3.4 စတုတ္ထဝဂ္ဂ
ရသေသု ဂေဓံ အကရံ အလောလော,
အနညပေါသီ သပဒါနစာရီ;
ကုလေ ကုလေ အပ္ပဋိဗဒ္ဓစိတ္တော,
ဧကော စရေ ခဂ္ဂဝိသာဏကပ္ပေါ. (1)
ရသေသု ဂေဓံ အကရံ အလောလော တိ. ရသော တိ မူလရသော ခန္ဓရသော တစရသော ပတ္တရသော ပုပ္ဖရသော ဖလရသော, အမ္ဗိလံ မဓုရံ တိတ္တကံ ကဋုကံ လောဏိကံ ခါရိကံ လမ္ဗိကံ ကသာဝေါ သာဒု အသာဒု သီတံ ဥဏှံ. သန္တေကေ သမဏဗြာဟ္မဏာ ရသဂိဒ္ဓါ. တေ ဇိဝှဂ္ဂေန ရသဂ္ဂါနိ ပရိယေသန္တာ အာဟိဏ္ဍန္တိ. တေ အမ္ဗိလံ လဘိတွာ အနမ္ဗိလံ ပရိယေသန္တိ, အနမ္ဗိလံ လဘိတွာ အမ္ဗိလံ ပရိယေသန္တိ; မဓုရံ လဘိတွာ အမဓုရံ ပရိယေသန္တိ, အမဓုရံ လဘိတွာ မဓုရံ ပရိယေသန္တိ; တိတ္တကံ လဘိတွာ အတိတ္တကံ ပရိယေသန္တိ, အတိတ္တကံ လဘိတွာ တိတ္တကံ ပရိယေသန္တိ; ကဋုကံ လဘိတွာ အကုဋကံ ပရိယေသန္တိ, အကုဋကံ လဘိတွာ ကဋုကံ ပရိယေသန္တိ; လောဏိကံ လဘိတွာ အလောဏိကံ ပရိယေသန္တိ, အလောဏိကံ လဘိတွာ လောဏိကံ ပရိယေသန္တိ; ခါရိကံ လဘိတွာ အခါရိကံ ပရိယေသန္တိ, အခါရိကံ လဘိတွာ ခါရိကံ ပရိယေသန္တိ; ကသာဝံ လဘိတွာ အကသာဝံ ပရိယေသန္တိ, အကသာဝံ လဘိတွာ ကသာဝံ ပရိယေသန္တိ; လမ္ဗိကံ လဘိတွာ အလမ္ဗိကံ ပရိယေသန္တိ, အလမ္ဗိကံ လဘိတွာ လမ္ဗိကံ ပရိယေသန္တိ; သာဒုံ လဘိတွာ အသာဒုံ ပရိယေသန္တိ, အသာဒုံ လဘိတွာ သာဒုံ ပရိယေသန္တိ; သီတံ လဘိတွာ ဥဏှံ ပရိယေသန္တိ, ဥဏှံ လဘိတွာ သီတံ ပရိယေသန္တိ. တေ ယံ ယံ လဘန္တိ တေန တေန န တုဿန္တိ, အပရာပရံ ပရိယေသန္တိ. မနာပိကေသု ရသေသု ရတ္တာ ဂိဒ္ဓါ ဂထိတာ မုစ္ဆိတာ အဇ္ဈောသန္နာ လဂ္ဂါ လဂ္ဂိတာ ပလိဗုဒ္ဓါ. သာ ရသတဏှာ တဿ ပစ္စေကသမ္ဗုဒ္ဓဿ ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ သော ပစ္စေကသမ္ဗုဒ္ဓေါ ပဋိသင်္ခါ ယောနိသော အာဟာရံ အာဟာရေတိ— “နေဝ ဒဝါယ န မဒါယ န မဏ္ဍနာယ န ဝိဘူသနာယ; ယာဝဒေဝ ဣမဿ ကာယဿ ဌိတိယာ ယာပနာယ ဝိဟိံသူပရတိယာ ဗြဟ္မစရိယာနုဂ္ဂဟာယ. ဣတိ ပုရာဏဉ္စ ဝေဒနံ ပဋိဟင်္ခါမိ, နဝဉ္စ ဝေဒနံ န ဥပ္ပါဒေဿာမိ, ယာတြာ စ မေ ဘဝိဿတိ အနဝဇ္ဇတာ စ ဖာသုဝိဟာရော စာ”တိ.
ယထာ ဝဏံ အာလိမ္ပေယျ ယာဝဒေဝ အာရုဟဏတ္ထာယ, ယထာ ဝါ အက္ခံ အဗ္ဘဉ္ဇေယျ ယာဝဒေဝ ဘာရဿ နိတ္ထရဏတ္ထာယ, ယထာ ပုတ္တမံသံ အာဟာရံ အာဟရေယျ ယာဝဒေဝ ကန္တာရဿ နိတ္ထရဏတ္ထာယ; ဧဝမေဝ သော ပစ္စေကသမ္ဗုဒ္ဓေါ ပဋိသင်္ခါ ယောနိသော အာဟာရံ အာဟာရေတိ— “နေဝ ဒဝါယ န မဒါယ န မဏ္ဍနာယ န ဝိဘူသနာယ; ယာဝဒေဝ ဣမဿ ကာယဿ ဌိတိယာ ယာပနာယ ဝိဟိံသူပရတိယာ ဗြဟ္မစရိယာနုဂ္ဂဟာယ. ဣတိ ပုရာဏဉ္စ ဝေဒနံ ပဋိဟင်္ခါမိ, နဝဉ္စ ဝေဒနံ န ဥပ္ပါဒေဿာမိ, ယာတြာ စ မေ ဘဝိဿတိ အနဝဇ္ဇတာ စ ဖာသုဝိဟာရော စာ”တိ. ရသတဏှာယ အာရတော ဝိရတော ပဋိဝိရတော နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ— ရသေသု ဂေဓံ အကရံ.
အလောလော တိ လောလုပ္ပံ ဝုစ္စတိ တဏှာ. ယော ရာဂေါ သာရာဂေါ …ပေ… အဘိဇ္ဈာ လောဘော အကုသလမူလံ. သာ လောလုပ္ပါ တဏှာ တဿ ပစ္စေကသမ္ဗုဒ္ဓဿ ပဟီနာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ. တသ္မာ ပစ္စေကသမ္ဗုဒ္ဓေါ အလောလောတိ— ရသေသု ဂေဓံ အကရံ အလောလော.
အနညပေါသီ သပဒါနစာရီ တိ အနညပေါသီ တိ သော ပစ္စေကသမ္ဗုဒ္ဓေါ အတ္တာနညေဝ ပေါသေတိ, န ပရန္တိ.
အနညပေါသိမညာတံ,
ဒန္တံ သာရေ ပတိဋ္ဌိတံ;
ခီဏာသဝံ ဝန္တဒေါသံ,
တမဟံ ဗြူမိ ဗြာဟ္မဏန္တိ.
အနညပေါသီ သပဒါနစာရီ တိ သော ပစ္စေကသမ္ဗုဒ္ဓေါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ဂါမံ ဝါ နိဂမံ ဝါ ပိဏ္ဍာယ ပဝိသတိ ရက္ခိတေနေဝ ကာယေန ရက္ခိတာယ ဝါစာယ ရက္ခိတေန စိတ္တေန ဥပဋ္ဌိတာယ သတိယာ သံဝုတေဟိ ဣန္ဒြိယေဟိ. ဩက္ခိတ္တစက္ခု ဣရိယာပထသမ္ပန္နော ကုလာ ကုလံ အနတိက္ကမန္တော ပိဏ္ဍာယ စရတီတိ— အနညပေါသီ သပဒါနစာရီ.
ကုလေ ကုလေ အပ္ပဋိဗဒ္ဓစိတ္တော တိ ဒွီဟိ ကာရဏေဟိ ပဋိဗဒ္ဓစိတ္တော ဟောတိ— အတ္တာနံ ဝါ နီစံ ဌပေန္တော ပရံ ဥစ္စံ ဌပေန္တော ပဋိဗဒ္ဓစိတ္တော ဟောတိ, အတ္တာနံ ဝါ ဥစ္စံ ဌပေန္တော ပရံ နီစံ ဌပေန္တော ပဋိဗဒ္ဓစိတ္တော ဟောတိ. ကထံ အတ္တာနံ နီစံ ဌပေန္တော ပရံ ဥစ္စံ ဌပေန္တော ပဋိဗဒ္ဓစိတ္တော ဟောတိ? “တုမှေ မေ ဗဟူပကာရာ, အဟံ တုမှေ နိဿာယ လဘာမိ စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရံ. ယမ္ပိ မေ အညေ ဒါတုံ ဝါ ကာတုံ ဝါ မညန္တိ တုမှေ နိဿာယ တုမှေ ပဿန္တာ. ယမ္ပိ မေ ပေါရာဏံ မာတာပေတ္တိကံ နာမဂေါတ္တံ တမ္ပိ မေ အန္တရဟိတံ တုမှေဟိ အဟံ ဉာယာမိ— ‘အသုကဿ ကုလုပကော, အသုကာယ ကုလုပကော’”တိ. ဧဝံ အတ္တာနံ နီစံ ဌပေန္တော ပရံ ဥစ္စံ ဌပေန္တော ပဋိဗဒ္ဓစိတ္တော ဟောတိ.
ကထံ အတ္တာနံ ဥစ္စံ ဌပေန္တော ပရံ နီစံ ဌပေန္တော ပဋိဗဒ္ဓစိတ္တော ဟောတိ? “အဟံ တုမှာကံ ဗဟူပကာရော, တုမှေ မံ အာဂမ္မ ဗုဒ္ဓံ သရဏံ ဂတာ ဓမ္မံ သရဏံ ဂတာ သံဃံ သရဏံ ဂတာ, ပါဏာတိပါတာ ပဋိဝိရတာ, အဒိန္နာဒါနာ ပဋိဝိရတာ, ကာမေသုမိစ္ဆာစာရာ ပဋိဝိရတာ, မုသာဝါဒါ ပဋိဝိရတာ, သုရာမေရယမဇ္ဇပမာဒဋ္ဌာနာ ပဋိဝိရတာ, တုမှာကံ အဟံ ဥဒ္ဒေသံ ဒေမိ ပရိပုစ္ဆံ ဒေမိ ဥပေါသထံ အာစိက္ခာမိ နဝကမ္မံ အဓိဋ္ဌာမိ; အထ စ ပန တုမှေ မံ ဥဇ္ဈိတွာ အညေ သက္ကရောထ ဂရုံ ကရောထ မာနေထ ပူဇေထာ”တိ. ဧဝံ အတ္တာနံ ဥစ္စံ ဌပေန္တော ပရံ နီစံ ဌပေန္တော ပဋိဗဒ္ဓစိတ္တော ဟောတိ.
ကုလေ ကုလေ အပ္ပဋိဗဒ္ဓစိတ္တော တိ သော ပစ္စေကသမ္ဗုဒ္ဓေါ ကုလပလိဗောဓေန အပ္ပဋိဗဒ္ဓစိတ္တော ဟောတိ, ဂဏပလိဗောဓေန အပ္ပဋိဗဒ္ဓစိတ္တော ဟောတိ, အာဝါသပလိဗောဓေန အပ္ပဋိဗဒ္ဓစိတ္တော ဟောတိ, စီဝရပလိဗောဓေန အပ္ပဋိဗဒ္ဓစိတ္တော ဟောတိ, ပိဏ္ဍပါတပလိဗောဓေန အပ္ပဋိဗဒ္ဓစိတ္တော ဟောတိ, သေနာသနပလိဗောဓေန အပ္ပဋိဗဒ္ဓစိတ္တော ဟောတိ, ဂိလာနပစ္စယဘေသဇ္ဇပရိက္ခာရပလိဗောဓေန အပ္ပဋိဗဒ္ဓစိတ္တော ဟောတီတိ— ကုလေ ကုလေ အပ္ပဋိဗဒ္ဓစိတ္တော ဟောတိ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ရသေသု ဂေဓံ အကရံ အလောလော,
အနညပေါသီ သပဒါနစာရီ;
ကုလေ ကုလေ အပ္ပဋိဗဒ္ဓစိတ္တော,
ဧကော စရေ ခဂ္ဂဝိသာဏကပ္ပေါ”တိ.
ပဟာယ ပဉ္စာဝရဏာနိ စေတသော,
ဥပက္ကိလေသေ ဗျပနုဇ္ဇ သဗ္ဗေ;
အနိဿိတော ဆေတွ သိနေဟဒေါသံ ,
ဧကော စရေ ခဂ္ဂဝိသာဏကပ္ပေါ. (2)
ပဟာယ ပဉ္စာဝရဏာနိ စေတသော တိ သော ပစ္စေကသမ္ဗုဒ္ဓေါ ကာမစ္ဆန္ဒနီဝရဏံ ပဟာယ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာ, ဗျာပါဒနီဝရဏံ… ထိနမိဒ္ဓနီဝရဏံ… ဥဒ္ဓစ္စကုက္ကုစ္စနီဝရဏံ… ဝိစိကိစ္ဆာနီဝရဏံ ပဟာယ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ သဝိတက္ကံ သဝိစာရံ ဝိဝေကဇံ ပီတိသုခံ ပဌမံ ဈာနံ ဥပသမ္ပဇ္ဇ ဝိဟရတီတိ— ပဟာယ ပဉ္စာဝရဏာနိ စေတသော.
ဥပက္ကိလေသေ ဗျပနုဇ္ဇ သဗ္ဗေ တိ ရာဂေါ စိတ္တဿ ဥပက္ကိလေသော, ဒေါသော စိတ္တဿ ဥပက္ကိလေသော, မောဟော စိတ္တဿ ဥပက္ကိလေသော, ကောဓော… ဥပနာဟော …ပေ… သဗ္ဗာကုသလာဘိသင်္ခါရာ စိတ္တဿ ဥပက္ကိလေသာ. ဥပက္ကိလေသေ ဗျပနုဇ္ဇ သဗ္ဗေ တိ သဗ္ဗေ စိတ္တဿ ဥပက္ကိလေသေ ဗျပနုဇ္ဇ ပနုဒိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— ဥပက္ကိလေသေ ဗျပနုဇ္ဇ သဗ္ဗေ.
အနိဿိတော ဆေတွ သိနေဟဒေါသန် တိ. အနိဿိတော တိ ဒွေ နိဿယာ— တဏှာနိဿယော စ ဒိဋ္ဌိနိဿယော စ …ပေ… အယံ တဏှာနိဿယော …ပေ… အယံ ဒိဋ္ဌိနိဿယော. သိနေဟော တိ ဒွေ သ္နေဟာ— တဏှာသ္နေဟော စ ဒိဋ္ဌိသ္နေဟော စ …ပေ… အယံ တဏှာသ္နေဟော …ပေ… အယံ ဒိဋ္ဌိသ္နေဟော. ဒေါသော တိ ယော စိတ္တဿ အာဃာတော ပဋိဃာတော ပဋိဃံ ပဋိဝိရောဓော ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓော ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ စဏ္ဍိက္ကံ အသုရောပေါ အနတ္တမနတာ စိတ္တဿ. အနိဿိတော ဆေတွ သိနေဟဒေါသန် တိ သော ပစ္စေကသမ္ဗုဒ္ဓေါ တဏှာသ္နေဟဉ္စ ဒိဋ္ဌိသ္နေဟဉ္စ ဒေါသဉ္စ ဆေတွာ ဥစ္ဆိန္ဒိတွာ သမုစ္ဆိန္ဒိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာ စက္ခုံ အနိဿိတော, သောတံ အနိဿိတော …ပေ… ဒိဋ္ဌသုတမုတဝိညာတဗ္ဗေ ဓမ္မေ အနိဿိတော အနလ္လီနော အနုပဂတော အနဇ္ဈောသိတော အနဓိမုတ္တော နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ— အနိဿိတော ဆေတွ သိနေဟဒေါသံ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ပဟာယ ပဉ္စာဝရဏာနိ စေတသော,
ဥပက္ကိလေသေ ဗျပနုဇ္ဇ သဗ္ဗေ;_
အနိဿိတော ဆေတွ သိနေဟဒေါသံ,
ဧကော စရေ ခဂ္ဂဝိသာဏကပ္ပေါ”တိ.
ဝိပိဋ္ဌိကတွာန သုခံ ဒုခဉ္စ,
ပုဗ္ဗေဝ စ သောမနဿဒေါမနဿံ;
လဒ္ဓါနုပေက္ခံ သမထံ ဝိသုဒ္ဓံ,
ဧကော စရေ ခဂ္ဂဝိသာဏကပ္ပေါ. (3)
ဝိပိဋ္ဌိကတွာန သုခံ ဒုခဉ္စ, ပုဗ္ဗေဝ စ သောမနဿဒေါမနဿန် တိ သော ပစ္စေကသမ္ဗုဒ္ဓေါ သုခဿ စ ပဟာနာ ဒုက္ခဿ စ ပဟာနာ ပုဗ္ဗေဝ သောမနဿဒေါမနဿာနံ အတ္ထင်္ဂမာ အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရတီတိ— ဝိပိဋ္ဌိကတွာန သုခံ ဒုခဉ္စ, ပုဗ္ဗေဝ စ သောမနဿဒေါမနဿံ.
လဒ္ဓါနုပေက္ခံ သမထံ ဝိသုဒ္ဓန် တိ. ဥပေက္ခာ တိ ယာ စတုတ္ထဇ္ဈာနေ ဥပေက္ခာ ဥပေက္ခနာ အဇ္ဈုပေက္ခနာ စိတ္တသမတာ စိတ္တပ္ပဿဒ္ဓတာ မဇ္ဈတ္တတာ စိတ္တဿ. သမထော တိ ယာ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒြိယံ သမာဓိဗလံ သမ္မာသမာဓိ; စတုတ္ထဇ္ဈာနေ ဥပေက္ခာ စ သမထော စ သုဒ္ဓါ ဟောန္တိ ဝိသုဒ္ဓါ ပရိယောဒါတာ အနင်္ဂဏာ ဝိဂတူပက္ကိလေသာ မုဒုဘူတာ ကမ္မနိယာ ဌိတာ အာနေဉ္ဇပ္ပတ္တာ. လဒ္ဓါနုပေက္ခံ သမထံ ဝိသုဒ္ဓန် တိ စတုတ္ထဇ္ဈာနံ ဥပေက္ခဉ္စ သမထဉ္စ လဒ္ဓါ လဘိတွာ ဝိန္ဒိတွာ ပဋိလဘိတွာတိ— လဒ္ဓါနုပေက္ခံ သမထံ ဝိသုဒ္ဓံ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ဝိပိဋ္ဌိကတွာန သုခံ ဒုခဉ္စ,
ပုဗ္ဗေဝ စ သောမနဿဒေါမနဿံ;
လဒ္ဓါနုပေက္ခံ သမထံ ဝိသုဒ္ဓံ,
ဧကော စရေ ခဂ္ဂဝိသာဏကပ္ပေါ”တိ.
အာရဒ္ဓဝိရိယော ပရမတ္ထပတ္တိယာ,
အလီနစိတ္တော အကုသီတဝုတ္တိ;
ဒဠှနိက္ကမော ထာမဗလူပပန္နော,
ဧကော စရေ ခဂ္ဂဝိသာဏကပ္ပေါ. (4)
အာရဒ္ဓဝိရိယော ပရမတ္ထပတ္တိယာ တိ ပရမတ္ထံ ဝုစ္စတိ အမတံ နိဗ္ဗာနံ. ယော သော သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓော နိဗ္ဗာနံ. ပရမတ္ထဿ ပတ္တိယာ လာဘာယ ပဋိလာဘာယ အဓိဂမာယ ဖဿနာယ သစ္ဆိကိရိယာယ အာရဒ္ဓဝီရိယော ဝိဟရတိ အကုသလာနံ ဓမ္မာနံ ပဟာနာယ ကုသလာနံ ဓမ္မာနံ သမ္ပဒါယ ထာမဝါ ဒဠှပရက္ကမော အနိက္ခိတ္တဓုရော ကုသလေသု ဓမ္မေသူတိ— အာရဒ္ဓဝိရိယော ပရမတ္ထပတ္တိယာ.
အလီနစိတ္တော အကုသီတဝုတ္တီ တိ သော ပစ္စေကသမ္ဗုဒ္ဓေါ အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ, ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ …ပေ… အနုပ္ပန္နာနံ ကုသလာနံ ဓမ္မာနံ ဥပ္ပါဒါယ …ပေ… ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတီတိ— ဧဝံ အလီနစိတ္တော အကုသီတဝုတ္တိ.
အထ ဝါ “ကာမံ တစော စ နှာရု စ အဋ္ဌိ စ အဝသိဿတု, သရီရေ ဥပဿုဿတု မံသလောဟိတံ, ယံ တံ ပုရိသထာမေန ပုရိသဗလေန ပုရိသဝီရိယေန ပုရိသပရက္ကမေန ပတ္တဗ္ဗံ န တံ အပါပုဏိတွာ ဝီရိယဿ သဏ္ဌာနံ ဘဝိဿတီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
နာသိဿံ န ပိဝိဿာမိ,
ဝိဟာရတော န နိက္ခမေ;
နပိ ပဿံ နိပါတေဿံ,
တဏှာသလ္လေ အနူဟတေတိ.
စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
“န တာဝါဟံ ဣမံ ပလ္လင်္ကံ ဘိန္ဒိဿာမိ ယာဝ မေ န အနုပါဒါယ အာသဝေဟိ စိတ္တံ ဝိမုစ္စိဿတီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
“န တာဝါဟံ ဣမမှာ အာသနာ ဝုဋ္ဌဟိဿာမိ ယာဝ မေ န အနုပါဒါယ အာသဝေဟိ စိတ္တံ ဝိမုစ္စိဿတီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
“န တာဝါဟံ ဣမမှာ စင်္ကမာ ဩရောဟိဿာမိ …ပေ… ဝိဟာရာ နိက္ခမိဿာမိ… အဍ္ဎယောဂါ နိက္ခမိဿာမိ… ပါသာဒါ နိက္ခမိဿာမိ… ဟမ္မိယာ နိက္ခမိဿာမိ… ဂုဟာယ နိက္ခမိဿာမိ… လေဏာ နိက္ခမိဿာမိ… ကုဋိယာ နိက္ခမိဿာမိ… ကူဋာဂါရာ နိက္ခမိဿာမိ… အဋ္ဋာ နိက္ခမိဿာမိ… မာဠာ နိက္ခမိဿာမိ… ဥဒ္ဒဏ္ဍာ နိက္ခမိဿာမိ… ဥပဋ္ဌာနသာလာယ နိက္ခမိဿာမိ… မဏ္ဍပါ နိက္ခမိဿာမိ… ရုက္ခမူလာ နိက္ခမိဿာမိ ယာဝ မေ န အနုပါဒါယ အာသဝေဟိ စိတ္တံ ဝိမုစ္စိဿတီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
“ဣမသ္မိံယေဝ ပုဗ္ဗဏှသမယေ အရိယဓမ္မံ အာဟရိဿာမိ သမာဟရိဿာမိ အဓိဂစ္ဆိဿာမိ ဖဿယိဿာမိ သစ္ဆိကရိဿာမီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ. “ဣမသ္မိံယေဝ မဇ္ဈနှိကသမယေ …ပေ… သာယနှသမယေ …ပေ… ပုရေဘတ္တံ… ပစ္ဆာဘတ္တံ… ပုရိမယာမံ… မဇ္ဈိမယာမံ… ပစ္ဆိမယာမံ… ကာဠေ… ဇုဏှေ… ဝဿေ… ဟေမန္တေ… ဂိမှေ… ပုရိမေ ဝယောခန္ဓေ… မဇ္ဈိမေ ဝယောခန္ဓေ… ပစ္ဆိမေ ဝယောခန္ဓေ အရိယဓမ္မံ အာဟရိဿာမိ သမာဟရိဿာမိ အဓိဂစ္ဆိဿာမိ ဖဿယိဿာမိ သစ္ဆိကရိဿာမီ”တိ စိတ္တံ ပဂ္ဂဏှာတိ ပဒဟတိ. ဧဝမ္ပိ အလီနစိတ္တော အကုသီတဝုတ္တိ.
ဒဠှနိက္ကမော ထာမဗလူပပန္နော တိ သော ပစ္စေကသမ္ဗုဒ္ဓေါ ဒဠှသမာဒါနော အဟောသိ ကုသလေသု ဓမ္မေသု အဝဋ္ဌိတသမာဒါနော ကာယသုစရိတေ ဝစီသုစရိတေ မနောသုစရိတေ ဒါနသံဝိဘာဂေ သီလသမာဒါနေ ဥပေါသထုပဝါသေ မတ္တေယျတာယ ပေတ္တေယျတာယ သာမညတာယ ဗြဟ္မညတာယ ကုလေဇေဋ္ဌာပစာယိတာယ အညတရညတရေသု အဓိကုသလေသု ဓမ္မေသူတိ— ဒဠှနိက္ကမော. ထာမဗလူပပန္နော တိ သော ပစ္စေကသမ္ဗုဒ္ဓေါ ထာမေန စ ဗလေန စ ဝီရိယေန စ ပရက္ကမေန စ ပညာယ စ ဥပေတော ဟောတိ သမုပေတော ဥပါဂတော သမုပါဂတော ဥပပန္နော သမုပပန္နော သမန္နာဂတောတိ— ဒဠှနိက္ကမော ထာမဗလူပပန္နော, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“အာရဒ္ဓဝိရိယော ပရမတ္ထပတ္တိယာ,
အလီနစိတ္တော အကုသီတဝုတ္တိ;
ဒဠှနိက္ကမော ထာမဗလူပပန္နော,
ဧကော စရေ ခဂ္ဂဝိသာဏကပ္ပေါ”တိ.
ပဋိသလ္လာနံ ဈာနမရိဉ္စမာနော,
ဓမ္မေသု နိစ္စံ အနုဓမ္မစာရီ;
အာဒီနဝံ သမ္မသိတာ ဘဝေသု,
ဧကော စရေ ခဂ္ဂဝိသာဏကပ္ပေါ. (5)
ပဋိသလ္လာနံ ဈာနမရိဉ္စမာနော တိ သော ပစ္စေကသမ္ဗုဒ္ဓေါ ပဋိသလ္လာနာရာမော ဟောတိ ပဋိသလ္လာနရတော အဇ္ဈတ္တံ စေတောသမထမနုယုတ္တော အနိရာကတဇ္ဈာနော ဝိပဿနာယ သမန္နာဂတော ဗြူဟေတာ သုညာဂါရံ ဈာယီ ဈာနရတော ဧကတ္တမနုယုတ္တော သဒတ္ထဂရုကောတိ ပဋိသလ္လာနံ. ဈာနမရိဉ္စမာနော တိ သော ပစ္စေကသမ္ဗုဒ္ဓေါ ဒွီဟိ ကာရဏေဟိ ဈာနံ န ရိဉ္စတိ— အနုပ္ပန္နဿ ဝါ ပဌမဿ ဈာနဿ ဥပ္ပါဒါယ ယုတ္တော ပယုတ္တော သံယုတ္တော အာယုတ္တော သမာယုတ္တော, အနုပ္ပန္နဿ ဝါ ဒုတိယဿ ဈာနဿ …ပေ… အနုပ္ပန္နဿ ဝါ တတိယဿ ဈာနဿ… အနုပ္ပန္နဿ ဝါ စတုတ္ထဿ ဈာနဿ ဥပ္ပါဒါယ ယုတ္တော ပယုတ္တော သံယုတ္တော အာယုတ္တော သမာယုတ္တောတိ— ဧဝမ္ပိ ဈာနံ န ရိဉ္စတိ.
အထ ဝါ ဥပ္ပန္နံ ဝါ ပဌမံ ဈာနံ အာသေဝတိ ဘာဝေတိ ဗဟုလီကရောတိ, ဥပ္ပန္နံ ဝါ ဒုတိယံ ဈာနံ …ပေ… ဥပ္ပန္နံ ဝါ တတိယံ ဈာနံ… ဥပ္ပန္နံ ဝါ စတုတ္ထံ ဈာနံ အာသေဝတိ ဘာဝေတိ ဗဟုလီကရောတိ. ဧဝမ္ပိ ဈာနံ န ရိဉ္စတီတိ— ပဋိသလ္လာနံ ဈာနမရိဉ္စမာနော.
ဓမ္မေသု နိစ္စံ အနုဓမ္မစာရီ တိ ဓမ္မာ ဝုစ္စန္တိ စတ္တာရော သတိပဋ္ဌာနာ …ပေ… အရိယော အဋ္ဌင်္ဂိကော မဂ္ဂေါ. ကတမေ အနုဓမ္မာ? သမ္မာပဋိပဒါ အပစ္စနီကပဋိပဒါ အနွတ္ထပဋိပဒါ ဓမ္မာနုဓမ္မပဋိပဒါ သီလေသု ပရိပူရကာရိတာ ဣန္ဒြိယေသု ဂုတ္တဒွါရတာ ဘောဇနေ မတ္တညုတာ ဇာဂရိယာနုယောဂေါ သတိသမ္ပဇညံ— ဣမေ ဝုစ္စန္တိ အနုဓမ္မာ. ဓမ္မေသု နိစ္စံ အနုဓမ္မစာရီ တိ ဓမ္မေသု နိစ္စကာလံ ဓုဝကာလံ သတတံ သမိတံ အဝေါကိဏ္ဏံ ပေါင်္ခါနုပေါင်္ခံ ဥဒကူမိကဇာတံ
အဝီစိသန္တတိသဟိတံ ဖဿိတံ ပုရေဘတ္တံ ပစ္ဆာဘတ္တံ ပုရိမယာမံ မဇ္ဈိမယာမံ ပစ္ဆိမယာမံ ကာဠေ ဇုဏှေ ဝဿေ ဟေမန္တေ ဂိမှေ ပုရိမေ ဝယောခန္ဓေ မဇ္ဈိမေ ဝယောခန္ဓေ ပစ္ဆိမေ ဝယောခန္ဓေ စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတီတိ— ဓမ္မေသု နိစ္စံ အနုဓမ္မစာရီ.
အာဒီနဝံ သမ္မသိတာ ဘဝေသူ တိ “သဗ္ဗေ သင်္ခါရာ အနိစ္စာ”တိ အာဒီနဝံ သမ္မသိတာ ဘဝေသု, “သဗ္ဗေ သင်္ခါရာ ဒုက္ခာ”တိ …ပေ… “သဗ္ဗေ ဓမ္မာ အနတ္တာ”တိ …ပေ… “ယံ ကိဉ္စိ သမုဒယဓမ္မံ, သဗ္ဗံ တံ နိရောဓဓမ္မန်”တိ အာဒီနဝံ သမ္မသိတာ ဘဝေသူတိ— အာဒီနဝံ သမ္မသိတာ ဘဝေသု, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ပဋိသလ္လာနံ ဈာနမရိဉ္စမာနော,
ဓမ္မေသု နိစ္စံ အနုဓမ္မစာရီ;
အာဒီနဝံ သမ္မသိတာ ဘဝေသု,
ဧကော စရေ ခဂ္ဂဝိသာဏကပ္ပေါ”တိ.
တဏှက္ခယံ ပတ္ထယမပ္ပမတ္တော,
အနေဠမူဂေါ သုတဝါ သတီမာ;
သင်္ခါတဓမ္မော နိယတော ပဓာနဝါ,
ဧကော စရေ ခဂ္ဂဝိသာဏကပ္ပေါ. (6)
တဏှက္ခယံ ပတ္ထယမပ္ပမတ္တော တိ. တဏှာ တိ ရူပတဏှာ …ပေ… ဓမ္မတဏှာ. တဏှက္ခယန် တိ ရာဂက္ခယံ ဒေါသက္ခယံ မောဟက္ခယံ ဂတိက္ခယံ ဥပပတ္တိက္ခယံ ပဋိသန္ဓိက္ခယံ ဘဝက္ခယံ သံသာရက္ခယံ ဝဋ္ဋက္ခယံ ပတ္ထယန္တော ဣစ္ဆန္တော သာဒိယန္တော ပိဟယန္တော အဘိဇပ္ပန္တောတိ— တဏှက္ခယံ ပတ္ထယံ. အပ္ပမတ္တော တိ သော ပစ္စေကသမ္ဗုဒ္ဓေါ သက္ကစ္စကာရီ သာတစ္စကာရီ …ပေ… အပ္ပမာဒေါ ကုသလေသု ဓမ္မေသူတိ— တဏှက္ခယံ ပတ္ထယမပ္ပမတ္တော.
အနေဠမူဂေါ သုတဝါ သတီမာ တိ. အနေဠမူဂေါ တိ သော ပစ္စေကသမ္ဗုဒ္ဓေါ ပဏ္ဍိတော ပညဝါ ဗုဒ္ဓိမာ ဉာဏီ ဝိဘာဝီ မေဓာဝီ. သုတဝါ တိ သော ပစ္စေကသမ္ဗုဒ္ဓေါ ဗဟုဿုတော ဟောတိ သုတဓရော သုတသန္နိစယော. ယေ တေ ဓမ္မာ အာဒိကလျာဏာ မဇ္ဈေကလျာဏာ ပရိယောသာနကလျာဏာ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ အဘိဝဒန္တိ, တထာရူပါဿ ဓမ္မာ ဗဟုဿုတာ ဟောန္တိ ဓာတာ ဝစသာ ပရိစိတာ မနသာနုပေက္ခိတာ ဒိဋ္ဌိယာ သုပ္ပဋိဝိဒ္ဓါ. သတီမာ တိ သော ပစ္စေကသမ္ဗုဒ္ဓေါ သတိမာ ဟောတိ ပရမေန သတိနေပက္ကေန သမန္နာဂတတ္တာ စိရကတမ္ပိ စိရဘာသိတမ္ပိ သရိတာ အနုဿရိတာတိ— အနေဠမူဂေါ သုတဝါ သတီမာ.
သင်္ခါတဓမ္မော နိယတော ပဓာနဝါ တိ သင်္ခါတဓမ္မော ဝုစ္စတိ ဉာဏံ. ယာ ပညာ ပဇာနနာ …ပေ… အမောဟော ဓမ္မဝိစယော သမ္မာဒိဋ္ဌိ. သင်္ခါတဓမ္မော တိ သော ပစ္စေကသမ္ဗုဒ္ဓေါ သင်္ခါတဓမ္မော ဉာတဓမ္မော တုလိတဓမ္မော တီရိတဓမ္မော ဝိဘူတဓမ္မော ဝိဘာဝိတဓမ္မော “သဗ္ဗေ သင်္ခါရာ အနိစ္စာ”တိ သင်္ခါတဓမ္မော …ပေ… “ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မန်”တိ သင်္ခါတဓမ္မော ဉာတဓမ္မော တုလိတဓမ္မော တီရိတဓမ္မော ဝိဘူတဓမ္မော ဝိဘာဝိတဓမ္မော. အထ ဝါ တဿ ပစ္စေကသမ္ဗုဒ္ဓဿ စ ခန္ဓာ သံခိတ္တာ ဓာတုယော သံခိတ္တာ အာယတနာနိ သံခိတ္တာနိ ဂတိယော သံခိတ္တာ ဥပပတ္တိယော သံခိတ္တာ ပဋိသန္ဓိယော သံခိတ္တာ ဘဝါ သံခိတ္တာ သံသာရာ သံခိတ္တာ ဝဋ္ဋာ သံခိတ္တာ. အထ ဝါ သော ပစ္စေကသမ္ဗုဒ္ဓေါ ခန္ဓပရိယန္တေ ဌိတော ဓာတုပရိယန္တေ ဌိတော အာယတနပရိယန္တေ ဌိတော ဂတိပရိယန္တေ ဌိတော ဥပပတ္တိပရိယန္တေ ဌိတော ပဋိသန္ဓိပရိယန္တေ ဌိတော ဘဝပရိယန္တေ ဌိတော သံသာရပရိယန္တေ ဌိတော ဝဋ္ဋပရိယန္တေ ဌိတော သင်္ခါရပရိယန္တေ ဌိတော အန္တိမဘဝေ ဌိတော အန္တိမသမုဿယေ ဌိတော အန္တိမဒေဟဓရော ပစ္စေကသမ္ဗုဒ္ဓေါ.
တဿာယံ ပစ္ဆိမကော ဘဝေါ,
စရိမောယံ သမုဿယော;
ဇာတိမရဏသံသာရော,
နတ္ထိ တဿ ပုနဗ္ဘဝေါတိ.
တံကာရဏာ ပစ္စေကသမ္ဗုဒ္ဓေါ သင်္ခါတဓမ္မော. နိယတော တိ နိယာမာ ဝုစ္စန္တိ စတ္တာရော အရိယမဂ္ဂါ. စတူဟိ အရိယမဂ္ဂေဟိ သမန္နာဂတောတိ နိယတော. နိယာမံ ပတ္တော သမ္ပတ္တော အဓိဂတော ဖဿိတော သစ္ဆိကတော ပတ္တော နိယာမံ. ပဓာနဝါ တိ ပဓာနံ ဝုစ္စတိ ဝီရိယံ. သော စေတသော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဓိတိ အသိထိလပရက္ကမော အနိက္ခိတ္တစ္ဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒြိယံ ဝီရိယဗလံ သမ္မာဝါယာမော. သော ပစ္စေကသမ္ဗုဒ္ဓေါ ဣမိနာ ပဓာနေန ဥပေတော သမုပေတော ဥပါဂတော သမုပါဂတော ဥပပန္နော သမုပပန္နော သမန္နာဂတော. တသ္မာ သော ပစ္စေကသမ္ဗုဒ္ဓေါ ပဓာနဝါတိ— သင်္ခါတဓမ္မော နိယတော ပဓာနဝါ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“တဏှက္ခယံ ပတ္ထယမပ္ပမတ္တော,
အနေဠမူဂေါ သုတဝါ သတီမာ;
သင်္ခါတဓမ္မော နိယတော ပဓာနဝါ,
ဧကော စရေ ခဂ္ဂဝိသာဏကပ္ပေါ”တိ.
သီဟောဝ သဒ္ဒေသု အသန္တသန္တော,
ဝါတောဝ ဇာလမှိ အသဇ္ဇမာနော;
ပဒုမံဝ တောယေန အလိမ္ပမာနော ,
ဧကော စရေ ခဂ္ဂဝိသာဏကပ္ပေါ. (7)
သီဟောဝ သဒ္ဒေသု အသန္တသန္တော တိ ယထာ သီဟော မိဂရာဇာ သဒ္ဒေသု အသန္တာသီ အပရိသန္တာသီ အနုတြာသီ အနုဗ္ဗိဂ္ဂေါ အနုဿင်္ကီ အနုတြာသော အဘီရူ အစ္ဆမ္ဘီ အနုတြာသီ အပလာယီ, ပစ္စေကသမ္ဗုဒ္ဓေါပိ သဒ္ဒေသု အသန္တာသီ အပရိသန္တာသီ အနုတြာသီ အနုဗ္ဗိဂ္ဂေါ အနုဿင်္ကီ အနုတြာသော အဘီရူ အစ္ဆမ္ဘီ အနုတြာသီ အပလာယီ ပဟီနဘယဘေရဝေါ ဝိဂတလောမဟံသော ဝိဟရတီတိ— သီဟောဝ သဒ္ဒေသု အသန္တသန္တော.
ဝါတောဝ ဇာလမှိ အသဇ္ဇမာနော တိ. ဝါတော တိ ပုရတ္ထိမာ ဝါတာ ပစ္ဆိမာ ဝါတာ ဥတ္တရာ ဝါတာ ဒက္ခိဏာ ဝါတာ သရဇာ ဝါတာ အရဇာ ဝါတာ သီတာ ဝါတာ ဥဏှာ ဝါတာ ပရိတ္တာ ဝါတာ အဓိမတ္တာ ဝါတာ ဝေရမ္ဘဝါတာ ပက္ခဝါတာ သုပဏ္ဏဝါတာ တာလပဏ္ဏဝါတာ ဝိဓူပနဝါတာ. ဇာလံ ဝုစ္စတိ သုတ္တဇာလံ. ယထာ ဝါတော ဇာလမှိ န သဇ္ဇတိ န ဂဏှာတိ န ဗဇ္ဈတိ န ပလိဗဇ္ဈတိ, ဧဝမေဝ ဒွေ ဇာလာ— တဏှာဇာလဉ္စ ဒိဋ္ဌိဇာလဉ္စ …ပေ… ဣဒံ တဏှာဇာလံ …ပေ… ဣဒံ ဒိဋ္ဌိဇာလံ. တဿ ပစ္စေကသမ္ဗုဒ္ဓဿ တဏှာဇာလံ ပဟီနံ ဒိဋ္ဌိဇာလံ ပဋိနိဿဋ္ဌံ, တဏှာဇာလဿ ပဟီနတ္တာ ဒိဋ္ဌိဇာလဿ ပဋိနိဿဋ္ဌတ္တာ သော ပစ္စေကသမ္ဗုဒ္ဓေါ ရူပေ န သဇ္ဇတိ သဒ္ဒေ န သဇ္ဇတိ …ပေ… ဒိဋ္ဌသုတမုတဝိညာတဗ္ဗေသု ဓမ္မေသု န သဇ္ဇတိ န ဂဏှာတိ န ဗဇ္ဈတိ န ပလိဗဇ္ဈတိ နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ— ဝါတောဝ ဇာလမှိ အသဇ္ဇမာနော.
ပဒုမံဝ တောယေန အလိမ္ပမာနော တိ ပဒုမံ ဝုစ္စတိ ပဒုမပုပ္ဖံ. တောယံ ဝုစ္စတိ ဥဒကံ. ယထာ ပဒုမပုပ္ဖံ တောယေန န လိမ္ပတိ န ပလိမ္ပတိ န ဥပလိမ္ပတိ, အလိတ္တံ အပလိတ္တံ အနုပလိတ္တံ, ဧဝမေဝ ဒွေ လေပါ— တဏှာလေပေါ စ ဒိဋ္ဌိလေပေါ စ …ပေ… အယံ တဏှာလေပေါ …ပေ… အယံ ဒိဋ္ဌိလေပေါ. တဿ ပစ္စေကသမ္ဗုဒ္ဓဿ တဏှာလေပေါ ပဟီနော, ဒိဋ္ဌိလေပေါ ပဋိနိဿဋ္ဌော. တဏှာလေပဿ ပဟီနတ္တာ ဒိဋ္ဌိလေပဿ ပဋိနိသဋ္ဌတ္တာ သော ပစ္စေကသမ္ဗုဒ္ဓေါ ရူပေ န လိမ္ပတိ သဒ္ဒေ န လိမ္ပတိ …ပေ… ဒိဋ္ဌသုတမုတဝိညာတဗ္ဗေသု ဓမ္မေသု န လိမ္ပတိ န ပလိမ္ပတိ န ဥပလိမ္ပတိ, အလိတ္တော အပလိတ္တော အနုပလိတ္တော နိက္ခန္တော နိဿဋော ဝိပ္ပမုတ္တော ဝိသညုတ္တော ဝိမရိယာဒိကတေန စေတသာ ဝိဟရတီတိ— ပဒုမံဝ တောယေန အလိမ္ပမာနော, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“သီဟောဝ သဒ္ဒေသု အသန္တသန္တော,
ဝါတောဝ ဇာလမှိ အသဇ္ဇမာနော;
ပဒုမံဝ တောယေန အလိမ္ပမာနော,
ဧကော စရေ ခဂ္ဂဝိသာဏကပ္ပေါ”တိ.
သီဟော ယထာ ဒါဌဗလီ ပသယှ,
ရာဇာ မိဂါနံ အဘိဘုယျ စာရီ;
သေဝေထ ပန္တာနိ သေနာသနာနိ,
ဧကော စရေ ခဂ္ဂဝိသာဏကပ္ပေါ. (8)
သီဟော ယထာ ဒါဌဗလီ ပသယှ, ရာဇာ မိဂါနံ အဘိဘုယျ စာရီ တိ ယထာ သီဟော မိဂရာဇာ ဒါဌဗလီ ဒါဌာဝုဓော သဗ္ဗေ တိရစ္ဆာနဂတေ ပါဏေ အဘိဘုယျ အဘိဘဝိတွာ အဇ္ဈောတ္ထရိတွာ ပရိယာဒိယိတွာ မဒ္ဒိတွာ စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတိ, ပစ္စေကသမ္ဗုဒ္ဓေါပိ ပညာဗလီ ပညာဝုဓော သဗ္ဗပါဏဘူတေ ပုဂ္ဂလေ ပညာယ အဘိဘုယျ အဘိဘဝိတွာ အဇ္ဈောတ္ထရိတွာ ပရိယာဒိယိတွာ မဒ္ဒိတွာ စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတီတိ— သီဟော ယထာ ဒါဌဗလီ ပသယှ, ရာဇာ မိဂါနံ အဘိဘုယျ စာရီ.
သေဝေထ ပန္တာနိ သေနာသနာနီ တိ ယထာ သီဟော မိဂရာဇာ အရညဝနမဇ္ဈောဂါဟေတွာ စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတိ, ပစ္စေကသမ္ဗုဒ္ဓေါပိ အရညဝနပတ္ထာနိ ပန္တာနိ သေနာသနာနိ ပဋိသေဝတိ အပ္ပသဒ္ဒါနိ အပ္ပနိဂ္ဃေါသာနိ ဝိဇနဝါတာနိ မနုဿရာဟဿေယျကာနိ ပဋိသလ္လာနသာရုပ္ပါနိ. သော ဧကော ဂစ္ဆတိ ဧကော တိဋ္ဌတိ ဧကော နိသီဒတိ ဧကော သေယျံ ကပ္ပေတိ ဧကော ဂါမံ ပိဏ္ဍာယ ပဝိသတိ ဧကော ပဋိက္ကမတိ ဧကော ရဟော နိသီဒတိ ဧကော စင်္ကမံ အဓိဋ္ဌာတိ ဧကော စရတိ ဝိဟရတိ ဣရိယတိ ဝတ္တေတိ ပါလေတိ ယပေတိ ယာပေတီတိ— သေဝေထ ပန္တာနိ သေနာသနာနိ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“သီဟော ယထာ ဒါဌဗလီ ပသယှ,
ရာဇာ မိဂါနံ အဘိဘုယျ စာရီ;
သေဝေထ ပန္တာနိ သေနာသနာနိ,
ဧကော စရေ ခဂ္ဂဝိသာဏကပ္ပေါ”တိ.
မေတ္တံ ဥပေက္ခံ ကရုဏံ ဝိမုတ္တိံ,
အာသေဝမာနော မုဒိတဉ္စ ကာလေ;
သဗ္ဗေန လောကေန အဝိရုဇ္ဈမာနော,
ဧကော စရေ ခဂ္ဂဝိသာဏကပ္ပေါ. (9)
မေတ္တံ ဥပေက္ခံ ကရုဏံ ဝိမုတ္တိံ, အာသေဝမာနော မုဒိတဉ္စ ကာလေ တိ သော ပစ္စေကသမ္ဗုဒ္ဓေါ မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ… တထာ တတိယံ… တထာ စတုတ္ထံ… ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ; ကရုဏာသဟဂတေန စေတသာ …ပေ… မုဒိတာသဟဂတေန စေတသာ …ပေ… ဥပေက္ခာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတီတိ— မေတ္တံ ဥပေက္ခံ ကရုဏံ ဝိမုတ္တိံ, အာသေဝမာနော မုဒိတဉ္စ ကာလေ.
သဗ္ဗေန လောကေန အဝိရုဇ္ဈမာနော တိ မေတ္တာယ ဘာဝိတတ္တာ ယေ ပုရတ္ထိမာယ ဒိသာယ သတ္တာ တေ အပ္ပဋိကူလာ ဟောန္တိ, ယေ ပစ္ဆိမာယ ဒိသာယ သတ္တာ …ပေ… ယေ ဥတ္တရာယ ဒိသာယ သတ္တာ… ယေ ဒက္ခိဏာယ ဒိသာယ သတ္တာ… ယေ ပုရတ္ထိမာယ အနုဒိသာယ သတ္တာ… ယေ ပစ္ဆိမာယ အနုဒိသာယ သတ္တာ… ယေ ဥတ္တရာယ အနုဒိသာယ သတ္တာ… ယေ ဒက္ခိဏာယ အနုဒိသာယ သတ္တာ… ယေ ဟေဋ္ဌိမာယ ဒိသာယ သတ္တာ… ယေ ဥပရိမာယ ဒိသာယ သတ္တာ… ယေ ဒသသု ဒိသာသု သတ္တာ တေ အပ္ပဋိကူလာ ဟောန္တိ. ကရုဏာယ ဘာဝိတတ္တာ… မုဒိတာယ ဘာဝိတတ္တာ… ဥပေက္ခာယ ဘာဝိတတ္တာ ယေ ပုရတ္ထိမာယ ဒိသာယ သတ္တာ …ပေ… ယေ ဒသသု ဒိသာသု သတ္တာ တေ အပ္ပဋိကူလာ ဟောန္တိ. သဗ္ဗေန လောကေန အဝိရုဇ္ဈမာနော တိ သဗ္ဗေန လောကေန အဝိရုဇ္ဈမာနော, အပ္ပဋိဝိရုဇ္ဈမာနော အနာဃာတိယမာနော အပ္ပဋိဟညမာနောတိ— သဗ္ဗေန လောကေန အဝိရုဇ္ဈမာနော, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“မေတ္တံ ဥပေက္ခံ ကရုဏံ ဝိမုတ္တိံ,
အာသေဝမာနော မုဒိတဉ္စ ကာလေ;
သဗ္ဗေန လောကေန အဝိရုဇ္ဈမာနော,
ဧကော စရေ ခဂ္ဂဝိသာဏကပ္ပေါ”တိ.
ရာဂဉ္စ ဒေါသဉ္စ ပဟာယ မောဟံ,
သန္ဒာလယိတွာန သံယောဇနာနိ;
အသန္တသံ ဇီဝိတသင်္ခယမှိ,
ဧကော စရေ ခဂ္ဂဝိသာဏကပ္ပေါ. (10)
ရာဂဉ္စ ဒေါသဉ္စ ပဟာယ မောဟန် တိ. ရာဂေါ တိ ယော ရာဂေါ သာရာဂေါ …ပေ… အဘိဇ္ဈာ လောဘော အကုသလမူလံ. ဒေါသော တိ ယော စိတ္တဿ အာဃာတော …ပေ… စဏ္ဍိက္ကံ အသုရောပေါ အနတ္တမနတာ စိတ္တဿ. မောဟော တိ ဒုက္ခေ အညာဏံ …ပေ… အဝိဇ္ဇာလင်္ဂီ မောဟော အကုသလမူလံ. ရာဂဉ္စ ဒေါသဉ္စ ပဟာယ မောဟန် တိ သော ပစ္စေကသမ္ဗုဒ္ဓေါ ရာဂဉ္စ ဒေါသဉ္စ မောဟဉ္စ ပဟာယ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— ရာဂဉ္စ ဒေါသဉ္စ ပဟာယ မောဟံ.
သန္ဒာလယိတွာန သံယောဇနာနီ တိ. ဒသ သံယောဇနာနိ— ကာမရာဂသံယောဇနံ ပဋိဃသံယောဇနံ …ပေ… အဝိဇ္ဇာသံယောဇနံ. သန္ဒာလယိတွာန သံယောဇနာနီ တိ ဒသ သံယောဇနာနိ သန္ဒာလယိတွာ ပဒါလယိတွာ သမ္ပဒါလယိတွာ ပဇဟိတွာ ဝိနောဒေတွာ ဗျန္တီကရိတွာ အနဘာဝံ ဂမေတွာတိ— သန္ဒာလယိတွာန သံယောဇနာနိ.
အသန္တသံ ဇီဝိတသင်္ခယမှီ တိ သော ပစ္စေကသမ္ဗုဒ္ဓေါ ဇီဝိတပရိယောသာနေ အသန္တာသီ အနုတြာသီ အနုဗ္ဗိဂ္ဂေါ အနုဿင်္ကီ အနုတြာသော အဘီရူ အစ္ဆမ္ဘီ အနုတြာသီ အပလာယီ ပဟီနဘယဘေရဝေါ ဝိဂတလောမဟံသော ဝိဟရတီတိ— အသန္တသံ ဇီဝိတသင်္ခယမှိ, ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ရာဂဉ္စ ဒေါသဉ္စ ပဟာယ မောဟံ,
သန္ဒာလယိတွာန သံယောဇနာနိ;
အသန္တသံ ဇီဝိတသင်္ခယမှိ,
ဧကော စရေ ခဂ္ဂဝိသာဏကပ္ပေါ”တိ.
ဘဇန္တိ သေဝန္တိ စ ကာရဏတ္ထာ,
နိက္ကာရဏာ ဒုလ္လဘာ အဇ္ဇ မိတ္တာ;
အတ္တတ္ထပညာ အသုစီ မနုဿာ,
ဧကော စရေ ခဂ္ဂဝိသာဏကပ္ပေါ. (11)
ဘဇန္တိ သေဝန္တိ စ ကာရဏတ္ထာ တိ အတ္တတ္ထကာရဏာ ပရတ္ထကာရဏာ ဥဘယတ္ထကာရဏာ ဒိဋ္ဌဓမ္မိကတ္ထကာရဏာ သမ္ပရာယိကတ္ထကာရဏာ ပရမတ္ထကာရဏာ ဘဇန္တိ သမ္ဘဇန္တိ သေဝန္တိ နိသေဝန္တိ သံသေဝန္တိ ပဋိသေဝန္တီတိ— ဘဇန္တိ သေဝန္တိ စ ကာရဏတ္ထာ.
နိက္ကာရဏာ ဒုလ္လဘာ အဇ္ဇ မိတ္တာ တိ ဒွေ မိတ္တာ— အဂါရိကမိတ္တော စ အနာဂါရိကမိတ္တော စ …ပေ… အယံ အဂါရိကမိတ္တော …ပေ… အယံ အနာဂါရိကမိတ္တော. နိက္ကာရဏာ ဒုလ္လဘာ အဇ္ဇ မိတ္တာ တိ ဣမေ ဒွေ မိတ္တာ အကာရဏာ နိက္ကာရဏာ အဟေတူ အပ္ပစ္စယာ ဒုလ္လဘာ ဒုလ္လဒ္ဓါ သုဒုလ္လဒ္ဓါ တိ— နိက္ကာရဏာ ဒုလ္လဘာ အဇ္ဇ မိတ္တာ.
အတ္တတ္ထပညာ အသုစီ မနုဿာ တိ. အတ္တတ္ထပညာ တိ အတ္တနော အတ္ထာယ အတ္တနော ဟေတု အတ္တနော ပစ္စယာ အတ္တနော ကာရဏာ ဘဇန္တိ သမ္ဘဇန္တိ သေဝန္တိ နိသေဝန္တိ သံသေဝန္တိ ပဋိသေဝန္တိ အာစရန္တိ သမာစရန္တိ ပယိရုပါသန္တိ ပရိပုစ္ဆန္တိ ပရိပဉှန္တီတိ— အတ္တတ္ထပညာ. အသုစီ မနုဿာ တိ အသုစိနာ ကာယကမ္မေန သမန္နာဂတာတိ အသုစီ မနုဿာ, အသုစိနာ ဝစီကမ္မေန သမန္နာဂတာတိ အသုစီ မနုဿာ, အသုစိနာ မနောကမ္မေန သမန္နာဂတာတိ အသုစီ မနုဿာ, အသုစိနာ ပါဏာတိပါတေန …ပေ… အသုစိနာ အဒိန္နာဒါနေန… အသုစိနာ ကာမေသုမိစ္ဆာစာရေန… အသုစိနာ မုသာဝါဒေန… အသုစိယာ ပိသုဏာယ ဝါစာယ သမန္နာဂတာ… အသုစိယာ ဖရုသာယ ဝါစာယ သမန္နာဂတာ… အသုစိနာ သမ္ဖပ္ပလာပေန သမန္နာဂတာ… အသုစိယာ အဘိဇ္ဈာယ သမန္နာဂတာ… အသုစိနာ ဗျာပါဒေန သမန္နာဂတာတိ အသုစီ မနုဿာ, အသုစိယာ မိစ္ဆာဒိဋ္ဌိယာ သမန္နာဂတာတိ အသုစီ မနုဿာ, အသုစိယာ စေတနာယ သမန္နာဂတာတိ အသုစီ မနုဿာ, အသုစိယာ ပတ္ထနာယ သမန္နာဂတာတိ အသုစီ မနုဿာ, အသုစိနာ ပဏိဓိနာ သမန္နာဂတာတိ အသုစီ မနုဿာ, အသုစီ ဟီနာ နိဟီနာ ဩမကာ လာမကာ ဆတုက္ကာ ပရိတ္တာတိ— အတ္တတ္ထပညာ အသုစီ မနုဿာ.
ဧကော စရေ ခဂ္ဂဝိသာဏကပ္ပေါ တိ. ဧကော တိ သော ပစ္စေကသမ္ဗုဒ္ဓေါ ပဗ္ဗဇ္ဇာသင်္ခါတေန ဧကော …ပေ… စရေ တိ အဋ္ဌ စရိယာယော …ပေ… ခဂ္ဂဝိသာဏကပ္ပေါ တိ ယထာ ခဂ္ဂဿ နာမ ဝိသာဏံ ဧကံ ဟောတိ အဒုတိယံ …ပေ… ဧကော စရေ ခဂ္ဂဝိသာဏကပ္ပေါ. တေနာဟ သော ပစ္စေကသမ္ဗုဒ္ဓေါ—
“ဘဇန္တိ သေဝန္တိ စ ကာရဏတ္ထာ,
နိက္ကာရဏာ ဒုလ္လဘာ အဇ္ဇ မိတ္တာ;
အတ္တတ္ထပညာ အသုစီ မနုဿာ,
ဧကော စရေ ခဂ္ဂဝိသာဏကပ္ပေါ”တိ.
စတုတ္ထော ဝဂ္ဂေါ.
ခဂ္ဂဝိသာဏသုတ္တနိဒ္ဒေသော ဧကူနဝီသတိမော.
အဇိတော တိဿမေတ္တေယျော,
ပုဏ္ဏကော အထ မေတ္တဂူ;
ဓောတကော ဥပသီဝေါ စ,
နန္ဒော စ အထ ဟေမကော.
တောဒေယျကပ္ပါ ဒုဘယော,
ဇတုကဏ္ဏီ စ ပဏ္ဍိတော;
ဘဒြာဝုဓော ဥဒယော စ,
ပေါသာလော စာပိ ဗြာဟ္မဏော;
မောဃရာဇာ စ မေဓာဝီ,
ပိင်္ဂိယော စ မဟာဣသိ.
သောဠသာနံ ပနေတေသံ,
ဗြာဟ္မဏာနံဝ သာသနံ;
ပါရာယနာနံ နိဒ္ဒေသာ,
တတ္တကာ စ ဘဝန္တိ ဟိ.
ခဂ္ဂဝိသာဏသုတ္တာနံ,
နိဒ္ဒေသာပိ တထေဝ စ;
နိဒ္ဒေသာ ဒုဝိဓာ ဉေယျာ,
ပရိပုဏ္ဏာ သုလက္ခိတာတိ.
စူဠနိဒ္ဒေသပါဠိ နိဋ္ဌိတာ.