3.1.2 ဓာတုသုတ္တ
Review
51.
332
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
333
“တိဿော ဣမာ, ဘိက္ခဝေ, ဓာတုယော. ကတမာ တိဿော? ရူပဓာတု, အရူပဓာတု, နိရောဓဓာတု— ဣမာ ခေါ, ဘိက္ခဝေ, တိဿော ဓာတုယော”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
334
“ရူပဓာတုံ ပရိညာယ,
အာရုပ္ပေသု အသဏ္ဌိတာ;
နိရောဓေ ယေ ဝိမုစ္စန္တိ,
တေ ဇနာ မစ္စုဟာယိနော.
335
ကာယေန အမတံ ဓာတုံ,
ဖုသယိတွာ နိရူပဓိံ;
ဥပဓိပ္ပဋိနိဿဂ္ဂံ,_
သစ္ဆိကတွာ အနာသဝေါ;
ဒေသေတိ သမ္မာသမ္ဗုဒ္ဓေါ,
အသောကံ ဝိရဇံ ပဒန်”တိ.
336
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
337
ဒုတိယံ.