2.1.1 ဒုက္ခဝိဟာရသုတ္တ
Review
28.
172
( ) ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
173
“ဒွီဟိ, ဘိက္ခဝေ, ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ ဒုက္ခံ ဝိဟရတိ သဝိဃာတံ သော်ပါယာသံ သပရိဠာဟံ; ကာယဿ ဘေဒါ ပရံ မရဏာ ဒုဂ္ဂတိ ပါဋိကင်္ခါ. ကတမေဟိ ဒွီဟိ? ဣန္ဒြိယေသု အဂုတ္တဒွါရတာယ စ, ဘောဇနေ အမတ္တညုတာယ စ. ဣမေဟိ ခေါ, ဘိက္ခဝေ, ဒွီဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ ဒုက္ခံ ဝိဟရတိ သဝိဃာတံ သော်ပါယာသံ သပရိဠာဟံ; ကာယဿ ဘေဒါ ပရံ မရဏာ ဒုဂ္ဂတိ ပါဋိကင်္ခါ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
174
“စက္ခု သောတဉ္စ ဃာနဉ္စ,
ဇိဝှါ ကာယော တထာ မနော;
ဧတာနိ ယဿ ဒွါရာနိ,
အဂုတ္တာနိ စ ဘိက္ခုနော.
175
ဘောဇနမှိ အမတ္တညူ,
ဣန္ဒြိယေသု အသံဝုတော;_
ကာယဒုက္ခံ စေတောဒုက္ခံ,
ဒုက္ခံ သော အဓိဂစ္ဆတိ.
176
ဍယှမာနေန ကာယေန,
ဍယှမာနေန စေတသာ;
ဒိဝါ ဝါ ယဒိ ဝါ ရတ္တိံ,
ဒုက္ခံ ဝိဟရတိ တာဒိသော”တိ.
177
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
178
ပဌမံ.