2.2.2 ဒေသနာသုတ္တ
Review
39.
245
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
246
“တထာဂတဿ, ဘိက္ခဝေ, အရဟတော သမ္မာသမ္ဗုဒ္ဓဿ ဒွေ ဓမ္မဒေသနာ ပရိယာယေန ဘဝန္တိ. ကတမာ ဒွေ? ‘ပါပံ ပါပကတော ပဿထာ’တိ— အယံ ပဌမာ ဓမ္မဒေသနာ; ‘ပါပံ ပါပကတော ဒိသွာ တတ္ထ နိဗ္ဗိန္ဒထ ဝိရဇ္ဇထ ဝိမုစ္စထာ’တိ— အယံ ဒုတိယာ ဓမ္မဒေသနာ. တထာဂတဿ, ဘိက္ခဝေ, အရဟတော သမ္မာသမ္ဗုဒ္ဓဿ ဣမာ ဒွေ ဓမ္မဒေသနာ ပရိယာယေန ဘဝန္တီ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
247
“တထာဂတဿ ဗုဒ္ဓဿ,
သဗ္ဗဘူတာနုကမ္ပိနော;
ပရိယာယဝစနံ ပဿ,
ဒွေ စ ဓမ္မာ ပကာသိတာ.
248
ပါပကံ ပဿထ စေတံ,
တတ္ထ စာပိ ဝိရဇ္ဇထ;
တတော ဝိရတ္တစိတ္တာသေ,
ဒုက္ခဿန္တံ ကရိဿထာ”တိ.
249
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
250
ဒုတိယံ.