1.3.7 မေတ္တာဘာဝနာသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“ယာနိ ကာနိစိ, ဘိက္ခဝေ, ဩပဓိကာနိ ပုညကိရိယဝတ္ထူနိ သဗ္ဗာနိ တာနိ မေတ္တာယ စေတောဝိမုတ္တိယာ ကလံ နာဂ္ဃန္တိ သောဠသိံ. မေတ္တာယေဝ တာနိ စေတောဝိမုတ္တိ အဓိဂ္ဂဟေတွာ ဘာသတေ စ တပတေ စ ဝိရောစတိ စ.
သေယျထာပိ, ဘိက္ခဝေ, ယာ ကာစိ တာရကရူပါနံ ပဘာ သဗ္ဗာ တာ စန္ဒိယာ ပဘာယ ကလံ နာဂ္ဃန္တိ သောဠသိံ, စန္ဒပဘာယေဝ တာ အဓိဂ္ဂဟေတွာ ဘာသတေ စ တပတေ စ ဝိရောစတိ စ; ဧဝမေဝံ ခေါ, ဘိက္ခဝေ, ယာနိ ကာနိစိ ဩပဓိကာနိ ပုညကိရိယဝတ္ထူနိ သဗ္ဗာနိ တာနိ မေတ္တာယ စေတောဝိမုတ္တိယာ ကလံ နာဂ္ဃန္တိ သောဠသိံ, မေတ္တာယေဝ တာနိ စေတောဝိမုတ္တိ အဓိဂ္ဂဟေတွာ ဘာသတေ စ တပတေ စ ဝိရောစတိ စ.
သေယျထာပိ, ဘိက္ခဝေ, ဝဿာနံ ပစ္ဆိမေ မာသေ သရဒသမယေ ဝိဒ္ဓေ ဝိဂတဝလာဟကေ ဒေဝေ အာဒိစ္စော နဘံ အဗ္ဘုဿက္ကမာနော သဗ္ဗံ အာကာသဂတံ တမဂတံ အဘိဝိဟစ္စ ဘာသတေ စ တပတေ စ ဝိရောစတိ စ; ဧဝမေဝံ ခေါ, ဘိက္ခဝေ, ယာနိ ကာနိစိ ဩပဓိကာနိ ပုညကိရိယဝတ္ထူနိ သဗ္ဗာနိ တာနိ မေတ္တာယ စေတောဝိမုတ္တိယာ ကလံ နာဂ္ဃန္တိ သောဠသိံ, မေတ္တာယေဝ တာနိ စေတောဝိမုတ္တိ အဓိဂ္ဂဟေတွာ ဘာသတေ စ တပတေ စ ဝိရောစတိ စ.
သေယျထာပိ, ဘိက္ခဝေ, ရတ္တိယာ ပစ္စူသသမယံ ဩသဓိတာရကာ ဘာသတေ စ တပတေ စ ဝိရောစတိ စ; ဧဝမေဝံ ခေါ, ဘိက္ခဝေ, ယာနိ ကာနိစိ ဩပဓိကာနိ ပုညကိရိယဝတ္ထူနိ သဗ္ဗာနိ တာနိ မေတ္တာယ စေတောဝိမုတ္တိယာ ကလံ နာဂ္ဃန္တိ သောဠသိံ, မေတ္တာယေဝ တာနိ စေတောဝိမုတ္တိ အဓိဂ္ဂဟေတွာ ဘာသတေ စ တပတေ စ ဝိရောစတိ စာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“ယော စ မေတ္တံ ဘာဝယတိ,
အပ္ပမာဏံ ပဋိဿတော;
တနူ သံယောဇနာ ဟောန္တိ,
ပဿတော ဥပဓိက္ခယံ.
ဧကမ္ပိ စေ ပါဏမဒုဋ္ဌစိတ္တော,
မေတ္တာယတိ ကုသလော တေန ဟောတိ;
သဗ္ဗေ စ ပါဏေ မနသာနုကမ္ပံ,
ပဟူတမရိယော ပကရောတိ ပုညံ.
ယေ သတ္တသဏ္ဍံ ပထဝိံ ဝိဇိတွာ,
ရာဇိသယော ယဇမာနာနုပရိယဂါ;
အဿမေဓံ ပုရိသမေဓံ,
သမ္မာပါသံ ဝါဇပေယျံ နိရဂ္ဂဠံ.
မေတ္တဿ စိတ္တဿ သုဘာဝိတဿ,
ကလမ္ပိ တေ နာနုဘဝန္တိ သောဠသိံ;
စန္ဒပ္ပဘာ တာရဂဏာဝ သဗ္ဗေ.
ယော န ဟန္တိ န ဃာတေတိ,
န ဇိနာတိ န ဇာပယေ;
မေတ္တံသော သဗ္ဗဘူတေသု,
ဝေရံ တဿ န ကေနစီ”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
သတ္တမံ.
တတိယော ဝဂ္ဂေါ.
တဿုဒ္ဒါနံ
စိတ္တံ မေတ္တံ ဥဘော အတ္ထေ,
ပုဉ္ဇံ ဝေပုလ္လပဗ္ဗတံ;
သမ္ပဇာနမုသာဝါဒေါ,
ဒါနဉ္စ မေတ္တဘာဝနာ.
သတ္တိမာနိ စ သုတ္တာနိ,
ပုရိမာနိ စ ဝီသတိ;
ဧကဓမ္မေသု သုတ္တန္တာ,
သတ္တဝီသတိသင်္ဂဟာတိ.
ဧကကနိပါတော နိဋ္ဌိတော.