26.40 ဒေဝဟိတဗြာဟ္မဏဝတ္ထု
ပုဗ္ဗေနိဝါသံ ယော ဝေဒိ,
သဂ္ဂါပါယဉ္စ ပဿတိ;
အထော ဇာတိက္ခယံ ပတ္တော,
အဘိညာဝေါသိတော မုနိ;
သဗ္ဗဝေါသိတဝေါသာနံ,
တမဟံ ဗြူမိ ဗြာဟ္မဏံ.
ဗြာဟ္မဏဝဂ္ဂေါ ဆဗ္ဗီသတိမော.
ဧတ္တာဝတာ သဗ္ဗပဌမေ ယမကဝဂ္ဂေ စုဒ္ဒသ ဝတ္ထူနိ, အပ္ပမာဒဝဂ္ဂေ နဝ, စိတ္တဝဂ္ဂေ နဝ, ပုပ္ဖဝဂ္ဂေ ဒွါဒသ, ဗာလဝဂ္ဂေ ပန္နရသ, ပဏ္ဍိတဝဂ္ဂေ ဧကာဒသ, အရဟန္တဝဂ္ဂေ ဒသ, သဟဿဝဂ္ဂေ စုဒ္ဒသ, ပါပဝဂ္ဂေ ဒွါဒသ, ဒဏ္ဍဝဂ္ဂေ ဧကာဒသ, ဇရာဝဂ္ဂေ နဝ, အတ္တဝဂ္ဂေ ဒသ, လောကဝဂ္ဂေ ဧကာဒသ, ဗုဒ္ဓဝဂ္ဂေ နဝ, သုခဝဂ္ဂေ အဋ္ဌ, ပိယဝဂ္ဂေ နဝ, ကောဓဝဂ္ဂေ အဋ္ဌ, မလဝဂ္ဂေ ဒွါဒသ, ဓမ္မဋ္ဌဝဂ္ဂေ ဒသ, မဂ္ဂဝဂ္ဂေ ဒွါဒသ, ပကိဏ္ဏကဝဂ္ဂေ နဝ, နိရယဝဂ္ဂေ နဝ, နာဂဝဂ္ဂေ အဋ္ဌ, တဏှာဝဂ္ဂေ ဒွါဒသ, ဘိက္ခုဝဂ္ဂေ ဒွါဒသ, ဗြာဟ္မဏဝဂ္ဂေ စတ္တာလီသာတိ ပဉ္စာဓိကာနိ တီဏိ ဝတ္ထုသတာနိ.
သတေဝီသစတုဿတာ,
စတုသစ္စဝိဘာဝိနာ;
သတတ္တယဉ္စ ဝတ္ထူနံ,
ပဉ္စာဓိကံ သမုဋ္ဌိတာတိ.
ဓမ္မပဒေ ဝဂ္ဂါနမုဒ္ဒါနံ
ယမကပ္ပမာဒေါ စိတ္တံ,
ပုပ္ဖံ ဗာလေန ပဏ္ဍိတော;
အရဟန္တော သဟဿဉ္စ,
ပါပံ ဒဏ္ဍေန တေ ဒသ.
ဇရာ အတ္တာ စ လောကော စ,
ဗုဒ္ဓေါ သုခံ ပိယေန စ;
ကောဓော မလဉ္စ ဓမ္မဋ္ဌော,
မဂ္ဂဝဂ္ဂေန ဝီသတိ.
ပကိဏ္ဏံ နိရယော နာဂေါ,
တဏှာ ဘိက္ခု စ ဗြာဟ္မဏော;
ဧတေ ဆဗ္ဗီသတိ ဝဂ္ဂါ,
ဒေသိတာဒိစ္စဗန္ဓုနာ.
ဂါထာနမုဒ္ဒါနံ
ယမကေ ဝီသတိ ဂါထာ,
အပ္ပမာဒမှိ ဒွါဒသ;
ဧကာဒသ စိတ္တဝဂ္ဂေ,
ပုပ္ဖဝဂ္ဂမှိ သောဠသ.
ဗာလေ စ သောဠသ ဂါထာ,
ပဏ္ဍိတမှိ စတုဒ္ဒသ;
အရဟန္တေ ဒသ ဂါထာ,
သဟဿေ ဟောန္တိ သောဠသ.
တေရသ ပါပဝဂ္ဂမှိ,
ဒဏ္ဍမှိ ဒသ သတ္တ စ;
ဧကာဒသ ဇရာ ဝဂ္ဂေ,
အတ္တဝဂ္ဂမှိ တာ ဒသ.
ဒွါဒသ လောကဝဂ္ဂမှိ,
ဗုဒ္ဓဝဂ္ဂမှိ ဌာရသ;
သုခေ စ ပိယဝဂ္ဂေ စ,
ဂါထာယော ဟောန္တိ ဒွါဒသ.
စုဒ္ဒသ ကောဓဝဂ္ဂမှိ,
မလဝဂ္ဂေကဝီသတိ;
သတ္တရသ စ ဓမ္မဋ္ဌေ,
မဂ္ဂဝဂ္ဂေ သတ္တရသ.
ပကိဏ္ဏေ သောဠသ ဂါထာ,
နိရယေ နာဂေ စ စုဒ္ဒသ;
ဆဗ္ဗီသ တဏှာဝဂ္ဂမှိ,
တေဝီသ ဘိက္ခုဝဂ္ဂိကာ.
ဧကတာလီသဂါထာယော,
ဗြာဟ္မဏေ ဝဂ္ဂမုတ္တမေ;
ဂါထာသတာနိ စတ္တာရိ,
တေဝီသ စ ပုနာပရေ;
ဓမ္မပဒေ နိပါတမှိ,
ဒေသိတာဒိစ္စဗန္ဓုနာတိ.
ဓမ္မပဒပါဠိ သမတ္တာ.