2.2.8 ပဋိသလ္လာနသုတ္တ
Review
45.
287
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
288
“ပဋိသလ္လာနာရာမာ, ဘိက္ခဝေ, ဝိဟရထ ပဋိသလ္လာနရတာ, အဇ္ဈတ္တံ စေတောသမထမနုယုတ္တာ, အနိရာကတဇ္ဈာနာ, ဝိပဿနာယ သမန္နာဂတာ, ဗြူဟေတာရော သုညာဂါရာနံ. ပဋိသလ္လာနာရာမာနံ, ဘိက္ခဝေ, ဝိဟရတံ ပဋိသလ္လာနရတာနံ အဇ္ဈတ္တံ စေတောသမထမနုယုတ္တာနံ အနိရာကတဇ္ဈာနာနံ ဝိပဿနာယ သမန္နာဂတာနံ ဗြူဟေတာနံ သုညာဂါရာနံ ဒွိန္နံ ဖလာနံ အညတရံ ဖလံ ပါဋိကင်္ခံ— ဒိဋ္ဌေဝ ဓမ္မေ အညာ, သတိ ဝါ ဥပါဒိသေသေ အနာဂါမိတာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
289
“ယေ သန္တစိတ္တာ နိပကာ,
သတိမန္တော စ ဈာယိနော;
သမ္မာ ဓမ္မံ ဝိပဿန္တိ,
ကာမေသု အနပေက္ခိနော.
290
အပ္ပမာဒရတာ သန္တာ,
ပမာဒေ ဘယဒဿိနော;
အဘဗ္ဗာ ပရိဟာနာယ,
နိဗ္ဗာနဿေဝ သန္တိကေ”တိ.
291
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
292
အဋ္ဌမံ.