3.2.10 ဒုတိယရာဂသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“ယဿ ကဿစိ, ဘိက္ခဝေ, ဘိက္ခုဿ ဝါ ဘိက္ခုနိယာ ဝါ ရာဂေါ အပ္ပဟီနော, ဒေါသော အပ္ပဟီနော, မောဟော အပ္ပဟီနော— အယံ ဝုစ္စတိ, ဘိက္ခဝေ, ‘အတိဏ္ဏော သမုဒ္ဒံ သဦမိံ သဝီစိံ သာဝဋ္ဋံ သဂဟံ သရက္ခသံ’. ယဿ ကဿစိ, ဘိက္ခဝေ, ဘိက္ခုဿ ဝါ ဘိက္ခုနိယာ ဝါ ရာဂေါ ပဟီနော, ဒေါသော ပဟီနော, မောဟော ပဟီနော— အယံ ဝုစ္စတိ, ဘိက္ခဝေ, ‘အတရိ သမုဒ္ဒံ သဦမိံ သဝီစိံ သာဝဋ္ဋံ သဂဟံ သရက္ခသံ, တိဏ္ဏော ပါရင်္ဂတော ထလေ တိဋ္ဌတိ ဗြာဟ္မဏော’”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“ယဿ ရာဂေါ စ ဒေါသော စ,
အဝိဇ္ဇာ စ ဝိရာဇိတာ;
သောမံ သမုဒ္ဒံ သဂဟံ သရက္ခသံ,
သဦမိဘယံ ဒုတ္တရံ အစ္စတာရိ.
သင်္ဂါတိဂေါ မစ္စုဇဟော နိရူပဓိ,
ပဟာသိ ဒုက္ခံ အပုနဗ္ဘဝါယ;
အတ္ထင်္ဂတော သော န ပမာဏမေတိ,
အမောဟယိ မစ္စုရာဇန္တိ ဗြူမီ”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
ဒသမံ.
ဒုတိယော ဝဂ္ဂေါ.
တဿုဒ္ဒါနံ
ပုညံ စက္ခု အထ ဣန္ဒြိယာနိ,
အဒ္ဓါ စ စရိတံ ဒုဝေ သောစိ;
မုနော အထ ရာဂဒုဝေ,
ပုန ဝဂ္ဂမာဟု ဒုတိယမုတ္တမန္တိ.