2.2.9 သိက္ခာနိသံသသုတ္တ
Review
46.
293
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
294
“သိက္ခာနိသံသာ, ဘိက္ခဝေ, ဝိဟရထ ပညုတ္တရာ ဝိမုတ္တိသာရာ သတာဓိပတေယျာ. သိက္ခာနိသံသာနံ, ဘိက္ခဝေ, ဝိဟရတံ ပညုတ္တရာနံ ဝိမုတ္တိသာရာနံ သတာဓိပတေယျာနံ ဒွိန္နံ ဖလာနံ အညတရံ ဖလံ ပါဋိကင်္ခံ— ဒိဋ္ဌေဝ ဓမ္မေ အညာ, သတိ ဝါ ဥပါဒိသေသေ အနာဂါမိတာ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
295
“ပရိပုဏ္ဏသိက္ခံ အပဟာနဓမ္မံ,
ပညုတ္တရံ ဇာတိခယန္တဒဿိံ;
တံ ဝေ မုနိံ အန္တိမဒေဟဓာရိံ,
မာရဉ္ဇဟံ ဗြူမိ ဇရာယ ပါရဂုံ.
296
တသ္မာ သဒါ ဈာနရတာ သမာဟိတာ,
အာတာပိနော ဇာတိခယန္တဒဿိနော;
မာရံ သသေနံ အဘိဘုယျ ဘိက္ခဝေါ,
ဘဝထ ဇာတိမရဏဿ ပါရဂါ”တိ.
297
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
298
နဝမံ.