2.1.10 သောမနဿသုတ္တ
Review
37.
226
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
227
“ဒွီဟိ, ဘိက္ခဝေ, ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခသောမနဿဗဟုလော ဝိဟရတိ, ယောနိ စဿ အာရဒ္ဓါ ဟောတိ အာသဝါနံ ခယာယ. ကတမေဟိ ဒွီဟိ? သံဝေဇနီယေသု ဌာနေသု သံဝေဇနေန, သံဝိဂ္ဂဿ စ ယောနိသော ပဓာနေန. ဣမေဟိ ခေါ, ဘိက္ခဝေ, ဒွီဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခသောမနဿဗဟုလော ဝိဟရတိ, ယောနိ စဿ အာရဒ္ဓါ ဟောတိ အာသဝါနံ ခယာယာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
228
“သံဝေဇနီယဋ္ဌာနေသု,
သံဝိဇ္ဇေထေဝ ပဏ္ဍိတော;
အာတာပီ နိပကော ဘိက္ခု,
ပညာယ သမဝေက္ခိယ.
229
ဧဝံ ဝိဟာရီ အာတာပီ,
သန္တဝုတ္တိ အနုဒ္ဓတော;
စေတောသမထမနုယုတ္တော,
ခယံ ဒုက္ခဿ ပါပုဏေ”တိ.
230
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
231
ဒသမံ.
232
ပဌမော ဝဂ္ဂေါ.
233
တဿုဒ္ဒါနံ
234
ဒွေ စ ဘိက္ခူ တပနီယာ,
တပနီယာ ပရတ္ထေဟိ;
အာတာပီ နကုဟနာ ဒွေ,
သောမနဿေန တေ ဒသာတိ.