1.3.1 ပသန္နစိတ္တသုတ္တ
Review
21.
113
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
114
“ဣဓာဟံ, ဘိက္ခဝေ, ဧကစ္စံ ပုဂ္ဂလံ ပသန္နစိတ္တံ ဧဝံ စေတသာ စေတော ပရိစ္စ ပဇာနာမိ— ‘ဣမမှိ စာယံ သမယေ ပုဂ္ဂလော ကာလံ ကရေယျ ယထာဘတံ နိက္ခိတ္တော ဧဝံ သဂ္ဂေ’. တံ ကိဿ ဟေတု? စိတ္တံ ဟိဿ, ဘိက္ခဝေ, ပသန္နံ. စေတောပသာဒဟေတု ခေါ ပန, ဘိက္ခဝေ, ဧဝမိဓေကစ္စေ သတ္တာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တီ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
115
“ပသန္နစိတ္တံ ဉတွာန,
ဧကစ္စံ ဣဓ ပုဂ္ဂလံ;
ဧတမတ္ထဉ္စ ဗျာကာသိ,
ဗုဒ္ဓေါ ဘိက္ခူန သန္တိကေ.
116
ဣမမှိ စာယံ သမယေ,_
ကာလံ ကယိရာထ ပုဂ္ဂလော;
သုဂတိံ ဥပပဇ္ဇေယျ,
စိတ္တံ ဟိဿ ပသာဒိတံ.
117
ယထာ ဟရိတွာ နိက္ခိပေယျ,
ဧဝမေဝံ တထာဝိဓော;
စေတောပသာဒဟေတု ဟိ,
သတ္တာ ဂစ္ဆန္တိ သုဂ္ဂတိန်”တိ.
118
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
119
ပဌမံ.