ဧကမေကဿ စေပိ ပဉှဿာ တိ ဧကမေကဿ စေပိ အဇိတပဉှဿ, ဧကမေကဿ စေပိ တိဿမေတ္တေယျပဉှဿ, ဧကမေကဿ စေပိ ပုဏ္ဏကပဉှဿ, ဧကမေကဿ စေပိ မေတ္တဂူပဉှဿ, ဧကမေကဿ စေပိ ဓောတကပဉှဿ, ဧကမေကဿ စေပိ ဥပသီဝပဉှဿ, ဧကမေကဿ စေပိ နန္ဒကပဉှဿ, ဧကမေကဿ စေပိ ဟေမကပဉှဿ, ဧကမေကဿ စေပိ တောဒေယျပဉှဿ, ဧကမေကဿ စေပိ ကပ္ပပဉှဿ, ဧကမေကဿ စေပိ ဇတုကဏ္ဏိပဉှဿ, ဧကမေကဿ စေပိ ဘဒြာဝုဓပဉှဿ, ဧကမေကဿ စေပိ ဥဒယပဉှဿ, ဧကမေကဿ စေပိ ပေါသာလပဉှဿ, ဧကမေကဿ စေပိ မောဃရာဇပဉှဿ, ဧကမေကဿ စေပိ ပိင်္ဂိယပဉှဿာတိ— ဧကမေကဿ စေပိ ပဉှဿ.
အတ္ထမညာယ ဓမ္မမညာယာ တိ သွေဝ ပဉှော ဓမ္မော, ဝိသဇ္ဇနံ အတ္ထောတိ အတ္ထံ အညာယ ဇာနိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ— အတ္ထမညာယ. ဓမ္မမညာယာ တိ ဓမ္မံ အညာယ ဇာနိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ— ဓမ္မမညာယာတိ— အတ္ထမညာယ ဓမ္မမညာယ. ဓမ္မာနုဓမ္မံ ပဋိပဇ္ဇေယျာ တိ သမ္မာပဋိပဒံ အနုလောမပဋိပဒံ အပစ္စနီကပဋိပဒံ အနွတ္ထပဋိပဒံ ဓမ္မာနုဓမ္မပဋိပဒံ ပဋိပဇ္ဇေယျာတိ— ဓမ္မာနုဓမ္မံ ပဋိပဇ္ဇေယျ. ဂစ္ဆေယျေဝ ဇရာမရဏဿ ပါရန် တိ ဇရာမရဏဿ ပါရံ ဝုစ္စတိ အမတံ နိဗ္ဗာနံ. ယော သော သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓော နိဗ္ဗာနံ. ဂစ္ဆေယျေဝ ဇရာမရဏဿ ပါရန် တိ ဇရာမရဏဿ ပါရံ ဂစ္ဆေယျ, ပါရံ အဓိဂစ္ဆေယျ, ပါရံ အဓိဖဿေယျ, ပါရံ သစ္ဆိကရေယျာတိ— ဂစ္ဆေယျေဝ ဇရာမရဏဿ ပါရံ. ပါရင်္ဂမနီယာ ဣမေ ဓမ္မာ တိ ဣမေ ဓမ္မာ ပါရင်္ဂမနီယာ. ပါရံ ပါပေန္တိ ပါရံ သမ္ပာပေန္တိ ပါရံ သမနုပါပေန္တိ, ဇရာမရဏဿ တရဏာယ သံဝတ္တန္တီတိ— ပါရင်္ဂမနီယာ ဣမေ ဓမ္မာတိ.
တသ္မာ ဣမဿ ဓမ္မပရိယာယဿာ တိ. တသ္မာ တိ တသ္မာ တံကာရဏာ တံဟေတု တပ္ပစ္စယာ တံနိဒါနာတိ— တသ္မာ. ဣမဿ ဓမ္မပရိယာယဿာ တိ ဣမဿ ပါရာယနဿာတိ— တသ္မာ ဣမဿ ဓမ္မပရိယာယဿ. ပါရာယနန္တေဝ အဓိဝစနန် တိ ပါရံ ဝုစ္စတိ အမတံ နိဗ္ဗာနံ …ပေ… နိရောဓော နိဗ္ဗာနံ. အယနံ ဝုစ္စတိ မဂ္ဂေါ, သေယျထိဒံ— သမ္မာဒိဋ္ဌိ …ပေ… သမ္မာသမာဓိ. အဓိဝစနန် တိ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါတိ— ပါရာယနန္တေဝ အဓိဝစနံ. တေနေတံ ဝုစ္စတိ—
“ဧကမေကဿ စေပိ ပဉှဿ အတ္ထမညာယ ဓမ္မမညာယ ဓမ္မာနုဓမ္မံ ပဋိပဇ္ဇေယျ, ဂစ္ဆေယျေဝ ဇရာမရဏဿ ပါရံ. ပါရင်္ဂမနီယာ ဣမေ ဓမ္မာတိ. တသ္မာ ဣမဿ ဓမ္မပရိယာယဿ ‘ပါရာယနန်’တေဝ အဓိဝစနန်”တိ.
အဇိတော တိဿမေတ္တေယျော,
ပုဏ္ဏကော အထ မေတ္တဂူ;
ဓောတကော ဥပသီဝေါ စ,
နန္ဒော စ အထ ဟေမကော. (1)
တောဒေယျကပ္ပါ ဒုဘယော,
ဇတုကဏ္ဏီ စ ပဏ္ဍိတော;
ဘဒြာဝုဓော ဥဒယော စ,
ပေါသာလော စာပိ ဗြာဟ္မဏော;
မောဃရာဇာ စ မေဓာဝီ,
ပိင်္ဂိယော စ မဟာဣသိ. (2)
ဧတေ ဗုဒ္ဓံ ဥပါဂစ္ဆုံ,
သမ္ပန္နစရဏံ ဣသိံ;
ပုစ္ဆန္တာ နိပုဏေ ပဉှေ,
ဗုဒ္ဓသေဋ္ဌံ ဥပါဂမုံ. (3)
ဧတေ ဗုဒ္ဓံ ဥပါဂစ္ဆုန် တိ. ဧတေ တိ သောဠသ ပါရာယနိယာ ဗြာဟ္မဏာ. ဗုဒ္ဓေါ တိ ယော သော ဘဂဝါ သယမ္ဘူ အနာစရိယကော ပုဗ္ဗေ အနနုဿုတေသု ဓမ္မေသု သာမံ သစ္စာနိ အဘိသမ္ဗုဇ္ဈိ, တတ္ထ စ သဗ္ဗညုတံ ပတ္တော ဗလေသု စ ဝသီဘာဝံ. ဗုဒ္ဓေါ တိ ကေနဋ္ဌေန ဗုဒ္ဓေါ? ဗုဇ္ဈိတာ သစ္စာနီတိ ဗုဒ္ဓေါ, ဗောဓေတာ ပဇာယာတိ ဗုဒ္ဓေါ, သဗ္ဗညုတာယ ဗုဒ္ဓေါ, သဗ္ဗဒဿာဝိတာယ ဗုဒ္ဓေါ, အဘိညေယျတာယ ဗုဒ္ဓေါ, ဝိသဝိတာယ ဗုဒ္ဓေါ, ခီဏာသဝသင်္ခါတေန ဗုဒ္ဓေါ, နိရုပလေပသင်္ခါတေန ဗုဒ္ဓေါ, ဧကန္တဝီတရာဂေါတိ ဗုဒ္ဓေါ, ဧကန္တဝီတဒေါသောတိ ဗုဒ္ဓေါ, ဧကန္တဝီတမောဟောတိ ဗုဒ္ဓေါ, ဧကန္တနိက္ကိလေသောတိ ဗုဒ္ဓေါ, ဧကာယနမဂ္ဂံ ဂတောတိ ဗုဒ္ဓေါ, ဧကော အနုတ္တရံ သမ္မာသမ္ဗောဓိံ အဘိသမ္ဗုဒ္ဓေါတိ ဗုဒ္ဓေါ, အဗုဒ္ဓိဝိဟတတ္တာ ဗုဒ္ဓိပဋိလာဘာတိ ဗုဒ္ဓေါ. ဗုဒ္ဓေါ တိ နေတံ နာမံ မာတရာ ကတံ န ပိတရာ ကတံ န ဘာတရာ ကတံ န ဘဂိနိယာ ကတံ န မိတ္တာမစ္စေဟိ ကတံ န ဉာတိသာလောဟိတေဟိ ကတံ န သမဏဗြာဟ္မဏေဟိ ကတံ န ဒေဝတာဟိ ကတံ. ဝိမောက္ခန္တိကမေတံ ဗုဒ္ဓါနံ ဘဂဝန္တာနံ ဗောဓိယာ မူလေ သဟ သဗ္ဗညုတဉာဏဿ ပဋိလာဘာ သစ္ဆိကာ ပညတ္တိ, ယဒိဒံ ဗုဒ္ဓေါတိ. ဧတေ ဗုဒ္ဓံ ဥပါဂစ္ဆုန် တိ ဧတေ ဗုဒ္ဓံ ဥပါဂမိံသု ဥပသင်္ကမိံသု ပယိရုပါသိံသု ပရိပုစ္ဆိံသု ပရိပဉှိံသူတိ— ဧတေ ဗုဒ္ဓံ ဥပါဂစ္ဆုံ.
သမ္ပန္နစရဏံ ဣသိန် တိ စရဏံ ဝုစ္စတိ သီလာစာရနိဗ္ဗတ္တိ. သီလသံဝရောပိ စရဏံ, ဣန္ဒြိယသံဝရောပိ စရဏံ, ဘောဇနေ မတ္တညုတာပိ စရဏံ, ဇာဂရိယာနုယောဂေါပိ စရဏံ, သတ္တပိ သဒ္ဓမ္မာ စရဏံ, စတ္တာရိပိ ဈာနာနိ စရဏံ. သမ္ပန္နစရဏန် တိ သမ္ပန္နစရဏံ သေဋ္ဌစရဏံ ဝိသေဋ္ဌစရဏံ ပါမောက္ခစရဏံ ဥတ္တမစရဏံ ပဝရစရဏံ. ဣသီ တိ ဣသိ ဘဂဝါ မဟန္တံ သီလက္ခန္ဓံ ဧသီ ဂဝေသီ ပရိယေသီတိ ဣသိ …ပေ… မဟေသက္ခေဟိ ဝါ သတ္တေဟိ ဧသိတော ဂဝေသိတော ပရိယေသိတော— “ကဟံ ဗုဒ္ဓေါ, ကဟံ ဘဂဝါ, ကဟံ ဒေဝဒေဝေါ ကဟံ နရာသဘော”တိ— ဣသီတိ— သမ္ပန္နစရဏံ ဣသိံ.
ပုစ္ဆန္တာ နိပုဏေ ပဉှေ တိ. ပုစ္ဆန္တာ တိ ပုစ္ဆန္တာ ယာစန္တာ အဇ္ဈေသန္တာ ပသာဒေန္တာ. နိပုဏေ ပဉှေ တိ ဂမ္ဘီရေ ဒုဒ္ဒသေ ဒုရနုဗောဓေ သန္တေ ပဏီတေ အတက္ကာဝစရေ နိပုဏေ ပဏ္ဍိတဝေဒနီယေ ပဉှေတိ— ပုစ္ဆန္တာ နိပုဏေ ပဉှေ.
ဗုဒ္ဓသေဋ္ဌံ ဥပါဂမုန် တိ. ဗုဒ္ဓေါ တိ ယော သော ဘဂဝါ …ပေ… သစ္ဆိကာ ပညတ္တိ, ယဒိဒံ ဗုဒ္ဓေါတိ. သေဋ္ဌန် တိ အဂ္ဂံ သေဋ္ဌံ ဝိသေဋ္ဌံ ပါမောက္ခံ ဥတ္တမံ ပဝရံ ဗုဒ္ဓံ ဥပါဂမုံ ဥပါဂမိံသု ဥပသင်္ကမိံသု ပယိရုပါသိံသု ပရိပုစ္ဆိံသု ပရိပဉှိံသူတိ— ဗုဒ္ဓသေဋ္ဌံ ဥပါဂမုံ. တေနေတံ ဝုစ္စတိ—
“ဧတေ ဗုဒ္ဓံ ဥပါဂစ္ဆုံ,
သမ္ပန္နစရဏံ ဣသိံ;
ပုစ္ဆန္တာ နိပုဏေ ပဉှေ,
ဗုဒ္ဓသေဋ္ဌံ ဥပါဂမုန်”တိ.
တေသံ ဗုဒ္ဓေါ ပဗျာကာသိ,
ပဉှံ ပုဋ္ဌော ယထာတထံ;
ပဉှာနံ ဝေယျာကရဏေန,
တောသေသိ ဗြာဟ္မဏေ မုနိ. (4)
တေသံ ဗုဒ္ဓေါ ပဗျာကာသီ တိ. တေသန် တိ သောဠသာနံ ပါရာယနိယာနံ ဗြာဟ္မဏာနံ. ဗုဒ္ဓေါ တိ ယော သော ဘဂဝါ …ပေ… သစ္ဆိကာ ပညတ္တိ, ယဒိဒံ ဗုဒ္ဓေါတိ. ပဗျာကာသီ တိ တေသံ ဗုဒ္ဓေါ ပဗျာကာသိ အာစိက္ခိ ဒေသေသိ ပညပေသိ ပဋ္ဌပေသိ ဝိဝရိ ဝိဘဇိ ဥတ္တာနီအကာသိ ပကာသေသီတိ— တေသံ ဗုဒ္ဓေါ ပဗျာကာသိ.
ပဉှံ ပုဋ္ဌော ယထာတထန် တိ. ပဉှံ ပုဋ္ဌော တိ ပဉှံ ပုဋ္ဌော ပုစ္ဆိတော ယာစိတော အဇ္ဈေသိတော ပသာဒိတော. ယထာတထန် တိ ယထာ အာစိက္ခိတဗ္ဗံ တထာ အာစိက္ခိ, ယထာ ဒေသိတဗ္ဗံ တထာ ဒေသေသိ, ယထာ ပညပေတဗ္ဗံ တထာ ပညပေသိ, ယထာ ပဋ္ဌပေတဗ္ဗံ တထာ ပဋ္ဌပေသိ, ယထာ ဝိဝရိတဗ္ဗံ တထာ ဝိဝရိ, ယထာ ဝိဘဇိတဗ္ဗံ တထာ ဝိဘဇိ, ယထာ ဥတ္တာနီကာတဗ္ဗံ တထာ ဥတ္တာနီအကာသိ, ယထာ ပကာသိတဗ္ဗံ တထာ ပကာသေသီတိ— ပဉှံ ပုဋ္ဌော ယထာတထံ.
ပဉှာနံ ဝေယျာကရဏေနာ တိ ပဉှာနံ ဝေယျာကရဏေန အာစိက္ခနေန ဒေသနေန ပညပနေန ပဋ္ဌပနေန ဝိဝရဏေန ဝိဘဇနေန ဥတ္တာနီကမ္မေန ပကာသနေနာတိ— ပဉှာနံ ဝေယျာကရဏေန.
တောသေသိ ဗြာဟ္မဏေ မုနီ တိ. တောသေသီ တိ တောသေသိ ဝိတောသေသိ ပသာဒေသိ အာရာဓေသိ အတ္တမနေ အကာသိ. ဗြာဟ္မဏေ တိ သောဠသ ပါရာယနိယေ ဗြာဟ္မဏေ. မုနီ တိ မောနံ ဝုစ္စတိ ဉာဏံ …ပေ… သင်္ဂဇာလမတိစ္စ သော မုနီတိ— တောသေသိ ဗြာဟ္မဏေ မုနိ. တေနေတံ ဝုစ္စတိ—
“တေသံ ဗုဒ္ဓေါ ပဗျာကာသိ,
ပဉှံ ပုဋ္ဌော ယထာတထံ;
ပဉှာနံ ဝေယျာကရဏေန,
တောသေသိ ဗြာဟ္မဏေ မုနီ”တိ.
တေ တောသိတာ စက္ခုမတာ,
ဗုဒ္ဓေနာဒိစ္စဗန္ဓုနာ;
ဗြဟ္မစရိယမစရိံသု,
ဝရပညဿ သန္တိကေ. (5)
တေ တောသိတာ စက္ခုမတာ တိ. တေ တိ သောဠသ ပါရာယနိယာ ဗြာဟ္မဏာ. တောသိတာ တိ တောသိတာ ဝိတောသိတာ ပသာဒိတာ အာရာဓိတာ အတ္တမနာ ကတာတိ— တေ တောသိတာ. စက္ခုမတာ တိ ဘဂဝါ ပဉ္စဟိ စက္ခူဟိ စက္ခုမာ— မံသစက္ခုနာပိ စက္ခုမာ, ဒိဗ္ဗစက္ခုနာပိ စက္ခုမာ, ပညာစက္ခုနာပိ စက္ခုမာ, ဗုဒ္ဓစက္ခုနာပိ စက္ခုမာ, သမန္တစက္ခုနာပိ စက္ခုမာ. ကထံ ဘဂဝါ မံသစက္ခုနာပိ စက္ခုမာ …ပေ… ဧဝံ ဘဂဝါ သမန္တစက္ခုနာပိ စက္ခုမာတိ— တေ တောသိတာ စက္ခုမတာ.
ဗုဒ္ဓေနာဒိစ္စဗန္ဓုနာ တိ. ဗုဒ္ဓေါ တိ ယော သော ဘဂဝါ …ပေ… သစ္ဆိကာ ပညတ္တိ, ယဒိဒံ ဗုဒ္ဓေါတိ. အာဒိစ္စဗန္ဓုနာ တိ အာဒိစ္စော ဝုစ္စတိ သူရိယော. သော ဂေါတမော ဂေါတ္တေန, ဘဂဝါပိ ဂေါတမော ဂေါတ္တေန, ဘဂဝါ သူရိယဿ ဂေါတ္တဉာတကော ဂေါတ္တဗန္ဓု. တသ္မာ ဗုဒ္ဓေါ အာဒိစ္စဗန္ဓူတိ— ဗုဒ္ဓေနာဒိစ္စဗန္ဓုနာ.
ဗြဟ္မစရိယမစရိံသူ တိ ဗြဟ္မစရိယံ ဝုစ္စတိ အသဒ္ဓမ္မသမာပတ္တိယာ အာရတိ ဝိရတိ ပဋိဝိရတိ ဝေရမဏီ ဝိရမဏံ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော. အပိ စ နိပ္ပရိယာယဝသေန ဗြဟ္မစရိယံ ဝုစ္စတိ အရိယော အဋ္ဌင်္ဂိကော မဂ္ဂေါ, သေယျထိဒံ— သမ္မာဒိဋ္ဌိ, သမ္မာသင်္ကပ္ပေါ, သမ္မာဝါစာ, သမ္မာကမ္မန္တော, သမ္မာအာဇီဝေါ, သမ္မာဝါယာမော, သမ္မာသတိ, သမ္မာသမာဓိ. ဗြဟ္မစရိယမစရိံသူ တိ ဗြဟ္မစရိယံ စရိံသု အစရိံသု သမာဒါယ ဝတ္တိံသူတိ— ဗြဟ္မစရိယမစရိံသု.
ဝရပညဿ သန္တိကေ တိ ဝရပညဿ အဂ္ဂပညဿ သေဋ္ဌပညဿ ဝိသေဋ္ဌပညဿ ပါမောက္ခပညဿ ဥတ္တမပညဿ ပဝရပညဿ. သန္တိကေ တိ သန္တိကေ သာမန္တာ အာသန္နေ အဝိဒူရေ ဥပကဋ္ဌေတိ— ဝရပညဿ သန္တိကေ. တေနေတံ ဝုစ္စတိ—
“တေ တောသိတာ စက္ခုမတာ,
ဗုဒ္ဓေနာဒိစ္စဗန္ဓုနာ;
ဗြဟ္မစရိယမစရိံသု,
ဝရပညဿ သန္တိကေ”တိ.
ဧကမေကဿ ပဉှဿ,
ယထာ ဗုဒ္ဓေန ဒေသိတံ;
တထာ ယော ပဋိပဇ္ဇေယျ,
ဂစ္ဆေ ပါရံ အပါရတော. (6)
ဧကမေကဿ ပဉှဿာ တိ ဧကမေကဿ အဇိတပဉှဿ, ဧကမေကဿ တိဿမေတ္တေယျပဉှဿ …ပေ… ဧကမေကဿ ပိင်္ဂိယပဉှဿာတိ— ဧကမေကဿ ပဉှဿ.
ယထာ ဗုဒ္ဓေန ဒေသိတန် တိ. ဗုဒ္ဓေါ တိ ယော သော ဘဂဝါ သယမ္ဘူ …ပေ… သစ္ဆိကာ ပညတ္တိ, ယဒိဒံ ဗုဒ္ဓေါတိ. ယထာ ဗုဒ္ဓေန ဒေသိတန် တိ ယထာ ဗုဒ္ဓေန အာစိက္ခိတံ ဒေသိတံ ပညပိတံ ပဋ္ဌပိတံ ဝိဝရိတံ ဝိဘဇိတံ ဥတ္တာနီကတံ ပကာသိတန္တိ— ယထာ ဗုဒ္ဓေန ဒေသိတံ.
တထာ ယော ပဋိပဇ္ဇေယျာ တိ သမ္မာပဋိပဒံ အနုလောမပဋိပဒံ အပစ္စနီကပဋိပဒံ အနွတ္ထပဋိပဒံ ဓမ္မာနုဓမ္မပဋိပဒံ ပဋိပဇ္ဇေယျာတိ— တထာ ယော ပဋိပဇ္ဇေယျ.
ဂစ္ဆေ ပါရံ အပါရတော တိ ပါရံ ဝုစ္စတိ အမတံ နိဗ္ဗာနံ …ပေ… နိရောဓော နိဗ္ဗာနံ; အပါရံ ဝုစ္စန္တိ ကိလေသာ စ ခန္ဓာ စ အဘိသင်္ခါရာ စ. ဂစ္ဆေ ပါရံ အပါရတော တိ အပါရတော ပါရံ ဂစ္ဆေယျ, ပါရံ အဓိဂစ္ဆေယျ, ပါရံ ဖဿေယျ, ပါရံ သစ္ဆိကရေယျာတိ— ဂစ္ဆေ ပါရံ အပါရတော. တေနေတံ ဝုစ္စတိ—
“ဧကမေကဿ ပဉှဿ,
ယထာ ဗုဒ္ဓေန ဒေသိတံ;
တထာ ယော ပဋိပဇ္ဇေယျ,
ဂစ္ဆေ ပါရံ အပါရတော”တိ.
အပါရာ ပါရံ ဂစ္ဆေယျ,
ဘာဝေန္တော မဂ္ဂမုတ္တမံ;
မဂ္ဂေါ သော ပါရံ ဂမနာယ,
တသ္မာ ပါရာယနံ ဣတိ. (7)
အပါရာ ပါရံ ဂစ္ဆေယျာ တိ အပါရံ ဝုစ္စန္တိ ကိလေသာ စ ခန္ဓာ စ အဘိသင်္ခါရာ စ; ပါရံ ဝုစ္စတိ အမတံ နိဗ္ဗာနံ …ပေ… တဏှက္ခယော ဝိရာဂေါ နိရောဓော နိဗ္ဗာနံ. အပါရာ ပါရံ ဂစ္ဆေယျာ တိ အပါရာ ပါရံ ဂစ္ဆေယျ, ပါရံ အဓိဂစ္ဆေယျ, ပါရံ ဖဿေယျ, ပါရံ သစ္ဆိကရေယျာတိ— အပါရာ ပါရံ ဂစ္ဆေယျ.
ဘာဝေန္တော မဂ္ဂမုတ္တမန် တိ မဂ္ဂမုတ္တမံ ဝုစ္စတိ အရိယော အဋ္ဌင်္ဂိကော မဂ္ဂေါ, သေယျထိဒံ— သမ္မာဒိဋ္ဌိ …ပေ… သမ္မာသမာဓိ. မဂ္ဂမုတ္တမန် တိ မဂ္ဂံ အဂ္ဂံ သေဋ္ဌံ ဝိသေဋ္ဌံ ပါမောက္ခံ ဥတ္တမံ ပဝရံ. ဘာဝေန္တော တိ ဘာဝေန္တော အာသေဝန္တော ဗဟုလီကရောန္တောတိ— ဘာဝေန္တော မဂ္ဂမုတ္တမံ.
မဂ္ဂေါ သော ပါရံ ဂမနာယာ တိ—
မဂ္ဂေါ ပန္ထော ပထော ပဇ္ဇော,
အဉ္ဇသံ ဝဋုမာယနံ;
နာဝါ ဥတ္တရသေတု စ,
ကုလ္လော စ ဘိသိ သင်္ကမော.
ပါရံ ဂမနာယာ တိ ပါရံ ဂမနာယ ပါရံ သမ္ပာပနာယ ပါရံ သမနုပါပနာယ ဇရာမရဏဿ တရဏာယာတိ— မဂ္ဂေါ သော ပါရံ ဂမနာယ.
တသ္မာ ပါရာယနံ ဣတီ တိ. တသ္မာ တိ တသ္မာ တံကာရဏာ တံဟေတု တပ္ပစ္စယာ တံနိဒါနာ. ပါရံ ဝုစ္စတိ အမတံ နိဗ္ဗာနံ …ပေ… နိရောဓော နိဗ္ဗာနံ. အယနံ ဝုစ္စတိ မဂ္ဂေါ. ဣတီ တိ ပဒသန္ဓိ …ပေ… ပဒါနုပုဗ္ဗတာပေတံ ဣတီတိ— တသ္မာ ပါရာယနံ ဣတိ. တေနေတံ ဝုစ္စတိ—
“အပါရာ ပါရံ ဂစ္ဆေယျ,
ဘာဝေန္တော မဂ္ဂမုတ္တမံ;
မဂ္ဂေါ သော ပါရံ ဂမနာယ,
တသ္မာ ပါရာယနံ ဣတီ”တိ.
ပါရာယနတ္ထုတိဂါထာနိဒ္ဒေသော သတ္တရသမော.