1.3.4 အဋ္ဌိပုဉ္ဇသုတ္တ
Review
24.
134
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
135
“ဧကပုဂ္ဂလဿ, ဘိက္ခဝေ, ကပ္ပံ သန္ဓာဝတော သံသရတော သိယာ ဧဝံ မဟာ အဋ္ဌိကင်္ကလော အဋ္ဌိပုဉ္ဇော အဋ္ဌိရာသိ ယထာယံ ဝေပုလ္လော ပဗ္ဗတော, သစေ သံဟာရကော အဿ, သမ္ဘတဉ္စ န ဝိနဿေယျာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
136
“ဧကဿေကေန ကပ္ပေန,
ပုဂ္ဂလဿဋ္ဌိသဉ္စယော;
သိယာ ပဗ္ဗတသမော ရာသိ,
ဣတိ ဝုတ္တံ မဟေသိနာ._
137
သော ခေါ ပနာယံ အက္ခာတော,
ဝေပုလ္လော ပဗ္ဗတော မဟာ;
ဥတ္တရော ဂိဇ္ဈကူဋဿ,_
မဂဓာနံ ဂိရိဗ္ဗဇေ.
138
ယတော စ အရိယသစ္စာနိ,
သမ္မပ္ပညာယ ပဿတိ;
ဒုက္ခံ ဒုက္ခသမုပ္ပါဒံ,
ဒုက္ခဿ စ အတိက္ကမံ;
အရိယဉ္စဋ္ဌင်္ဂိကံ မဂ္ဂံ,
ဒုက္ခူပသမဂါမိနံ.
139
သ သတ္တက္ခတ္တုံ ပရမံ,
သန္ဓာဝိတွာန ပုဂ္ဂလော;
ဒုက္ခဿန္တကရော ဟောတိ,
သဗ္ဗသံယောဇနက္ခယာ”တိ.
140
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
141
စတုတ္ထံ.