2.2.11 အာပါယိကသုတ္တ
Review
48.
306
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
307
“ဒွေမေ, ဘိက္ခဝေ, အာပါယိကာ နေရယိကာ ဣဒမပ္ပဟာယ. ကတမေ ဒွေ? ယော စ အဗြဟ္မစာရီ ဗြဟ္မစာရိပဋိညော, ယော စ ပရိပုဏ္ဏံ ပရိသုဒ္ဓံ ဗြဟ္မစရိယံ စရန္တံ အမူလကေန အဗြဟ္မစရိယေန အနုဒ္ဓံသေတိ. ဣမေ ခေါ, ဘိက္ခဝေ, ဒွေ အာပါယိကာ နေရယိကာ ဣဒမပ္ပဟာယာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
308
“အဘူတဝါဒီ နိရယံ ဥပေတိ,
ယော ဝါပိ ကတွာ န ကရောမိ စာဟ;
ဥဘောပိ တေ ပေစ္စ သမာ ဘဝန္တိ,_
နိဟီနကမ္မာ မနုဇာ ပရတ္ထ.
309
ကာသာဝကဏ္ဌာ ဗဟဝေါ,
ပါပဓမ္မာ အသညတာ;
ပါပါ ပါပေဟိ ကမ္မေဟိ,
နိရယံ တေ ဥပပဇ္ဇရေ.
310
သေယျော အယောဂုဠော ဘုတ္တော,
တတ္တော အဂ္ဂိသိခူပမော;
ယဉ္စေ ဘုဉ္ဇေယျ ဒုဿီလော,
ရဋ္ဌပိဏ္ဍမသညတော”တိ.
311
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
312
ဧကာဒသမံ.