3.2 ဒုတိယဝဂ္ဂ
သစေ လဘေထ နိပကံ သဟာယံ,
သဒ္ဓိံ စရံ သာဓုဝိဟာရိ ဓီရံ;
အဘိဘုယျ သဗ္ဗာနိ ပရိဿယာနိ,
စရေယျ တေနတ္တမနော သတီမာ. (1)
သစေ လဘေထ နိပကံ သဟာယန် တိ သစေ နိပကံ ပဏ္ဍိတံ ပညဝန္တံ ဗုဒ္ဓိမန္တံ ဉာဏိံ ဝိဘာဝိံ မေဓာဝိံ သဟာယံ လဘေယျ ပဋိလဘေယျ အဓိဂစ္ဆေယျ ဝိန္ဒေယျာတိ— သစေ လဘေထ နိပကံ သဟာယံ.
သဒ္ဓိံ စရံ သာဓုဝိဟာရိ ဓီရန် တိ. သဒ္ဓိံ စရန် တိ ဧကတော စရံ. သာဓုဝိဟာရိန် တိ ပဌမေနပိ ဈာနေန သာဓုဝိဟာရိံ, ဒုတိယေနပိ ဈာနေန… တတိယေနပိ ဈာနေန… စတုတ္ထေနပိ ဈာနေန သာဓုဝိဟာရိံ, မေတ္တာယပိ စေတောဝိမုတ္တိယာ သာဓုဝိဟာရိံ, ကရုဏာယပိ …ပေ… မုဒိတာယပိ… ဥပေက္ခာယပိ စေတောဝိမုတ္တိယာ သာဓုဝိဟာရိံ, အာကာသာနဉ္စာယတနသမာပတ္တိယာပိ သာဓုဝိဟာရိံ, ဝိညာဏဉ္စာယတနသမာပတ္တိယာပိ …ပေ… အာကိဉ္စညာယတနသမာပတ္တိယာပိ …ပေ… နေဝသညာနာသညာယတနသမာပတ္တိယာပိ သာဓုဝိဟာရိံ, နိရောဓသမာပတ္တိယာပိ သာဓုဝိဟာရိံ, ဖလသမာပတ္တိယာပိ သာဓုဝိဟာရိံ. ဓီရန် တိ ဓီရံ ပဏ္ဍိတံ ပညဝန္တံ ဗုဒ္ဓိမန္တံ ဉာဏိံ ဝိဘာဝိံ မေဓာဝိန္တိ— သဒ္ဓိံ စရံ သာဓုဝိဟာရိ ဓီရံ.
အဘိဘုယျ သဗ္ဗာနိ ပရိဿယာနီ တိ. ပရိဿယာ တိ ဒွေ ပရိဿယာ— ပါကဋပရိဿယာ စ ပဋိစ္ဆန္နပရိဿယာ စ …ပေ… ဣမေ ဝုစ္စန္တိ ပါကဋပရိဿယာ …ပေ… ဣမေ ဝုစ္စန္တိ ပဋိစ္ဆန္နပရိဿယာ …ပေ… ဧဝမ္ပိ, တတြာသယာတိ— ပရိဿယာ. အဘိဘုယျ သဗ္ဗာနိ ပရိဿယာနီ တိ သဗ္ဗေ ပရိဿယေ အဘိဘုယျ အဘိဘဝိတွာ အဇ္ဈောတ္ထရိတွာ ပရိယာဒိယိတွာ မဒ္ဒိတွာတိ— အဘိဘုယျ သဗ္ဗာနိ ပရိဿယာနိ.
စရေယျ တေနတ္တမနော သတီမာ တိ သော ပစ္စေကသမ္ဗုဒ္ဓေါ တေန နိပကေန ပဏ္ဍိတေန ပညဝန္တေန ဗုဒ္ဓိမန္တေန ဉာဏိနာ ဝိဘာဝိနာ မေဓာဝိနာ သဟာယေန သဒ္ဓိံ အတ္တမနော တုဋ္ဌမနော ဟဋ္ဌမနော ပဟဋ္ဌမနော ဥဒဂ္ဂမနော မုဒိတမနော စရေယျ ဝိဟရေယျ ဣရိယေယျ ဝတ္တေယျ ပါလေယျ ယပေယျ ယာပေယျာတိ— စရေယျ တေနတ္တမနော. သတီမာ တိ သော ပစ္စေကသမ္ဗုဒ္ဓေါ သတိမာ ဟောတိ ပရမေန သတိနေပက္ကေန သမန္နာဂတော, စိရကတမ္ပိ စိရဘာသိတမ္ပိ သရိတာ အနုဿရိတာတိ— စရေယျ တေနတ္တမနော သတီမာ. တေနာဟ သော ပစ္စေကသမ္ဗုဒ္ဓေါ—
“သစေ လဘေထ နိပကံ သဟာယံ,
သဒ္ဓိံ စရံ သာဓုဝိဟာရိ ဓီရံ;
အဘိဘုယျ သဗ္ဗာနိ ပရိဿယာနိ,
စရေယျ တေနတ္တမနော သတီမာ”တိ.
နော စေ လဘေထ နိပကံ သဟာယံ,
သဒ္ဓိံ စရံ သာဓုဝိဟာရိ ဓီရံ;
ရာဇာဝ ရဋ္ဌံ ဝိဇိတံ ပဟာယ,
ဧကော စရေ ခဂ္ဂဝိသာဏကပ္ပေါ. (2)
နော စေ လဘေထ နိပကံ သဟာယန် တိ နော စေ နိပကံ ပဏ္ဍိတံ ပညဝန္တံ ဗုဒ္ဓိမန္တံ ဉာဏိံ ဝိဘာဝိံ မေဓာဝိံ သဟာယံ လဘေယျ ပဋိလဘေယျ အဓိဂစ္ဆေယျ ဝိန္ဒေယျာတိ— နော စေ လဘေထ နိပကံ သဟာယံ.
သဒ္ဓိံ စရံ သာဓုဝိဟာရိ ဓီရန် တိ. သဒ္ဓိံ စရန် တိ ဧကတော စရံ. သာဓုဝိဟာရိန် တိ ပဌမေနပိ ဈာနေန သာဓုဝိဟာရိံ …ပေ… နိရောဓသမာပတ္တိယာပိ သာဓုဝိဟာရိံ, ဖလသမာပတ္တိယာပိ သာဓုဝိဟာရိံ. ဓီရန် တိ ဓီရံ ပဏ္ဍိတံ ပညဝန္တံ ဗုဒ္ဓိမန္တံ ဉာဏိံ ဝိဘာဝိံ မေဓာဝိန္တိ— သဒ္ဓိံ စရံ သာဓုဝိဟာရိ ဓီရံ.
ရာဇာဝ ရဋ္ဌံ ဝိဇိတံ ပဟာယာ တိ ရာဇာ ခတ္တိယော မုဒ္ဓါဘိသိတ္တော ဝိဇိတသင်္ဂါမော နိဟတပစ္စာမိတ္တော လဒ္ဓါဓိပ္ပါယော ပရိပုဏ္ဏကောသကောဋ္ဌာဂါရော ရဋ္ဌဉ္စ ဇနပဒဉ္စ ကောသဉ္စ ကောဋ္ဌာဂါရဉ္စ ပဟူတဟိရညသုဝဏ္ဏံ နဂရဉ္စ ပရိစ္စဇိတွာ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတွာ အကိဉ္စနဘာဝံ ဥပဂန္တွာ ဧကော စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတိ. ဧဝံ ပစ္စေကသမ္ဗုဒ္ဓေါပိ သဗ္ဗံ ဃရာဝါသပလိဗောဓံ ဆိန္ဒိတွာ ပုတ္တဒါရပလိဗောဓံ ဆိန္ဒိတွာ ဉာတိပလိဗောဓံ ဆိန္ဒိတွာ မိတ္တာမစ္စပလိဗောဓံ ဆိန္ဒိတွာ ကေသမဿုံ ဩဟာရေတွာ ကာသာယာနိ ဝတ္ထာနိ အစ္ဆာဒေတွာ အဂါရသ္မာ အနဂါရိယံ ပဗ္ဗဇိတွာ အကိဉ္စနဘာဝံ ဥပဂန္တွာ ဧကော စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတီတိ— ရာဇာဝ ရဋ္ဌံ ဝိဇိတံ ပဟာယ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“နော စေ လဘေထ နိပကံ သဟာယံ,
သဒ္ဓိံ စရံ သာဓုဝိဟာရိ ဓီရံ;
ရာဇာဝ ရဋ္ဌံ ဝိဇိတံ ပဟာယ,
ဧကော စရေ ခဂ္ဂဝိသာဏကပ္ပေါ”တိ.
အဒ္ဓါ ပသံသာမ သဟာယသမ္ပဒံ,
သေဋ္ဌာ သမာ သေဝိတဗ္ဗာ သဟာယာ;
ဧတေ အလဒ္ဓါ အနဝဇ္ဇဘောဇီ,
ဧကော စရေ ခဂ္ဂဝိသာဏကပ္ပေါ. (3)
အဒ္ဓါ ပသံသာမ သဟာယသမ္ပဒန် တိ. အဒ္ဓါ တိ ဧကံသဝစနံ နိဿံသယဝစနံ နိက္ကင်္ခဝစနံ အဒွေဇ္ဈဝစနံ အဒွေဠှကဝစနံ နိယောဂဝစနံ အပဏ္ဏကဝစနံ အဝိရဒ္ဓဝစနံ အဝတ္ထာပနဝစနမေတံ— အဒ္ဓါတိ. သဟာယသမ္ပဒန် တိ သဟာယသမ္ပဒါ ဝုစ္စတိ ယော သော သဟာယော အသေက္ခေန သီလက္ခန္ဓေန သမန္နာဂတော ဟောတိ, အသေက္ခေန သမာဓိက္ခန္ဓေန… အသေက္ခေန ပညာက္ခန္ဓေန … အသေက္ခေန ဝိမုတ္တိက္ခန္ဓေန… အသေက္ခေန ဝိမုတ္တိဉာဏဒဿနက္ခန္ဓေန သမန္နာဂတော ဟောတိ. အဒ္ဓါ ပသံသာမ သဟာယသမ္ပဒန် တိ သဟာယသမ္ပဒံ ပသံသာမ ထောမေမ ကိတ္တေမ ဝဏ္ဏေမာတိ— အဒ္ဓါ ပသံသာမ သဟာယသမ္ပဒံ.
သေဋ္ဌာ သမာ သေဝိတဗ္ဗာ သဟာယာ တိ သေဋ္ဌာ ဟောန္တိ သဟာယာ သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေန; သမာ သဒိသာ ဟောန္တိ သဟာယာ သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေန. သေဋ္ဌာ ဝါ သဟာယာ သဒိသာ ဝါ သဟာယာ သေဝိတဗ္ဗာ ဘဇိတဗ္ဗာ ပယိရုပါသိတဗ္ဗာ ပရိပုစ္ဆိတဗ္ဗာ ပရိပဉှိတဗ္ဗာတိ— သေဋ္ဌာ သမာ သေဝိတဗ္ဗာ သဟာယာ.
ဧတေ အလဒ္ဓါ အနဝဇ္ဇဘောဇီ တိ အတ္ထိ ပုဂ္ဂလော သာဝဇ္ဇဘောဇီ အတ္ထိ ပုဂ္ဂလော အနဝဇ္ဇဘောဇီတိ. ကတမော စ ပုဂ္ဂလော သာဝဇ္ဇဘောဇီ? ဣဓေကစ္စော ပုဂ္ဂလော ကုဟနာယ လပနာယ နေမိတ္တိကတာယ နိပ္ပေသိကတာယ လာဘေန လာဘံ နိဇိဂီသနတာယ ဒါရုဒါနေန ဝေဠုဒါနေန ပတ္တဒါနေန ပုပ္ဖဒါနေန ဖလဒါနေန သိနာနဒါနေန စုဏ္ဏဒါနေန မတ္တိကာဒါနေန ဒန္တကဋ္ဌဒါနေန မုခေါဒကဒါနေန စာဋုကမျတာယ မုဂ္ဂသူပျတာယ ပါရိဘဋျတာယ ပီဌမဒ္ဒိကတာယ ဝတ္ထုဝိဇ္ဇာယ တိရစ္ဆာနဝိဇ္ဇာယ အင်္ဂဝိဇ္ဇာယ နက္ခတ္တဝိဇ္ဇာယ ဒူတဂမနေန ပဟိဏဂမနေန ဇင်္ဃပေသနိယေန ဝေဇ္ဇကမ္မေန နဝကမ္မေန ပိဏ္ဍပဋိပိဏ္ဍကေန ဒါနာနုပ္ပဒါနေန, အဓမ္မေန ဝိသမေန လဒ္ဓါ လဘိတွာ အဓိဂန္တွာ ဝိန္ဒိတွာ ပဋိလဘိတွာ ဇီဝိကံ ကပ္ပေတိ. အယံ ဝုစ္စတိ ပုဂ္ဂလော သာဝဇ္ဇဘောဇီ.
ကတမော စ ပုဂ္ဂလော အနဝဇ္ဇဘောဇီ? ဣဓေကစ္စော ပုဂ္ဂလော န ကုဟနာယ န လပနာယ န နေမိတ္တိကတာယ န နိပ္ပေသိကတာယ န လာဘေန လာဘံ နိဇိဂီသနတာယ န ဒါရုဒါနေန န ဝေဠုဒါနေန န ပတ္တဒါနေန န ပုပ္ဖဒါနေန န ဖလဒါနေန န သိနာနဒါနေန န စုဏ္ဏဒါနေန န မတ္တိကာဒါနေန န ဒန္တကဋ္ဌဒါနေန န မုခေါဒကဒါနေန န စာဋုကမျတာယ န မုဂ္ဂသူပျတာယ န ပါရိဘဋျတာယ န ပီဌမဒ္ဒိကတာယ န ဝတ္ထုဝိဇ္ဇာယ န တိရစ္ဆာနဝိဇ္ဇာယ န အင်္ဂဝိဇ္ဇာယ န နက္ခတ္တဝိဇ္ဇာယ န ဒူတဂမနေန န ပဟိဏဂမနေန န ဇင်္ဃပေသနိယေန န ဝေဇ္ဇကမ္မေန န နဝကမ္မေန န ပိဏ္ဍပဋိပိဏ္ဍကေန န ဒါနာနုပ္ပဒါနေန, ဓမ္မေန သမေန လဒ္ဓါ လဘိတွာ အဓိဂန္တွာ ဝိန္ဒိတွာ ပဋိလဘိတွာ ဇီဝိကံ ကပ္ပေတိ. အယံ ဝုစ္စတိ ပုဂ္ဂလော အနဝဇ္ဇဘောဇီ.
ဧတေ အလဒ္ဓါ အနဝဇ္ဇဘောဇီ တိ ဧတေ အနဝဇ္ဇဘောဇီ အလဒ္ဓါ အလဘိတွာ အနဓိဂန္တွာ အဝိန္ဒိတွာ အပ္ပဋိလဘိတွာတိ— ဧတေ အလဒ္ဓါ အနဝဇ္ဇဘောဇီ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“အဒ္ဓါ ပသံသာမ သဟာယသမ္ပဒံ,
သေဋ္ဌာ သမာ သေဝိတဗ္ဗာ သဟာယာ;
ဧတေ အလဒ္ဓါ အနဝဇ္ဇဘောဇီ,
ဧကော စရေ ခဂ္ဂဝိသာဏကပ္ပေါ”တိ.
ဒိသွာ သုဝဏ္ဏဿ ပဘဿရာနိ,
ကမ္မာရပုတ္တေန သုနိဋ္ဌိတာနိ;
သင်္ဃဋ္ဋယန္တာနိ ဒုဝေ ဘုဇသ္မိံ,
ဧကော စရေ ခဂ္ဂဝိသာဏကပ္ပေါ. (4)
ဒိသွာ သုဝဏ္ဏဿ ပဘဿရာနီ တိ ဒိသွာ ပဿိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာ. သုဝဏ္ဏဿာ တိ ဇာတရူပဿ. ပဘဿရာနီ တိ ပရိသုဒ္ဓါနိ ပရိယောဒါတာနီတိ— ဒိသွာ သုဝဏ္ဏဿ ပဘဿရာနိ.
ကမ္မာရပုတ္တေန သုနိဋ္ဌိတာနီ တိ ကမ္မာရပုတ္တော ဝုစ္စတိ သုဝဏ္ဏကာရော. ကမ္မာရပုတ္တေန သုနိဋ္ဌိတာနီ တိ ကမ္မာရပုတ္တေန သုနိဋ္ဌိတာနိ သုကတာနိ သုပရိကမ္မကတာနီတိ— ကမ္မာရပုတ္တေန သုနိဋ္ဌိတာနိ.
သင်္ဃဋ္ဋယန္တာနိ ဒုဝေ ဘုဇသ္မိန် တိ ဘုဇော ဝုစ္စတိ ဟတ္ထော. ယထာ ဧကသ္မိံ ဟတ္ထေ ဒွေ နူပုရာနိ ဃဋ္ဋေန္တိ; ဧဝမေဝ သတ္တာ တဏှာဝသေန ဒိဋ္ဌိဝသေန နိရယေ ဃဋ္ဋေန္တိ, တိရစ္ဆာနယောနိယံ ဃဋ္ဋေန္တိ, ပေတ္တိဝိသယေ ဃဋ္ဋေန္တိ, မနုဿလောကေ ဃဋ္ဋေန္တိ, ဒေဝလောကေ ဃဋ္ဋေန္တိ, ဂတိယာ ဂတိံ ဥပပတ္တိယာ ဥပပတ္တိံ ပဋိသန္ဓိယာ ပဋိသန္ဓိံ ဘဝေန ဘဝံ သံသာရေန သံသာရံ ဝဋ္ဋေန ဝဋ္ဋံ ဃဋ္ဋေန္တိ သင်္ဃဋ္ဋေန္တိ သင်္ဃဋ္ဋေန္တာ စရန္တိ ဝိဟရန္တိ ဣရိယန္တိ ဝတ္တေန္တိ ပါလေန္တိ ယပေန္တိ ယာပေန္တီတိ— သင်္ဃဋ္ဋယန္တာနိ ဒုဝေ ဘုဇသ္မိံ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ဒိသွာ သုဝဏ္ဏဿ ပဘဿရာနိ,
ကမ္မာရပုတ္တေန သုနိဋ္ဌိတာနိ;
သင်္ဃဋ္ဋယန္တာနိ ဒုဝေ ဘုဇသ္မိံ,
ဧကော စရေ ခဂ္ဂဝိသာဏကပ္ပေါ”.
ဧဝံ ဒုတီယေန သဟာ မမဿ,
ဝါစာဘိလာပေါ အဘိသဇ္ဇနာ ဝါ;
ဧတံ ဘယံ အာယတိံ ပေက္ခမာနော,
ဧကော စရေ ခဂ္ဂဝိသာဏကပ္ပေါ. (5)
ဧဝံ ဒုတီယေန သဟာ မမဿာ တိ တဏှာဒုတိယော ဝါ ဟောတိ ပုဂ္ဂလဒုတိယော ဝါ. ကထံ တဏှာဒုတိယော ဟောတိ? တဏှာတိ ရူပတဏှာ …ပေ… ဓမ္မတဏှာ. ယဿေသာ တဏှာ အပ္ပဟီနာ, သော ဝုစ္စတိ တဏှာဒုတိယော.
တဏှာဒုတိယော ပုရိသော,
ဒီဃမဒ္ဓါန သံသရံ;
ဣတ္ထဘာဝညထာဘာဝံ,_
သံသာရံ နာတိဝတ္တတီတိ.
ဧဝံ တဏှာဒုတိယော ဝါ ဟောတိ.
ကထံ ပုဂ္ဂလဒုတိယော ဟောတိ? ဣဓေကစ္စော န အတ္ထဟေတု န ကာရဏဟေတု ဥဒ္ဓတော အဝူပသန္တစိတ္တော ဧကဿ ဝါ ဒုတိယော ဟောတိ, ဒွိန္နံ ဝါ တတိယော ဟောတိ, တိဏ္ဏံ ဝါ စတုတ္ထော ဟောတိ. တတ္ထ ဗဟုံ သမ္ဖပ္ပလာပံ ပလပတိ; သေယျထိဒံ— ရာဇကထံ စောရကထံ မဟာမတ္တကထံ သေနာကထံ ဘယကထံ ယုဒ္ဓကထံ အန္နကထံ ပါနကထံ ဝတ္ထကထံ သယနကထံ မာလာကထံ ဂန္ဓကထံ ဉာတိကထံ ယာနကထံ ဂါမကထံ နိဂမကထံ နဂရကထံ ဇနပဒကထံ ဣတ္ထိကထံ သူရကထံ ဝိသိခါကထံ ကုမ္ဘဋ္ဌာနကထံ ပုဗ္ဗပေတကထံ နာနတ္တကထံ လောကက္ခာယိကံ သမုဒ္ဒက္ခာယိကံ ဣတိဘဝါဘဝကထံ ကထေတိ. ဧဝံ ပုဂ္ဂလဒုတိယော ဟောတီတိ— ဧဝံ ဒုတီယေန သဟာ မမဿ.
ဝါစာဘိလာပေါ အဘိသဇ္ဇနာ ဝါ တိ ဝါစာဘိလာပေါ ဝုစ္စတိ ဗာတ္တိံသ တိရစ္ဆာနကထာ, သေယျထိဒံ— ရာဇကထံ …ပေ… ဣတိဘဝါဘဝကထံ. အဘိသဇ္ဇနာ ဝါ တိ ဒွေ သဇ္ဇနာ— တဏှာသဇ္ဇနာ စ ဒိဋ္ဌိသဇ္ဇနာ စ …ပေ… အယံ တဏှာသဇ္ဇနာ …ပေ… အယံ ဒိဋ္ဌိသဇ္ဇနာတိ— ဝါစာဘိလာပေါ အဘိသဇ္ဇနာ ဝါ.
ဧတံ ဘယံ အာယတိံ ပေက္ခမာနော တိ. ဘယန် တိ ဇာတိဘယံ ဇရာဘယံ ဗျာဓိဘယံ မရဏဘယံ ရာဇဘယံ စောရဘယံ အဂ္ဂိဘယံ ဥဒကဘယံ အတ္တာနုဝါဒဘယံ ပရာနုဝါဒဘယံ ဒဏ္ဍဘယံ ဒုဂ္ဂတိဘယံ ဦမိဘယံ ကုမ္ဘိလဘယံ အာဝဋ္ဋဘယံ သုသုမာရဘယံ အာဇီဝိကဘယံ အသိလောကဘယံ ပရိသသာရဇ္ဇဘယံ မဒနဘယံ ဘယာနကံ ဆမ္ဘိတတ္တံ လောမဟံသော စေတသော ဥဗ္ဗေဂေါ ဥတြာသော. ဧတံ ဘယံ အာယတိံ ပေက္ခမာနော တိ ဧတံ ဘယံ အာယတိံ ပေက္ခမာနော ဒက္ခမာနော ဩလောကယမာနော နိဇ္ဈာယမာနော ဥပပရိက္ခမာနောတိ— ဧတံ ဘယံ အာယတိံ ပေက္ခမာနော, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ဧဝံ ဒုတီယေန သဟာ မမဿ,
ဝါစာဘိလာပေါ အဘိသဇ္ဇနာ ဝါ;
ဧတံ ဘယံ အာယတိံ ပေက္ခမာနော,
ဧကော စရေ ခဂ္ဂဝိသာဏကပ္ပေါ”.
ကာမာ ဟိ စိတြာ မဓုရာ မနောရမာ,
ဝိရူပရူပေန မထေန္တိ စိတ္တံ;
အာဒီနဝံ ကာမဂုဏေသု ဒိသွာ,
ဧကော စရေ ခဂ္ဂဝိသာဏကပ္ပေါ. (6)
ကာမာ ဟိ စိတြာ မဓုရာ မနောရမာ တိ. ကာမာ တိ ဥဒ္ဒါနတော ဒွေ ကာမာ— ဝတ္ထုကာမာ စ ကိလေသကာမာ စ …ပေ… ဣမေ ဝုစ္စန္တိ ဝတ္ထုကာမာ …ပေ… ဣမေ ဝုစ္စန္တိ ကိလေသကာမာ. စိတြာ တိ နာနာဝဏ္ဏာ ရူပါ နာနာဝဏ္ဏာ သဒ္ဒါ နာနာဝဏ္ဏာ ဂန္ဓာ နာနာဝဏ္ဏာ ရသာ နာနာဝဏ္ဏာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ. မဓုရာ တိ ဝုတ္တဉှေတံ ဘဂဝတာ— “ပဉ္စိမေ, ဘိက္ခဝေ, ကာမဂုဏာ. ကတမေ ပဉ္စ? စက္ခုဝိညေယျာ ရူပါ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ, သောတဝိညေယျာ သဒ္ဒါ …ပေ… ဃာနဝိညေယျာ ဂန္ဓာ… ဇိဝှါဝိညေယျာ ရသာ… ကာယဝိညေယျာ ဖောဋ္ဌဗ္ဗာ ဣဋ္ဌာ ကန္တာ မနာပါ ပိယရူပါ ကာမူပသံဟိတာ ရဇနီယာ. ဣမေ ခေါ, ဘိက္ခဝေ, ပဉ္စ ကာမဂုဏာ. ယံ ခေါ, ဘိက္ခဝေ, ဣမေ ပဉ္စ ကာမဂုဏေ ပဋိစ္စ ဥပ္ပဇ္ဇတိ သုခံ သောမနဿံ, ဣဒံ ဝုစ္စတိ ကာမသုခံ မိဠှသုခံ ပုထုဇ္ဇနသုခံ အနရိယသုခံ, ‘န သေဝိတဗ္ဗံ န ဘာဝေတဗ္ဗံ န ဗဟုလီကာတဗ္ဗံ, ဘာယိတဗ္ဗံ ဧတဿ သုခဿာ’တိ ဝဒါမီ”တိ— ကာမာ ဟိ စိတြာ မဓုရာ. မနောရမာ တိ. မနော တိ ယံ စိတ္တံ …ပေ… တဇ္ဇာ မနောဝိညာဏဓာတု. မနော ရမေန္တိ ထောမေန္တိ တောသေန္တိ ပဟာသေန္တီတိ— ကာမာ ဟိ စိတြာ မဓုရာ မနောရမာ.
ဝိရူပရူပေန မထေန္တိ စိတ္တန် တိ နာနာဝဏ္ဏေဟိ ရူပေဟိ …ပေ… နာနာဝဏ္ဏေဟိ ဖောဋ္ဌဗ္ဗေဟိ စိတ္တံ မထေန္တိ တောသေန္တိ ပဟာသေန္တီတိ— ဝိရူပရူပေန မထေန္တိ စိတ္တံ.
အာဒီနဝံ ကာမဂုဏေသု ဒိသွာ တိ. ဝုတ္တဉှေတံ ဘဂဝတာ— “ကော စ, ဘိက္ခဝေ, ကာမာနံ အာဒီနဝေါ? ဣဓ, ဘိက္ခဝေ, ကုလပုတ္တော ယေန သိပ္ပဋ္ဌာနေန ဇီဝိကံ ကပ္ပေတိ, ယဒိ မုဒ္ဒါယ ယဒိ ဂဏနာယ ယဒိ သင်္ခါနေန ယဒိ ကသိယာ ယဒိ ဝဏိဇ္ဇာယ ယဒိ ဂေါရက္ခေန ယဒိ ဣဿတ္ထေန ယဒိ ရာဇပေါရိသေန ယဒိ သိပ္ပညတရေန, သီတဿ ပုရက္ခတော ဥဏှဿ ပုရက္ခတော ဍံသမကသဝါတာတပသရီသပသမ္ဖဿေဟိ သမ္ဖဿမာနော ခုပ္ပိပါသာယ မီယမာနော; အယံ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
တဿ စေ, ဘိက္ခဝေ, ကုလပုတ္တဿ ဧဝံ ဥဋ္ဌဟတော ဃဋတော ဝါယမတော တေ ဘောဂါ နာဘိနိပ္ဖဇ္ဇန္တိ, သော သောစတိ ကိလမတိ ပရိဒေဝတိ ဥရတ္တာဠိံ ကန္ဒတိ, သမ္မောဟံ အာပဇ္ဇတိ— ‘မောဃံ ဝတ မေ ဥဋ္ဌာနံ, အဖလော ဝတ မေ ဝါယာမော’တိ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
တဿ စေ, ဘိက္ခဝေ, ကုလပုတ္တဿ ဧဝံ ဥဋ္ဌဟတော ဃဋတော ဝါယမတော တေ ဘောဂါ အဘိနိပ္ဖဇ္ဇန္တိ, သော တေသံ ဘောဂါနံ အာရက္ခာဓိကရဏံ ဒုက္ခံ ဒေါမနဿံ ပဋိသံဝေဒေတိ— ‘ကိန္တိ မေ ဘောဂေ နေဝ ရာဇာနော ဟရေယျုံ, န စောရာ ဟရေယျုံ, န အဂ္ဂိ ဍဟေယျ, န ဥဒကံ ဝဟေယျ, န အပ္ပိယာ ဒါယာဒါ ဟရေယျုန်’တိ. တဿ ဧဝံ အာရက္ခတော ဂေါပယတော တေ ဘောဂေ ရာဇာနော ဝါ ဟရန္တိ စောရာ ဝါ ဟရန္တိ အဂ္ဂိ ဝါ ဍဟတိ ဥဒကံ ဝါ ဝဟတိ အပ္ပိယာ ဝါ ဒါယာဒါ ဟရန္တိ. သော သောစတိ …ပေ… သမ္မောဟံ အာပဇ္ဇတိ— ‘ယမ္ပိ မေ အဟောသိ တမ္ပိ နော နတ္ထီ’တိ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
ပုန စပရံ, ဘိက္ခဝေ, ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု ရာဇာနောပိ ရာဇူဟိ ဝိဝဒန္တိ, ခတ္တိယာပိ ခတ္တိယေဟိ ဝိဝဒန္တိ, ဗြာဟ္မဏာပိ ဗြာဟ္မဏေဟိ ဝိဝဒန္တိ, ဂဟပတီပိ ဂဟပတီဟိ ဝိဝဒန္တိ, မာတာပိ ပုတ္တေန ဝိဝဒတိ, ပုတ္တောပိ မာတရာ ဝိဝဒတိ, ပိတာပိ ပုတ္တေန ဝိဝဒတိ, ပုတ္တောပိ ပိတရာ ဝိဝဒတိ, ဘာတာပိ ဘဂိနိယာ ဝိဝဒတိ, ဘဂိနီပိ ဘာတရာ ဝိဝဒတိ, သဟာယောပိ သဟာယေန ဝိဝဒတိ. တေ တတ္ထ ကလဟဝိဂ္ဂဟဝိဝါဒါပန္နာ အညမညံ ပါဏီဟိပိ ဥပက္ကမန္တိ လေဍ္ဍူဟိပိ ဥပက္ကမန္တိ ဒဏ္ဍေဟိပိ ဥပက္ကမန္တိ သတ္ထေဟိပိ ဥပက္ကမန္တိ. တေ တတ္ထ မရဏမ္ပိ နိဂစ္ဆန္တိ မရဏမတ္တမ္ပိ ဒုက္ခံ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
ပုန စပရံ, ဘိက္ခဝေ, ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု အသိစမ္မံ ဂဟေတွာ ဓနုကလာပံ သန္နယှိတွာ ဥဘတောဗျူဠှံ သင်္ဂါမံ ပက္ခန္ဒန္တိ, ဥသူသုပိ ခိပ္ပမာနေသု သတ္တီသုပိ ခိပ္ပမာနာသု အသီသုပိ ဝိဇ္ဇောတလန္တေသု. တေ တတ္ထ ဥသူဟိပိ ဝိဇ္ဈန္တိ သတ္တီဟိပိ ဝိဇ္ဈန္တိ အသိနာပိ သီသံ ဆိန္ဒန္တိ. တေ တတ္ထ မရဏမ္ပိ နိဂစ္ဆန္တိ မရဏမတ္တမ္ပိ ဒုက္ခံ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
ပုန စပရံ, ဘိက္ခဝေ, ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု အသိစမ္မံ ဂဟေတွာ ဓနုကလာပံ သန္နယှိတွာ အဒ္ဒါဝလေပနာ ဥပကာရိယော ပက္ခန္ဒန္တိ, ဥသူသုပိ ခိပ္ပမာနေသု သတ္တီသုပိ ခိပ္ပမာနာသု, အသီသုပိ ဝိဇ္ဇောတလန္တေသု. တေ တတ္ထ ဥသူဟိပိ ဝိဇ္ဈန္တိ သတ္တီဟိပိ ဝိဇ္ဈန္တိ ဆကဏကာယပိ ဩသိဉ္စန္တိ အဘိဝဂ္ဂေနပိ ဩမဒ္ဒန္တိ အသိနာပိ သီသံ ဆိန္ဒန္တိ. တေ တတ္ထ မရဏမ္ပိ နိဂစ္ဆန္တိ မရဏမတ္တမ္ပိ ဒုက္ခံ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
ပုန စပရံ, ဘိက္ခဝေ, ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု သန္ဓိမ္ပိ ဆိန္ဒန္တိ နိလ္လောပမ္ပိ ဟရန္တိ ဧကာဂါရိကမ္ပိ ကရောန္တိ ပရိပန္ထေပိ တိဋ္ဌန္တိ ပရဒါရမ္ပိ ဂစ္ဆန္တိ. တမေနံ ရာဇာနော ဂဟေတွာ ဝိဝိဓာ ကမ္မကာရဏာ ကာရေန္တိ— ကသာဟိပိ တာဠေန္တိ, ဝေတ္တေဟိပိ တာဠေန္တိ, အဍ္ဎဒဏ္ဍကေဟိပိ တာဠေန္တိ, ဟတ္ထမ္ပိ ဆိန္ဒန္တိ …ပေ… အသိနာပိ သီသံ ဆိန္ဒန္တိ. တေ တတ္ထ မရဏမ္ပိ နိဂစ္ဆန္တိ မရဏမတ္တမ္ပိ ဒုက္ခံ. အယမ္ပိ, ဘိက္ခဝေ, ကာမာနံ အာဒီနဝေါ သန္ဒိဋ္ဌိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု.
ပုန စပရံ, ဘိက္ခဝေ, ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု ကာယေန ဒုစ္စရိတံ စရန္တိ ဝါစာယ ဒုစ္စရိတံ စရန္တိ မနသာ ဒုစ္စရိတံ စရန္တိ. တေ ကာယေန ဒုစ္စရိတံ စရိတွာ ဝါစာယ ဒုစ္စရိတံ စရိတွာ မနသာ ဒုစ္စရိတံ စရိတွာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တိ. အယမ္ပိ, ဘိက္ခဝေ, ကာမာနံ အာဒီနဝေါ သမ္ပရာယိကော ဒုက္ခက္ခန္ဓော ကာမဟေတု ကာမနိဒါနံ ကာမာဓိကရဏံ ကာမာနမေဝ ဟေတု”.
အာဒီနဝံ ကာမဂုဏေသု ဒိသွာ တိ ကာမဂုဏေသု အာဒီနဝံ ဒိသွာ ပဿိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ— အာဒီနဝံ ကာမဂုဏေသု ဒိသွာ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ကာမာ ဟိ စိတြာ မဓုရာ မနောရမာ,
ဝိရူပရူပေန မထေန္တိ စိတ္တံ;
အာဒီနဝံ ကာမဂုဏေသု ဒိသွာ,
ဧကော စရေ ခဂ္ဂဝိသာဏကပ္ပေါ”တိ.
ဤတီ စ ဂဏ္ဍော စ ဥပဒ္ဒဝေါ စ,
ရောဂေါ စ သလ္လဉ္စ ဘယဉ္စ မေတံ;
ဧတံ ဘယံ ကာမဂုဏေသု ဒိသွာ,
ဧကော စရေ ခဂ္ဂဝိသာဏကပ္ပေါ. (7)
ဤတီ စ ဂဏ္ဍော စ ဥပဒ္ဒဝေါ စ, ရောဂေါ စ သလ္လဉ္စ ဘယဉ္စ မေတန် တိ ဝုတ္တဉှေတံ ဘဂဝတာ— “ဘယန္တိ, ဘိက္ခဝေ, ကာမာနမေတံ အဓိဝစနံ. ဒုက္ခန္တိ, ဘိက္ခဝေ, ကာမာနမေတံ အဓိဝစနံ. ရောဂေါတိ, ဘိက္ခဝေ, ကာမာနမေတံ အဓိဝစနံ. ဂဏ္ဍောတိ, ဘိက္ခဝေ, ကာမာနမေတံ အဓိဝစနံ. သလ္လန္တိ, ဘိက္ခဝေ, ကာမာနမေတံ အဓိဝစနံ. သင်္ဂေါတိ, ဘိက္ခဝေ, ကာမာနမေတံ အဓိဝစနံ. ပင်္ကောတိ, ဘိက္ခဝေ, ကာမာနမေတံ အဓိဝစနံ. ဂဗ္ဘောတိ, ဘိက္ခဝေ, ကာမာနမေတံ အဓိဝစနံ. ကသ္မာ စ, ဘိက္ခဝေ, ဘယန္တိ ကာမာနမေတံ အဓိဝစနံ? ယသ္မာ စ ကာမရာဂရတ္တာယံ, ဘိက္ခဝေ, ဆန္ဒရာဂဝိနိဗဒ္ဓေါ ဒိဋ္ဌဓမ္မိကာပိ ဘယာ န ပရိမုစ္စတိ, သမ္ပရာယိကာပိ ဘယာ န ပရိမုစ္စတိ, တသ္မာ ဘယန္တိ ကာမာနမေတံ အဓိဝစနံ. ကသ္မာ စ, ဘိက္ခဝေ, ဒုက္ခန္တိ …ပေ… ရောဂေါတိ… ဂဏ္ဍောတိ… သလ္လန္တိ… သင်္ဂေါတိ… ပင်္ကောတိ… ဂဗ္ဘောတိ ကာမာနမေတံ အဓိဝစနံ? ယသ္မာ စ ကာမရာဂရတ္တာယံ, ဘိက္ခဝေ, ဆန္ဒရာဂဝိနိဗဒ္ဓေါ ဒိဋ္ဌဓမ္မိကာပိ ဂဗ္ဘာ န ပရိမုစ္စတိ, သမ္ပရာယိကာပိ ဂဗ္ဘာ န ပရိမုစ္စတိ, တသ္မာ ဂဗ္ဘောတိ ကာမာနမေတံ အဓိဝစနန်”တိ.
ဘယံ ဒုက္ခဉ္စ ရောဂေါ စ,
ဂဏ္ဍော သလ္လဉ္စ သင်္ဂေါ စ;
ပင်္ကော ဂဗ္ဘော စ ဥဘယံ,
ဧတေ ကာမာ ပဝုစ္စန္တိ;
ယတ္ထ သတ္တော ပုထုဇ္ဇနော.
ဩတိဏ္ဏော သာတရူပေန,
ပုန ဂဗ္ဘာယ ဂစ္ဆတိ;
ယတော စ ဘိက္ခု အာတာပီ,
သမ္ပဇညံ န ရိစ္စတိ.
သော ဣမံ ပလိပထံ ဒုဂ္ဂံ,
အတိက္ကမ္မ တထာဝိဓော;
ပဇံ ဇာတိဇရူပေတံ,
ဖန္ဒမာနံ အဝေက္ခတီတိ.
ဤတီ စ ဂဏ္ဍော စ ဥပဒ္ဒဝေါ စ,
ရောဂေါ စ သလ္လဉ္စ ဘယဉ္စ မေတံ.
ဧတံ ဘယံ ကာမဂုဏေသု ဒိသွာ တိ ဧတံ ဘယံ ကာမဂုဏေသု ဒိသွာ ပဿိတွာ တုလယိတွာ တီရယိတွာ ဝိဘာဝယိတွာ ဝိဘူတံ ကတွာတိ— ဧတံ ဘယံ ကာမဂုဏေသု ဒိသွာ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ဤတီ စ ဂဏ္ဍော စ ဥပဒ္ဒဝေါ စ,
ရောဂေါ စ သလ္လဉ္စ ဘယဉ္စ မေတံ;
ဧတံ ဘယံ ကာမဂုဏေသု ဒိသွာ,
ဧကော စရေ ခဂ္ဂဝိသာဏကပ္ပေါ”တိ.
သီတဉ္စ ဥဏှဉ္စ ခုဒံ ပိပါသံ,
ဝါတာတပေ ဍံသသရီသပေ စ;
သဗ္ဗာနိပေတာနိ အဘိသမ္ဘဝိတွာ,
ဧကော စရေ ခဂ္ဂဝိသာဏကပ္ပေါ. (8)
သီတဉ္စ ဥဏှဉ္စ ခုဒံ ပိပါသန် တိ. သီတန် တိ ဒွီဟိ ကာရဏေဟိ သီတံ ဟောတိ— အဗ္ဘန္တရဓာတုပ္ပကောပဝသေန ဝါ သီတံ ဟောတိ ဗဟိဒ္ဓါ ဥတုဝသေန ဝါ သီတံ ဟောတိ. ဥဏှန် တိ ဒွီဟိ ကာရဏေဟိ ဥဏှံ ဟောတိ— အဗ္ဘန္တရဓာတုပ္ပကောပဝသေန ဝါ ဥဏှံ ဟောတိ ဗဟိဒ္ဓါ ဥတုဝသေန ဝါ ဥဏှံ ဟောတိ. ခုဒါ ဝုစ္စတိ ဆာတကော. ပိပါသာ ဝုစ္စတိ ဥဒကပိပါသာတိ— သီတဉ္စ ဥဏှဉ္စ ခုဒံ ပိပါသံ.
ဝါတာတပေ ဍံသသရီသပေ စာ တိ. ဝါတာ တိ ပုရတ္ထိမာ ဝါတာ ပစ္ဆိမာ ဝါတာ ဥတ္တရာ ဝါတာ ဒက္ခိဏာ ဝါတာ သရဇာ ဝါတာ အရဇာ ဝါတာ သီတာ ဝါတာ ဥဏှာ ဝါတာ ပရိတ္တာ ဝါတာ အဓိမတ္တာ ဝါတာ ဝေရမ္ဘဝါတာ ပက္ခဝါတာ သုပဏ္ဏဝါတာ တာလပဏ္ဏဝါတာ ဝိဓူပနဝါတာ. အာတပေါ ဝုစ္စတိ သူရိယသန္တာပေါ. ဍံသာ ဝုစ္စန္တိ ပိင်္ဂလမက္ခိကာ. သရီသပါ ဝုစ္စန္တိ အဟီတိ— ဝါတာတပေ ဍံသသရီသပေ စ.
သဗ္ဗာနိပေတာနိ အဘိသမ္ဘဝိတွာ တိ အဘိဘဝိတွာ အဇ္ဈောတ္ထရိတွာ ပရိယာဒိယိတွာ မဒ္ဒိတွာတိ— သဗ္ဗာနိပေတာနိ အဘိသမ္ဘဝိတွာ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“သီတဉ္စ ဥဏှဉ္စ ခုဒံ ပိပါသံ,
ဝါတာတပေ ဍံသသရီသပေ စ;
သဗ္ဗာနိပေတာနိ အဘိသမ္ဘဝိတွာ,
ဧကော စရေ ခဂ္ဂဝိသာဏကပ္ပေါ”တိ.
နာဂေါဝ ယူထာနိ ဝိဝဇ္ဇယိတွာ,
သဉ္ဇာတခန္ဓော ပဒုမီ ဥဠာရော;
ယထာဘိရန္တံ ဝိဟရေ အရညေ,
ဧကော စရေ ခဂ္ဂဝိသာဏကပ္ပေါ. (9)
နာဂေါဝ ယူထာနိ ဝိဝဇ္ဇယိတွာ တိ နာဂေါ ဝုစ္စတိ ဟတ္ထိနာဂေါ. ပစ္စေကသမ္ဗုဒ္ဓေါပိ နာဂေါ. ကိံကာရဏာ ပစ္စေကသမ္ဗုဒ္ဓေါ နာဂေါ? အာဂုံ န ကရောတီတိ နာဂေါ; န ဂစ္ဆတီတိ နာဂေါ; န အာဂစ္ဆတီတိ နာဂေါ. ကထံ သော ပစ္စေကသမ္ဗုဒ္ဓေါ အာဂုံ န ကရောတီတိ နာဂေါ? အာဂု ဝုစ္စတိ ပါပကာ အကုသလာ ဓမ္မာ သံကိလေသိကာ ပေါနောဘဝိကာ သဒရာ ဒုက္ခဝိပါကာ အာယတိံ ဇာတိဇရာမရဏိယာ.
အာဂုံ န ကရောတိ ကိဉ္စိ လောကေ,
သဗ္ဗသံယောဂေ ဝိသဇ္ဇ ဗန္ဓနာနိ;
သဗ္ဗတ္ထ န သဇ္ဇတီ ဝိမုတ္တော,
နာဂေါ တာဒိ ပဝုစ္စတေ တထတ္တာ.
ဧဝံ သော ပစ္စေကသမ္ဗုဒ္ဓေါ အာဂုံ န ကရောတီတိ နာဂေါ.
ကထံ သော ပစ္စေကသမ္ဗုဒ္ဓေါ န ဂစ္ဆတီတိ နာဂေါ? သော ပစ္စေကသမ္ဗုဒ္ဓေါ န ဆန္ဒာဂတိံ ဂစ္ဆတိ, န ဒေါသာဂတိံ ဂစ္ဆတိ, န မောဟာဂတိံ ဂစ္ဆတိ, န ဘယာဂတိံ ဂစ္ဆတိ, န ရာဂဝသေန ဂစ္ဆတိ, န ဒေါသဝသေန ဂစ္ဆတိ, န မောဟဝသေန ဂစ္ဆတိ, န မာနဝသေန ဂစ္ဆတိ, န ဒိဋ္ဌိဝသေန ဂစ္ဆတိ, န ဥဒ္ဓစ္စဝသေန ဂစ္ဆတိ, န ဝိစိကိစ္ဆာဝသေန ဂစ္ဆတိ, န အနုသယဝသေန ဂစ္ဆတိ, န ဝဂ္ဂေဟိ ဓမ္မေဟိ ယာယတိ နီယတိ ဝုယှတိ သံဟရီယတိ. ဧဝံ သော ပစ္စေကသမ္ဗုဒ္ဓေါ န ဂစ္ဆတီတိ နာဂေါ.
ကထံ သော ပစ္စေကသမ္ဗုဒ္ဓေါ န အာဂစ္ဆတီတိ နာဂေါ? သောတာပတ္တိမဂ္ဂေန ယေ ကိလေသာ ပဟီနာ တေ ကိလေသေ န ပုနေတိ န ပစ္စေတိ န ပစ္စာဂစ္ဆတိ, သကဒါဂါမိမဂ္ဂေန …ပေ… အနာဂါမိမဂ္ဂေန …ပေ… အရဟတ္တမဂ္ဂေန ယေ ကိလေသာ ပဟီနာ တေ ကိလေသေ န ပုနေတိ န ပစ္စေတိ န ပစ္စာဂစ္ဆတိ. ဧဝံ သော ပစ္စေကသမ္ဗုဒ္ဓေါ န အာဂစ္ဆတီတိ နာဂေါ.
နာဂေါဝ ယူထာနိ ဝိဝဇ္ဇယိတွာ တိ ယထာ သော ဟတ္ထိနာဂေါ ယူထာနိ ဝိဝဇ္ဇေတွာ ပရိဝဇ္ဇေတွာ အဘိနိဝဇ္ဇေတွာ ဧကောဝ အရညဝနမဇ္ဈောဂါဟေတွာ စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတိ, ပစ္စေကသမ္ဗုဒ္ဓေါပိ ဂဏံ ဝိဝဇ္ဇေတွာ ပရိဝဇ္ဇေတွာ အဘိဝဇ္ဇေတွာ ဧကော အရညဝနပတ္ထာနိ ပန္တာနိ သေနာသနာနိ ပဋိသေဝတိ အပ္ပသဒ္ဒါနိ အပ္ပနိဂ္ဃေါသာနိ ဝိဇနဝါတာနိ မနုဿရာဟဿေယျကာနိ ပဋိသလ္လာနသာရုပ္ပါနိ. သော ဧကော ဂစ္ဆတိ ဧကော တိဋ္ဌတိ ဧကော နိသီဒတိ ဧကော သေယျံ ကပ္ပေတိ ဧကော ဂါမံ ပိဏ္ဍာယ ပဝိသတိ ဧကော ပဋိက္ကမတိ ဧကော ရဟော နိသီဒတိ ဧကော စင်္ကမံ အဓိဋ္ဌာတိ ဧကော စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတီတိ— နာဂေါဝ ယူထာနိ ဝိဝဇ္ဇယိတွာ.
သဉ္ဇာတခန္ဓော ပဒုမီ ဥဠာရော တိ ယထာ သော ဟတ္ထိနာဂေါ သဉ္ဇာတက္ခန္ဓော သတ္တရတနော ဝါ ဟောတိ အဋ္ဌရတနော ဝါ, ပစ္စေကသမ္ဗုဒ္ဓေါပိ သဉ္ဇာတက္ခန္ဓော အသေက္ခေန သီလက္ခန္ဓေန အသေက္ခေန သမာဓိက္ခန္ဓေန အသေက္ခေန ပညာက္ခန္ဓေန အသေက္ခေန ဝိမုတ္တိက္ခန္ဓေန အသေက္ခေန ဝိမုတ္တိဉာဏဒဿနက္ခန္ဓေန. ယထာ သော ဟတ္ထိနာဂေါ ပဒုမီ, ပစ္စေကသမ္ဗုဒ္ဓေါပိ သတ္တဟိ ဗောဇ္ဈင်္ဂပုပ္ဖေဟိ ပဒုမီ, သတိသမ္ဗောဇ္ဈင်္ဂပုပ္ဖေန ဓမ္မဝိစယသမ္ဗောဇ္ဈင်္ဂပုပ္ဖေန ဝီရိယသမ္ဗောဇ္ဈင်္ဂပုပ္ဖေန ပီတိသမ္ဗောဇ္ဈင်္ဂပုပ္ဖေန ပဿဒ္ဓိသမ္ဗောဇ္ဈင်္ဂပုပ္ဖေန သမာဓိသမ္ဗောဇ္ဈင်္ဂပုပ္ဖေန ဥပေက္ခာသမ္ဗောဇ္ဈင်္ဂပုပ္ဖေန. ယထာ သော ဟတ္ထိနာဂေါ ဥဠာရော ထာမေန ဗလေန ဇဝေန သူရေန, ပစ္စေကသမ္ဗုဒ္ဓေါပိ ဥဠာရော သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေနာတိ— သဉ္ဇာတခန္ဓော ပဒုမီ ဥဠာရော.
ယထာဘိရန္တံ ဝိဟရေ အရညေ တိ ယထာ သော ဟတ္ထိနာဂေါ ယထာဘိရန္တံ အရညေ ဝိဟရတိ, ပစ္စေကသမ္ဗုဒ္ဓေါပိ ယထာဘိရန္တံ အရညေ ဝိဟရတိ. ပဌမေနပိ ဈာနေန ယထာဘိရန္တံ အရညေ ဝိဟရတိ, ဒုတိယေနပိ ဈာနေန …ပေ… တတိယေနပိ ဈာနေန… စတုတ္ထေနပိ ဈာနေန ယထာဘိရန္တံ အရညေ ဝိဟရတိ; မေတ္တာယပိ စေတောဝိမုတ္တိယာ ယထာဘိရန္တံ အရညေ ဝိဟရတိ, ကရုဏာယပိ စေတောဝိမုတ္တိယာ… မုဒိတာယပိ စေတောဝိမုတ္တိယာ… ဥပေက္ခာယပိ စေတောဝိမုတ္တိယာ ယထာဘိရန္တံ အရညေ ဝိဟရတိ; အာကာသာနဉ္စာယတနသမာပတ္တိယာပိ ယထာဘိရန္တံ အရညေ ဝိဟရတိ, ဝိညာဏဉ္စာယတနသမာပတ္တိယာပိ… အာကိဉ္စညာယတနသမာပတ္တိယာပိ… နေဝသညာနာသညာယတနသမာပတ္တိယာပိ… နိရောဓသမာပတ္တိယာပိ… ဖလသမာပတ္တိယာပိ ယထာဘိရန္တံ အရညေ ဝိဟရတီတိ— ယထာဘိရန္တံ ဝိဟရေ အရညေ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“နာဂေါဝ ယူထာနိ ဝိဝဇ္ဇယိတွာ,
သဉ္ဇာတခန္ဓော ပဒုမီ ဥဠာရော;
ယထာဘိရန္တံ ဝိဟရေ အရညေ,
ဧကော စရေ ခဂ္ဂဝိသာဏကပ္ပေါ”တိ.
အဋ္ဌာနတံ သင်္ဂဏိကာရတဿ,
ယံ ဖဿယေ သာမယိကံ ဝိမုတ္တိံ;
အာဒိစ္စဗန္ဓုဿ ဝစော နိသမ္မ,
ဧကော စရေ ခဂ္ဂဝိသာဏကပ္ပေါ. (10)
အဋ္ဌာနတံ သင်္ဂဏိကာရတဿ, ယံ ဖဿယေ သာမယိကံ ဝိမုတ္တိန် တိ ဝုတ္တဉှေတံ ဘဂဝတာ— “ယာဝတာနန္ဒ, ဘိက္ခု သင်္ဂဏိကာရာမော သင်္ဂဏိကရတော သင်္ဂဏိကာရာမတံ အနုယုတ္တော, ဂဏာရာမော ဂဏရတော ဂဏသမ္မုဒိတော ဂဏာရာမတံ အနုယုတ္တော, ယံ တံ နေက္ခမ္မသုခံ ပဝိဝေကသုခံ ဥပသမသုခံ သမ္ဗောဓိသုခံ, တဿ သုခဿ နိကာမလာဘီ ဘဝိဿတိ အကိစ္ဆလာဘီ အကသိရလာဘီတိ— နေတံ ဌာနံ ဝိဇ္ဇတိ. ယော စ ခေါ သော, အာနန္ဒ, ဘိက္ခု ဧကော ဂဏသ္မာ ဝူပကဋ္ဌော ဝိဟရတိ, တဿေတံ ဘိက္ခုနော ပါဋိကင်္ခံ. ယံ တံ နေက္ခမ္မသုခံ ပဝိဝေကသုခံ ဥပသမသုခံ သမ္ဗောဓိသုခံ, တဿ သုခဿ နိကာမလာဘီ ဘဝိဿတိ အကိစ္ဆလာဘီ အကသိရလာဘီတိ— ဌာနမေတံ ဝိဇ္ဇတိ. ယာဝတာနန္ဒ, ဘိက္ခု သင်္ဂဏိကာရာမော သင်္ဂဏိကရတော သင်္ဂဏိကာရာမတံ အနုယုတ္တော, ဂဏာရာမော ဂဏရတော ဂဏသမ္မုဒိတော (ဂဏာရာမတံ အနုယုတ္တော) သာမာယိကံ ဝါ ကန္တံ စေတောဝိမုတ္တိံ ဥပသမ္ပဇ္ဇ ဝိဟရိဿတိ, အသာမာယိကံ ဝါ အကုပ္ပန္တိ— နေတံ ဌာနံ ဝိဇ္ဇတိ. ယော စ ခေါ သော, အာနန္ဒ, ဘိက္ခု ဧကော ဂဏသ္မာ ဝူပကဋ္ဌော ဝိဟရတိ, တဿေတံ ဘိက္ခုနော ပါဋိကင်္ခံ သာမာယိကံ ဝါ ကန္တံ စေတောဝိမုတ္တိံ ဥပသမ္ပဇ္ဇ ဝိဟရိဿတိ, အသာမာယိကံ ဝါ အကုပ္ပန္တိ, ဌာနမေတံ ဝိဇ္ဇတီ”တိ— အဋ္ဌာနတံ သင်္ဂဏိကာရတဿ, ယံ ဖဿယေ သာမယိကံ ဝိမုတ္တိံ.
အာဒိစ္စဗန္ဓုဿ ဝစော နိသမ္မာ တိ အာဒိစ္စော ဝုစ္စတိ သူရိယော. သော ဂေါတမော ဂေါတ္တေန. ပစ္စေကသမ္ဗုဒ္ဓေါပိ ဂေါတမော ဂေါတ္တေန. သော ပစ္စေကသမ္ဗုဒ္ဓေါ သူရိယဿ ဂေါတ္တဉာတကော ဂေါတ္တဗန္ဓု, တသ္မာ ပစ္စေကသမ္ဗုဒ္ဓေါ အာဒိစ္စဗန္ဓု. အာဒိစ္စဗန္ဓုဿ ဝစော နိသမ္မာ တိ အာဒိစ္စဗန္ဓုဿ ဝစနံ ဗျပ္ပထံ ဒေသနံ အနုသာသနံ အနုသိဋ္ဌံ သုတွာ သုဏိတွာ ဥဂ္ဂဟေတွာ ဥပဓာရယိတွာ ဥပလက္ခယိတွာတိ— အာဒိစ္စဗန္ဓုဿ ဝစော နိသမ္မ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“အဋ္ဌာနတံ သင်္ဂဏိကာရတဿ,
ယံ ဖဿယေ သာမယိကံ ဝိမုတ္တိံ;
အာဒိစ္စဗန္ဓုဿ ဝစော နိသမ္မ,
ဧကော စရေ ခဂ္ဂဝိသာဏကပ္ပေါ”တိ.
ဒုတိယော ဝဂ္ဂေါ.