2.2.5 သုက္ကဓမ္မသုတ္တ
Review
42.
266
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
267
“ဒွေမေ, ဘိက္ခဝေ, သုက္ကာ ဓမ္မာ လောကံ ပါလေန္တိ. ကတမေ ဒွေ? ဟိရီ စ, ဩတ္တပ္ပဉ္စ. ဣမေ စေ, ဘိက္ခဝေ, ဒွေ သုက္ကာ ဓမ္မာ လောကံ န ပါလေယျုံ, နယိဓ ပညာယေထ မာတာတိ ဝါ မာတုစ္ဆာတိ ဝါ မာတုလာနီတိ ဝါ အာစရိယဘရိယာတိ ဝါ ဂရူနံ ဒါရာတိ ဝါ. သမ္ဘေဒံ လောကော အဂမိဿ ယထာ အဇေဠကာ ကုက္ကုဋသူကရာ သောဏသိင်္ဂါလာ. ယသ္မာ စ ခေါ, ဘိက္ခဝေ, ဣမေ ဒွေ သုက္ကာ ဓမ္မာ လောကံ ပါလေန္တိ တသ္မာ ပညာယတိ မာတာတိ ဝါ မာတုစ္ဆာတိ ဝါ မာတုလာနီတိ ဝါ အာစရိယဘရိယာတိ ဝါ ဂရူနံ ဒါရာတိ ဝါ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
268
“ယေသဉ္စေ ဟိရိဩတ္တပ္ပံ,
သဗ္ဗဒါ စ န ဝိဇ္ဇတိ;
ဝေါက္ကန္တာ သုက္ကမူလာ တေ,
ဇာတိမရဏဂါမိနော.
269
ယေသဉ္စ ဟိရိဩတ္တပ္ပံ,
သဒါ သမ္မာ ဥပဋ္ဌိတာ;
ဝိရူဠှဗြဟ္မစရိယာ တေ,
သန္တော ခီဏပုနဗ္ဘဝါ”တိ.
270
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
271
ပဉ္စမံ.