2.1.7 အာတာပီသုတ္တ
Review
34.
208
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
209
“အနာတာပီ, ဘိက္ခဝေ, ဘိက္ခု အနောတ္တာပီ အဘဗ္ဗော သမ္ဗောဓာယ, အဘဗ္ဗော နိဗ္ဗာနာယ, အဘဗ္ဗော အနုတ္တရဿ ယောဂက္ခေမဿ အဓိဂမာယ. အာတာပီ စ ခေါ, ဘိက္ခဝေ, ဘိက္ခု ဩတ္တာပီ ဘဗ္ဗော သမ္ဗောဓာယ, ဘဗ္ဗော နိဗ္ဗာနာယ, ဘဗ္ဗော အနုတ္တရဿ ယောဂက္ခေမဿ အဓိဂမာယာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
210
“အနာတာပီ အနောတ္တာပီ,
ကုသီတော ဟီနဝီရိယော;
ယော ထိနမိဒ္ဓဗဟုလော,
အဟိရီကော အနာဒရော;
အဘဗ္ဗော တာဒိသော ဘိက္ခု,
ဖုဋ္ဌုံ သမ္ဗောဓိမုတ္တမံ.
211
ယော စ သတိမာ နိပကော ဈာယီ,
အာတာပီ ဩတ္တာပီ စ အပ္ပမတ္တော;
သံယောဇနံ ဇာတိဇရာယ ဆေတွာ,
ဣဓေဝ သမ္ဗောဓိမနုတ္တရံ ဖုသေ”တိ._
212
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
213
သတ္တမံ.